សង្គមស៊ីវិលរិះគន់ប៉ូលិសស៊ើបអង្កេតករណីអភិបាលរងខេត្តតាកែវយឺត
ob.mp3
ករណីផ្ទុះអាវុធនៅក្នុងហាងខារ៉ាអូខេ យីហោ រស្មីអង្គរ ក្នុងសង្កាត់រកាក្រៅ ក្រុងដូនកែវ ខេត្តតាកែវ បណ្ដាលឲ្យម្ចាស់ហាងរងរបួសកាលពីថ្ងៃទី៣ ខែកញ្ញា កន្លងទៅ ត្រូវបានមន្ត្រីអង្គការសង្គមស៊ីវិលរិះគន់ថា សមត្ថកិច្ចមិនយកចិត្តទុកដាក់ធ្វើការស៊ើបអង្កេត ព្រោះអ្នកពាក់ព័ន្ធបង្កឲ្យមានការផ្ទុះអាវុធនោះ ជាក្រុមរបស់លោក ឡាយ វណ្ណៈ ជាអភិបាលរងខេត្តតាកែវ។
មន្ត្រីសម្របសម្រួលអង្គការអាដហុក (Adhoc) ប្រចាំខេត្តតាកែវ លោក អ៊ុន ថាន្នន ឲ្យដឹងនៅថ្ងៃទី១៨ ខែកញ្ញា ថា ករណីផ្ទុះអាវុធនោះ សមត្ថកិច្ចទំនងជាមិនអាចពន្លឿននីតិវិធីស៊ើបអង្កេតឲ្យបានលឿន ដើម្បីអាចចាប់ខ្លួនជនប្រព្រឹត្តយកមកផ្ដន្ទាទោសនោះទេ។
លោកបន្តថា ករណីនេះអាចនឹងមានការយឺតយ៉ាវថែមទៀត ប្រសិនបើមិនមានការចុះផ្សាយតាមសារព័ត៌មានឲ្យបានច្រើនទេនោះ៖ «ទាក់ទងនឹងមន្ត្រីថ្នាក់ធំរឿងអីត្រូវលឿន ប្រសិនបើគ្មានការផ្សព្វផ្សាយអីគគ្រឹកគគ្រេងទេ រឹតតែយឺតជាងហ្នឹងទៀត។ ដល់ពេលយើងផ្សាយទៅ គេក៏ខ្នះខ្នែងអីខ្លះទៅណា! សួរថាត្រឹមប៉ូលិសល្មមៗមិនហ៊ានលេងជាមួយអភិបាល អភិបាលរងទេ វាទាក់ទងសែស្រឡាយអីអ៊ីចឹង សូម្បីតែខាងតុលាការព្រះរាជអាជ្ញាគាត់មានអំណាចឯករាជ្យមួយនៅក្នុងខេត្ត ប៉ុន្តែធៀបជាមួយចៅហ្វាយខេត្ត គាត់មិនហ៊ានទេ។ អ៊ីចឹងខ្ញុំគិតថា ពាក់ព័ន្ធជាមួយមន្ត្រីថ្នាក់ធំ មានន័យថា យើងនិយាយត្រឹមប៉ុណ្ណេះបានហើយ គេធ្វើការក្នុងការប្រយ័ត្នប្រយែង ព្រោះគេខាងនោះថ្នាក់ធំៗដែរណា!»។
ស្នងការនគរបាលខេត្តតាកែវ លោក អ៊ុក សំណាង ធ្លាប់ប្រាប់វិទ្យុអាស៊ីសេរី កាលពីថ្ងៃទី១៦ ខែកញ្ញា ថា ការយឺតយ៉ាវនៃការស៊ើបអង្កេតនេះ ក៏ព្រោះតែជនរងគ្រោះដែលជាម្ចាស់ហាងខារ៉ាអូខេ កំពុងសម្រាកព្យាបាលនៅប្រទេសវៀតណាម ហើយសមត្ថកិច្ចមិនអាចសាកសួរពីជនរងគ្រោះបាន។
វិទ្យុអាស៊ីសេរី មិនអាចទាក់ទងលោក អ៊ុក សំណាង សុំការបំភ្លឺបន្ថែមបានទេនៅថ្ងៃទី១៨ ខែកញ្ញា ខណៈដែលជនរងគ្រោះ លោក មាស សុធន ជាម្ចាស់ហាងខារ៉ាអូខេ បញ្ជាក់ថា មិនបាននៅប្រទេសវៀតណាម នោះទេ ហើយកំពុងសម្រាកនៅផ្ទះក្នុងខេត្តតាកែវ។
វិទ្យុអាស៊ីសេរី បានដកស្រង់សំដីប្រភពពីសាក្សីម្នាក់ដែលអះអាងថា បានឃើញហេតុការណ៍ផ្ទុះអាវុធក្នុងហាងខារ៉ាអូខេនោះ ថាកាំភ្លើងដែលជនប្រព្រឹត្តបង្កឲ្យមានការផ្ទុះអាវុធ មានតំលៃថ្លៃដលទៅ ៨ពាន់ដុល្លារ ជាប្រភេទគ្រាប់ប្រៃ មានសារធាតុម្យ៉ាងដែលអាចធ្វើឲ្យមុខរបួសជើងម្ចាស់ហាងនោះរលួយ និងអាចឈានទៅដល់កាត់ជើងផង។ ផ្ទុយទៅវិញ លោក មាស សុធន អ្នករបួសជើងនោះបដិសេធថា ការអះអាងរបស់ប្រភពនោះមិនពិតទេ។
សូមស្ដាប់បទសម្ភាសន៍ពិស្ដាររបស់អ្នកស្រី អ៊ុក សាវបូរី ជាមួយលោក មាស សុធន ជាជនរងគ្រោះ៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
ឩត្តម
ពី P62TZHSសង្គមស៊ីវិលបានតួនាទីសំខាន់ក្នុងការផ្តល់ប្រឹក្សាផែ្នកផ្លូវច្បាប់ជូនចំពោះជនក្រីក្រដោយឥតគិតថ្លៃ ជាពិសេសចំពោះជនទាំងទ្បាយណាដែលត្រូវគេរំលោភសិទិ្ឋ ។ បើកុំមានសង្គមស៊ីវិល តើអ្នកធានាថាយុត្តិធម៌សង្គមកើតមានទ្បើងចំពោះអ្នកក្រ អ្នកដែលគ្មានអំណាច បក្សពួកនិយម អ្នកគ្មានទ្រព្យសម្បត្តិទេ ? ជាពិសេសករណីនៅខែត្រតាកែវជាឩទាហរណ៏ ???
Sep 19, 2012 07:56 PM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
