ឪពុក​ម្ដាយ​ពលករ​ចោទ​ក្រុមហ៊ុន​២ ថា​មិន​ទទួល​ខុស​ត្រូវ

ឪពុក​ម្ដាយ​គ្រួសារ​របស់​ពលករ​ខ្មែរ​ទៅ​ធ្វើ​ការ​នៅ​ប្រទេស​ម៉ាឡេស៊ី​មួយ​ចំនួន បាន​ចោទ​ក្រុមហ៊ុន​នាំ​ពលករ​ខ្មែរ​ទៅ​ធ្វើ​ការ​ចំនួន​ពីរ ដែល​មាន​ទីស្នាក់ការ​នៅ​ទី​ក្រុង​ភ្នំពេញ ថា​មិន​ទទួល​ខុស​ត្រូវ។
ដោយ សួន សុផល មុន្នី
2012-03-19
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

ឪពុក​ម្ដាយ​ពលការិនី​ខ្មែរ​ចំនួន​ពីរ​គ្រួសារ​បាន​អំពាវនាវ​សុំ​ឲ្យ​រដ្ឋាភិបាល និង​អង្គការ​ក្រៅ​រដ្ឋាភិបាល​ជួយ​យក​កូន​ស្រី​ពួក​គាត់​ពីរ​នាក់ ពី​ប្រទេស​ម៉ាឡេស៊ី​មក​ស្រុក​ខ្មែរ​វិញ។ ពលការិនី​ទាំង​ពីរ​នាក់​នោះ ម្នាក់​កំពុង​បាត់​ខ្លួន និង​ម្នាក់​ទៀត​កំពុង​រង​ទារុណកម្ម និង​ហូប​ចុក​មិន​គ្រប់គ្រាន់ បន្ទាប់​ពី​ក្រុមហ៊ុន​នៅ​ស្រុក​ខ្មែរ​ចំនួន​ពីរ នាំ​ពួក​គេ​យក​ទៅ​ឲ្យ​ធ្វើ​ជា​អ្នក​បម្រើ​គេ នៅ​តាម​ផ្ទះ​ក្នុង​ប្រទេស​ម៉ាឡេស៊ី។

លោក ស្រី ឆើត​ឆេង អាយុ​៣៦​ឆ្នាំ និង​ស្វាមី​ឈ្មោះ ផាន់ វិត អាយុ​៣៧​ឆ្នាំ រស់​នៅ​ភូមិ​ទឹកខៀវ ឃុំ​អំពិល​ប្រាំ​ដើម ស្រុក​បវេល ខេត្ត​បាត់ដំបង។ លោក​ស្រី​បាន​ថ្លែង​នៅ​ព្រឹក​ថ្ងៃ​ច័ន្ទ ទី​១៩ ខែ​មិនា ឆ្នាំ​២០១២ ថា កូន​ស្រី​របស់​គាត់​ឈ្មោះ វិត សាវឿត អាយុ​១៨​ឆ្នាំ ត្រូវ​បាន​ក្រុមហ៊ុន​យូមេន​ផៅវ័រ (Human Power) នាំ​ទៅ​ធ្វើ​ការ​នៅ​តាម​ផ្ទះ​នៅ​ប្រទេស​ម៉ាឡេស៊ី តាំង​ពី​ថ្ងៃ​ទី​២៥ ខែ​ឧសភា ឆ្នាំ​២០១១។ លោក​ស្រី​បន្ត​ថា កូន​ស្រី​គាត់​បាន​ទទួល​ទារុណកម្ម និង​ហូប​ចុក​មិន​គ្រប់​គ្រាន់ ហើយ​បាន​ទូរស័ព្ទ​មក​សុំ​ឪពុក​ម្ដាយ​ឲ្យ​ជួយ​យក​នាង​ត្រឡប់​មក​ស្រុក​ខ្មែរ​វិញ ៖ «កូន​ខ្ញុំ​ទូរស័ព្ទ​មក​យំ​សុំ​ឲ្យ​ម៉ែ​ជួយ ថៅកែ​ឲ្យ​បាយ​ហូប​មិន​គ្រប់​មិន​គ្រាន់​ទេ ថៅកែ​ធ្វើ​បាប​កូន​ខ្ញុំ ខ្ញុំ​ទាក់​ទង​ទៅ​ក្រុមហ៊ុន គេ​ថា ជួយ​តែ​មាត់ ខែ​ណា​ដូច​ខែ​ណា​ដែរ កូន​ខ្ញុំ​លំបាក​ធ្វើ​ការ​លំបាក​ទាំង​យប់​ម៉ោង ៣​ព្រឹក បាន​គេ​ឲ្យ​កូន​ខ្ញុំ​សម្រាក»

