សាក្សីដែលបានឃើញហេតុការណ៏ លោក ឆាយ ធី បញ្ជាក់ ៖ «ប៉ូលិសជិត១០នាក់ស្លៀកឯកសណ្ឋានហើយបញ្ឆេះឡានរង់ចាំ។ ពេលនោះប៉ូលិស៧-៨នាក់ចូលទៅក្នុងបន្ទប់តុលាការ។ ឮសូរ ស្វិន វេវ ហើយនិង យ៉ាង ថន ស្រែកយ៉ាងខ្លាំង "ជួយផងៗ អយុត្តិធម៌ណាស់" ស្រែកផង យំផង។ ពេលនោះសហគមន៍គ្នាគាត់បះបោរពីខាងក្រៅចូល ពេលនោះប៉ូលិសបានរារាំង សហគមន៍ក៏យកដំបងកាន់រំដោះ ហើយយក ស្វិន វេវ ដាក់លើម៉ូតូជិះទៅ»។
ចំណែកមន្ត្រីសមាគមអាដហុកខេត្តរតនគិរីដែលកំពុងមានវត្តមាននៅការិយាល័យ លោក ង៉ែត ណារ៉ា បញ្ជាក់ថា បានព្យាយាមរត់ចូលគេហដ្ឋានមួយខ្នងដែលនៅជាប់ស្នាក់ការសមាគម ក៏ប៉ុន្តែប៉ូលិសប្រមាណ១០នាក់បានតាមចូលទៅក្នុងគេហដ្ឋាននោះដោយស្រែកថាចោរ ហើយវាយសហគមន៍ដោយស្វ័យកាំភ្លើងទើបចាប់ខ្លួនយកមកកាន់ស្នងការដ្ឋានប៉ូលិស។
លោក ង៉ែត ណារ៉ បានឲ្យដឹងថា ៖ «ប៉ូលិសប្រើស្នាប់ភ្លើងរហូតដល់មានការយកដំបងធំណាស់ យកទៅវ៉ៃភ្លៅ ឡើងគាត់ស្រែកថា "អ៊ូយៗ"»។
តាមការពិនិត្យឃើញជាក់ស្តែងប្រជាពលរដ្ឋជិតទីកើតហេតុមានការច្រួលច្របល់ភិតភ័យអស់រយៈពេលប្រមាណមួយម៉ោងនៅរសៀលម៉ោងប្រមាណ៥ ថ្ងៃព្រហស្បតិ៍ ទី២៧ វិច្ឆិកា ឆ្នាំ២០០៨ ហើយប៉ូលិសបានដាក់កម្លាំងរាំងខ្ទប់របងស្នងការដ្ឋានមិនឲ្យជនណាម្នាក់ចូលទៅក្នុងបានឡើយ។
វិទ្យុអាស៊ីសេរីបានព្យាយាមតាំងពីថ្ងៃកើតហេតុដើម្បីសុំកិច្ចអធិប្បាយពីមន្ត្រីប៉ូលិសនិងមន្ត្រីតុលាការខេត្តជុំវិញហេតុការណ៍នេះ តែត្រូវបានបដិសេធ។
ចំណែកនៅថ្ងៃសុក្រនេះនៅការិយាល័យព្រះរាជអាជ្ញារងខេត្តរតនគិរី លោក រស់ សារាំ បដិសេធដោយថាជាប់រវល់ ហើយស្នងការប៉ូលិស លោក រាយ រ៉ៃ និងស្នងការស្តីទី លោក ចៅ នាង ក៏ដូចគ្នា។
យ៉ាងនេះក្តីមន្ត្រីអាដហុកបញ្ជាក់ថា មន្ត្រីប៉ូលិសម្នាក់រងរបួស តំណាងសហគមន៍ លោក យ៉ាង ថន និងជាសកម្មជនសមាគមអាដហុកផងដែរត្រូវចាប់ខ្លួន ចំណែកប្រជាសហគមន៍ជាង៤០នាក់ដែលធ្វើការបះបោរបានរត់គេចខ្លួន។
មន្ត្រីសម្របសម្រួលសមាគមអាដហុកខេត្តរតនគិរី លោក ប៉ែន ប៊ុណ្ណារ៍ បានហៅការចាប់ខ្លួនអ្នកភូមិគឺជាអំពើអយុត្តិធម៌ ហើយទាមទារឲ្យមានការថ្កោលទោសមន្ត្រីតុលាការនោះ។
លោក ប៉ែន ប៊ុណ្ណារ៍ បានមានប្រសាសន៍ថា ៖ «ក្រុមហ៊ុនហ្នឹងឈូសឆាយដី មិនចាត់ការអ្នកដែលកាប់រានដីព្រៃ បែរជាមកចាប់ខ្លួនសហគមន៍ ក៏ដូចជាសកម្មជនរបស់អាដហុក។ លោកខិតខំការពារដីព្រៃដែលជាដីរដ្ឋ ហើយជាពិសេសដីសមូហភាពរបស់គាត់ផង»។
ប្រជាសហគមន៍ភូមិប៉ាងតាងជាង១០០គ្រួសារបានប្តឹងក្រុមហ៊ុនឌីអ៊ឹមហ្រ្គូបដែលបានប្រើប្រាស់មន្ត្រីកងអង្គរក្សលោកនាយករដ្ឋមន្ត្រី ហ៊ុន សែន រំលោភឈូសឆាយដីសមូហភាពរបស់ប្រជាសហគមន៍និងដីព្រៃឈើជាង២០០ហិកតារ តាំងពីឆ្នាំ២០០៥ ក៏ប៉ុន្តែពុំមានចំណាត់ការអ្វីឡើយ។
ប្រជាសហគមន៍និយាយថា តុលាការប្រើវិធីចាប់ខ្លួនតំណាងអ្នកភូមិដើម្បីបំបាក់ស្មារតី ហើយនៅព្រឹកថ្ងៃសុក្រនេះតាមអ្នកភូមិនិយាយឲ្យដឹងថា ប្រជាសហគមន៍ជនជាតិដើមភូមិប៉ាតាងទាំងអស់គ្នាគ្រោងលើកគ្នាមកតវ៉ាសុំឲ្យមានការដោះលែងតំណាងពួកគេ ក៏ប៉ុន្តែត្រូវអាក់ខានដោយសារមានការរារាំងពីអាជ្ញាធរឃុំ៕