កុមារីម្នាក់ស្លាប់និងមនុស្ស៩នាក់ក្អួតចង្អោរដោយសារទទួលទានដំឡូងមី

កុមារីអាយុ ៧ឆ្នាំម្នាក់ បានស្លាប់ និងសមាជិកគ្រួសារ រួមទាំងសាច់ញាតិរបស់នាង ៩នាក់ទៀត បានក្អួតចង្អោរ ដោយសារការទទួលទានដំឡូងមី។ ក្រុមអាជ្ញាធរមូលដ្ឋាន បានបញ្ជូនអ្នកជំងឺទាំង ៩នាក់នេះ ទៅសង្គ្រោះនៅមន្ទីរពេទ្យបង្អែកស្រុកសំពៅលូន ខេត្តបាត់ដំបង។

ដោយ សួន សុផលមុន្នី
2012-10-06

h100612mn.mp3

អ្នកពុលដំឡូងមី ៩នាក់ មានអាការៈធូរស្បើយ បន្ទាប់ពីក្រុមអាជ្ញាធរមូលដ្ឋានបញ្ជូនពួកគេទៅសង្គ្រោះនៅមន្ទីរពេទ្យបង្អែក ស្រុកសំពៅលូន កាលពីព្រឹកថ្ងៃទី៥ ខែតុលា ប៉ុន្តែមានក្មេងស្រីម្នាក់បានស្លាប់នៅនឹងផ្ទះ ដោយសារនាងមានស្ថានភាពពុលធ្ងន់ធ្ងរ នៅក្រោយការទទួលទានដំឡូងមីរួចមក។

មេឃុំប៊ួ លោក កើត ចិន្ដា បានថ្លែងនៅថ្ងៃទី៦ ខែតុលា ថា កាលពីល្ងាចថ្ងៃទី៤ ខែតុលា ប្រជាពលរដ្ឋចំនួន ពីរគ្រួសារ មានគ្នា ១០នាក់ ក្រោយពីទទួលទានបាយរួច បាននាំគ្នាស្ងោរដំឡូងមី ហូបថែមទៀត ស្រាប់តែពុល ក្អួតចង្អោរ បណ្ដាលឲ្យកូនស្រីអាយុ ៧ឆ្នាំ ស្លាប់ និង ៩នាក់ បញ្ជូនទៅសង្គ្រោះនៅមន្ទីរពេទ្យ ស្រុកសំពៅលូន៖ «ស្លាប់ម្នាក់កូនក្មេងស្រី អាយុ ៧ឆ្នាំ រស់នៅភូមិភ្នំប្រាំពីរ ឃុំប៊ួ ពុលហ្នឹង ពីរគ្រួសារ។ កូនមួយគ្រួសារទៀត ដូចជាបីនាក់ហ្នឹង មកលេងប្ដីប្រពន្ធ ហើយនិងចៅមួយ ហើយខាងនុះ ៧ ដែលនៅជាមួយក្រុមគ្រួសារហ្នឹង ប៉ុន្តែបើយើងនិយាយឲ្យចំទៅ វាត្រកូលតែមួយហ្នឹង»។

គ្រួសារប្រជាពលរដ្ឋរងគ្រោះ ជាអ្នកស្នាក់នៅភូមិភ្នំប្រាំពីរ ឃុំប៊ួ ស្រុកភ្នំព្រឹក ខេត្តបាត់ដំបង។ គ្រួសារនេះ មានជីវភាពក្រីក្រ និងជាអ្នកចំណាកស្រុកទៅរកការងារធ្វើនៅតំបន់នោះ។

លោក សុង សុភ័ក្កិ ជាអធិការនគរបាលស្រុកភ្នំព្រឹក បានថ្លែងថា គ្រួសារកុមារីរងគ្រោះមានជីវភាពក្រីក្រ ទើបនាំគ្នារើសដំឡូងមីយកទៅស្ងោរទទួលទានដូច្នេះ៖ «មូលហេតុ គាត់អ្នកចំណាកស្រុក មកធ្វើកម្មករនៅហ្នឹង។ ក្រោយមក ល្ងាចជុំគ្នា គាត់គាស់ដំឡូងមី យកមកហូប សំខាន់ដំឡូង បើអ្នកដែលគេដឹង គេអត់ដែលហូបទេ ដំឡូងគេដាំធ្វើម្សៅ គាត់យកទៅស្ងោរហូប តែស្ងោរហូប គឺពុលហើយ បណ្ដាលឲ្យស្លាប់ម្នាក់ និង ៩នាក់ទៀតចូលព្យាបាលនៅមន្ទីរពេទ្យ ប៉ុន្តែឥឡូវបានធូរស្រាលហើយ មន្ទីរពេទ្យបង្អែកសំពៅលូន»។

ប្រភពពីគ្រូពេទ្យ នៅមន្ទីរពេទ្យបង្អែក ស្រុកសំពៅលូន បានឲ្យដឹងថា ប្រជាពលរដ្ឋដែលពុលដំឡូងមី ទាំង ៩នាក់នោះ មានអាការៈធូរស្រាលឡើងវិញ ហើយបានចេញពីមន្ទីរពេទ្យត្រឡប់ទៅផ្ទះវិញ នៅល្ងាចថ្ងៃទី៦ ខែតុលា នេះ៖ «ធូរស្រាលអស់ហើយ អ្នកប៉ុន្មាននាក់នោះ ស្លាប់តែក្មេងហ្នឹង ព្រោះក្មេងតូចវាក្អួតខ្លាំងពេក។ កាលណាក្អួតទៅ វាខ្សោះជាតិទឹក កូនក្មេងអាយុ ប្រាំ ប្រាំមួយឆ្នាំនៅចន្លោះ ៧ឆ្នាំអីហ្នឹង។ មនុស្សចាស់អាចទ្រាំទ្របានមកនៅពេទ្យ តាមសួរទៅដំឡូងមានពីរប្រភេទ។ ប្រភេទដែលអាចពុល និងប្រភេទមិនអាចពុល»។

ក្រុមអាជ្ញាធរមូលដ្ឋាន បានឲ្យដឹងថា ប្រជាពលរដ្ឋមួយចំនួននៅក្នុងមូលដ្ឋាន ស្រុកភ្នំព្រឹក ជាអ្នកចំណាកស្រុកក្រីក្រមកពីបណ្ដាខេត្តផ្សេងៗគ្នា។ ពួកគេបាននាំប្ដីប្រពន្ធ កូនចៅ ដើម្បីទៅរកការងារធ្វើ ប៉ុន្តែ ដោយសារភាពក្រីក្រ គ្រួសារទាំងនោះបានប្រឈមនឹងបញ្ហាជីវភាពច្រើន។ គ្រួសារខ្លះ ពុំមានការងារធ្វើគ្រប់គ្រាន់ មិនអាចរកប្រាក់កម្រៃចិញ្ចឹមជីវិតបាន ទើបខ្វះខាត ហើយនាំគ្នាយកដំឡូងមីទៅស្ងោរទទួលទានដូច្នេះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។