ម្ដាយពលការិនីបម្រើការនៅម៉ាឡេស៊ី សុំឲ្យអាដហុក ជួយស្វែងរកកូនស្រីរបស់គាត់

ស្ត្រីមួយរូបមានកូនទៅធ្វើការបម្រើតាមផ្ទះនៅប្រទេសម៉ាឡេស៊ី បានសុំឲ្យអង្គការការពារសិទ្ធិមនុស្ស ឈ្មោះ អាដហុក (Adhoc) នៅខេត្តព្រះវិហារ ជួយរកកូនស្រីរបស់គាត់ ដែលបាត់ដំណឹងចំនួនជិត២ឆ្នាំមកហើយ។

ដោយ កែវ និមល
2012-08-15

h081512us.mp3

១៣-សីហា-២០១២៖ អ្នកស្រី ធឿន ហឿន រស់នៅភូមិដំណាក់ ឃុំកំពង់ប្រណាក ស្រុកត្បែងមានជ័យ ខេត្តព្រះវិហារ គាត់បាត់ដំណឹងកូនទៅធ្វើការនៅម៉ាឡេស៊ី ជិត២ឆ្នាំមកហើយ។

RFA/Keo Nimol

បច្ចុប្បន្ននេះ ក្រុមហ៊ុនដែលជ្រើសរើសកូនស្រីនោះទៅធ្វើការ មិនឆ្លើយតបចំពោះសំណួរផ្សេងៗទាក់ទងជាមួយកូនគាត់ទៀតឡើយ។

ស្ត្រីមួយរូបឈ្មោះ ធឿន ហឿន រស់នៅភូមិដំណាក់ ឃុំកំពង់ប្រណាក ស្រុកត្បែងមានជ័យ ខេត្តព្រះវិហារ បានសុំឲ្យអង្គការការពារសិទ្ធិមនុស្ស និងអាជ្ញាធរគ្រប់ជាន់ថ្នាក់ ជួយរកព័ត៌មានទាក់ទងកូនស្រីរបស់គាត់ឈ្មោះ ជិន តាំងយូ អាយុ១៩ឆ្នាំ ដែលបានទៅធ្វើការនៅប្រទេសម៉ាឡេស៊ី តាំងពីខែតុលា ឆ្នាំ២០១០។

អ្នកស្រី ធឿន ហឿន បានរៀបរាប់ឲ្យដឹងថា តាំងពីកូនអ្នកស្រីឡើងយន្តហោះទៅធ្វើការនៅប្រទេសម៉ាឡេស៊ី កាលពីខែតុលា ឆ្នាំ២០១០ កន្លងទៅ អ្នកស្រីមិនដែលបានទទួលដំណឹងពីកូនស្រីរបស់គាត់ឡើយ។ គាត់មិនដឹងថា កូនស្រីរបស់គាត់មានស្ថានភាពរស់នៅយ៉ាងណាឡើយ ហើយមិនដឹងថា តើនាងស្លាប់ ឬរស់ទេ។

អ្នកស្រី ធឿន ហឿន បានឲ្យដឹងថា កូនស្រីរបស់គាត់ឈ្មោះ ជិន តាំងយូ នេះមានអត្តលេខអិលអេច១៦៣ (163LH) ទៅធ្វើការនៅប្រទេសម៉ាឡេស៊ី តាមរយៈក្រុមហ៊ុនជ្រើសរើសពលករឈ្មោះ ហ្វីលីម៉រ (Philimore)។ ការទៅធ្វើការបម្រើតាមផ្ទះនៅម៉ាឡេស៊ី នេះ គេឲ្យប្រាក់ខែចំនួន១៨០ដុល្លារ ក្នុងមួយខែ។ ប៉ុន្តែ តាំងពីបាត់ដំណឹងកូនមក អ្នកស្រីបានសួរតំណាងក្រុមហ៊ុនជាច្រើនលើក តែក្រុមហ៊ុនមិនឆ្លើយតបឡើយ។

អ្នកស្រី ធឿន ហឿន បានឲ្យដឹងថា មានក្មេងស្រីក្នុងភូមិជាច្រើននាក់ បានទៅធ្វើការនៅម៉ាឡេស៊ី ដូចកូនស្រីគាត់ដែរ តែពួកគេបានមកវិញអស់ហើយ។ គាត់បានសួរដំណឹងពីកូនស្រីគាត់ តាមក្មេងក្នុងភូមិដែរ តែមិនមានអ្នកណាដឹងឡើយ។

