ពលរដ្ឋ​ខេត្ត​កំពង់ឆ្នាំង​ប្រតិកម្ម​ការ​ដាក់​ឲ្យ​ដេញ​ថ្លៃ​កំពង់​ចម្លង​ដ​ទទឹង

ប្រជាពលរដ្ឋ និង​អាជ្ញាធរ​ដែន​ដី​ភូមិ-ឃុំ បាន​ប្រតិកម្ម​តវ៉ា​ចំពោះ​ក្រសួង​ហិរញ្ញវត្ថុ ដែល​បាន​សម្រេច​ឲ្យ​ធ្វើ​ការ​ដេញ​ថ្លៃ​ដ​ទទឹង នៅ​កំពង់ផែ​ឃុំ​តាជេស។
ដោយ មណ្ឌល កែវ
2012-12-08
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

អ្នក​ភូមិ និង​អាជ្ញាធរ​ចោទ​ថា ការ​ដេញ​ថ្លៃ​នេះ​បាន​ធ្វើ​ឲ្យ​ប៉ះពាល់​យ៉ាង​ខ្លាំង​ដល់​ជីវភាព​រស់នៅ​ប្រចាំ​ថ្ងៃ​របស់​អ្នក​ភូមិ ព្រោះ​តារាង​តម្លៃ​ដែល​ដេញ​ថ្លៃ​ដោយ​អ្នក​ម៉ៅការ​ខ្ពស់​ជាង​តម្លៃ​ដែល​អ្នក​ភូមិ​ធ្លាប់​ធ្វើ​ដំណើរ​ជា​រៀង​រាល់​ថ្ងៃ ដោយ​ទូក​ដ​ឯកជន​ដែល​មិន​មាន​អ្នក​ម៉ៅការ។

តារាង​តម្លៃ​ឆ្លង​ទៅ​មក​ពី​កំពង់​ដ​ទទឹង ឃុំ​តាជេស និង​ឃុំ​សែប ស្រុក​កំពង់ត្រឡាច ទៅ​ឃុំ​កោះថ្កូវ ស្រុក​ជលគីរី ដែល​ដេញ​ថ្លៃ​ដោយ​អ្នក​ម៉ៅការ​ដ​ថ្មី រង​ការ​តវ៉ា​យ៉ាង​ខ្លាំង​ពី​អ្នក​ភូមិ និង​អាជ្ញាធរ​ឃុំ។

តំណាង​អ្នក​ភូមិ​កោះថ្កូវ ឈ្មោះ សារ៉េត បាន​ឲ្យ​ដឹង​នៅ​ព្រឹក​ថ្ងៃ​ទី៧ ធ្នូ ថា តារាង​តម្លៃ​ឆ្លង​ទៅ​មក​ដែល​មាន​ការ​សម្រេច​យល់​ព្រម​ពី​អាជ្ញាធរ​ខេត្ត មាន​ការ​ប៉ះពាល់​យ៉ាង​ខ្លាំង​ដល់​ជីវភាព​អ្នក​ភូមិ។ អ្នក​ភូមិ​រូប​នេះ បាន​លើក​យក​ករណី​សិស្ស​ម្នាក់​ដែល​ត្រូវ​ឆ្លង​ទៅ​មក ដើម្បី​ទៅ​រៀន​នោះ​ថា អ្នក​ភូមិ​ដែល​មាន​កូន​ឆ្លង​ដ​ទៅ​រៀន គឺ​ត្រូវ​ចំណាយ​លើស​សព្វដង​ប្រមាណ ១០​ម៉ឺន​រៀល ក្នុង​មួយ​ឆ្នាំ នេះ​មិន​ទាន់​គិត​ពី​តម្លៃ​កសិផល​ដែល​ត្រូវ​ដឹក​ឆ្លង​យក​មក​លក់​ដែល​ក្នុង​សៀវភៅ​បន្ទុក​បាន​កំណត់​តម្លៃ​លើស​ទូក​ដ​ឯកជន​ទ្វេ​ដង។