លោក ផាន់ វិត អាយុ​៣៧​ឆ្នាំ ត្រូវ​ជា​ឪពុក​ពលការិនី​រូប​នេះ បាន​អំពាវនាវ​សុំ​ឲ្យ​រដ្ឋាភិបាល និង​អង្គការ​ក្រៅ​រដ្ឋាភិបាល​នានា ជួយ​យក​កូន​ស្រី​គាត់​មក​ស្រុក​ខ្មែរ​វិញ​ឲ្យ​បាន​ឆាប់។ ពី​ព្រោះ​នាង​កំពុង​ទទួល​ការ​ធ្វើ​ទុក្ខ​ទោស​យ៉ាង​ធ្ងន់ធ្ងរ​ពី​សំណាក់​ម្ចាស់​ផ្ទះ ដែល​នាង​រស់​នៅ​ធ្វើ​ការ​ឲ្យ ៖ «ឲ្យ​ខាង​អង្គការ​ជួយ​យក​កូន​ខ្ញុំ​មក​វិញ កូន​លំបាក​គេ​ធ្វើ​បាប បង្អត់​បាយ គេ​មិន​ឲ្យ​ហូប​គ្រប់​គ្រាន់ ហើយ​វ៉ៃ​ធាក់​គ្នា​ទៀត»

ទាក់​ទិន​បញ្ហា​ពលករ​ខ្មែរ​នៅ​ក្នុង​ប្រទេស​ម៉ាឡេស៊ី​នេះ​ដែរ លោក​ស្រី កាយ លួម អាយុ​៥៦​ឆ្នាំ រស់​នៅ​ភូមិ​ព្រែក​ឆ្តោរ ឃុំ​ពាមឯក ស្រុក​ឯក​ភ្នំ ខេត្ត​បាត់ដំបង។ លោក​ស្រី​បាន​ថ្លែង​ថា កូន​ស្រី​គាត់​ឈ្មោះ យឿត ច្រិប អាយុ​២០​ឆ្នាំ បាន​ទៅ​ធ្វើ​ការ​នៅ​ប្រទេស​ម៉ាឡេ​តាម​រយៈ​ក្រុមហ៊ុន​មួយ ដែល​លោក​ស្គាល់​ឈ្មោះ​ថា អ៊ិល អី ធី (L.E.T.) ។ ក្រុម​ហ៊ុន​នេះ​បាន​យក​កូន​ស្រី​គាត់​ទៅ​ប្រទេស​ម៉ាឡេស៊ី​តាំង​ពី​ថ្ងៃ​ទី​១៨ ខែ​សីហា ឆ្នាំ​២០១០។ ប៉ុន្តែ​រហូត​មក​ដល់​បច្ចុប្បន្ន កូន​ស្រី​របស់​គាត់​បាត់​ដំណឹង​សូន្យ។

លោក​បាន​អំពាវនាវ​សុំ​ឲ្យ​រដ្ឋាភិបាល​ខ្មែរ និង​អង្គការ​នានា​ជួយ​រក​កូន​គាត់​ដែល​កំពុង​បាត់​ខ្លួន​នៅ​ក្នុង​ប្រទេស​ម៉ាឡេស៊ី ៖ «សួរ​ទៅ​ក្រុមហ៊ុន ក្រុមហ៊ុន​គេ​ថា​មិន​អី​ទេៗ សួរ​ទៅ​ខ្ញុំ​សុំ​លេខ​ថៅកែ គេ​ឲ្យ​លេខ​ថៅកែ​មក​ខ្ញុំ​ទូរស័ព្ទ​ទៅ​សួរ​ថៅកែ​ហ្នឹង គេ​ថា​អត់​ស្គាល់»

វិទ្យុ​អាស៊ី​សេរី​នៅ​មិន​ទាន់​អាច​ទាក់​ទង​ក្រុមហ៊ុន យូមេន ផៅវ័រ និង​ក្រុមហ៊ុន អ៊ិល អី ធី ដើម្បី​សុំ​សេចក្ដី​បញ្ជាក់​ទាក់​ទិន​ទៅ​បញ្ហា​ពលករ-ការិនី​ខ្មែរ​ទាំង​ពីរ​នាក់ ដែល​កំពុង​មាន​បញ្ហា​នៅ​ក្នុង​ប្រទេស​ម៉ាឡេស៊ី​នេះ​បាន​ទេ។

