ក្រុមអង្គការការពារសិទ្ធិមនុស្សបានសម្ដែងការព្រួយបារម្ភថា ជនសង្ស័យបាញ់ប្រហារកម្មករជាអភិបាលក្រុងបាវិត ខេត្តស្វាយរៀង អាចលួចរត់គេចខ្លួន ខណៈដែលតុលាការបានពន្យារនីតិវិធីរបស់ខ្លួន មិនបានចេញដីកានាំខ្លួន ឬចាប់ខ្លួនជនសង្ស័យបាញ់កម្មករឲ្យរបួសនោះភ្លាមៗ។ ចៅក្រមតុលាការខេត្តស្វាយរៀង បែរជាចេញត្រឹមដីកាឲ្យជនសង្ស័យចូលខ្លួនទៅបំភ្លឺនៅតុលាការទៅវិញនេះ។
ការលើកឡើងដូច្នេះ នៅបន្ទាប់ពីព្រះរាជអាជ្ញាសាលាដំបូងខែត្រស្វាយរៀង បានចេញដីកាកោះហៅលោក ឈូក បណ្ឌិត ជាអភិបាលក្រុងបាវិត ឲ្យចូលខ្លួនទៅបំភ្លឺនៅតុលាការ នៅថ្ងៃទី១៦ ខែមីនា ខាងមុខ ពីបទជាប់សង្ស័យពីករណីបាញ់ប្រហារកម្មកររបួសធ្ងន់ចំនួន ៣នាក់ កាលពីថ្ងៃទី២០ កុម្ភៈ ឆ្នាំ២០១២។
ប្រធានកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍ លោក មឿន តុលា មានប្រសាសន៍នៅថ្ងៃទី៦ ខែមីនា ថា តុលាការមិនគួរចេញត្រឹមដីកាកោះហៅលោក ឈូក បណ្ឌិត ឲ្យចូលខ្លួនទៅបំភ្លឺដូច្នេះទេ។ តុលាការគួរតែចេញដីកានាំខ្លួនជនសង្ស័យរូបនេះយកមកឃុំឃាំង និងធ្វើការស៊ើបអង្កេតបន្ត ពីព្រោះថា នេះជាករណីជនសង្ស័យបានប្រព្រឹត្តបទល្មើសជាក់ស្ដែង។
មន្ត្រីស៊ើបអង្កេតជាន់ខ្ពស់នៃអង្គការសិទ្ធិមនុស្សលីកាដូ លោក អំ សំអាត បានពន្យល់ថា តាមច្បាប់ បទល្មើសជាក់ស្ដែងកើតឡើងនោះ សមត្ថកិច្ចពាក់ព័ន្ធ ឬមន្ត្រីនគរបាលយុត្តិធម៌ មានសិទ្ធិចាប់ឃាត់ខ្លួនជនសង្ស័យដែលប្រព្រឹត្តបទល្មើសព្រហ្មទណ្ឌភ្លាមៗ នៅក្នុងរយៈពេល ៧ថ្ងៃ ដោយពុំចាំបាច់មានដីកាបង្គាប់ពីតុលាការទេ។ តែករណីនេះវាខុសពីប្រក្រតីទៅវិញ។
គិតពីថ្ងៃដែលជនសង្ស័យជាអភិបាលក្រុងបាវិត បានបាញ់ប្រហារទៅលើហ្វូងកម្មកររោងចក្រកៅវ៉េ (Kaoway) នៅតំបន់សេដ្ឋកិច្ចពិសេស ក្រុងបាវិត បានធ្វើកូដកម្មទាមទារដំឡើងប្រាក់ឈ្នួល និងប្រាក់ថ្លៃបាយមកដល់ពេលនេះ មានរយៈពេលជាង ២សប្ដាហ៍ (២០ កុម្ភៈ មកទល់ ៦ មីនា) មកហើយ ប៉ុន្តែជនសង្ស័យនៅមានសេរីភាពនៅឡើយ។
បងប្រុសកម្មការិនីរងរបួសដោយសារគ្រាប់កាំភ្លើង ហើយបានមកសម្រាកព្យាបាលរបួសនៅមន្ទីរពេទ្យកាល់ម៉ែតនោះ បានឲ្យដឹងថា កាលពីថ្ងៃទី២៩ ខែកុម្ភៈ តំណាងអភិបាលក្រុងបាវិត បានទៅសួរសុខទុក្ខប្អូនស្រីរបស់គាត់នៅមន្ទីរពេទ្យ ហើយឲ្យបានឲ្យលុយចំនួន ២លានរៀល។ គេប្រាប់ថា ឲ្យឈប់ប្ដឹងលោក ឈូក បណ្ឌិត ហើយគេប្រាប់ថា លុយនោះជាលុយឧបត្ថម្ភរបស់អ្នកស្រីឧបនាយករដ្ឋមន្ត្រី ម៉ែន សំអន។