គាត់​បន្ត​ថា សកម្មភាព​វិនិយោគ​នេះ​បាន​ផ្ទុយ​ពី​គោលការណ៍​កាត់​បន្ថយ​ភាព​ក្រីក្រ​របស់​រាជ​រដ្ឋាភិបាល​ទាំង​ស្រុង៖ «កំពង់​ដ​ចាស់​គេ​មាន​ដំណើរ​ការ​ល្អ។ ចរាចរណ៍​ចេញ​ចូល​ក៏​ស្រួល ហើយ​បើ​ប្រៀបធៀប​បញ្ហា​សិស្ស​សាលា​នោះ គឺ​គេ​មាន​ការ​អនុគ្រោះ​ច្រើន ដោយ​ក្នុង​មួយ​ឆ្នាំ​គេ​យក​តែ​ស្រូវ ៤០​គីឡូ​ទេ នេះ​បើ​គិត​ជា​លុយ​ក្នុង​មួយ​ថ្ងៃ​មិន​ដល់ ១០០​រៀល​ផង។ តែ​ដល់​អ្នក​ម៉ៅការ​ផ្ដាច់​មុខ​ដ​ថ្មី​នេះ គេ​ថា​មិន​យក​លុយ​កូន​សិស្ស​ទេ តែ​គេ​យក​ថ្លៃ​កង់​មួយ​ថ្លៃ ៣០០​រៀល។ ដល់​អ៊ីចឹង យើង​គិត​មើល តើ​មួយ​ខែ​អស់​ប៉ុន្មាន ហើយ​១​ឆ្នាំ​ប៉ុន្មាន? ខ្ញុំ​ដូច​ជា​មិន​ពេញ​ចិត្ត​សោះ ចំពោះ​បញ្ហា​នេះ»

ក៏​ដូច​ជា​អ្នក​ភូមិ​ដែរ មេ​ឃុំ​តាជេស គឺ​លោក សួស ស៊ីផៃ លោក​មាន​ប្រសាសន៍​ថា លោក​មិន​គាំទ្រ​ឲ្យ​មាន​ការ​វិនិយោគ​បែប​នេះ​ទេ។ លោក​ថា លោក​កំពុង​ធ្វើ​របាយការណ៍​ស្នើសុំ​ឲ្យ​ថ្នាក់​លើ​ពិចារណា​ឡើង​វិញ​ក្នុង​ការ​បញ្ឈប់​ការ​វិនិយោគ​ដែល​មាន​ផល​ប៉ះពាល់​ដល់​ប្រជាពលរដ្ឋ​ក្រីក្រ​បែប​នេះ៖ «ជា​រឿង​មួយ​ដែល​ខ្ញុំ​អត់​បាន​ចូល​រួម​ទទួល​ខុស​ត្រូវ ហើយ​អត់​បាន​ដឹង។ ហើយ​ដល់​ថ្នាក់​លើ​ដាក់​មក​អ៊ីចឹង ឲ្យ​ខ្ញុំ​អនុវត្ត ខ្ញុំ​ដូច​ជា​មិន​យល់​ថា​ហេតុ​អី។ ខ្ញុំ​នៅ​ជាប់​ផ្ទាល់​ជាមួយ​ប្រជាពលរដ្ឋ ខ្ញុំ​ដឹង​ពី​សុខ​ទុក្ខ​ពួក​គាត់។ ឯ​អ្នក​មក​ពី​ខាង​ក្រៅ មិន​បាន​ដឹង ហើយ​ស្រាប់​តែ​ធ្វើ​ដោយ​ពុំ​មាន​ការ​ពិភាក្សា​ជាមួយ​ខ្ញុំ​ជា​អាជ្ញា។ ឥឡូវ​មាន​បញ្ហា​ការ​តវ៉ា​របស់​ប្រជាពលរដ្ឋ អ៊ីចឹង​ខ្ញុំ​មិន​ដឹង​ធ្វើ​ម៉េច បាន​ត្រឹម​តែ​រាយការណ៍​ទៅ​លើ​ឲ្យ​ពិចារណា​ឡើង​វិញ»

