ពលរដ្ឋខេត្តស្វាយរៀងចងចាំស្នាព្រះហស្តរបស់ព្រះមហាវីរក្សត្រក្នុងការការពារទឹកដី

ចំណែកពលរដ្ឋនៅខេត្តស្វាយរៀង ឯណេះវិញ ក៏មិនខុសគ្នាដែរ ពួកគាត់បង្ហាញការសោកសៅយ៉ាងពន់ពេក ចំពោះការបាត់បង់ទៅនៃក្សត្រដែលគេចាត់ទុកថា ព្រះមហាវីរក្សត្រ សម្រាប់ជាតិមាតុភូមិ។

ដោយ ម៉ម មុនីរតន៍
2012-10-19

h101812mm.mp3

រីឯមន្ត្រីអាជ្ញាធរខេត្ត បញ្ជាក់ថា ព្រះមហាវីរក្សត្រ ព្រះអង្គបានបន្សល់នូវស្នាព្រះហស្តជាច្រើន សម្រាប់ខេត្តស្វាយរៀង ក្រៅពីការពារបូរណភាពទឹកដីនៅខេត្តនេះ ក៏មានសាលារៀន ផ្លូវថ្នល់ និងប្រព័ន្ធធារាសាស្ត្រជាដើម។

ពលរដ្ឋនៅក្រុងបាវិត និងខេត្តស្វាយរៀង បង្ហាញការសោកស្ដាយ និងអាឡោះអាល័យចំពោះការបាត់បង់ទៅនៃអតីតព្រះមហាវីរក្សត្រ ព្រះបាទសម្ដេចព្រះ នរោត្តម សីហនុ ដោយចាត់ទុកថាជាព្រះរាជាប្រកបដោយទសពិធរាជធម៌។

លោក សាន គីម ជាពលរដ្ឋរស់នៅឃុំបាទី ស្រុកចន្ទ្រា ខេត្តស្វាយរៀង លោកអះអាងថា ព្រះបាទសម្ដេចព្រះ នរោត្តម សីហនុ គឺជាក្សត្រមួយព្រះអង្គដែលបានពុះពាររាល់ឧបសគ្គ សម្រាប់បុព្វហេតុជាតិមាតុភូមិ ទាំងក្នុងអតីតកាល និងបច្ចុប្បន្ន។ លោកបន្តថា ការបាត់បង់ទៅនៃព្រះមហាវីរក្សត្រ នៅពេលនេះ គឺចំពេលដែលកម្ពុជា ត្រូវគេមើលឃើញថា នៅមិនទាន់មានការឯកភាពនយោបាយផ្ទៃក្នុងស្រួលបួលនៅឡើយ៖ «បើគាត់នៅទៅ បានជាម្លប់ដល់កូនចៅ ហើយអ៊ីចឹងបានច្បាស់។ ហើយឥឡូវ ខ្ញុំមិនដឹងដែរ អាណិតដែរ មិនដឹងធ្វើម៉េច ខ្ញុំសោកស្ដាយដែរ ចេះតែនឹកឃើញវែងឆ្ងាយទៅ។ ណាមួយ គាត់កាលពីដើមៗមក ធ្លាប់តាៗខ្ញុំគាត់និយាយថា សម្ដេចឪ សម្ដេចតាទួតហ្នឹង គាត់តស៊ូខ្លាំងមុតមាំមែនទែន»។

ចំណែកលោក ជួន ជី រស់នៅក្រុងបាវិត ដែលជាតំបន់សេដ្ឋកិច្ចពិសេសជាប់ព្រំប្រទល់កម្ពុជា វៀតណាម លោកគិតថា អ្វីដែលជាបន្ទុកថ្មីទៀតនៅពេលនេះ គឺការបារម្ភចំពោះការជ្រៀតជ្រែកបូរណភាពទឹកដីពីបរទេសមកលើកម្ពុជា៖ «រាល់ថ្ងៃ ខ្ញុំបារម្ភខ្លាចបាត់បង់ទឹកដីខ្មែរយើងណាបង ព្រោះអីខ្មែរយើងបាត់បង់ទឹកដីច្រើនណាស់ហើយ។ ឥឡូវ បើសម្ដេចឪស្លាប់ទៀត បាត់បង់ទៀត ខ្មែរជំនាន់ក្រោយនឹងដឹងគិតទៅជាយ៉ាងណាទេ»។

