អង្គភាព​គាំពារ​ជន​រងគ្រោះ​នឹង​រៀបចំ​វេទិកា​ស្ដីពី​ដំណើរ​ការ​របស់​សាលាក្ដី​ខ្មែរ​ក្រហម

នៅ​គ្រា​ដែល​សាលាក្ដី​ខ្មែរ​ក្រហម កំពុង​ដំណើរ​ការ​នីតិវិធី​កាត់​ទោស​អតីត​មេ​ដឹកនាំ​ខ្មែរ​ក្រហម លើ​សំណុំ​រឿង ០០២ នោះ គឺ​មាន​ដើម​បណ្ដឹង​រដ្ឋប្បវេណី​ជាច្រើន មិន​សូវ​ដឹង​អំពី​នីតិវិធី​កាត់​ទោស​របស់​តុលាការ និង​អំពី​សិទ្ធិ​របស់​ខ្លួន​ទេ ទោះ​បី​ជា​អង្គភាព​គាំពារ​ជន​រងគ្រោះ​បាន​រៀបចំ​វេទិកា​ថ្នាក់​តំបន់ ដើម្បី​ណែនាំ និង​ផ្ដល់​ព័ត៌មាន​អំពី​ការ​វិវឌ្ឍ​របស់​សាលាក្ដី​កន្លង​មក​ក៏ដោយ។
ដោយ ទីន ហ្សាការីយ៉ា
2012-11-13
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ជន​រង​គ្រោះ​ ខ្មែរ​ក្រហម ៣០៥
ប្រជាពលរដ្ឋ​រង​គ្រោះ​នៅ​ក្នុង​របប​ខ្មែរ​ក្រហម​មក​ពី​ខេត្ត​កំពត និង​ខេត្ត​កំពង់ចាម ថត​រូប​អនុស្សាវរីយ៍​ជាមួយ​មន្ត្រី​សាលាក្ដី​ខ្មែរ​ក្រហម នៅ​សាល​សវនាការ​នៃ​សាលាក្ដី​ខ្មែរ​ក្រហម នា​រាជធានី​ភ្នំពេញ កាល​ពី​ថ្ងៃ​ទី​៣០ ខែ​ធ្នូ ឆ្នាំ​២០១០។
RFA

អង្គភាព​គាំពារ​ជន​រងគ្រោះ​នៃ​អង្គ​ជំនុំ​ជម្រះ​វិសាមញ្ញ​ក្នុង​តុលាការ​កម្ពុជា នឹង​រៀបចំ​វេទិកា​ថ្នាក់​តំបន់​លើក​ទី៤ នៅ​ខេត្ត​ព្រះសីហនុ ដើម្បី​ផ្ដល់​ព័ត៌មាន​ថ្មីៗ​អំពី​ដំណើរ​វិវឌ្ឍន៍​របស់​សាលាក្ដី​ខ្មែរ​ក្រហម ដល់​ដើម​បណ្ដឹង​រដ្ឋប្បវេណី​ប្រមាណ ២០០​នាក់ នៅ​ថ្ងៃ​ទី១៦ វិច្ឆិកា ខាង​មុខ។

មន្ត្រី​ទទួល​បន្ទុក​នៃ​អង្គភាព​គាំពារ​ជន​រងគ្រោះ​នៃ​សាលាក្ដី​ខ្មែរ​ក្រហម លោក អ៊ឹម សុភា មាន​ប្រសាសន៍​ថា ការ​រៀបចំ​វេទិកា​នេះ សម្រាប់​ឲ្យ​ដើម​បណ្ដឹង​រដ្ឋប្បវេណី​ប្រមាណ ២០០​នាក់ ដែល​មិន​ធ្លាប់​បាន​ចូល​រួម​ស្ដាប់​សវនាការ​នៃ​សំណុំ​រឿង​លេខ​០០២ នៅ​ក្នុង​ឆ្នាំ​២០១២ ដែល​មក​ពី ៤​ខេត្ត រួម​មាន​ខេត្ត​ព្រះសីហនុ កំពត កោះកុង និង​ខេត្ត​កំពង់ស្ពឺ។ លោក​បញ្ជាក់​ថា សាលាក្ដី​មាន​លទ្ធភាព​តិច​តូច​បំផុត សម្រាប់​អញ្ជើញ​ដើម​បណ្ដឹង​រដ្ឋប្បវេណី​មក​ស្ដាប់​ផ្ទាល់​នៅ​ក្នុង​សវនាការ។