កញ្ញា ហ៊ូ ម៉ាបូន្នី បុគ្គលិកអង្កេតស្ត្រីរបស់អង្គការការពារសិទ្ធិមនុស្សអាដហុក ខេត្តព្រះវិហារ មានប្រសាសន៍ថា ក្រោយទទួលពាក្យសុំឲ្យជួយរកកូននេះ អង្គការការពារសិទ្ធិមនុស្សអាដហុក នឹងទាក់ទងជាមួយអង្គការមិនមែនរដ្ឋាភិបាលនានា និងអាជ្ញាធរ ដើម្បីស្វែងរកព័ត៌មានទាក់ទងពលករ ជិន តាំងយូ នេះ។

អ្នកស្រី ប្រាំង ធីតា ប្រធានការិយាល័យប្រឆាំងការជួញដូរនៅខេត្តព្រះវិហារ បានជំរុញឲ្យម្តាយរបស់នារី ជិន តាំងយូ ត្រូវតែទៅទាក់ទងក្រុមហ៊ុនដោយផ្ទាល់ ដើម្បីស្វែងរកព័ត៌មានពីកូនរបស់ខ្លួន។ ចំណែកការិយាល័យអ្នកស្រី នឹងបញ្ជូនព័ត៌មានតាមខ្សែរយៈ ដើម្បីរកកូនស្រីឈ្មោះ ជិន តាំងយូ នោះដែរ។

ស្ត្រីមួយរូបដែលអះអាងថា ជាបុគ្គលិកក្រុមហ៊ុន ហ្វីលីម៉រ នៅក្រុងភ្នំពេញ ទទួលបន្ទុកខាងព័ត៌មាន តែសុំមិនចេញឈ្មោះ បានឲ្យដឹងថា អ្នកស្រីនឹងខិតខំទាក់ទងជាមួយតំណាងក្រុមហ៊ុននៅប្រទេសម៉ាឡេស៊ី ដើម្បីស៊ើបសួររកដំណឹងពលការិនី ជិន តាំងយូ ដើម្បីផ្តល់ព័ត៌មានឲ្យក្រុមគ្រួសារបានដឹងអំពីសុខទុក្ខរបស់នាង។

ទោះបីមានការធានាថា ក្រុមហ៊ុននឹងស្វែងរកព័ត៌មានក៏ដោយ ក៏អ្នកស្រី ធឿន ហឿន ជាម្តាយពលការិនី ជិន តាំងយូ មិនទាន់ជឿថា ក្រុមហ៊ុនអាចផ្តល់ដំណឹងឲ្យអ្នកស្រីបានពិតប្រាកដឡើយ ពីព្រោះកន្លងមកជិត២ឆ្នាំមកហើយ អ្នកស្រីបានទាក់ទងក្រុមហ៊ុនជាច្រើនលើកមកហើយ តែមិនបានទទួលព័ត៌មានសុខទុក្ខកូនអ្នកស្រីឡើយ។

លោក មឿន តុលា ប្រធានកម្មវិធីសិទ្ធិការងារ នៃមជ្ឈមណ្ឌលអប់រំច្បាប់សម្រាប់សហគមន៍ បានឲ្យដឹងថា គេអាចរកដំណឹងពីពលករឈ្មោះ ជិន តាំងយូ ដែលទៅធ្វើការនៅប្រទេសម៉ាឡេស៊ី បាន បើសិនជាគេដឹងអំពីអត្តលេខក្រុមហ៊ុនរបស់នាង និងថ្ងៃចេញដំណើរពីប្រទេសកម្ពុជាទៅប្រទេសម៉ាឡេស៊ី។

ប្រភពអង្គការអាដហុក នៅខេត្តព្រះវិហារ បានឲ្យដឹងថា គិតចាប់តាំងពីខែមករា មកទល់ខែកក្កដា ឆ្នាំ២០១២ នេះ មានប្រជាពលរដ្ឋមកប្ដឹងការបាត់ដំណឹងកូនទៅធ្វើការនៅបរទេស និងការជួញដូរនានាមានចំនួន១៣ករណីហើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។