ក្រុមនិស្សិតទាមទារឲ្យក្រសួងអប់រំជួយអន្តរាគមន៍ក្នុងបញ្ហាសញ្ញាបត្រ
ដោយ សុខ សេរី
2009-03-19
ក្រុមនិស្សិតនៃវិទ្យាស្ថានវិទ្យាសាស្រ្តគ្រប់គ្រងដែលបានប្រឡងជាប់ដើម្បីទទួលបានសញ្ញាបត្រកម្រិតបរិញ្ញាបត្រនិងអនុបណ្ឌិតបានទាមទារឲ្យក្រសួងអប់រំ យុវជននិងកីទ្បា ជួយអន្តរាគមន៍ធ្វើយ៉ាងណាចេញសញ្ញាបត្រទាំងនោះមកឲ្យនិស្សិតជាង១០០នាក់ដែលពួកគេមិនបានទទួលសញ្ញាបត្រនោះអស់រយៈពេលជាង៣ឆ្នាំមកហើយក្រោយពីបានប្រឡងជាប់។
ផ្អែកតាមប្រភពបានឲ្យដឹងថា ក្រុមនិស្សិតខែ្មរចំនួនជាង១០០នាក់ដែលបានចំណាយថវិកាផ្ទាល់ខ្លួនចំនួនជាង១២០០ដុល្លារអាមេរិកសម្រាប់សិក្សារយៈពេល៤ឆ្នាំនៅចន្លោះឆ្នាំ២០០២រហូតដល់ឆ្នាំ២០០៦កន្លងទៅនោះនៅឯវិទ្យាស្ថានវិទ្យាសាស្រ្តគ្រប់គ្រងនៅក្នុងខេត្តកំពង់ធំនិងខេត្តកំពតនិងខេត្តមួយចំនួនទៀត គឺមិនបានទទួលសញ្ញាបត្រដូចៗគ្នារយៈពេល៣ឆ្នាំមកហើយក្រោយពីការប្រឡងជាប់ ហើយវិទ្យាស្ថាននោះត្រូវបានប្រកាសបិទកាលពីឆ្នាំ២០០៨កន្លងទៅនេះដោយក្រសួងអប់រំ យុវជននិងកីឡា។
និស្សិតម្នាក់ដែលបានប្រឡងជាប់ដើម្បីទទួលសញ្ញាបត្រកម្រិតបរិញ្ញាបត្រជំនាញខាងគ្រប់គ្រងទូទៅ ឬ MBA នៅក្នុងខេត្តកំពង់ធំ បានថែ្លងប្រាប់វិទ្យុអាស៊ីសេរីថា លោកបានខាតបង់ពេលវេលានិងថវិកា ប៉ុន្តែនៅទីបញ្ចប់លោកមិនបានទទួលសញ្ញាបត្រនោះឡើយក្រោយពីបានប្រឡងជាប់។
និស្សិតដដែលបានឲ្យដឹងថា ៖ «សាលាហ្នឹងគឺបោកប្រាស់ សាលាហ្នឹងបានបិទបាំងនូវភាពមិនត្រឹមត្រូវជាមួយខាងរដ្ឋាភិបាលរបស់ក្រសួងអប់រំ យុវជននិងកីឡា»។
និស្សិតម្នាក់ទៀតដែលបានប្រឡងជាប់ដើម្បីទទួលសញ្ញាបត្រកម្រិតអនុបណ្ឌិតជំនាញខាងគ្រប់គ្រងតំណាងឲ្យក្រុមនិស្សិតជាង១០០នាក់មិនបានទទួលសញ្ញាបត្រដូចគ្នានោះនៅក្នុងខេត្តកំពតបានតវ៉ាថា ៖ «ការសិក្សាហ្នឹងវាបំពេញ Credit អីត្រឹមត្រូវហើយ ប៉ុន្តែដល់ទីបំផុតក្រសួងអត់ទទួលស្គាល់។ ឥឡូវមានតែសំណូមពរទៅក្រសួងអប់រំ ឲ្យជួយចេញសញ្ញាបត្រឲ្យទៅ ពួកខ្ញុំនេះបំពេញលក្ខខណ្ឌគ្រប់គ្រាន់ឲ្យសាលាហើយ ប៉ុន្តែត្រង់សាលាវិញបំពេញលក្ខខណ្ឌឲ្យក្រសួងគ្រប់មិនគ្រប់ មិនដឹងទេ»។
