ឯកអគ្គរដ្ឋទូតអាមេរិកថ្មីជួបពិភាក្សាជាមួយលោក ហ៊ុន សែន

ឯកអគ្គរដ្ឋទូតថ្មីនៃសហរដ្ឋអាមេរិកប្រចាំនៅកម្ពុជា លោក វីល្លៀម ថត (William Todd) នៅថ្ងៃទី៣ ខែកក្កដា ឆ្នាំ២០១២ បានជួបពិភាក្សាជាមួយលោកនាយករដ្ឋមន្ត្រី ហ៊ុន សែន នៅឯវិមានសន្តិភាព រយៈពេលជាងកន្លះម៉ោង។

ដោយ សុខ សេរី
2012-07-03

ts.mp3

ឯកអគ្គរដ្ឋទូតថ្មីនៃសហរដ្ឋអាមេរិកប្រចាំនៅកម្ពុជា លោក វីល្លៀម ថត (William Todd) [ឆ្វេង] ជួបពិភាក្សាជាមួយលោកនាយករដ្ឋមន្ត្រី ហ៊ុន សែន នៅវិមានសន្តិភាព កាលពីថ្ងៃ៣ កក្កដា ឆ្នាំ២០១២។

RFA/Sok Serey

ក្នុងកិច្ចពិភាក្សាគ្នានោះ ភាគីទាំងពីរបានឯកភាពគ្នាថា នឹងបន្តពង្រឹងចំណងទាក់ទង និងជំរុញឲ្យមានវិនិយោគទុនរបស់សហរដ្ឋអាមេរិកមកកម្ពុជា ឲ្យបានច្រើន។

លោកនាយករដ្ឋមន្ត្រី ហ៊ុន សែន និងឯកអគ្គរដ្ឋទូតថ្មីនៃសហរដ្ឋអាមេរិក លោក វីល្លៀម ថត នៅថ្ងៃទី៣ ខែកក្កដា ឆ្នាំ២០១២ បានឯកភាពគ្នាជាគោលការណ៍ចំនួន ៤ចំណុច។ ក្នុងនោះរួមមាន ទី១ ពង្រឹងទំនាក់ទំនង និងសហប្រតិបត្តិការរវាងកម្ពុជា និងសហរដ្ឋអាមេរិក ទី២ ជំរុញឲ្យមានវិនិយោគទុនរបស់សហរដ្ឋអាមេរិកនៅប្រទេសកម្ពុជា ទី៣ សហការ និងផ្ដល់ព័ត៌មានរវាងស្ថាប័ននានានៃប្រទេសទាំងពីរ ដើម្បីជំរុញទំនាក់ទំនងរវាងប្រទេសទាំងពីរ និងទី៤ បង្កើតឲ្យមានទំនាក់ទំនងល្អរវាងយុវជននៃប្រទេសទាំងពីរ។

ជំនួយការផ្ទាល់របស់លោកនាយករដ្ឋមន្ត្រី ហ៊ុន សែន លោក អៀង សុផល្លែត បានមានប្រសាសន៍ប្រាប់អ្នកកាសែតថា គោលការណ៍ទាំងនោះត្រូវបានស្វាគមន៍ដោយលោកនាយករដ្ឋមន្ត្រី៖ «សម្ដេចបានមានប្រសាសន៍ថា វាជាកត្តាសំខាន់ណាស់ដែលធ្វើឲ្យទំនាក់ទំនងប្រទេសយើងទាំងពីរមានដំណើរការល្អ ហើយក៏បានថ្លែងអំណរគុណចំពោះការយកចិត្តទុកដាក់ទៅលើការជំរុញអ្នកវិនិយោគសហរដ្ឋអាមេរិក ឲ្យមកកាន់កម្ពុជាយើង។ ...សម្ដេចបានមានប្រសាសន៍ថា គប្បីជំរុញវិស័យវិនិយោគ វិស័យទេសចរណ៍ ។ល។ និង ។ល។»។

ឯកអគ្គរដ្ឋទូតសហរដ្ឋអាមេរិក លោក វីល្លៀម ថត មិនបានផ្ដល់អត្ថាធិប្បាយអ្វីទេប្រាប់អ្នកកាសែតនៅក្រោយជំនួបនោះ។ ប៉ុន្តែមន្ត្រីស្ថានទូតសហរដ្ឋអាមេរិកបានចែកឯកសារមួយចំនួនដល់អ្នកកាសែត។ ឯកសារនោះបាននិយាយថា សហរដ្ឋអាមេរិកនៅតែតាំងចិត្តធ្វើយ៉ាងណាឲ្យវេទិកាតំបន់អាស៊ានទទួលបានជោគជ័យ ហើយរដ្ឋមន្ត្រីក្រសួងការបរទេសសហរដ្ឋអាមេរិក អ្នកស្រី ហ៊ីលឡារី គ្លិនតុន (Hillary Clinton) សង្ឃឹមដោយរីករាយថា នឹងមកចូលរួមក្នុងវេទិកានេះ។

