នាយករដ្ឋមន្ត្រីថៃប្រតិកម្មតបនឹងប្រសាសន៍របស់មេដឹកនាំខ្មែរ

ដោយ កេសរណ្ណីយ្យា

2009-09-30

នាយករដ្ឋមន្រ្តីថៃ លោក អាភីស៊ិត វេតឆាឈីវ៉ាក់ (Abhisit Vejjajiva) បានប្រតិកម្មតបទៅនឹងប្រសាសន៍របស់នាយករដ្ឋមន្ត្រីខ្មែរ ហ៊ុន សែន ជុំវិញបញ្ហាជម្លោះប្រាសាទព្រះវិហារ។

AFP PHOTO

នាយករដ្ឋមន្ត្រីថៃ អាភីស៊ិត វេតឆាឈីវ៉ាក់ (Abhisit Vejjajiva)។

ប្រតិកម្មតបទៅនឹងប្រសាសន៍ព្រមានរបស់លោកនាយករដ្ឋមន្រ្តី ហ៊ុន សែន ដកស្រង់ដោយទីភ្នាក់ងារសារព័ត៌មានបារាំង AFP ដែលបានបញ្ជាឲ្យបាញ់សម្លាប់ពលរដ្ឋថៃណាដែលឆ្លងព្រំដែនចូលមកតំបន់ក្បែរប្រាសាទព្រះវិហារនោះ នាយករដ្ឋមន្រ្តីថៃ លោក អាភីស៊ិត វេតឆាឈីវ៉ាក់ (Abhisit Vejjajiva) បានថ្លែងនៅថ្ងៃអង្គារ ទី២៩ កញ្ញា ថា លោក ហ៊ុន សែន មានបំណងចង់សងសឹងតបតទៅនឹងក្រុមបាតុករថៃ ដែលបានធ្វើការតវ៉ាទាមទារកាលពីថ្ងៃទី១៩ ខែកញ្ញា។ ប៉ុន្តែនាយករដ្ឋមន្រ្តីថៃបានថ្លែងបញ្ជាក់យ៉ាងទទូចថា ប្រទេសថៃនៅតែចង់ស្វែងរកដំណោះស្រាយដោយសន្តិវិធីចំពោះបញ្ហាជម្លោះប្រាសាទព្រះវិហារ តាមរយៈគណៈកម្មការព្រំដែនរួមដែលបង្កើតឡើងដោយប្រទេសទាំងពីរ។

តុលាការយុត្តិធម៌ក្រុងឡាអេ នៅក្នុងឆ្នាំ១៩៦២ បានសម្រេចកាត់ក្តីប្រគល់ប្រាសាទព្រះវិហារឲ្យភាគីខ្មែរ។ នៅខែកក្កដា ឆ្នាំ២០០៨ អង្គការយូណេស្កូបានទទួលយល់ព្រមដាក់ប្រាសាទព្រះវិហាររបស់ខ្មែរជាសម្បត្តិបេតិកភណ្ឌពិភពលោកតាមសំណើរបស់រាជរដ្ឋាភិបាលកម្ពុជា។

នាយករដ្ឋមន្រ្តីថៃ លោក អាភីស៊ិត វេតឆាឈីវ៉ាក់ បានថ្លែងថា ក្នុងឱកាសនៃមហាសន្និបាទរបស់អង្គការសហប្រជាជាតិនៅទីក្រុងញូវយ៉ក កាលពីសប្តាហន៍មុន លោកបានលើកបញ្ហានេះទៅអគ្គលេខាធិការអង្គការសហប្រជាជាតិ លោក បាន គីម៉ូន (Ban Ki-moon) ដោយគូសបញ្ជាក់ថា ការសម្រេចរបស់យូណេស្កូបានធ្វើឲ្យស្ថានភាពរវាងប្រទេសថៃនិងកម្ពុជាកាន់តែមានសភាពតានតឹងថែមទៀត៕

បោះពុម្ព អ៊ីម៉េល