ផ្អែកតាមប្រភពបានឲ្យដឹងថា វិទ្យាស្ថានវិទ្យាសាស្រ្តគ្រប់គ្រងនោះមានសាខានៅក្នុងខេត្តក្រុងចំនួន៧នៅក្នុងប្រទេសកម្ពុជាត្រូវបានប្រកាសបិទកាលពីឆ្នាំ២០០៨កន្លងទៅនេះដោយសារក្រសួងអប់រំ យុវជននិងកីទ្បានិងរដ្ឋាភិបាលមិនបានទទួលស្គាល់តាមច្បាប់ដែលមានលោក សេង លីម៉េង ជានាយក ហើយបច្ចុប្បន្នលោកបានក្លាយជាអនុរដ្ឋលេខាធិការនៃក្រសួងអភិវឌ្ឍន៍ជនបទ។
មិនអាចទាក់ទង លោក សេង លីម៉េង បានភ្លាមៗទេដើម្បីសុំការបំភ្លឺជុំវិញការតវ៉ានិងការចោទប្រកាន់ខាងលើនេះ។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យបានមានប្រសាសន៍អត្ថាធិប្បាយថា ៖ «អ្នកដែលបើកហ្នឹងគ្រាន់តែជារូបភាពមួយវិនិយោគទុន មិនមែនការបង្កើតដើម្បីបណ្ដុះនូវធនធានមនុស្សសម្រាប់កូនខ្មែរពិតប្រាកដទេ»។
ទាក់ទងនឹងការតវ៉ារបស់ក្រុមនិស្សិតខាងលើនេះ លោក លី សុមុន្នី ជាអនុរដ្ឋលេខាធិការក្រសួងអប់រំ យុវជននិងកីទ្បា បានមានប្រសាសន៍បំភ្លឺថា ក្រសួងបានរៀបចំឲ្យមានការប្រឡងធ្វើតេស្តជាថ្មីសិស្សចំនួនប្រមាណ១៥០នាក់កាលពីដើមខែមីនាកន្លងទៅថ្មីៗនេះនៅក្នុងចំណោមសិស្សជាង៣០០នាក់។
លោក លី សុមុន្នី បានមានប្រសាសន៍ថា ៖ «រៀបចំប្រឡងហើយតើ គេមក១៥០ប្លាយនាក់ រៀបចំដោះស្រាយអាហ្នឹងហើយតើ! ពីថ្ងៃ១ ខែមីនា»។
លោកបានបញ្ជាក់ឲ្យដឹងថា ក្រសួងបានរៀបចំឲ្យមានការធ្វើតេស្តជាថ្មីនិងប្រឡងជាថ្មីនោះសម្រាប់និស្សិតណាដែលមានឈ្មោះជាផ្លូវការដែលក្រសួងទទួលបានកន្លងមក៕
អត្ថបទដែលទាក់ទង
អភិបាលខេត្តក្រចេះ លោក ខាំ ភឿន ស្លាប់ក្នុងគ្រោះថ្នាក់ចរាចរណ៍
អាជ្ញាធរខេត្តកំពង់ចាមរារាំងអង្គការមិនឲ្យចែកអំណោយដល់កុមារកំព្រា
មន្ត្រីរាជការនៅមណ្ឌលគិរីមិនបានបើកប្រាក់បៀវត្ស៣ខែហើយ
អាជ្ញាធររកឃើញសារធាតុគីមីនិងគ្រាប់មិនទាន់ផ្ទុះពីសម័យសង្គ្រាម
សាលារាជធានីភ្នំពេញហាមមិនឲ្យរថយន្តដឹកសាំងបើកឆ្លងទីក្រុង៥ថ្ងៃ
ប្រជានេសាទនៅកំពតត្អូញពីការពិបាកចតទូកដោយសារគំនរខ្សាច់
ពលរដ្ឋនៅកំពង់ឆ្នាំងចោទអាជ្ញាធរថាយកតម្លៃសេវាធ្វើលិខិតផ្សេងៗថ្លៃ
មន្ត្រីរាជការនៅតាកែវបើកប្រាក់ខែយឺត
