សមាគមគ្រូបង្រៀនបដិសេធលទ្ធផលប្រឡងសញ្ញាបត្រទុតិយភូមិ

សមាគមគ្រូបង្រៀនកម្ពុជាឯករាជ្យ បដិសេធមិនទទួលយកលទ្ធផលប្រឡងសញ្ញាបត្រទុតិយភូមិ ឬសញ្ញាបត្របាក់ឌុប ឆ្នាំ២០១២ ទេ ដោយអះអាងថា វិញ្ញាសាប្រឡងបានបែកធ្លាយស្ទើរគ្រប់មុខវិជ្ជា និងមានអំពើពុករលួយ ដែលលទ្ធផលមិនអាចយកជាការបាន។

ដោយ ដែន អយុធ្យា
2012-08-08

h080812ay.mp3

ទីតាំងលក់សៀវភៅកំណែតូចៗនៅក្បែរសាលាវិទ្យាល័យបាក់ទូក កាលពីថ្ងៃទី០៧ ខែសីហា ឆ្នាំ២០១២ ជាថ្ងៃទី២នៃការប្រឡងសញ្ញាបត្រទុតិយភូមិ។

RFA/Mom Sophon

ការបែកធ្លាយវិញ្ញាសានេះ ធ្វើឲ្យសិស្សានុសិស្សដែលយកចិត្តទុកដាក់ក្នុងការសិក្សាដោយប្រើសមត្ថភាពរបស់ខ្លួនសុទ្ធសាធ មិនចេះសូកប៉ាន់នោះ សម្ដែងអារម្មណ៍ខកចិត្ត។

មន្ត្រីសង្គមស៊ីវិល និងបេក្ខជនប្រឡងសញ្ញាបត្រទុតិយភូមិ (បាក់ឌុប) ឆ្នាំនេះ គ្មានជំនឿទៅលើការដឹកនាំរបស់លោក អ៊ឹម សិទ្ធី រដ្ឋមន្ត្រីក្រសួងអប់រំ យុវជន និងកីឡា ដែលមិនអាចទប់ស្កាត់ការបែកវិញ្ញាសាប្រឡងបាន។

លោក រ៉ុង ឈុន ជាប្រធានសមាគមគ្រូបង្រៀនកម្ពុជាឯករាជ្យ នៅថ្ងៃពុធ ទី៨ ខែសីហា ឆ្នាំ២០១២ លោកបានអះអាងថា វិញ្ញាសាសំខាន់ៗបានបែកធ្លាយស្ទើរគ្រប់មុខវិជ្ជា មានដូចជា វិញ្ញាសាគីមីវិទ្យា ជីវវិទ្យា គណិតវិទ្យា និងមុខវិជ្ជាខ្មែរជាដើម។

លោកបន្តថា សមាគមគ្រូបង្រៀនបដិសេធមិនទទួលយកលទ្ធផលប្រឡងសញ្ញាបត្របាក់ឌុប ឆ្នាំនេះទេ ព្រោះគ្មានលក្ខណៈត្រឹមត្រូវ គ្មានតម្លាភាព និងគ្មានយុត្តិធម៌៖ «យើងមើលឃើញថា មានការគ្រប់គ្រងដែលធ្វើឲ្យបេក្ខជននិមួយៗហ្នឹង បានយកទូរស័ព្ទតាមខ្លួន ហើយបានបើកចម្លងទៅតាមរយៈហ្វែសប៊ុក (Facebook) ដែលមានបង្ហោះចម្លើយនៅក្នុងហ្វែសប៊ុក ហើយមានក្រុមមិត្តភ័ក្ដិបង្ហោះទៅឲ្យ និងមានការបើកចម្លង មានការបាញ់ចម្លើយតាមទូរស័ព្ទជាបន្តបន្ទាប់»។

លោកបានចាត់ទុកសកម្មភាពដឹកនាំរបស់លោករដ្ឋមន្ត្រីក្រសួងអប់រំថា មានភាពកម្សោយ នាំឲ្យវិស័យអប់រំកម្ពុជាធ្លាក់ចុះគុណភាព។