លោក អំ សំអាត បានសង្កត់ធ្ងន់ថា នៅក្នុងកាលៈទេសៈនេះ ជាឱកាសរបស់តុលាការ ឬរដ្ឋាភិបាល ដើម្បីបង្ហាញថា កម្ពុជាជាប្រទេសគោរពច្បាប់ និងតុលាការមានភាពឯករាជ្យ មិនស្ថិតនៅក្រោមឥទ្ធិពលអ្នកនយោបាយណាមួយនោះទេ តុលាការគួរតែអនុវត្តនីតិវិធីរបស់ខ្លួនឲ្យបានលឿនជាងនេះ និងចេញដីកានាំខ្លួនលោក ឈូក បណ្ឌិត ជាបន្ទាន់មួយ ដើម្បីស្វែងរកយុត្តិធម៌ជូនជនរងគ្រោះ។
ព្រះរាជអាជ្ញាសាលាដំបូងខែត្រស្វាយរៀង លោក ហ៊ឹង ប៊ុនជា បានអធិប្បាយថា តុលាការកំពុងតែដំណើរការនីតិវិធីរបស់ខ្លួនក្នុងការចាត់ការទៅលើសំណុំរឿងព្រហ្មទណ្ឌមួយនេះ។ លោកព្រះរាជអាជ្ញាបានអះអាងថា ទោះបីជាលោក ឈូក បណ្ឌិត មានខ្នងបង្អែកអ្នកធំការពារលោកនៅពីក្រោយខ្នងក្នុងរឿងនេះយ៉ាងណាក៏ដោយ ក៏ប៉ុន្តែនៅពេលតុលាការរកឃើញភស្តុងតាងគ្រប់គ្រាន់ តុលាការនឹងចាត់វិធានការទៅតាមផ្លូវច្បាប់។
ទោះបីជាមានការបកស្រាយពីមន្ត្រីតុលាការយ៉ាងនេះក្ដី ប៉ុន្តែមន្ត្រីសិទ្ធិមនុស្សបានលើកហេតុផលថា ករណីអភិបាលក្រុងបាវិត ជាប់សង្ស័យពីរឿងកម្មករនេះ វាខុសពីករណីដែលសន្តិសុខក្រុមហ៊ុនធីធីវ៉ាយ (TTY) នៅខែត្រក្រចេះ បាញ់ប្រហារទៅលើប្រជាពលរដ្ឋខណៈពួកគេតវ៉ារឿងជម្លោះដីធ្លី កាលពីខែមករា នោះ ពីព្រោះថា ករណីនេះតុលាការខែត្រក្រចេះ បានចេញដីកា និងចាប់ខ្លួនសន្តិសុខ ៣នាក់ និងនាយកចាត់ការទូទៅរបស់ក្រុមហ៊ុនធីធីវ៉ាយ ភ្លាមៗ បន្ទាប់ពីលោកនាយករដ្ឋមន្ត្រី ហ៊ុន សែន បានប្រកាស។
ទាក់ទងនឹងករណីនេះ ត្រូវបានលោក ស ខេង ឧបនាយករដ្ឋមន្រ្តី និងជារដ្ឋមន្ត្រីក្រសួងមហាផ្ទៃ បានប្រកាសថា អភិបាលក្រុងបាវិត ជាអ្នកបាញ់ប្រហារកម្មករទាំងបីនាក់នោះ ផ្ទុយទៅវិញលោក ឈូក បណ្ឌិត នៅក្រៅសំណាញ់ច្បាប់ដដែល។
លោក ឈូក បណ្ឌិត មានអាយុជាង ៤០ឆ្នាំ មានស្រុកកំណើតនៅឃុំអណ្ដូងគោ ស្រុករមាសហែក ខែត្រស្វាយរៀង។ នៅចន្លោះឆ្នាំ២០០០ ឆ្នាំ២០០១ ខណៈលោក ហ៊ុន ណេង ធ្វើជាអភិបាលខែត្រស្វាយរៀង លោក ឈូក បណ្ឌិត បានធ្វើជាអភិបាលស្រុកស្វាយរៀង។
ប្រភពសុំមិនបញ្ចេញឈ្មោះបានរៀបរាប់ថា លោក ឈូក បណ្ឌិត មានទំនាក់ទំនងជិតស្និទ្ធជាមួយមន្ត្រីជាន់ខ្ពស់រដ្ឋាភិបាលមួយរូប។ រហូតដល់ចន្លោះឆ្នាំ២០០៩ ដល់ ២០១០ ប្រភពដដែលបានបញ្ជាក់ថា នៅខណៈដែលខែត្រស្វាយរៀង ត្រូវក្រសួងមហាផ្ទៃ រៀបចំឲ្យមាន ៥សង្កាត់នោះ លោក ឈូក បណ្ឌិត បានធ្វើជាអភិបាលក្រុងតាំងពីពេលនោះមក។
