កម្មករកាត់ដេរចំនួនជាង១០០០នាក់នៃរោងចក្រតាក់ហ្វាត នៅថៃ្ងសុក្រទី៦ ខែវិច្ឆិកា នេះ បានធ្វើបាតុកម្មដោយសន្តិវិធីនៅខាងមុខសភាជាតិ ដើម្បីសុំកិច្ចអន្តរាគមន៍ដោះស្រាយឲ្យថៅកែរោងចក្រផ្តាច់កិច្ចសន្យាការងាររបស់កម្មករសរុប១.៨២៣នាក់ និងបើកប្រាក់ខែបំណាច់ពីការងារ ចំពោះអ្វីដែលក្រុមកម្មករទាំងនោះកំពុងតែរងការព្យួរការងាររយៈពេលជិត១ឆ្នាំមកហើយ និងបន្តព្យួរការងារនោះបន្តទៀត។
កម្មករឈ្មោះ ឆឹង សុស្រីលី ជាកម្មករនៃរោងចក្រតាក់ហ្វាត មកពីខេត្តកណ្តាល ដែលបានធ្វើជាកម្មករនៅក្នុងរោងចក្រនេះតាំងពីឆ្នាំ១៩៩៧មក នៅក្នុងចំណោមកម្មករជាង១.០០០នាក់ មកសំដែងការតវ៉ានោះបានថែ្លងថា ៖ «កន្លងមកក្រុមហ៊ុនព្យួរការងារពួកខ្ញុំអស់រយៈពេលជាច្រើនខែមកហើយ ព្យួរជិតមួយឆ្នាំហើយ គាត់នៅតែឲ្យពួកខ្ញុំ ១០ដុល្លារ។ សូមឲ្យគាត់បើកផ្ដាច់កិច្ចសន្យា គុណលុយឲ្យពួកខ្ញុំទាំងអស់គ្នាដែលជាកម្មករទាំងអស់គ្នា...»។
លោក មាស សម្ផស្ស ជាប្រធានជាប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (CCAWDU) នៅរោងចក្រតាក់ហ្វាត ដែលបានដឹកនាំតំណាងកម្មករចូលជួបមន្រ្តីសភាជាតិ និងបានប្រគល់ញាត្តិតវ៉ានោះ បានមានប្រសាសន៍ថា តំណាងរបស់សភាជាតិបានទទួលញត្តិនោះហើយ។
លោក មាស សម្ផស្ស មានប្រសាសន៍ដូច្នេះ ៖ «ជួបជាមួយនឹងជំទាវ ហ៊ុន សុដារី គាត់បានមានប្រសាសន៍ថា គាត់បានសិក្សាអំពីតាក់ហ្វាតយូរហើយ គាត់ដឹងព័ត៌មាននៅតាក់ហ្វាតហើយ ហើយគាត់ក៏បានទូរស័ព្ទតាំងពីព្រឹកប្រាប់ទៅក្រសួងការងារ ដើម្បីឲ្យក្រសួងការងារជួយអន្តរាគមន៍អំពីបញ្ហាហ្នឹង ហើយគាត់នឹងជំរុញញត្តិហ្នឹងទៅឲ្យក្រសួងការងារនៅថ្ងៃហ្នឹងតែម្ដង ហើយនៅខាងក្រសួងមហាផ្ទៃគាត់ទាក់ទងមកខ្ញុំថា សុំផ្ដល់ព័ត៌មានឲ្យគាត់ បើសិនជារោងចក្រហ្នឹងមានបញ្ហាអីមិនស្រួល គាត់នឹងសុំសាលដីកាពីតុលាការ នឹងបិទរោងចក្រហ្នឹងកុំឲ្យនាំសម្ភារៈចេញ»។
មានក្រុមសមត្ថកិច្ចនគរបាលចម្រុះជាច្រើននាក់នៅជុំវិញក្រុមកម្មករតវ៉ានោះ។
មន្រ្តីនគរបាលចរាចរណ៍ម្នាក់បានថែ្លងថា ៖ «(ការពារ)ចរាចរណ៍ សណ្ដាប់ធ្នាប់ ហើយកុំឲ្យវាមានបញ្ហាអីផ្សេងទៀត»។
មិនអាចទាក់ទងតំណាងរោងចក្រតាក់ហ្វាតបានទេនៅថ្ងៃសុក្រ ទី៦ ខែវិច្ឆិកា ដើម្បីសុំការពន្យល់ ប៉ុន្តែតំណាងម្នាក់នៃរោងចក្រនេះ ធ្លាប់បានបញ្ជាក់កាលពីពេលថ្មីៗនេះថា រោងចក្រនេះមិនបានទទួលការបញ្ជាទិញតាំងឆ្នាំ២០០៧មក ហើយរោងចក្រនេះកំពុងតែក្ស័យធន។
ប្រភពពីកម្មករនិងសហជីពកម្មករបានឲ្យដឹងថា នៅគ្រាដែលរោងចក្រកំពុងតែព្យួរការងារកម្មករជាច្រើនខែមកហើយនោះ គេបានលក់ក្រណាត់ លក់ម៉ាស៊ីនដេរ និងម្ជុលពីឃ្លាំងអស់ ហើយរោងចក្របានដឹកឈើប្រណិតចូលទៅវិញ ៖ «ឈើប្រណីតៗចំនួន១២ឡាន ស្មើនឹង២.០០០គូបជាង។ អត់មានខោមានអាវអីកាត់ ទៅជាមានឈើវិញ អ៊ីចឹងពួកខ្ញុំប្លែកចិត្តត្រង់ហ្នឹងថា ហេតុអីក៏ក្រុមហ៊ុនកាត់ដេរមានឈើនៅក្នុងហ្នឹង?»។
តំណាងសហជីពកម្មករកាត់ដេរ CCAWDU បានព្រមានឲ្យដឹងថា តំណាងកម្មករនិងសហជីពគ្រោងនឹងប្តឹងទៅតុលាការនាពេលឆាប់ៗនេះ ដើម្បីរឹបអូសទ្រព្យសម្បតិ្តរបស់រោងចក្រ នៅគ្រាដែលញត្តិនានាទៅសភាជាតិ ខុទ្ទកាល័យរបស់លោកនាយករដ្ឋមន្រ្តី ហ៊ុន សែន និងក្រុមប្រឹក្សាអាជ្ញាកណ្តាលមិនត្រូវបានដោះស្រាយឲ្យជ្រះស្រទ្បះនៅទ្បើយទេ៕