អ្នកស្រី ហ៊ីលឡារី គ្លិនតុន នឹងដឹកនាំគណៈប្រតិភូធុរកិច្ច ឬអ្នកវិនិយោគទុនដ៏ធំមួយដែលមិនធ្លាប់មានកន្លងមក មកចូលរួមក្នុងវេទិការវាងសហរដ្ឋអាមេរិក និងអាស៊ាន នៅខេត្តសៀមរាប។

មន្ត្រីស្ថានទូតសហរដ្ឋអាមេរិកនៅកម្ពុជា បានឲ្យដឹងថា រដ្ឋមន្ត្រីក្រសួងការបរទេសសហរដ្ឋអាមេរិក អ្នកស្រី ហ៊ីលឡារី គ្លិនតុន នឹងមកចូលរួមក្នុងវេទិកាសហរដ្ឋអាមេរិក និងអាស៊ាន នៅថ្ងៃទី១១ ខែកក្កដា ឆ្នាំ២០១២ ខាងមុខនេះ។

ឯកសារនោះបានបន្តថា សហរដ្ឋអាមេរិកបានចំណាយយ៉ាងច្រើនក្នុងកម្មវិធីពង្រឹងលទ្ធិប្រជាធិបតេយ្យ និងកែលំអអភិបាលកិច្ចល្អនៅកម្ពុជា ដែលជួយដល់បរិយាកាសវិនិយោគទុនសម្រាប់ប្រទេសកម្ពុជា។

មន្ត្រីអង់គ្លេសជួបជាមួយលោក ហ៊ុន សែន

នៅថ្ងៃដដែលនេះដែរ រដ្ឋមន្ត្រីនៃការិយាល័យកិច្ចការបរទេសនៃចក្រភពអង់គ្លេស លោក ជឺរីមី ប្រូនណេ (Jeremy Browne) ក៏បានជួបពិភាក្សាជាមួយលោកនាយករដ្ឋមន្ត្រី ហ៊ុន សែន នៅឯវិមានសន្តិភាពនោះដែរ ដើម្បីពង្រឹងទំនាក់ទំនង និងសេដ្ឋកិច្ចរវាងអាស៊ាន និងចក្រភពអង់គ្លេសឲ្យកាន់តែរឹងមាំ។

ការពង្រឹងទំនាក់ទំនងផ្នែកសេដ្ឋកិច្ចនេះ ធ្វើឡើងនៅគ្រាដែលតំបន់អាស៊ានកំពុងមានកំណើនសេដ្ឋកិច្ចខ្ពស់។

ជំនួយការផ្ទាល់របស់លោកនាយករដ្ឋមន្រ្តី ហ៊ុន សែន លោក អៀង សុផល្លែត បានមានប្រសាសន៍ប្រាប់អ្នកកាសែតនៅក្រោយជំនួបនោះថា អ្នកវិនិយោគទុនអង់គ្លេស កំពុងតែស្វែងរកការធ្វើវិនិយោគនៅតំបន់អាស៊ាន ក្នុងនោះមានកម្ពុជាដែរ។

លោក អៀង សុផល្លែត៖ «ចក្រភពអង់គ្លេសមានកម្មវិធីនយោបាយ ធ្វើការឲ្យកាន់តែជិតស្និទ្ធឡើងជាមួយតំបន់ (អាស៊ាន) នៅពេលដែលតំបន់អាស៊ីអាគ្នេយ៍ទាំងមូលកំពុងតែមានទំនាក់ទំនងល្អ ធ្វើការជាមួយគ្នាមានភាពជិតស្និទ្ធ សហគមន៍អាស៊ានកាន់តែរឹងមាំឡើង។ ក្នុងន័យនេះដែរ លោកក៏បានគត់សំគាល់ឃើញថា នៅក្នុងព្រះរាជាណាចក្រកម្ពុជាយើង មានភាពអនុគ្រោះយ៉ាងខ្លាំងក្នុងការធ្វើធុរកិច្ច ដើម្បីទទួលនូវការជោគជ័យ»។

លោក ប្រូនណេ មកធ្វើទស្សនកិច្ចនៅប្រទេសមួយចំនួននៅតំបន់អាស៊ី ដូចជាប្រទេសថៃ ប្រទេសកម្ពុជា វៀតណាម និងកោះហុងកុង ជាដើម។

សេចក្ដីប្រកាសព័ត៌មានរបស់ស្ថានទូតចក្រភពអង់គ្លេសនៅកម្ពុជា បានឲ្យដឹងថា លោក ប្រូនណេ បានជួបជាមួយអ្នកជំនួញធំៗនៅប្រទេសកម្ពុជា និងជួបតំណាងអង្គការសង្គមស៊ីវិល។ ក្រៅពីនេះទៀត លោកនឹងទៅទស្សនាសាលាក្ដីខ្មែរក្រហម និងជួបជាមួយជនរងគ្រោះនៃរបបខ្មែរក្រហម៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។