យ៉ាង​នេះ​ក្ដី អភិបាល​រង​ទទួល​បន្ទុក​សេដ្ឋកិច្ច និង​ការ​វិនិយោគ​ខេត្ត​កំពង់ឆ្នាំង លោក អ៊ុន សំអុល មាន​ប្រសាសន៍​ថា លោក​ទើប​តែ​ទទួល​បាន​ព័ត៌មាន​ពី​ប្រតិកម្ម​របស់​ប្រជាពលរដ្ឋ​តាម​របាយការណ៍​របស់​អាជ្ញាធរ​ឃុំ និង​ស្រុក។ លោក​ថា លោក​នឹង​ពិនិត្យ​ពី​ការ​វិនិយោគ​នេះ​ឡើង​វិញ ក្នុង​ពេល​ដ៏​ឆាប់​ខាង​មុខ​នេះ៖ «ឥឡូវ ខ្ញុំ​ឲ្យ​ខាង​ស្រុក និង​មន្ទីរ​ជំនាញ​ពិនិត្យ​មើល។ ទោះ​បី​ថា​គាត់​មាន​ច្បាប់​អនុញ្ញាត​ក៏ដោយ ក៏​ខ្ញុំ​ត្រូវ​ពិនិត្យ​ឡើង​វិញ​ពី​តម្លៃ​នៃ​សៀវភៅ​បន្ទុក​មិន​មែន​អ្នក​ម៉ៅការ​ដេញ​ថ្លៃ​បាន​ចេះ​តែ​យក​តម្លៃ​ស្រេច​តែ​ចិត្ត​នោះ​ទេ»

ប្រភព​ពី​អាជ្ញាធរ​ឃុំ​តាជេស បាន​ឲ្យ​ដឹង​ថា កំពង់​ចម្លង​ដ​ទទឹង​ឃុំ​តាជេស នេះ​ជា​ជំនួយ​របស់​ស្ថានទូត​ជប៉ុន ក្រោម​គម្រោង​គូសាណូណិ របស់​ប្រជាជន និង​រដ្ឋាភិបាល​ជប៉ុន តាម​រយៈ​ជំនួយ​ឧបត្ថម្ភ​ទ្រង់ទ្រាយ​តូច​សន្តិសុខ​មនុស្ស​ជាតិ បាន​ជួយ​សាង​សង់ ចំណាយ​អស់​ប្រាក់​ជាង ១០​ម៉ឺន​ដុល្លារ និង​បាន​សាង​សង់​រួច​រាល់​កាល​ពី​ថ្ងៃ​ទី៣ ខែ​សីហា ឆ្នាំ​២០១២ កន្លង​ទៅ​នេះ។ ស្រាប់​តែ​ឥឡូវ មាន​មនុស្ស​មួយ​ក្រុម​មក​ចង់​ដណ្ដើម​ផល​ប្រយោជន៍​ពី​ប្រជាពលរដ្ឋ​ទៅ​វិញ ដោយ​យក​លេស​ថា​ចង់​វិនិយោគ​សាង​សង់​កំពង់​ចម្លង​ដ​ទទឹង​ពី​ឃុំ​តាជេស ទៅ​ឃុំ​កោះថ្កូវ ទៀត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (1)
  • បោះពុម្ព
  • ចែករំលែក
  • អ៊ីម៉ែល

កូនខ្មែរ

ពី កំពង់ឆ្នាំង

សំណងនៅថ្មីសន្លាងតែម្តង ដូចនេះមិនចាំបាច់ចំណាយលុយធ្វើអីបើជប៉ុនធ្វើអស់១០ម៉ឺនដុល្លារហើយហ្នឹង!!!ហេសហេ!!! ល្បិចជនកររាស្រ្តរបស់មន្ត្រីតេជោសែន!!! កុំសម្បីដៃពេកណាអស់លោក បោះឆ្នោតជិតមកដល់ហើយ ខំប្រឹងឡើងពីព្រោះពេលវេលាកេងប្រវ័ញខិតជិតអស់មែនទែនហើយទាន!!!

Dec 10, 2012 04:41 AM