លោកថា ក្រៅពីបែកធ្លាយវិញ្ញាសាប្រឡង ក៏មានករណីមន្ត្រីអនុរក្ស ឬមេប្រយោគទទួលសំណូកពុករលួយពីសិស្សពី ៥ពាន់ទៅ៥ម៉ឺនរៀល ឬច្រើនជាងនេះ ជាថ្នូរឲ្យបេក្ខជនអាចចម្លងកំណែវិញ្ញាសា។ បន្ថែមលើនេះ លោក រ៉ុង ឈុន បញ្ជាក់ថា ក៏មានលេចឮព័ត៌មានប្រធានមណ្ឌលបានសហការជាមួយគ្រូបង្រៀនថ្នាក់ទី១២ ធ្វើកំណែលក់ជូនបេក្ខជន កើតមានតាមមណ្ឌលប្រឡងមួយចំនួនថែមទៀត។

ទាក់ទិនបញ្ហានេះ យុវសិស្សជាបេក្ខជនប្រឡងសញ្ញាបត្របាក់ឌុប នៅមណ្ឌលខេត្តព្រៃវែង មិនបញ្ចេញឈ្មោះម្នាក់ នៅរសៀលថ្ងៃទី៨ ខែសីហា បានសម្ដែងការខកចិត្តចំពោះការបែកធ្លាយវិញ្ញាសាប្រឡង ដែលក្រសួងអប់រំមិនអាចទប់ស្កាត់បាន។ យុវជនរូបនេះ បានហៅការបែកធ្លាយវិញ្ញាសាថា នាំឲ្យការខិតខំប្រឹងប្រែងរៀនសូត្ររបស់ខ្លួនគ្មានន័យ៖ «ខ្ញុំប្រឡងនេះ ខ្ញុំពឹងទៅលើសមត្ថភាពខ្លួនខ្ញុំផ្ទាល់តែម្តង គឺមិនបើកសំណៅឯកសារចម្លងដូចសិស្សដទៃទៀតទេ។ ដូច្នេះ ខ្ញុំអន់ចិត្តបន្តិចដែរ ព្រោះថាការប្រឡងវាអយុត្តិធម៌សម្រាប់ខ្ញុំ»។

ចំណែកអាណាព្យាបាលសិស្សរស់នៅខេត្តកំពង់ចាម បានឲ្យដឹងដែរថា អនុរក្ស ឬមេប្រយោគប្រចាំមណ្ឌលប្រឡង បានជំរិតយកលុយពីកូនរបស់គាត់ចន្លោះពី ៥ម៉ឺនទៅ១០ម៉ឺនរៀលក្នុង១ថ្ងៃ ដោយអះអាងថា បើសិស្សណាមិនបង់ជូនពួកគេ នឹងមានបញ្ហាពេលប្រឡង។

លោក សន ជ័យ ជាមន្ត្រីសម្របសម្រួលបណ្ដាញរួបរួមដើម្បីគណនេយ្យភាពសង្គម ប្រចាំអាស៊ីបូព៌ា និងប៉ាស៊ីហ្វិក ជាអង្គការមួយធ្វើការជាមួយយុវជន លោកព្រួយបារម្ភចំពោះធនធានមនុស្សរបស់យុវជនកម្ពុជា ខ្លាចមិនមានគុណភាពអាចប្រកួតប្រជែងជាមួយយុវជនក្នុងបណ្ដាប្រទេសសមាជិកសមាគមអាស៊ាន ពេលធ្វើសមាហរណកម្មសេដ្ឋកិច្ចអាស៊ាន នាឆ្នាំ២០១៥។ លោកបានស្តីបន្ទោសថ្នាក់ដឹកនាំក្រសួងអប់រំ ដែលមិនអាចទប់ស្កាត់វិញ្ញាសាប្រឡង មិនឲ្យបែកធ្លាយបាន។

វិទ្យុអាស៊ីសេរី មិនអាចទាក់ទងលោក អ៊ឹម សិទ្ធី រដ្ឋមន្ត្រីក្រសួងអប់រំ ដើម្បីបំភ្លឺជុំវិញការបែកធ្លាយវិញ្ញាសាប្រឡងសញ្ញាបត្រទុតិយភូមិបានទេ នៅរសៀលថ្ងៃពុធ ទី៨ ខែសីហា។

ប៉ុន្តែ លោក អ៊ឹង ង៉ោហុក ប្រធាននាយកដ្ឋានមធ្យមសិក្សាចំណេះទូទៅ នៃក្រសួងអប់រំ បានថ្លែងថា ការប្រឡងសញ្ញាបត្របាក់ឌុប ឆ្នាំនេះ មានដំណើរការល្អ និងប្រសើរជាងឆ្នាំកន្លងទៅ៖ «គ្មានការបែកធ្លាយវិញ្ញាសាអ្វីទាំងអស់។ ធម្មតាការរៀន គឺវិញ្ញាសាគេត្រូវចេញគ្របដណ្ដប់នៅក្នុងកម្មវិធីសិក្សា មានន័យថា ខ្លឹមសារមាននៅក្នុងសៀវភៅ។ អ៊ីចឹង វាគ្មានអីក្រៅពីក្នុងសៀវភៅទេ។ ដូច្នេះ អ្វីដែលថាជាការចោទប្រកាន់ទៅលើការបែកធ្លាយវិញ្ញាសា គឺជារឿងមិនពិត។ ពីព្រោះគណៈមេប្រយោគយើងបានត្រួតពិនិត្យត្រឹមត្រូវ»។

ក្រសួងអប់រំ យុវជន និងកីឡា បានបង្ហាញថា សម័យប្រឡងសញ្ញាបត្រទុតិយភូមិ ឬសញ្ញាបត្របាក់ឌុប ឆ្នាំ២០១២ មានបេក្ខជនប្រឡងសរុបចំនួន ១១៤.៤១៤នាក់។

មណ្ឌលប្រឡងមានចំនួន ២៥៤មណ្ឌល និងមានបន្ទប់ប្រឡងចំនួន ៤.៦៦៣បន្ទប់ នៅទូទាំងប្រទេស។ សម័យប្រឡងសញ្ញាបត្របាក់ឌុប មានរយៈពេល ២ថ្ងៃកន្លះ ចាប់ពីថ្ងៃចន្ទ ទី៦ ដល់ថ្ងៃពុធ ទី៨ ខែសីហា ឆ្នាំ២០១២៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (5)

ចុចត្រង់នេះដើម្បីបន្ថែមយោបល់របស់អ្នក

អ្នកអានអនាមិក

ពី ភ្នំពេញ

បើមិនមានលទ្ធភាពគ្រប់គ្រាន់ក្នុងការធ្វើអ្វីមួយ ចុះចេញទៅ ខ្មែរមិនខ្វះទេ អ្នកមានសមត្ថភាព។

Aug 08, 2012 10:30 PM

អាត្មាភាព ថោង សាលីម

ពី ប/មានជ័យ

ប្រសិនបើមានអំពើរពុករលួយមែន មិនទទួលស្គាល់លទ្ធផល
ប្រឡងជាការល្អ រដ្ឋាភិបាលគួរពង្រឹងការអប់រំឲ្យល្អជាងនេះបន្តិច
ដើម្បីឲ្យយុវជនខ្មែរមានសមត្ថភាពប្រកួតប្រជែងការងារ ក្នុងសហគមន៍អាស៊ាន។

Aug 08, 2012 06:31 PM

ប្រជាជន

ពី pp

លោកឯងជាស្អីមកបដិសេធលទ្ធផលប្រលង។ បើនិយាយបែបនេះមុខសិស្ស ប្រហែលជារត់ប្រាសអាយុហើយ។

Aug 08, 2012 11:40 AM

អ្នកអានអនាមិក

Stop the SHOW OFF with THE certificates you POSSESS and start with the ABILITY you really have. Certificates are only pieces of papers to adorn office walls.

Aug 08, 2012 09:55 AM