ប្រជាពលរដ្ឋសុំមិនបញ្ចេញឈ្មោះបានឲ្យដឹងថា លោក បណ្ឌិត ជាមនុស្សធ្វើការងារមិនគោរពអ្នកដទៃ និងជាមនុស្សក្អេងក្អាង ឆេវឆាវ ធ្វើអ្វីៗអាងអំណាចរបស់ខ្លួន។ ប្រភពដដែលបានពន្យល់ថា មូលហេតុដែលលោក ឈូក បណ្ឌិត បានបាញ់ទៅលើកម្មករនោះ ដោយសារតែលោកបានទទួលថវិកាមួយចំនួនពីក្រុមហ៊ុនពីមុនមក និងលោកជាអ្នកមើលការខុសត្រូវផ្នែកសន្តិសុខនៅតំបន់សេដ្ឋកិច្ចពិសេសក្រុងបាវិត។
ទោះបីជាយ៉ាងណាក៏ដោយ ក្រុមមន្ត្រីសិទ្ធិមនុស្សបានលើកឡើងទៀតថា ដើម្បីបង្ហាញថា ប្រទេសកម្ពុជា ជាប្រទេសនីតិរដ្ឋ តុលាការមានភាពឯករាជ្យ តុលាការគួរតែចាត់ការទៅលើសំណុំរឿងព្រះទណ្ឌមួយនេះ។ គេមិនត្រូវពន្យារពេលយូរបន្តទៀតទេ ទោះបីជាជនសង្ស័យមានទំនាក់ទំនងជិតស្និទ្ធនឹងមន្ត្រីមានអំណាចធំយ៉ាងណាក៏ដោយ។ ជាពិសេសនៅក្នុងពេលដែលប្រទេសកម្ពុជា កំពុងមានតួនាទីជាប្រធានសមាគមអាស៊ាន។
ទាក់ទងនឹងបញ្ហានេះ ក្រុមអង្គការសិទ្ធិមនុស្ស និងសហជីពជាង ២០អង្គការ គ្រោងនឹងដាក់ញត្តិទៅរដ្ឋាភិបាល និងក្រសួងមហាផ្ទៃ នៅក្នុងសប្ដាហ៍នេះ ដើម្បីទាមទារឲ្យរដ្ឋាភិបាលចាត់វិធានការចាប់ខ្លួនលោក ឈូក បណ្ឌិត យកមកផ្ដន្ទាទោសទៅតាមផ្លូវច្បាប់។
ប្រជាពលរដ្ឋនៅខែត្រស្វាយរៀង និងក្រុមមន្ត្រីសិទ្ធិមនុស្សបានអះអាងថា ជនសង្ស័យប្រើប្រាស់កាំភ្លើងបាញ់បង្ក្រាបទៅលើហ្វូងកូដករ នៅមានសេរីភាពនៅឡើយនេះ ដោយសារជនសង្ស័យរូបនេះមានទំនាក់ទំនងជិតស្និទ្ធជាមួយឧបនាយករដ្ឋមន្ត្រីប្រចាំការ និងជារដ្ឋមន្ត្រីក្រសួងទំនាក់ទំនងរដ្ឋសភា និងព្រឹទ្ធសភា គឺអ្នកស្រី ម៉ែន សំអន។
ក្រុមមន្ត្រីអង្គការសិទ្ធិមនុស្សបានសម្ដែងការព្រួយបារម្ភថា តុលាការបានកោះហៅលោក ឈូក បណ្ឌិត ឲ្យចូលខ្លួនទៅបំភ្លឺនៅថ្ងៃទី១៦ មីនា ខាងមុខនេះ ជាឱកាសពន្យារពេលមួយ ទុកឲ្យជនសង្ស័យធ្វើការសម្របសម្រួលជាមួយជនរងគ្រោះ ឬគំរាមជនរងគ្រោះមិនឲ្យប្ដឹងផ្ដល់ ដោយសារគេអាងខ្សែអ្នកធំ ប៉ុន្តែយ៉ាងណាក៏ដោយ តាមក្រមព្រហ្មទណ្ឌ ជនល្មើសពីបទព្រហ្មទណ្ឌមិនអាចរួចផុតពីសំណាញ់ច្បាប់ឡើយ ទោះបីជាជនរងគ្រោះមិនប្ដឹងក៏ដោយ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។