«ទំនិញឡើងថ្លៃលុយវាមិនដល់ ទិញស្អីៗវាខ្វះខាត ចេះតែដើររកទៅ ។ កោសខ្យល់បោកខោអាវឲ្យគេរាល់ថ្ងៃហ្នឹងមិនដែលទំនេរផង គ្រាន់តែហូបបាយរួចទៅបាត់ៗ បោកខោអាវអី ។ ជួនកាលបានព្រឹកខ្វះល្ងាច បានល្ងាចខ្វះព្រឹក ។ បើផ្ដាច់ទាំងអស់កូនខ្ញុំអត់បានរៀនទេ បើយើងអត់មានស្អីផ្ដល់ត្រូវតែអត់» ៖ ការត្អូញត្អែរនេះឮចេញពីផ្ទះស្លឹកធ្លុះដោយអន្លើ មានសភាពទ្រេតខ្លាំង ទប់ដោយជណ្តើរ ៤កាំ និងសសរកូនឈើតូចៗ ។ បន្ទាប់ពីទំនិញក្នុងពិភពលោកបានឡើងថ្លៃ ហើយអង្គការកម្មវីធីស្បៀងអាហារពិភពលោក បានផ្អាកផ្តល់អាហារសម្រន់ពេលព្រឹក ដល់សិស្សក្រីក្រ នៅក្នុងប្រទេសកម្ពុជាដែលនាំឲ្យសិស្ស ៤៥ម៉ឺននាក់ បច្ចុប្បន្នពុំបានបន្តទទួលទានអាហារពេលព្រឹកដូចសព្វដង ។
ស្រ្តីវ័យជាង៥០ឆ្នាំ អើតចេញពីក្នុងផ្ទះស្លឹកធ្លុះនៅភូមិភ្នំដិល ឃុំភ្នំដិល ស្រុកបាធាយ ខេត្តកំពង់ចាម ឈ្មោះ ទេព កុលាប ឲ្យដឹងថាគាត់ជាស្រីមេម៉ាយរកស៊ីបោកខោអាវ និងកោសខ្យល់ យកកម្រៃចិញ្ចឹមកូន៦នាក់ ។ ក្រោយមកអង្គការកម្មវិធីស្បៀងអាហារពិភពលោកនិងអាជ្ញាធរ រួមទាំងនាយកសាលាបឋមសិក្សាភ្នំដិល បានជួយឧបត្ថម្ភស្បៀង សម្ភារៈសិក្សា លើកទឹកចិត្តឲ្យកូនៗបានទៅរៀន ។
អ្នកស្រី កុលាប បន្តថា ២-៣ឆ្នាំមកនេះអង្គការជួយស្បៀងបានតែកូនម្នាក់ក្នុងចំណោមកូនទាំង៦នាក់នោះ ។ នៅដើមឆ្នាំសិក្សា២០០៧ សាលាបានផ្តាច់អាហារសម្រន់ពេលព្រឹក ។ ប៉ុន្តែ នៅបន្តបើកអាហារូបត្ថម្ភប្រចាំខែ មានអង្ករ១៥គីឡូក្រាម ប្រេងឆា១លីត្រ និងសណ្តែកសៀង ២គីឡូក្រាម ឲ្យកូនដែលរៀននោះនៅឡើយ ។
អ្នកស្រី កុលាប បានមានប្រសាសន៍ថា ៖ «...អត់ដែរ ទៅរកហ្នឹងបានព្រឹកខ្វះល្ងាច បានល្ងាចខ្វះព្រឹក ប៉ុន្តែបានកូនចេះតែបន្តទេ ពេលយើងជិតដាច់ខ្យល់កូនបន្តមកទៅ ដូចបើកអង្ករ មួយខែបើកៗអ៊ីចឹង បានជិតប្រហែលកន្លះខែដែរ សម្រាប់អង្ករហ្នឹង យើងមានយកទៅដូរដោះអី គ្រាន់តែហូបហ្នឹង ។ (ចុះសណ្ដែកសៀងគេឲ្យមកហ្នឹង ?) មិនទាន់ធ្វើអីទុកលាយបាយ តែមិនទាន់បានលាយផង» ។
កុមារី កង ស៊ីណា ជាកូននិងជាសិស្សថ្នាក់ទី៤ខ នៃសាលាបឋមសិក្សាភ្នំដិល ឲ្យដឹងថា ស្បៀងឧបត្ថម្ភដោយអង្គការនោះផ្តល់តែសិស្សកំព្រាក្រីក្រ រៀនពីថ្នាក់ទី៤ឡើងទៅ ។
កុមារី កង ស៊ីណា បន្តថា ៖ «អារម្មណ៍ខ្ញុំ ខ្ញុំមិនសប្បាយចិត្ត ព្រោះខ្ញុំមិនបានអាហារូបករណ៍» ។
