ពលរដ្ឋដែលមានជម្លោះដីធ្លីនៅភ្នំពេញស្វែងរកអន្តរាគមន៍ពីអង្គការ
h080812in.mp3
អ្នកសហគមន៍ទាំងនោះ បានចំណាយពេលមួយព្រឹកស្វែងរកទីស្នាក់ការអង្គការនោះ ប៉ុន្តែពុំអាចរកឃើញ។ ពួកគេបានសម្រេចនាំគ្នាទៅអានសំណើរបស់ពួកគេនៅក្នុងតំបន់បឹងកក់។
ពលរដ្ឋជិត១០០នាក់មកពីសហគមន៍ដែលមានជម្លោះដីធ្លីចំនួនប្រាំ នៅរាជធានីភ្នំពេញ បាននាំគ្នាដើរហែក្បួនចេញពីតំបន់បឹងកក់ និងបន្ទាប់មកបានជិះរ៉ឺម៉កទេសចរណ៍ទៅតាមផ្លូវសំខាន់ៗមួយចំនួន ប៉ុន្តែពួកគេពុំអាចរកឃើញទីស្នាក់ការរបស់អង្គការសហព័ន្ធសិទ្ធិមនុស្ស និងអភិវឌ្ឍន៍កម្ពុជាឡើយ។
ពលរដ្ឋទាំងនោះមកពីតំបន់បឹងកក់ បុរីកីឡា បឹងឈូក សហគមន៍៣៤៧ និងអ្នករស់ជាប់របងប្រលានយន្តហោះភ្នំពេញ ដែលរងផលប៉ះពាល់ផ្នែកដីធ្លី។ ពួកគេបានអំពាវនាវអង្គការសហព័ន្ធសិទ្ធិមនុស្ស និងអភិវឌ្ឍន៍កម្ពុជា បង្ហាញទីតាំងជាក់លាក់ ដើម្បីងាយស្រួលសម្រាប់ពួកគេស្វែងរកអន្តរាគមន៍ជួយរកដំណោះស្រាយរឿងជម្លោះដីធ្លី។
តំណាងបុរីកីឡា អ្នកស្រី ឆាយ គឹមហ៊ន មានប្រសាសន៍ថា ពួកគេបានជួបការលំបាកជាច្រើនឆ្នាំមកហើយនៅក្នុងជម្លោះដីធ្លីរវាងពួកគេ និងក្រុមហ៊ុនផានអ៊ីម៉ិច (Phanimex)។ នៅពេលពួកគេបានទទួលព័ត៌មានតាមប្រព័ន្ធផ្សព្វផ្សាយថា អង្គការសហព័ន្ធសិទ្ធិមនុស្ស និងអភិវឌ្ឍន៍កម្ពុជា បានបង្ហាញចេតនាពីការដោះស្រាយជម្លោះដីធ្លី ពួកគេព្យាយាមទាក់ទងអង្គការសហព័ន្ធសិទ្ធិមនុស្ស និងអភិវឌ្ឍន៍កម្ពុជា ជាច្រើនថ្ងៃ ដើម្បីដាក់ញត្តិសុំអន្តរាគមន៍ជួយរកដំណោះស្រាយរឿងដីធ្លីរបស់ពួកគេ ដែលអូសបន្លាយច្រើនឆ្នាំមកហើយនេះ។
អង្គការសហព័ន្ធសិទ្ធិមនុស្ស និងអភិវឌ្ឍន៍កម្ពុជា តំណាងឲ្យអង្គការយុវជន អង្គការសមាគមចំនួន៣១ មានបេសកកម្មតស៊ូមតិ និងលើកស្ទួយយុត្តិធម៌។
ពលរដ្ឋនៃសហគមន៍ដែលមានជម្លោះដីធ្លី ក៏បានបញ្ជាក់ដែរថា គេដឹងថាអង្គការសង្គម អង្គការសហព័ន្ធសិទ្ធិមនុស្ស និងអភិវឌ្ឍន៍ នៅថ្ងៃទី៦ សីហា បានចេញសេចក្ដីថ្លែងការណ៍ជំទាស់ទៅនឹងការអះអាងរបស់លោក សៀរ ភារម្យ នាយកលេខាធិការដ្ឋានក្រុមការងារពិសេសសិទ្ធិលំនៅឋាន ដែលថាក្រុមនិស្សិតចុះវាស់ដីធ្លីដល់ប្រជាពលរដ្ឋមិនមានប្រសិទ្ធភាព និងនិរន្តរភាព។
សេចក្ដីថ្លែងការណ៍នោះចុះហត្ថលេខាដោយលោក ថៅ វាសនា បានកោតសរសើរលោកនាយករដ្ឋមន្ត្រី ហ៊ុន សែន ថា គោលនយោបាយចាស់សកម្មភាពថ្មីរបស់រដ្ឋាភិបាល បានអនុវត្តកំណែទម្រង់ដីធ្លីប្រកបដោយប្រសិទ្ធភាព។ ដោយសង្កេតករណីនេះ ទើបពលរដ្ឋដែលកំពុងមានជម្លោះដីធ្លីនោះ បានស្វះស្វែងរកកិច្ចអន្តរាគមន៍ពីប្រធានអង្គការមួយនេះ។
តំណាងអ្នកភូមិបឹងកក់ អ្នកស្រី ទេព វន្នី មានប្រសាសន៍ថា អ្នកបឹងកក់ចង់ផ្ដល់ព័ត៌មានទៅលោក ថៅ វាសនា ពីបញ្ហារបស់ពួកគាត់ និងស្នើអោយជួយដោះស្រាយបញ្ហា៣ចំណុច សម្រាប់អ្នកបឹងកក់ នោះ គឺការបោះបង្គោលកំណត់ព្រំដីទំហំ១២,៤៤ហិកតារ ផ្ដល់ដីធ្លីដល់អ្នកដែលត្រូវឆ្វៀលចេញ និងលើកលែងការចោទប្រកាន់តំណាង១៥នាក់នៅតុលាការ។
តំណាងអ្នកសហគមន៍បឹងឈូក អ្នកស្រី ខៀវ ចិន្តា មានប្រសាសន៍ថា ជាការប្រសើរណាស់ប្រសិនបើសហព័ន្ធសិទ្ធិមនុស្ស និងអភិវឌ្ឍន៍កម្ពុជា អាចជួយពួកគាត់បាន។ ពួកគាត់បានបាត់បង់ដីធ្លី ផ្ទះសម្បែង ចំណែកតំណាងជាច្រើននាក់ក៏ត្រូវចោទប្រកាន់ទៅតុលាការដោយសារតែជម្លោះដីធ្លី។
ឆ្លើយតបនឹងការលើកឡើងនេះ ប្រធានសហព័ន្ធសិទ្ធិមនុស្ស និងអភិវឌ្ឍន៍កម្ពុជា លោក ថៅ វាសនា មានប្រសាសន៍ថា ពលរដ្ឋដែលមានជម្លោះដីធ្លីនោះ គឺពុំចាំបាច់ដាក់សំណើទៅអង្គការរបស់លោកឡើយ ដ្បិតអង្គការលោកមិនបានផ្ដោតលើជម្លោះដីធ្លីឡើយ។ លោក ថៅ វាសនា បន្តថា ចំពោះបញ្ហារំលោភសិទ្ធិដីធ្លី ចាំបាច់ត្រូវមានការស៊ើបអង្កេត ប៉ុន្តែអង្គការរបស់លោកពុំមានបទពិសោធក្នុងករណីនេះឡើយ។
បើទោះជាយ៉ាងណា ពលរដ្ឋដែលចង់បានអន្តរាគមន៍ដោះស្រាយបញ្ហារបស់ពួកគាត់ បានអះអាងថា ពួកគេនឹងព្យាយាមស្វែងរកស្នាក់ការរបស់អង្គការរបស់លោក ថៅ វាសនា តទៅទៀត ដើម្បីបានបង្ហាញពីទុក្ខលំបាក ពីការតស៊ូប្រឆាំងនឹងការបណ្ដេញពួកគេចេញពីលំនៅឋាន។
តំណាងបុរីកីឡា អ្នកស្រី ឆាយ គឹមហ៊ន មានប្រសាសន៍ថា គង់នឹងមានស្ថាប័នរដ្ឋាភិបាលមួយចំនួនអាចដឹងពីអាសយដ្ឋានអង្គការនេះ។
ក្រៅពីការជំរុញអោយសហព័ន្ធសិទ្ធិមនុស្ស និងអភិវឌ្ឍន៍កម្ពុជា ងាកមកយកចិត្តទុកដាក់ពីការរំលោភសិទ្ធិដីធ្លី និងសិទ្ធិលំនៅឋាននេះ អ្នកសហគមន៍ដែលមានជម្លោះដីធ្លី ក៏បានអំពាវនាវទៅដល់អង្គការ សមាគម ទោះមាននិន្នាការគាំទ្ររដ្ឋាភិបាល ឬជំទាស់ ត្រូវបង្ហាញទីតាំងស្នាក់ការរបស់ខ្លួនអោយបានជាក់លាក់ ដើម្បីផ្ដល់ឱកាសអោយពលរដ្ឋបានស្នើសុំអន្តរាគមន៍ ឬជួបប្រឹក្សាយោបល់ផ្នែកច្បាប់ទៅតាមតួនាទីនៃអង្គការមិនមែនរដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
