លោក ឈូក អាង មេបញ្ជាការវរសេនាតូច៩១១ ការពារព្រំដែន បានថ្លែងប្រាប់វិទ្យុអាស៊ីសេរីថា ជនល្មើសពីរនាក់ ឈ្មោះ លី សំបូរ អាយុ ២៨ឆ្នាំ រស់នៅភូមិនិម្មិត២ ឃុំនិម្មិត និងឈ្មោះ នួន ឆៃរ៉ា អាយុ ២១ឆ្នាំ រស់នៅឃុំប៉ោយប៉ែត ស្រុកអូរជ្រៅ ខេត្តបន្ទាយមានជ័យ ត្រូវបានកម្លាំងវរសេនាតូចលេខ៩១១ ចាប់បាន ក្រោយពីទទួលពាក្យបណ្តឹងពីក្រុមគ្រួសារនិងអាជ្ញាធរថៃជុំវិញករណីចាប់ជំរិត។
លោក ឈូក អាង មានប្រសាសន៍ថា ៖ «ប្រហែលជាចំណាយពេល ១ថ្ងៃ ដល់ឪពុកម្តាយ គេចាប់ផ្តើមប្ដឹងមកអាជ្ញាធរយើង និងសមត្ថកិច្ចយើង ដាក់ផែនការភ្លាមៗ ធ្វើភ្លាម ទៅស្រាវជ្រាវបន្តបន្ទាប់ ពីមួយទៅមួយៗ តាមវាគ្រប់គន្លាក់ទាំងអស់។ តាមចម្លើយមានម្នាក់ទៀត ប៉ុន្តែម្នាក់ទៀតគេចបាត់»។
ហេតុការណ៍ចាប់ជំរិតក្មេងជនជាតិថៃនេះ បានកើតឡើងកាលពីថ្ងៃទី២៩ ខែសីហា រហូតមកដល់វេលាល្ងាចថ្ងៃទី៣០ ខែសីហា ឆ្នាំ២០០៨ ទើបចាប់ខ្លួនបាន។
បើតាមមេបញ្ជាការវរសេនាតូចលេខ៩១១ បានឲ្យដឹងថា ក្មេងជនជាតិថៃ មានអាយុ ១៥ឆ្នាំ រស់នៅឃុំគោកធ្យូង ខេត្តស្រះកែវថៃ ត្រូវបានជនល្មើសល្បួងនាំពីទឹកដីថៃ តាមច្រករបៀងមកទឹកដីខ្មែរក្នុងស្រុកអូរជ្រៅ ខេត្តបន្ទាយមានជ័យ ហើយធ្វើសកម្មភាពជំរិតយកលុយពីក្មេងបានចំនួន ៤ពាន់បាត និងទាក់ទងទូរស័ព្ទទៅជំរិតទារពីឪពុកម្តាយក្មេងជនជាតិថៃនោះ បានចំនួន១ម៉ឺនបាតថែមទៀត តែជនល្មើសនោះ មិនបានដោះលែងក្មេងជនជាតិថៃនោះទេ។
លោក ហ៊ុន ហ៊ាង ស្នងការនគរបាលខេត្តបន្ទាយមានជ័យ បានមានប្រសាសន៍ថា ជនល្មើសទាំងពីរនាក់ត្រូវបានស្នងការដ្ឋាននគរបាលខេត្ត កសាងសំណុំរឿងបញ្ជូនទៅតុលាការរួចរាល់ហើយ កាលពីល្ងាចថ្ងៃអាទិត្យម្សិលមិញដើម្បីចាត់ការតាមច្បាប់ ៖ «ខ្ញុំបានកសាងសំណុំរឿងនិងបញ្ជូនទៅតុលាការ កាលពីល្ងាចមិញហើយ»។
ក្មេងរងគ្រោះជនជាតិថៃ អាយុ១៥ឆ្នាំ ត្រូវបានអាជ្ញាធរខ្មែរផ្តល់ទៅឲ្យក្រុមគ្រួសារវិញហើយ បន្ទាប់ពីធ្វើកំណត់ហេតុរួចរាល់ កាលពីល្ងាចថ្ងៃទី៣០ ខែសីហា ឆ្នាំ២០០៨។
លោក ឈូក អាង មេបញ្ជាការវរសេនាតូចការពារព្រំដែន នៅក្នុងស្រុកអូរជ្រៅ ខេត្តបន្ទាយមានជ័យ បានថ្លែងថា នេះលើកដំបូងហើយ ដែលមានករណីចាប់ជំរិតក្មេងជនជាតិថៃ នៅតាមព្រំដែនចំគោលដៅដែលលោកឈរជើងការពារ។ លោកបានបន្តថា ករណីនេះ អាចនឹងមានសភាពធ្ងន់ធ្ងរ ប្រសិនបើខាងសមត្ថកិច្ចរបស់លោក មិនមានវិធានការទាន់ពេលវេលានោះ៕