ថៃដោះលែងអ្នកភូមិខ្មែរ៣នាក់ជាប់ចោទពីបទឆ្លងដែនខុសច្បាប់
ដោយ សុផល មុន្នី
2009-11-25
អាជ្ញាធរថៃបានដោះលែងអ្នកភូមិ៣នាក់ក្នុងចំណោម១២នាក់ ក្រោយពីអ្នកភូមិខ្មែរទាំងនោះត្រូវបានកងទាហានប៉ារ៉ាថៃ ចាប់ឃុំកាលពីថ្ងៃ៩ និងថ្ងៃ១០ វិច្ឆិកា ដោយចោទពីបទឆ្លងដែនខុសច្បាប់ចូលក្នុងដីថៃ។
លោក ប្រាក់ សាំ ប្រធានប៉ុស្តិ៍នគរបាលច្រកបឹងត្រកួន បានថ្លែងនៅព្រឹកថ្ងៃទី២៤ ខែវិច្ឆិកាថា ភាគីថៃបានយល់ព្រមដោះលែងអ្នកភូមិខ្មែរ៣នាក់មកវិញ ក្រោយពីប្រជាពលរដ្ឋខ្មែរ៣នាក់បានបង់ប្រាក់ម្នាក់ៗអស់ជាង១ពាន់បាតទៅឲ្យតុលាការខេត្តស្រះកែវថៃ។
លោក ប្រាក់ សាំ បានឲ្យដឹងដូច្នេះ ៖ «ដោយសារបីនាក់ហ្នឹងគ្នាមានលុយប្រកាន់ក្ដី អស់ម្នាក់១ពាន់បាតជាង ចំណែក៥នាក់ទៀតអត់ទាន់មានលុយឲ្យគេទេ អត់ទាន់បានមកទេ។ ៥នាក់ហ្នឹង បើសិនជាមានលុយបង់នឹងអាចត្រូវដោះលែង»។
កាលពីថ្ងៃទី៩ ខែវិច្ឆិកា ប្រជាពលរដ្ឋខ្មែរពីរនាក់ត្រូវបានទាហានប៉ារ៉ាថៃចាប់ខ្លួន ខណៈដែលឆ្លងដែនខុសច្បាប់ ជិះម៉ូតូឌុបក្នុងគោលដៅទៅក្រុងបាងកករកការងារធ្វើ និងថ្ងៃទី១០ ខែវិច្ឆិកា ប្រជាពលរដ្ឋខ្មែរ១០នាក់ទៀតត្រូវចាប់ខ្លួនដូចគ្នា ខណៈដែលពួកគេជិះកង់ដឹកអង្ករលក់ក្នុងដីថៃតាមបន្ទាត់ព្រំដែន។
ខ្មែរទាំង១២នាក់បានឆ្លងតាមច្រកអូរសាយ ជិតច្រកបឹងត្រកួន ក្នុងឃុំគោករមៀត ស្រុកថ្មពួក លុះចូលដល់ចំណុចមួយក្នុងភូមិថាត់ថៃ ឃុំថាត់ថៃ ស្រុកតាប់ព្រះយ៉ា ខេត្តស្រះកែវ ត្រូវកងទាហានប៉ារ៉ាចាប់ដោយចោទថា ឆ្លងដែនខុសច្បាប់និងយកទំនិញទៅលក់អត់មានការត្រួតពិនិត្យពីមន្ត្រីគយថៃ។
លោក អ៊ឹម រិទ្ធ មេភូមិត្រពាំងសំរោង បានថ្លែងថា ប្រជាពលរដ្ឋខ្មែរទាំង៣នាក់ដែលថៃដោះលែងមកវិញនោះ មានឈ្មោះ ប៉ិត ស៊ីម, ប៊ុន កេសរ និងឈ្មោះ ស៊ុន កំសត់។
លោក អ៊ឹម រិទ្ធ បានឲ្យដឹងដូច្នេះថា ៖ «៣នាក់ហ្នឹងយកលុយទៅលោះចេញមុនការឃុំខ្លួន អ៊ីចឹងនៅ៤នាក់ទៀត សម្រាប់ភូមិខ្ញុំទេ នៅពេលមួយអាទិត្យទៀត។ ខ្ញុំសួរអ្នកចេញមកហ្នឹងគាត់ថា ត្រូវឃុំ៧ថ្ងៃទៀត»។
