បុរសខ្មែរ២នាក់ត្រូវប៉ូលិសការពារព្រំដែនថៃបាញ់ស្លាប់
h080412hs-a1.mp3
លោក ហង្ស សាវយុត អ្នកយកព័ត៌មានវិទ្យុអាស៊ីសេរី ប្រចាំភាគឧត្តរនៃប្រទេសកម្ពុជា បានរាយការណ៍ថា កាលពីវេលាម៉ោងប្រហែល៥ល្ងាច ថ្ងៃសៅរ៍ ទី៤ ខែសីហា អាជ្ញាធរថៃនៃខេត្តសុរិន្ទ បានបញ្ជូនសាកសពបុរសខ្មែរចំនួន២នាក់ មកឱ្យអាជ្ញាធរខ្មែរវិញ នៅច្រកទ្វាព្រំដែនអូស្មាច់ នៃទឹកដីក្រុងសំរោង ខេត្តឧត្តរមានជ័យ។
លោក ពៅ ផេង ជាអនុប្រធានក្រុមការងារទំនាក់ទំនងព្រំដែនកម្ពុជា-ថៃ ប្រចាំច្រកអូស្មាច់ លោកបានមានប្រសាសន៍ថា សាកសពបុរសខ្មែរពីរនាក់នោះ ត្រូវអាជ្ញាធរថៃនៃខេត្តសុរិន្ទ ប្រគល់មកដល់ដៃអាជ្ញាធរខ្មែរហើយ កាលពីល្ងាចថ្ងៃទី៤ ខែសីហា។
លោក ពៅ ផេង៖ «រាយការណ៍មកថា គេដឹកមកវត្តអូស្មាច់ហើយ។ ទំនាក់ទំនងព្រំដែនថៃ ដឹកយកមកឱ្យ ហើយខាងទំនាក់ទំនងក្រុមខ្ញុំ ក៏ចូលទៅយកដែរ។ បងចាំសួរព័ត៌មានលម្អិតទៅឈ្មោះ ផល ព្រោះគេនៅរងនៅទីនោះ ព្រោះខ្ញុំអត់បាននៅ ខ្ញុំសុំច្បាប់មកធ្វើបុណ្យ»។
សាកសពបុរសខ្មែរទាំងពីរនាក់នោះ ម្នាក់ឈ្មោះ សុទ្ធ វ៉ិត អាយុ ២៣ឆ្នាំ ទីលំនៅភូមិជប់គគីរ ឃុំគោកមន ស្រុកបន្ទាយអំពិល និងម្នាក់ទៀតឈ្មោះ នាត អាយុ ៥៥ឆ្នាំ ទីលំនៅភូមិជ្រឹង សង្កាត់កូនគ្រៀល ក្រុងសំរោង។
ប្រភពពីអាជ្ញាធរថៃ បានឱ្យដឹងថា បុរសខ្មែរទាំងពីរ ត្រូវប៉ូលិសការពារព្រំដែនថៃនៃស្រុកកាប់ជើង ខេត្តសុរិន្ទ បាញ់ស្លាប់ កាលពីវេលាម៉ោងប្រមាណជា ៣រសៀល កាលពីថ្ងៃទី៣ ខែសីហា នៅចំណុចភូមិនួនថង ឃុំគោកតាភៀន ក្នុងទឹកដីថៃ។
បុរសខ្មែរទាំងពីរនាក់ មានសម្លៀកបំពាក់យោធាផលិតនៅប្រទេសចិន ប៉ុន្តែគេមិនដឹងថា តើពួកគេបានលួចឆ្លងដែនទៅក្នុងទឹកដីថៃ ដើម្បីធ្វើអ្វីទេ គ្រាន់តែគេសង្ស័យថា អាចពាក់ព័ន្ធនឹងការលួចចូលទៅកាប់ឈើគ្រញូងខុសច្បាប់ ក្នុងទឹកដីថៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