រីឯកុមារី ឈឹម ស្រីលីន សិស្សថ្នាក់ទី៥ សាលាបឋមសិក្សាភ្នំដិល ឲ្យដឹងថា ប្រសិនបើអង្គការមិនជួយឧបត្ថម្ភស្បៀងទៀតទេ គេទំនងជាអាចឆ្លៀតក្រោយម៉ោងរៀន ទៅស៊ីឈ្នួលច្រូតស្រូវគេយកកម្រៃមករៀនបញ្ចប់ការសិក្សា ។
កុមារី ពង់ សុខអេង អាយុ១៤ឆ្នាំ សិស្សថ្នាក់ទី៦ខ ឲ្យដឹងថាស្បៀងឧបត្ថម្ភដោយអង្គការ តាមរយៈសាលារៀននេះ បានជួយទប់លំនឹងសិក្សារបស់កុមារី១ឆ្នាំឲ្យបានល្អមិនបានអវត្តមាន ហើយម្តាយកុមារី មិនបានអូសទាញយកគេទៅស្វែងរកប្រាក់ទិញស្បៀង ដូចពេលមុន ៖ «ខ្ញុំអស់សង្ឃឹមក្នុងខ្លួននៅពេលគេផ្ដាច់ អត់មានអង្ករអត់មានអីហូប ដាច់ពេលអីអ៊ីចឹង» ។
ជីដូនកុមារី ពង់ សុខអេង បានអង្វរករថាសុំឲ្យអង្គការនិងនាយកសាលា កុំផ្តាច់របបអាហារដល់សិស្សក្រីក្រទៀតអី ដោយកុមារីគ្មានឪពុកមានតែម្តាយ ខំត្រដរដឹកត្រីបន្លែទៅលក់ដល់ផ្សារផ្អាវ យកប្រាក់ចំណេញតិចតួច មកចិញ្ចឹមកូនតូចៗ៣នាក់ ៖ «ម៉ែឪវាអត់ គ្នារកដែរ តែរកមួយថ្ងៃហូបមួយថ្ងៃ ដល់ឧបត្ថម្ភទៅគ្នាគ្រាន់បានគ្រាន់ដែរ រកលុយបានមកគ្រាន់ទិញម្ហូប» ។
កុមារីសិស្សថ្នាក់ទី៥ខ និយាយថាគេមានផ្ទុកមេរោគអេដស៍សព្វថ្ងៃរស់នៅជាមួយជីតា ។ ឪពុកស្លាប់ចោល ឯម្តាយកំពុងឈឺធ្ងន់ ។ កុមារីថាបច្ចុប្បន្ននាយកសាលាផ្តល់អាហារូបត្ថម្ភ មួយខែអង្ករ១៥គីឡូក្រាម ប្រេង១លីត្រ និងគ្រាប់សណ្តែកសៀង ២គីឡូក្រាម រួមទាំងសម្លៀកបំពាក់ និងសម្ភារៈសិក្សាផង ។ រីឯអាហារសម្រន់ពេលព្រឹក គេមិនបានទទួលទាននៅសាលាដូចពីមុនទេ តាំងពីចូលរៀនដើមឆ្នាំនេះមក ។ កុមារីថាទោះជាយ៉ាងណាសុំឲ្យអង្គការនៅបន្តផ្តល់អាហារពេលព្រឹក ដល់សិស្សក្រីក្រ និងកំព្រាតទៅទៀត ៖ «ជីវភាពរឹតតែក្រីក្រឡើង នាពេលដែលគេប្ដាច់អាហារូបត្ថម្ភ» ។
នាយកសាលាបឋមសិក្សាភ្នំដិល លោក នង សុផល មានប្រសាសន៍ថាកុមារបានទទួលទាន អាហារសម្រន់ពេលព្រឹក និងអាហារូបត្ថម្ភក្នុងសាលានេះមាន១២៣នាក់ ។ គេជាសិស្សកំព្រាក្រីក្រ ហើយរៀនចាប់ពីថ្នាក់ទី៤ ទៅដល់ថ្នាក់ទី៦ គឺជាសិស្សរៀនពូកែមិនមានអវត្តមានច្រើនជាង ១០ដង ។ លោកថាអាហារសម្រន់ពេលព្រឹកសម្រាប់កុមារកំព្រាក្រីក្រ បានផ្តល់៦កម្រងក្នុងស្រុកបាធាយ ។ នៅក្នុងឆ្នាំសិក្សា ២០០៧-២០០៨នេះ អាហារសម្រន់នោះត្រូវអង្គការស្បៀងអាហារពិភពលោកបានផ្អាក ប៉ុន្តែផ្តល់អាហារូបត្ថម្ភរាល់ខែ ។