លោក អ៊ឹម សុភា អះអាង​ថា ការ​ធ្វើ​វេទិកា​នេះ​មាន​គោល​បំណង​សំខាន់​ឲ្យ​ដើម​បណ្ដឹង​រដ្ឋប្បវេណី​ទទួល​បាន​ការ​ពន្យល់​ពី​មេធាវី​របស់​ខ្លួន នូវ​ដំណើរ​ការ​នៃ​ការ​បំបែក​នីតិវិធី​សំណុំ​រឿង​០០២ និង​ដើម្បី​ឲ្យ​ដើម​បណ្ដឹង​ទាំង​នោះ​ប្រើប្រាស់​សិទ្ធិ​របស់​ខ្លួន៖ «យើង​បាន​រៀបចំ​បង្ក​ឱកាស​ហ្នឹង មិន​មែន​ត្រឹម​តែ​វេទិកា​ថ្នាក់​តំបន់​ហ្នឹង ជា​ប្រចាំ អ្នក​ត្រូវ​មក​ផ្ដល់​សក្ខីកម្ម​ហ្នឹង យើង​រៀប​ចំ​ដាច់​ដោយ​ឡែក»

ទោះ​បី​ជា​យ៉ាង​នេះ​ក្ដី មេធាវី​ដើម​បណ្ដឹង​រដ្ឋប្បវេណី លោក​មេធាវី ហុង គឹមសួន បាន​បំភ្លឺ​ថា នៅ​មាន​ឧបសគ្គ​ជាច្រើន​ចំពោះ​ដើម​បណ្ដឹង​រដ្ឋប្បវេណី ដូច​ជា​ការ​តាម​មិន​ទាន់​អំពី​ដំណើរ​ការ​របស់​សាលាក្ដី ការ​មិន​យល់​អំពី​នីតិវិធី​របស់​តុលាការ ឬ​ពី​សិទ្ធិ​របស់​ខ្លួន​ជាដើម។ លោក​បញ្ជាក់​ទៀត​ថា មូលហេតុ​សំខាន់ បើ​សាលាក្ដី​មាន​ថវិកា​ដើម្បី​យក​ដើម​បណ្ដឹង​រដ្ឋប្បវេណី​មក​ស្ដាប់​សវនាការ​ដោយ​ផ្ទាល់ ជា​ការ​ប្រសើរ៖ «ដំណើរ​ការ​ខ្វះ​ថវិកា ដែល​ពួក​គាត់​អត់​មក មួយ​ទៀត ពួក​គាត់​មិន​បាន​ដឹង​ទេ សូម្បី​តែ​ករណី​០០១ ឌុច ហ្នឹង ក៏​មិន​បាន​ផ្សាយ​បន្ត​ផ្ទាល់​ឲ្យ​ដឹង​ដែរ។ ដូច្នេះ ថា​មិន​ថា ដើម​បណ្ដឹង​រដ្ឋប្បវេណី ឬ​ប្រជាពលរដ្ឋ​ទូទៅ​ទេ»

ការ​រៀបចំ​វេទិកា​ថ្នាក់​តំបន់​របស់​អង្គភាព​គាំពារ​ជន​រងគ្រោះ​នេះ នៅ​គ្រា​ដែល​សាលាក្ដី​ខ្មែរ​ក្រហម កំពុង​ដំណើរ​ការ​ជំនុំ​ជម្រះ​សំណុំ​រឿង​លេខ​០០២ លើ​អ្នក​ទទួល​ខុស​ត្រូវ​ជាន់​ខ្ពស់​នៅ​ក្នុង​របប​ខ្មែរ​ក្រហម មាន នួន ជា អៀង សារី និង​ខៀវ សំផន។ ការ​ជំនុំ​ជម្រះ​សេចក្ដី​លើ​មេ​ដឹកនាំ​ខ្មែរ​ក្រហម​ទាំង​នេះ ផ្ដល់​ឱកាស​ដ៏​សំខាន់​ជា​ប្រវត្តិសាស្ត្រ​មួយ​ក្នុង​ការ​បង្ហាញ​ឲ្យ​ឃើញ​ថា របប​កម្ពុជា​ប្រជាធិបតេយ្យ​បាន​ធ្វើ​ការ​សម្រេច​ចិត្ត​ជាច្រើន ដែល​បង្ក​ឲ្យ​មាន​ការ​ស្លាប់​ប្រជាពលរដ្ឋ​ប្រមាណ ២លាន​នាក់។

សេចក្ដី​ប្រកាស​ព័ត៌មាន​របស់​អង្គភាព​គាំពារ​ជន​រងគ្រោះ​នៃ​អង្គ​ជំនុំ​ជម្រះ​វិសាមញ្ញ​ក្នុង​តុលាការ​កម្ពុជា ចេញ​ផ្សាយ​នៅ​ថ្ងៃ​ទី១៣ វិច្ឆិកា សរសេរ​ថា ដើម​បណ្ដឹង​រដ្ឋប្បវេណី​ទាំង​អស់​មាន ៣.៨៦៤​នាក់។ អង្គភាព​គាំពារ​ជន​រងគ្រោះ មាន​ផែនការ​រៀបចំ​វេទិកា​ថ្នាក់​តំបន់​ចំនួន​៨ នៅ​ឆ្នាំ​២០១២ និង​ឆ្នាំ​២០១៣ ក្នុង​គម្រោង​ការ​ចូល​រួម​របស់​ជន​រងគ្រោះ ប្រកប​ដោយ​អត្ថន័យ​ក្នុង​នីតិវិធី​សាលាក្ដី​ខ្មែរ​ក្រហម៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល