ការចាប់បញ្ជូនពលរដ្ឋខ្មែរក្មេងចាស់ប្រុសស្រីទាំង៦៧នាក់ គឺបានកើតមានឡើងកាលពីព្រឹកថ្ងៃសុក្រ ទី៦ ខែវិច្ឆិកា មួយថ្ងៃបន្ទាប់ពីថៃបានដកឯកអគ្គរាជទូតរបស់ខ្លួនចេញពីប្រទេសកម្ពុជាក្នុងការប្រឆាំងជាមួយកម្ពុជាដែលបានទទួលអតីតនាយករដ្ឋមន្ត្រីថៃ លោក ថាក់ស៊ីន ឈីនណាវ៉ាត្រ (Thaksin Shinawatra) ធ្វើជាទីប្រឹក្សាផ្ទាល់របស់លោក ហ៊ុន សែន នាយករដ្ឋមន្ត្រីខ្មែរ និងជាទីប្រឹក្សារាជរដ្ឋាភិបាលកម្ពុជាទទួលបន្ទុកសេដ្ឋកិច្ច។
លោកអនុសេនីយ៍ត្រី សុន ណូ នាយរងប៉ុស្តិ៍នគរបាលច្រកកូនភ្នំ បានថ្លែងថា ពលរដ្ឋខ្មែរទាំង៦៧នាក់នោះត្រូវបានក្រុមទាហានឈុតខ្មៅថៃចាប់បញ្ជូនមកវិញ ដោយសារតែពួកគេឆ្លងដែនខុសច្បាប់ចូលទៅរកការងារធ្វើក្នុងដីថៃ។
លោកអនុសេនីយ៍ត្រី សុន ណូ បានឲ្យដឹងថា ៖ «៦៧នាក់ គាត់លួចឆ្លងដែនខុសច្បាប់ដែលខ្ញុំមិនបានឃើញ... គាត់បម្រុងទៅស្នាក់អាស្រ័យរកស៊ីនៅហ្នឹង(ប្រទេសថៃ)»។
លោក សុខ ភក្តី ដែលរស់នៅជាប់ព្រំដែនខ្មែរថៃក្នុងស្រុកសំពៅលូននោះ បានថ្លែងថា ប្រពលរដ្ឋខ្មែរទាំង៦៧នាក់បានធ្វើដំណើរចូលទៅក្នុងទឹកដីថៃ កាលពីវេលាម៉ោង៤ទៀបភ្លឺ ព្រឹកថ្ងៃសុក្រ។
លោក សុខ ភក្តី បានបញ្ជាក់ថា ៖ «ចាប់ហ្នឹងនៅចំណុចកូនភ្នំ តំបន់ដីស ចម្ងាយពីច្រកប្រហែលជា១គីឡូកន្លះ។ គាត់ចេញទៅម៉ោង៤ ចេញទៅវាលំបាកក្នុងព្រៃ ហើយមេខ្យល់ក៏រត់ចោលប្រជាពលរដ្ឋ៦៧នាក់ហ្នឹង។ គេរត់ចោលទៅ គាត់អត់ស្គាល់ភូមិសាស្ត្រដែនដីថៃ»។
ស្ត្រីម្នាក់អាយុ៤២ឆ្នាំក្នុងចំណោមពលរដ្ឋខ្មែរទាំង៦៧នាក់បាននិយាយថា កងទាហានឈុតខ្មៅថៃនៅទីនោះបានចាប់ពួកគាត់ឃាត់ទុកអស់រយៈពេលប្រហែលជាបីម៉ោង ហើយបានប្រើឲ្យបោចស្មៅ រើសសំរាម ប៉ុន្តែមិនមានការវាយដំទេ ៖ «គេចាប់ទាំងអស់ហ្នឹង អត់មានវ៉ៃដំអីទេ។ ខ្មែរយើងនាំចូលទៅ ប៉ុន្តែគេដើរលឿនទៅមុនបាត់ទៅ នៅតែខ្ញុំក្រោយគេ រកផ្លូវទៅមិនឃើញ»។
បុរសវ័យចំណាស់៥៧ឆ្នាំ ឈ្មោះ ចេង អាន បានថ្លែងថា រូបលោកនិងពលរដ្ឋទាំង៦៦នាក់ផ្សេងទៀតបានធ្វើចំណាកស្រុកពីខេត្តកំពង់ចាមនិងខេត្តកំពង់ធំ មកស្នាក់នៅស្រុកម៉ាឡៃ ខេត្តបន្ទាយមានជ័យ និងស្រុកសំពៅលូន ខេត្តបាត់ដំបង ហើយបាននាំគ្នាចូលក្នុងទឹកដីថៃដើម្បីរកការងារធ្វើជាលើកដំបូង។
លោក ចេង អាន បានមានប្រសាសន៍ថា ៖ «ទៅធ្វើកម្មករកាប់អំពៅ លើកដំឡូង។ ខាងកំពង់ចាម មានមកបួនដប់ម្ភៃនាក់ទៅ ខាងកំពង់ធំ ម្ភៃសាមសិបនាក់ទៅ វាចម្រុះគ្នា។ វាគ្មាន(ការងារ)ខាងខ្មែរយើងហ្នឹង វាអស់ការងារហើយ»។
ប្រជាពលរដ្ឋខ្មែរនៅតាមខេត្តក្រុងនានាក្នុងប្រទេសកម្ពុជា ដោយសារតែភាពក្រីក្រ កង្វះការងារធ្វើ បានបង្ខំនិងរុញច្រានពួកគេឲ្យធ្វើចំណាកស្រុកពីភូមិឋានរបស់ខ្លួនដើម្បីស្វែងរកការងារធ្វើក្នុងប្រទេសថៃ បើទោះបីជាពួកគេដឹងថា ប្រឈមទៅនឹងបញ្ហាគ្រោះថ្នាក់ជាច្រើនក៏ដោយ៕