ចំពោះការព្រួយបារម្ភអំពីការបាត់បង់ទឹកដីនេះជាថ្មីម្ដងទៀត ប្រមុខរដ្ឋាភិបាលលោក ហ៊ុន សែន បានសច្ចានៅចំពោះព្រះបរមសព ព្រះមហាវីរក្សត្រ ក្នុងទីក្រុងប៉េកាំង ប្រទេសចិន មុននឹងយាងព្រះបរមសពរបស់ព្រះអង្គមកមាតុប្រទេសវិញថា លោកនឹងរក្សានូវព្រះរាជបល័្លង្ក ព្រះញាតិវង្សានុវង្ស និងបូរណភាពទឹកដីកម្ពុជា ឲ្យស្ថិតនៅគង់វង្ស។

ចំណែកលោក ជាង អំ អភិបាលខេត្តស្វាយរៀង លោកមានប្រសាសន៍ថា ស្នាព្រះហស្តជាច្រើនក្រៅពីបូរណភាពទឹកដីរបស់អតីតព្រះមហាវីរក្សត្រ ព្រះបាទសម្ដេចព្រះ នរោត្ដម សីហនុ ដែលបានបន្សល់ទុក ដូចជាសាលារៀនជាដើម នៅខេត្តស្វាយរៀង នោះ គឺជាភស្តុតាង និងជាអនុស្សាវរីយ៍ដែលមិនអាចបំភ្លេចបានក្នុងមួយឆាកជីវិតនៃព្រះរាជបូជនីយកិច្ចរបស់ព្រះអង្គសម្រាប់កម្ពុជា៖ «មានច្រើន ព្រះករុណា ស្នាព្រះហស្តសាលាបឋមសិក្សាសម្ដេចឪ នៅទល់មុខសាលាខេត្តហ្នឹង ហើយនិងព្រះអង្គកសាងនៅវត្តនៅចន្ទ្រា នៅស្រុកចន្ទ្រា ព្រះវិហារ ហើយនិងលោកជួយច្រើន ប្រឡាយទឹក អណ្ដូងទឹក ដល់ប្រជាពលរដ្ឋ»។

បើតាមមន្ត្រីជាន់ខ្ពស់ខេត្តស្វាយរៀង ឲ្យដឹងថា នៅថ្ងៃទី២០ ខែតុលា នឹងមានរៀបចំពិធីគោរពព្រះវិញ្ញាណក្ខន្ធ ព្រះបរមសព ព្រះមហាវីរក្សត្រ ព្រះបាទសម្ដេចព្រះ នរោត្តម សីហនុ ក្នុងទ្រង់ទ្រាយធំ ដោយមានការចូលរួមពីមន្ត្រីរាជការ អាជ្ញាធរ និងប្រជាពលរដ្ឋ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (2)

ចុចត្រង់នេះដើម្បីបន្ថែមយោបល់របស់អ្នក

អ្នករមាសហែក

ពី ស្វរ.

ខ្ញុំមានការព្រួយបារម្មណ៍ណាស់ កាលព្រះអង្គនៅមានព្រះជន្មនៅ នៅមានគេខ្លាចក្រែង ឥឡូវអ្នកស្រុកខ្ញុំជាម្ចាស់ស្រុក បែជាខ្លាចជនជាតិដ៏ទៃទៅវិញ ឥឡូវព្រះអង្គសោយទិវង្គត់យើង ពួកខ្ញុំមានអារម្មណ៍ថាគ្មានភាពកក់ក្តៅទេ ដូចជាគ្មានឪពុកម្តាយចឹង

Oct 20, 2012 05:22 AM

អ្នកអានអនាមិក

San Kim,how old are you ?
What kind of resistant did the king make besides allowing VC slipped into Chantrea causing American bombed the village,the king Sihanouk gathered police family to put there to show international news anchors that American bombed Khmer families (if I recalled correctly).

Oct 19, 2012 11:31 PM