លោក ម៉ក់ សុធិន គឺជាប្រធានសមាគមមគ្គុទ្ទេសក៍ទេសចរណ៍ និងជនជាតិខ្មែរនិយាយភាសារុស្ស៊ី ប្រចាំខេត្តសៀមរាប។ លោកបានមានប្រសាសន៍កាលពីរសៀលថ្ងៃអាទិត្យ ទី៣០ ខែកញ្ញា ថា ក្រុមរបស់លោកដែលជាមគ្គុទ្ទេសក៍ទេសចរណ៍ជនជាតិខ្មែរនិយាយភាសារុស្សី កំពុងប្រឈមមុខនឹងការបាត់បង់អាជីពប្រចាំថ្ងៃ ដោយសារតែក្រុមហ៊ុនទេសចរណ៍ឯកជនមួយចំនួនបាននាំយកជនជាតិរុស្ស៊ី ឱ្យមកនាំភ្ញៀវដើរកម្សាន្តនៅតាមតំបន់អង្គរ។
លោក ម៉ក់ សុធិន បានបញ្ជាក់ទៀតថា បច្ចុប្បន្ននេះក្រុមហ៊ុនមួយចំនួនមិនបានជួលមគ្គុទ្ទេសក៍ ទេសចរណ៍ជនជាតិខ្មែរនិយាយភាសារុស្សី ឱ្យទៅជូនភ្ញៀវដើរកម្សាន្តឡើយ ដោយសារតែគេប្រើជនជាតិរុស្ស៊ី ដែលជាអ្នកបកប្រែភាសានោះឱ្យធ្វើជាមគ្គុទ្ទេសក៍ដើម្បីអធិប្បាយអំពីប្រវត្តិសាស្ត្រ សេដ្ឋកិច្ចសង្គម វប្បធម៌ សាសនា ប្រពៃណី និងទំនៀមទម្លាប់របស់ខ្មែរជូនភ្ញៀវទេសចរបានទៀតផង។ បញ្ហានេះគឺកំពុងខុសច្បាប់ទេសចរណ៍នៃព្រះរាជាណាចក្រកម្ពុជា ដែលមានចែង។
លោក ម៉ក់ សុធិន៖ «បច្ចុប្បន្នមានពួករុស្ស៊ី ដើរ ដែលអត់មានអាជ្ញាប័ណ្ណហ្នឹងប្រហែលជាពី ២០-៣០នាក់។ គេបញ្ជូនគ្នាមកពីប៉ាតាយ៉ា (ប្រទេសថៃ) ហ្នឹងជាបន្តបន្ទាប់មកហើយ។ គេទាក់ទងយកភ្ញៀវពីខាងប៉ាតាយ៉ាមក។ ខាងក្រុមហ៊ុនគេថា គេមានគោលការណ៍យកតែមគ្គុទ្ទេសក៍ជនជាតិរុស្ស៊ីទេ អត់មានយកមគ្គុទ្ទេសក៍ជនជាតិខ្មែរទេ។ ខ្មែរយើងហ្នឹងឥឡូវកំពុងតែអត់មានការងារធ្វើទេ។ កូនចៅខ្ញុំប្រហែលជា ៥០នាក់ជាង ឥឡូវខ្ញុំគិតថា ដើរភ្ញៀវបច្ចុប្បន្នហ្នឹង មិនដល់បានដប់នាក់ផង»។
កាលពីថ្ងៃទី២៧ ខែកញ្ញា ឆ្នាំ២០១២ កន្លងទៅ សមាគមមគ្គុទ្ទេសក៍ទេសចរណ៍បានធ្វើជាលិខិតចំហមួយចែកជូនដល់បណ្ដាញព័ត៌មានឱ្យជួយផ្សព្វផ្សាយអំពីផលប៉ះពាល់នានាទៅលើក្រុមមគ្គុទ្ទេសក៍ទេសចរណ៍ជនជាតិខ្មែរនិយាយភាសារុស្ស៊ី ដែលកំពុងប្រឈមមុខ និងការបាត់បង់ការងារប្រចាំថ្ងៃ រួមទាំងបង្ហាញពីភាពអនាធិបតេយ្យរបស់ក្រុមជនជាតិរុស្ស៊ី ដែលចូលមកដណ្ដើមការងារទេសចរណ៍ របស់ពលរដ្ឋខ្មែរជាដើម។
សមាគមមគ្គុទ្ទេសក៍ទេសចរណ៍ និងជនជាតិខ្មែរនិយាយភាសារុស្ស៊ី ចង់ឱ្យមន្ត្រីរដ្ឋាភិបាលដែលពាក់ព័ន្ធជួយដោះស្រាយបញ្ហានេះ។
លោក ថោង ខុន រដ្ឋមន្ត្រីក្រសួងទេសចរណ៍នៃប្រទេសកម្ពុជា បានមានប្រសាសន៍ថា គោលការណ៍ដាច់ណាត់ គឺបានដាក់ចេញជាយូរមកហើយ ដោយកំណត់ថា មគ្គុទ្ទេសក៍ទេសចរណ៍គឺជាជនជាតិខ្មែរ ហើយអ្នកបកប្រែភាសាដែលជាជនជាតិបរទេសមិនមែនជាមគ្គុទ្ទេសក៍ទេ។ នៅក្នុងករណីដែលសមាគមមានមគ្គុទ្ទេសក៍គ្រប់គ្រាន់ដាក់ឱ្យនាំភ្ញៀវទេសចរនោះ គឺមិនចាំបាច់ឱ្យមានអ្នកបកប្រែភាសាទេ លើកលែងតែគ្មានមគ្គុទ្ទេសក៍គ្រប់គ្រាន់។
លោករដ្ឋមន្ត្រីបានព្រមានថា ក្រុមហ៊ុនណាដែលយកជនជាតិបរទេសជាអ្នកបកប្រែភាសាទៅធ្វើជាមគ្គុទ្ទេសក៍ទេសចរណ៍នោះ គឺជារឿងខុសច្បាប់ ហើយក្រសួងទេសចរណ៍មិនអនុញ្ញាតឱ្យបន្តធ្វើដូច្នោះបានទេ។ លោករដ្ឋមន្ត្រីបានជំរុញឱ្យនគរបាលទេសចរណ៍ និងប្រធានមន្ទីរទេសចរណ៍ ត្រូវស្រាវជ្រាវករណីនេះជាបន្ទាន់។
លោក ថោង ខុន៖ «ប្រសិនបើមានករណីហ្នឹងមែន ត្រូវប៉ូលិសទេសចរណ៍ ជាមួយសមាគមមគ្គុទ្ទេសក៍ ហើយនិងប្រធានមន្ទីរទេសចរណ៍ ត្រូវធ្វើការជាមួយគ្នាភ្លាម។ អាហ្នឹងអត់អនុញ្ញាតឱ្យធ្វើអ៊ីចឹងទេ»។
សមាគមមគ្គុទ្ទេសក៍ទេសចរណ៍ និងជនជាតិខ្មែរនិយាយភាសារុស្ស៊ី បានឱ្យដឹងថា បញ្ហាដែលក្រុមហ៊ុនយកជនជាតិរុស្ស៊ី ឱ្យមកដើរធ្វើជាមគ្គុទ្ទេសក៍ទេសចរណ៍នៅតាមតំបន់អង្គរនោះ បានកើតមានក្នុងរយៈពេលជាង ២ឆ្នាំមកនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។