យោងតាមកាសែតថៃ The Nation លោករដ្ឋមន្ត្រីរូបនេះ បានថ្លែងបង្ហាញអំពីជំហររបស់រដ្ឋាភិបាលថៃយ៉ាងដូច្នេះ នៅក្នុងសន្និសីទកាសែត កាលពីថ្ងៃពុធ ម្សិលមិញនេះ បន្ទាប់ពីតុលាការថៃ បានចេញអធិបញ្ជាឲ្យរដ្ឋាភិបាលថៃ ផ្អាករាល់សកម្មភាពទាំងឡាយណា ដែលទាក់ទងនឹងបញ្ហាប្រាសាទព្រះវិហារនេះ ។
លោករដ្ឋមន្រ្តី ណុបផាដុន ប៉ាត់តៈម៉ា ដែលនឹងទៅចូលរួមកិច្ចប្រជុំរបស់អង្គការយូណេស្កូ ដែលនឹងផ្តើមធ្វើនៅទីក្រុងកេបិក ប្រទេសកាណាដា ចាប់ពីថ្ងៃទី២ កក្កដាទៅ បានបញ្ជាក់ថា យូណេស្កូ នឹងពិនិត្យមើលរបៀបវារៈស្តីពីបញ្ជីបេតិកភណ្ឌពិភពលោក នៅចុងសប្តាហ៍នេះ ឬដើមសប្តាហ៍ក្រោយ ។
ប៉ុន្តែ គេនៅមិនទាន់ដឹងច្បាស់នៅឡើយទេ ថាតើការប្តូរជំហររបស់រដ្ឋាភិបាលថៃ ពីគាំទ្រមកប្រឆាំងវិញនេះ នឹងបណ្តាលឲ្យប៉ះពាល់ដល់ដំណើរការនៃសេចក្តីស្នើរបស់ខ្មែរ ក្នុងការដាក់បញ្ចូលប្រាសាទព្រះវិហារ ជាបេតិកភណ្ឌពិភពលោក ដែរឬមួយយ៉ាងណានោះទេ ៕