ពលរដ្ឋស្នើសុំឲ្យអាជ្ញាធរដកសមាសភាពតំណាងសហគមន៍នៅខេត្តកំពង់ចាម

បន្ទាប់ពីរដ្ឋាភិបាលបានកាត់បឹងធំ ស្ថិតក្នុងឡូនេសាទលេខ២ ដែលជាបឹងមានផ្ទៃទឹកប្រមាណ៤៨ហិកតារជាប់ចំនួន៣ស្រុក ក្នុងខេត្តកំពង់ចាម ទៅឲ្យប្រជាពលរដ្ឋនេសាទជាលក្ខណៈគ្រួសារគ្រប់គ្រង កាលពីខែវិច្ឆិកា ឆ្នាំ២០១១ មក អ្នកភូមិបានសម្ដែងការព្រួយបារម្ភជាថ្មីម្តងទៀត បន្ទាប់ពីអតីតប្រធានសហគមន៍នេសាទបានជាប់ឆ្នោតដោយស្ងាត់ៗទៅគ្រប់គ្រងនៅសហគមន៍នេសាទនៅថ្នាក់ស្រុក។

ដោយ ទេព សុរ៉ាវី
2012-08-07

h080712tn.mp3

តំណាងអ្នកភូមិចំនួន៨នាក់ នៅឃុំមាន ក្នុងស្រុកព្រៃឈរ ស្នើសុំឲ្យមេឃុំដកសមាសភាពអនុប្រធានទី២ នៃគណៈកម្មការសហគមន៍បឹងធំ ដែលគ្រប់គ្រងចំនួន៣ស្រុកចេញ បន្ទាប់ពីអ្នកភូមិរកឃើញថា តំណាងសហគមន៍រូបនោះបានឃុបឃិតជាមួយមន្ត្រីជលផលទទួលសំណូកពីប្រជានេសាទខុសច្បាប់។

ការស្នើសុំនេះ ធ្វើឡើងនៅក្នុងកិច្ចប្រជុំមួយនៅសាលាឃុំ នៅថ្ងៃទី៧ ខែសីហា។ តំណាងអ្នកភូមិនៅឃុំមាន លោក សុខ ឈឿង ឲ្យដឹងថា លោក លឹម សុភាព អតីតប្រធានសហគមន៍សាមគ្គីឃុំមាន ដែលគ្រប់គ្រងនៅបឹងកេស ជាប់នឹងបឹងធំ ត្រូវបានតែងតាំងដោយស្ងាត់ៗដោយមន្ត្រីជលផលខេត្ត ទៅជាអនុប្រធានទី២សហគមន៍បឹងធំ ដែលអាចគ្រប់គ្រងចំនួន៣ស្រុក នៅស្រុកព្រៃឈរ ស្រុកកងមាស និងស្រុកកំពង់សៀម ក្នុងខេត្តកំពង់ចាម។

លោក សុខ ឈឿង បន្តថា តំណាងអ្នកភូមិចំនួន១២រូប មកពី៦ភូមិ ក្នុងឃុំមាន ដែលបានមកពីការបោះឆ្នោតសកលនៅតាមភូមិ និងដែលត្រូវបោះឆ្នោតអសកលម្តងទៀតនៅថ្នាក់ឃុំ ដើម្បីឈរឈ្មោះជាតំណាងអ្នកភូមិ ចូលរួមបោះឆ្នោតនៅថ្នាក់ស្រុក ជាសមាជិកគណៈកម្មការសហគមន៍បឹងធំ មិនទាន់ដំណើរការផង ស្រាប់តែឈ្មោះ លឹម សុភាព អតីតប្រធានសហគមន៍សាមគ្គីឃុំមាន បែរជាជាប់ឆ្នោតស្ងាត់ៗធ្វើជាតំណាងអ្នកភូមិក្នុងសហគមន៍បឹងធំ ទៅវិញ។

លោកបញ្ជាក់ថា អ្នកភូមិមិនទទួលស្គាល់ឈ្មោះ លឹម សុភាព ជាតំណាងរបស់ខ្លួន ហើយទៅឈរឈ្មោះជាប់ជាអនុប្រធានទី២ នៃគណៈកម្មការសហគមន៍បឹងធំនោះទេ។ ទើបស្នើសុំឲ្យដកឈ្មោះ លឹម សុភាព ចេញពីសមាសភាពនៃគណៈកម្មការនេះ ហើយបោះឆ្នោតម្តងទៀត ដោយមានតំណាងភូមិពិតប្រាកដចូលរួម៖ «មូលហេតុអីបានខេត្តជ្រើសរើសលោក លឹម សុភាព ទៅឈរឈ្មោះវិញ ព្រោះមនុស្សនេះជាប់ពាក់ព័ន្ធនឹងបទល្មើសមិនប្រក្រតី នៅក្នុងសហគមន៍»។