អ្នកភូមិម្នាក់ឈ្មោះ ប៊ុន កេសរ ដែលថៃដោះលែងមកវិញនោះ បានថ្លែងថា ពលរដ្ឋខ្មែរ៧នាក់ទៀតកំពុងឃុំខ្លួននៅពន្ធនាគារខេត្តស្រះកែវ ចំណែកក្មេង២នាក់ទៀតមិនទាន់គ្រប់អាយុ ត្រូវបានអាជ្ញាធរថៃយកទៅដាក់នៅមណ្ឌលកែប្រែ។
លោកឧត្តមសេនីយ៍ ហ៊ុន ហ៊ាន ស្នងការនគរបាលខេត្តបន្ទាយមានជ័យ បានថ្លែងកាលពីថ្ងៃអង្គារ ទី១៧ វិច្ឆិកា កន្លងទៅថ្មីៗនេះថា ភាគីថៃបានសន្យាថា នឹងដោះលែងប្រជាពលរដ្ឋខ្មែរ៨នាក់នៅថ្ងៃទី២២ ខែវិច្ឆិកាមកវិញ ប៉ុន្តែរហូតមកថ្ងៃទី២៤ ខែវិច្ឆិកា មានតែអ្នកភូមិខ្មែរបីនាក់ប៉ុណ្ណោះត្រូវថៃដោះលែង។
អ្នកភូមិខ្មែរដែលកំពុងជាប់ឃុំជាបន្តនោះ មានឈ្មោះ អួរ ស្រ៊ុន ឈ្មោះ ថន ថាច ឈ្មោះ សំ ថាន ឈ្មោះ ស៊ុត សុផល ឈ្មោះ ហ៊ុយ ឈុនលី និងក្មេងអាយុ២ឆ្នាំឈ្មោះ លី ប៊ុនលាង និងឈ្មោះ ថាច វីរៈ អ្នកទាំងអស់រស់នៅភូមិសាមគ្គីនិងភូមិត្រពាំងសំរោង ឃុំគោករមៀត ស្រុកថ្មពួក ខេត្តបន្ទាយមានជ័យ ចំណែកឯបុរសពីរនាក់ផ្សេងទៀត ជាអ្នកស្នាក់នៅក្នុងមូលដ្ឋានបណ្តោះអាសន្ន មិនមានអ្នកស្គាល់ឈ្មោះ៕
អត្ថបទដែលទាក់ទង
មេទ័ពខ្មែរ៖ ការប៉ះទង្គិចគ្នានឹងចៀសមិនរួចបើថៃនៅតែប៉ុនប៉ងឈ្លានពាន
មេដឹកនាំខ្មែររិះគន់ធ្ងន់ៗចំពោះនាយករដ្ឋមន្ត្រីថៃ
ខ្មែរបដិសេធថាមិនបានបញ្ជូនមន្រ្តីទៅចរចាជាមួយថៃនៅប្រាសាទតាមាន់
ស្ថានការណ៍នៅតំបន់ប្រាសាទតាមាន់ធំថ្ងៃ៨ កុម្ភៈ
សភាពការណ៍ទូទៅនៅតំបន់ព្រំដែនភាគពាយ័ព្យ
ស្ថានការណ៍យោធានៅតំបន់ប្រាសាទតាមាន់
ទាហានថៃចូលកាន់កាប់ប្រាសាទតាមាន់
ហ៊ុនសែន៖ កម្ពុជានឹងបើកច្រកព្រំដែនបើសភាពការណ៍ដូចមុនថ្ងៃ១៥ កក្កដា
អាជ្ញាធររឹតបន្តឹងសន្តិសុខនៅតំបន់ប្រាសាទព្រះវិហារ
កម្ពុជាប្រតិកម្មចំពោះសញ្ញាកំណត់ព្រំដែនខ្មែរថៃរបស់Google Earth
មតិ
បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួលនិងអាចចុះផ្សាយបានយោងតាមលក្ខខណ្ឌនៃការប្រើប្រាស់របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរីមិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។
stop kill people anything wrong let the law taking action.
2009-11-30 19:51
មើលមតិទាំងអស់.