កម្មការិនីម្នាក់បានធ្លាក់ពីលើផ្ទះថ្មជាន់ទី២ ក្នុងពេលកំពុងព្យាយាមរត់គេចខ្លួនពីផ្ទះក្រុមហ៊ុនមួយកន្លែង នៅម៉ោង៥ទាបភ្លឺ ថ្ងៃទី៥ កញ្ញា នៅភូមិទឹកថ្លា សង្កាត់ទឹកថ្លា ខណ្ឌសែនសុខ ក្រុងភ្នំពេញ។ ក្រុមអាជ្ញាធរមូលដ្ឋានឲ្យដឹងថា ក្រុមហ៊ុននោះគឺក្រុមហ៊ុន វី.ស៊ី.មេនផៅវើ (V.C Main Power) នាំកម្មករខ្មែរទៅធ្វើការនៅប្រទេសម៉ាឡេស៊ី។
ប្រភពដែលដឹងហេតុការណ៍នេះគឺ លោក សួន សុផលមុន្នី រស់នៅក្បែរកន្លែងកើតហេតុនោះ រៀបរាប់ហេតុការណ៍ដែលបានកើតឡើងពេលទាបភ្លឺនេះ ៖ «ក្រុមហ៊ុន វី.ស៊ី.មេនផៅវើ (V.C Main Power) នាំកម្មករទៅធ្វើការនៅប្រទេសម៉ាឡេស៊ី Malaysia។ កន្លងទៅនិងថ្មីៗនេះ មនុស្សដែលយកមកឲ្យធ្វើការនឹង ធ្វើបាបមនុស្សពេក។ បិទសិទ្ធសេរីភាព វាចាក់សោមិនឲ្យចេញក្រៅ។ ដល់ពេលវាអបនឹងទុយយោ ដល់ពេលឱបអត់ជាប់ទុយយោ ធ្លាក់មកក្រោម រួចស្រែកថា អូយជួយផង! រួចក៏សន្លប់បាត់ទៅ។ ពេលនោះបងប្រុសម្នាក់នៅផ្ទះជិតនឹង ក៏ស្រែកប្រាប់សន្តិសុខយាមនៅទីនឹងថា ម៉េចក៏មិនយកទៅពេទ្យ ងាប់ឥឡូវហើយ! វាក៏ដឹកមនុស្សនឹងយកទៅពេទ្យ ប៉ុន្តែមកដល់ឥឡូវនេះមិនដឹងថា នាងនឹងស្លាប់ឬរស់ទេ។ ប៉ុន្តែ ពេលធ្លាក់នឹងមានឈាមហើយបែកក្បាល»។
អាជ្ញាធរមូលដ្ឋានឲ្យដឹងថា ប៉ូលិសបានចុះទៅធ្វើកំណត់ហេតុករណីនេះ តែម្ចាស់ក្រុមហ៊ុនមិននៅ ហើយគេមិនទាន់ដឹងអត្តសញ្ញាណជនរងគ្រោះនៅឡើយទេ ហើយព័ត៌មានពីមន្ទីរជនរងគ្រោះ បញ្ជូនទៅព្យាបាលនោះក៏មិនទាន់ដឹងដែរ។ ប៉ូលិសកំពុងបន្តស៊ើបអង្កេត។
លោក ឃួន ស្រេង អភិបាលខណ្ឌ សែន សុខ បញ្ជាក់ថា ក្រុមហ៊ុន វី.ស៊ី.មេនផៅវើ ជាក្រុមហ៊ុនស្របច្បាប់ ហើយមានកន្លែងឲ្យកម្មករស្នាក់នៅត្រឹមត្រូវ ក៏ប៉ុន្តែ លោកឆ្ងល់ថា កន្លងមកចេះតែមានកម្មករជាច្រើនព្យាយាមរត់គេចចេញពីផ្ទះក្រុមហ៊ុន ដោយលោតចេញពីជាន់លើមកដីយ៉ាងគ្រោះថ្នាក់បំផុត។ លោកថា លោកនឹងស៊ើបអង្កេតករណីនេះជាបន្ទាន់ ៖ «ខ្ញុំនឹងអញ្ជើញក្រុមហ៊ុននេះមកធ្វើកំណត់ហេតុមួយដើម្បីធ្វើសេចក្ដីរាយការណ៍ជូនអភិបាលរាជធានីភ្នំពេញ។ ជុំវិញបញ្ហាកន្លងមកនេះ ក្រុមហ៊ុននេះតែងតែមានបញ្ហាច្រើនណាស់ កន្លងមកនេះ ការលោតការអីនឹងវាមានជារឿយៗ»។
វិទ្យុអាស៊ីសេរី មិនអាចទាក់ទងតំណាងក្រុមហ៊ុន វី.ស៊ី.មេនផៅវើ បានទេនៅថ្ងៃទី៥ កញ្ញា ដើម្បីសុំការបញ្ជាក់បន្ថែម។
ក្នុងរយៈពេលកន្លងមក មានសេចក្ដីរាយការណ៍អំពីរឿងអាស្រូវជាច្រើនពីអង្គការសិទ្ធិមនុស្សដូចករណីនេះដែរ ស្ដីពីកម្មករខ្មែរទៅធ្វើការនៅក្រៅប្រទេស ត្រូវគេបោកប្រាស់និងរំលោភសិទ្ធិសេរីភាព ស្ទើរស្លាប់ស្ទើររស់ ហើយថ្មីៗនេះ មានកម្មការិនីម្នាក់ ត្រូវអង្គការក្រៅរដ្ឋាភិបាលជួយអន្តរាគមន៍ ឲ្យត្រឡប់ទៅផ្ទះវិញ បន្ទាប់ពីគេលួចផ្លោះរបងរត់ចេញពីក្រុមហ៊ុនមួយ ដែលគេឃុំឃាំង មិនឲ្យហូបចុកគ្រប់គ្រាន់ នៅមុនពេលគេបញ្ជូនទៅធ្វើការនៅប្រទេសម៉ាឡេស៊ីនោះ៕