តំណាងអ្នកភូមិបញ្ជាក់ថាឈ្មោះ លឹម សុភាព ត្រូវបានអ្នកភូមិអស់ជំនឿទុកចិត្តឲ្យគ្រប់គ្រង និងការពារតំបន់នេសាទ បន្ទាប់ពីគាត់បានឃុបឃិតជាមួយមន្ត្រីជលផលមួយចំនួនដើរយកលុយពីប្រជានេសាទ ជាថ្នូរអនុញ្ញាតិឲ្យពួកគេនេសាទនៅបឹងធំ ដោយប្រើឧបករណ៍ខុសច្បាប់។

មេឃុំមាន លោក អ៊ុន តារា ឲ្យដឹងថា លោកនឹងស្នើសុំឲ្យលោក លឹម សុភាព បង្ហាញលិខិតស្នាមស្របច្បាប់បញ្ជាក់ពីការតែងតាំងគាត់ជាអនុប្រធានទី២ នៃគណៈកម្មការសហគមន៍បឹងធំ នេះ។

លោកបញ្ជាក់ថា ប្រសិនជាមានលិខិតស្នាមស្របច្បាប់ ឬយ៉ាងណាក៏ដោយ ក៏លោកនឹងសរសេរលិខិតស្នើសុំមួយទៅជលផលខេត្ត ដើម្បីសុំដកលោក លឹម សុភាព ចេញពីគណៈកម្មការនេះតាមការទាមទារពីអ្នកភូមិ៖ «ដូរបាន ព្រោះថ្នាក់ឃុំដូរហើយ ប៉ុន្តែវាប៉ះអ្នកអាណាព្យាបាលសហគមន៍ គឺជលផល»។

វិទ្យុអាស៊ីសេរី មិនអាចសុំការបំភ្លឺពីលោក លឹម សុភាព ជុំវិញការចោទប្រកាន់ពីអ្នកភូមិបានទេ នៅថ្ងៃទី៧ ខែសីហា។

នាយរងខណ្ឌរដ្ឋបាលជលផលខេត្តកំពង់ចាម លោក ភួង ទីណា ឲ្យដឹងថា ខាងជលផលនឹងធ្វើការស៊ើបអង្កេតពីករណីស្នើសុំដកលោក លឹម សុភាព នេះ ថាតើជារឿងទំនាស់បុគ្គល ឬយ៉ាងណា? តែបើតាមការចុះស្រាវជ្រាវរបស់លោកកន្លងមក លោក លឹម សុភាព និងមន្ត្រីជលផលស្រុក និងខេត្តមិនបានទទួលសំណូកពីប្រជានេសាទខុសច្បាប់ ដូចការចោទប្រកាន់ពីអ្នកភូមិនោះឡើយ៖ «ជួនទៅ អ្នកខ្លះជាបុគ្គលមានការខ្នះខ្នែងជាមួយ លឹម សុភាព និងខ្លះទៀត ក៏មានគេគាំទ្រ ហើយខ្លះទៀតក៏មិនជាបញ្ហាជាមួយគ្នាពីការសុំដកនេះទៅ»។

មន្រ្តីសម្របសម្រួលអង្គការអាដហុក ប្រចាំខេត្តកំពង់ចាម លោក នាង សុវ៉ាត បញ្ជាក់ថា ការស្នើសុំដកឈ្មោះ លឹម សុភាព ចេញពីគណៈកម្មការនេះ ស្របតាមលក្ខន្តិកសហគមន៍ ហើយអាជ្ញាធរឃុំគួរចាត់នីតិវិធីបោះឆ្នោតជ្រើសរើសតំណាងអ្នកភូមិឲ្យបានលឿន ដើម្បីកាត់បន្ថយការនេសាទខុសច្បាប់នៅបឹងធំ នោះ។

លោកនាយករដ្ឋមន្ត្រី ហ៊ុន សែន បានប្រកាសកាលពីខែកក្កដា ដោយលើកទឹកចិត្តឲ្យប្រជាពលរដ្ឋត្រូវហ៊ានងើបឡើងតស៊ូមតិប្រឆាំងនឹងប្រធានសហគមន៍នេសាទ ឬមន្ត្រីពាក់ព័ន្ធទាំងអស់ដែលទទួលសំណូកបើកឲ្យមានការនេសាទខុសច្បាប់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។