គ្រូបង្រៀនម្នាក់មកពីស្រុកឈូក ខេត្តកំពត បានមានប្រសាសន៍ដោយសុំមិនឲ្យបញ្ចេញឈ្មោះថា គ្រូបង្រៀននៅខេត្តកំពតមិនទាន់ប្រាក់បៀវត្សសម្រាប់ខែតុលាឡើយ បើទោះបីជាខេត្តមួយចំនួនផ្សេងទៀត រួមមានខេត្តតាកែវនិងខេត្តកណ្ដាល បានទទួលប្រាក់ខែខែតុលារួចហើយក៏ដោយចុះ។
គ្រូបង្រៀនដដែលបានឲ្យដឹងថា ៖ «អត់បានទាំងអស់គ្នា ហើយខេត្តតាកែវបើកយូរពេកហើយ ខេត្តតាកែវបើកមួយខែមកជិតបើកខែ១១ទៀតហើយហ្នឹង។ រដ្ឋាភិបាលពីណាមកបានជាខុសគ្នាអ៊ីចឹង រដ្ឋាភិបាលខេត្តតាកែវម៉េចក៏មានលុយអ៊ីចឹងបើកឲ្យគ្រូទាំងអស់គ្នា ដល់រដ្ឋាភិបាលខេត្តកំពតម៉េចក៏ស្ទះចរាចរណ៍ថវិកាទៅវិញ»។
គ្រូបង្រៀនម្នាក់ទៀតនៅឯខេត្តព្រៃវែងក៏បានតវ៉ាពីការយឺតយ៉ាវនៃការបើកប្រាក់ខែនេះដែរ ៖ «ប្រាក់ខែហ្នឹងគឺនៅស្ទះតាំងពីខែ១០មក ឥឡូវខែ១១ជិតដាច់ទៀតទៅហើយ។ មួយខេត្តព្រៃវែងគឺអត់ទាន់បើកទាំងអស់ ហើយចំពោះខេត្តផ្សេងដែលមានពួកម៉ាកខ្ញុំបង្រៀនហ្នឹង ខ្ញុំ Call ទៅ គេថា គេបើកហើយ ខេត្តតាកែវ តេទៅ ថាបើកហើយ ខេត្តកណ្ដាលអីបើកហើយ»។
ប្រធានការិយាល័យយុវជននិងកុមារនៃមន្ទីរអប់រំខេត្តព្រៃវែង លោក ផាន អៀន បានឲ្យដឹងថា ប្រាក់ខែសម្រាប់ខែតុលាត្រូវបានបើកនៅថ្ងៃព្រហស្បតិ៍នេះហើយនៅតាមការិយាល័យអប់រំស្រុក ហើយថា ប្រាក់ខែនោះនឹងធ្លាក់ទៅដល់ដៃគ្រូនៅថ្ងៃសុក្រស្អែកនេះ។
លោក ផាន អៀន បានឲ្យដឹងថា មូលហេតុនៃការយឺតយ៉ាវនោះគឺដោយសារតែមន្ត្រីអប់រំខេត្តកំពុងត្រួតពិនិត្យឡើងវិញលើប្រាក់បៀវត្សសម្រាប់កូននិងប្រពន្ធ។
លោក ផាន អៀន បានបញ្ជាក់ថា ៖ «មានការយឺតយ៉ាវហ្នឹងពីម្សិលមិញខ្ញុំឃើញគណនេយ្យរាយការណ៍ដែរ វាមានច្រើនគន្លាក់ ដោយសារតែយើងមានការរុះរើលុយ ដូចថាពីមុនមកយើងមានលុយកូន ដូចថាកូនមាន១ពាន់នាក់អ៊ីចឹងទៅណា៎ ដល់មកឆ្នាំថ្មីនេះយើងត្រូវបញ្ចូលកូនថ្មី អ៊ីចឹងបញ្ជីអេតាហ្នឹងវាត្រូវវ៉ៃសាថ្មី ព្រោះគ្រូនៅក្នុងខេត្តព្រៃវែងនេះមានជិត៨ពាន់ វា៧ពាន់នាក់ជាង ដល់អ៊ីចឹងទៅយើងត្រូវធ្វើការសើរើបញ្ចូលសាថ្មីហ្នឹង បានវាទៅជាយឺត»៕