លោក យិន ម៉េងលី ប្រធាន​សម្របសម្រួល​នៃ​សមាគម​អាដហុក​ប្រចាំ​ខេត្ត​បាត់ដំបង។ លោក​បាន​ថ្លែង​ថា សមាគម​អាដហុក​បាន​ទទួល​ពាក្យ​បណ្ដឹង​ពី​ឪពុក​ម្ដាយ​ពលការិនី​ខ្មែរ ធ្វើ​ការ​នៅ​ប្រទេស​ម៉ាឡេស៊ី​ចំនួន​បី នៅ​ថ្ងៃ​ច័ន្ទ ទី​១៩ ខែ​មិនា នេះ។ លោក​ថា​សមាគម​កំពុង​ធ្វើ​ការ​សួរ​ប្រមូល​ព័ត៌មាន​លំអិត ដើម្បី​ឲ្យ​មាន​ឯកសារ​ភស្តុតាង​ច្បាស់​លាស់ និង​ធ្វើ​កិច្ច​សហការ​ជា​មួយ​ស្នងការ​នគរបាល​ខេត្ត​បាត់ដំបង ដើម្បី​ជួយ​យក​ពលការិនី​ទាំង​នោះ​មក​ស្រុក​ខ្មែរ​វិញ ៖ «អ្វី​ដែល​យើង​កង្វល់ យើង​ឃើញ​ថា បញ្ហា​នេះ​ចេះ​តែ​កើត​មាន​ជា​បន្ត​បន្ទាប់ ដែល​ទទួល​បាន​បណ្ដឹង​ជា​រៀង​រាល់​ខែ ហើយ​យើង​ក៏​ឃើញ​មាន​ការ​ផ្សព្វ​ផ្សាយ​ព័ត៌មាន​ពី​ការ​ជ្រើស​រើស​ពលករ​នេះ​តាម​បណ្ដាញ​សារ​ព័ត៌មាន​មួយ​ចំនួន​ដែរ អ៊ីចឹង​ខ្ញុំ​សុំ​ផ្ដោត​រឿង​នេះ​ទៅ​ដល់​ប្រជា​ពល​រដ្ឋ សុំ​ឲ្យ​លោក​ធ្វើ​ការ​ពិចារណា​តាម​ដាន​ក្រុម​ហ៊ុន​ឲ្យ​បាន​ច្បាស់​លាស់​មុន​និង​សម្រេច​ចិត្ត​ឲ្យ​កូន​របស់​ខ្លួន​ទៅ​ធ្វើ​ការ​នៅ​ក្រៅ​ប្រទេស»

ទន្ទឹម​គ្នា​នេះ សមាគម​អាដហុក​បាន​ស្នើ​ឲ្យ​ក្រសួង​ពាក់ព័ន្ធ ជា​ពិសេស​ក្រសួង​ការ​ងារ និង​បណ្ដុះ​បណ្ដាល​វិជ្ជាជីវៈ សុំ​ពិនិត្យ​មើល​ឡើង​វិញ​ទៅ​លើ​ក្រុមហ៊ុន​នានា និង​បង្កើត​ឲ្យ​មាន​ក្រុម​ការ​ងារ​ស្នូល​មួយ ដើម្បី​ដោះ​ស្រាយ​រាល់​បញ្ហា និង​បាតុភាព​ដែល​កើត​មាន​ពាក់ព័ន្ធ​ទៅ​នឹង​ពលករ​ខ្មែរ ដែល​ចេញ​ទៅ​ធ្វើ​ការ​នៅ​ក្រៅ​ប្រទេស៕

កំណត់​ចំណាំ៖ ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ ដើម្បី​រក្សា​សេចក្ដី​​ថ្លៃថ្នូរ យើង​​ខ្ញុំ​នឹង​ផ្សាយ​តែ​មតិ​ណា​ដែល​មិន​​ជេរ​​ប្រមាថ​​ដល់​​អ្នក​​ដទៃ​តែ​ប៉ុណ្ណោះ។

មតិ (3)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

Dear parents of girls, please do not blaim the company who did not responsible for your girls. That is their business. Who blaim is our goverment who never care about their own people meaning that our topgoverment leaders are crooks and clown. Of course they are good at killing innocent people. I am very sure in 20 years Phnom Penh is no belonging to Cambodia anymore. It might become Hochimich city and Cambodia absolutely will be ruled by VN if Cambodian people still allow these leaders remain on seats. KICK THEM OUT. USING YOUR VOTES PLEASE.

Mar 21, 2012 12:24 AM

អ្នក​អាន​អនាមិក

Dejo era,Khmer tears and blood all over the world. The rich and powerful drive the poor away. Bravo Cambodia Kingdom of wonder.

Mar 19, 2012 11:04 PM

អ្នក​អាន​អនាមិក

ដំណោះស្រាយមានតែម្យ៉ាងទេគឺបញ្ឃប់បញ្ចេញពលករខ្មែរ
ចេញទៅក្រៅហើយបញ្ចូលយួនចូលស្រុកវិញនោះពលករ
ខ្មែរនឹងមានការងាធ្វើគ្រប់ៗគ្នាមិនខាន។

Mar 19, 2012 04:55 PM