លោក នង សុផល បានឲ្យដឹងថា ៖ «អត់បានចាំខែប៉ុន្តែឆ្នាំហ្នឹងគេផ្ដាច់មួយឆ្នាំហើយ តាំងពីខែ១០ ដែលយើងចូលរៀនដំបូងមកហ្នឹង ប៉ុន្តែនៅតែបានអាហារូបករណ៍ដដែល ។ ចំពោះអាហារពេលព្រឹកគេផ្ដាច់ ព្រោះវាមានចំណុចខ្លះគេថា សហគមន៍មិនគាំទ្រការដឹកជញ្ជូនផ្លូវឆ្ងាយ តែចំពោះសាលាខ្ញុំអត់មានពាក់ព័ន្ធអ្វីទាំងអស់ ពាក់ព័ន្ធតែរឿងសាលាយើងនៅចាប់ទីប្រជុំជន ហើយភាគច្រើនសិស្សខ្ញុំសុទ្ធតែសិស្សដែលនៅជាប់ទីផ្សារ ។ អ្នកផ្សារកូនគេហូបបានឆ្អែតទៅអាចសល់ស្បៀង រួចយើងស្ដាយកុំឲ្យស្បៀងហ្នឹងវាបង្វែរមក ចង់និយាយថា បង្វែរឲ្យចំកូនក្រីក្រពិតប្រាកដ បង្វែរទៅកន្លែងណាដែលគេខ្សត់ខ្សោយខ្លាំង» ។
ចំណែកនាយកសាលាបឋមសិក្សាផ្អាវ លោក ជា អ៊ន មានប្រសាសន៍ថាសិស្សកំព្រា និងទីទ័លក្រ មានចំនួន ១២០នាក់ ដែលរៀននៅក្នុងសាលានេះ មិនបានទទួលអាហារសម្រន់ពេលព្រឹក ពីអង្គការកម្មវិធីស្បៀងអាហារពិភពលោកទៀតទេ តាំងពីខែ១០ ដើមឆ្នាំសិក្សាថ្មីមក ។ លោកថាការផ្តាច់អាហារសម្រន់ពេលព្រឹកដល់កុមារមាន៣កម្រង គឺនៅសាលាភ្នំដិល សាលាបាធាយ និងសាលាផ្អាវ ។ រីឯ៣កម្រងទៀត មានសាលាតាំងក្រសាំង សាលាជាលា និងសាលាសណ្តែក នៅបន្តផ្តល់ឲ្យ ។
ពាក់ព័ន្ធនឹងបញ្ហានេះ លោក Thomas នាយកអង្គការកម្មវិធីស្បៀងអាហារពិភពលោក ប្រចាំប្រទេសកម្ពុជា មានប្រសាសន៍ថារយៈពេលនេះ អង្គការផ្អាកផ្តល់អាហារសម្រន់ពេលព្រឹក ដល់សាលាចំនួន១៣៤៤ ដែលពាក់ព័ន្ធសិស្ស ៤៥ម៉ឺននាក់ ក្នុង១២ខេត្ត មានឧត្តរមានជ័យ សៀមរាប បន្ទាយមានជ័យ ព្រះវិហារ ស្ទឹងត្រែង កំពង់សោម ពោធិ៍សាត់ កំពង់ចាម កំពង់់ឆ្នាំង កំពង់ស្ពឺ ព្រៃវែង និងស្វាយរៀង ។ លោកបន្តថា រដ្ឋាភិបាលកម្ពុជាបានសន្យាផ្តល់ស្បៀង ចំនួន ៣ពាន់តោន មុនដំណាច់ខែឧសភា សម្រាប់ជួយទ្រទ្រង់កម្មវិធីអាហារសម្រន់ពេលព្រឹកឡើងវិញ ។
លោក Thomas បានមានប្រសាសន៍ថា ៖ "យើងបានទទួលការឆ្លើយតបពីរដ្ឋាភិបាលកម្ពុជាថា គេនឹងផ្តល់អង្ករចំនួន ៣ពាន់តោន សម្រាប់កម្មវិធីក្នុងប្រទេសកម្ពុជា ហើយយើងនឹងទទួលបានអង្ករនោះ នៅបំណាច់ខែឧសភានេះ" ។
តាមការឲ្យដឹងពីនាយកសាលានានាក្នុងស្រុកបាធាយ ថាអាហារសម្រន់ពេលព្រឹកសម្រាប់សិស្សក្រីក្រដែលអង្គការស្បៀងអាហារពិភពលោកបានផ្អាក នៅដើមឆ្នាំសិក្សា ២០០៧-២០០៨នេះ មានសិស្សជាង១០០នាក់ ក្នុង១កម្រងៗមិនបានទទួលទានអាហារសម្រន់ពេលព្រឹកនោះ ៕