មេដឹកនាំប្រទេសធំៗចូលរួមគោរពព្រះវិញ្ញាណក្ខន្ធអតីតព្រះមហាក្សត្រ

ប្រមុខដឹកនាំប្រទេសមួយចំនួននៅក្នុងតំបន់អាស៊ីអាគ្នេយ៍ បានធ្វើដំណើរមកកាន់ប្រទេសកម្ពុជា ជាបន្តបន្ទាប់ ដើម្បីចូលរួមគោរពព្រះវិញ្ញាណក្ខន្ធរបស់ព្រះករុណាព្រះបាទសម្តេចព្រះ នរោត្តម សីហនុ ចាប់ពីពេលដែលព្រះបរមសពរបស់ព្រះអង្គ ត្រូវបានបញ្ជូនមកដល់ព្រះបរមរាជវាំងកាលពីថ្ងៃទី១៧ ខែតុលា។

ដោយ ទេព សុរ៉ាវី
2012-10-23

tn.mp3

ព្រះបរមសពព្រះករុណាព្រះបាទសម្ដេចព្រះ នរោត្ដម សីហនុ ត្រូវបានដង្ហែមកដល់វិមានឯករាជ្យ កាលពីថ្ងៃទី១៧ ខែតុលា ឆ្នាំ២០១២។

RFA/Tep Soravy

ក្នុងរយៈពេលនៃពិធីបុណ្យកាន់ទុក្ខជាផ្លូវការ ៧ថ្ងៃ នៃព្រះវិញ្ញាណក្ខន្ធរបស់ព្រះបាទសម្ដេចព្រះ នរោត្តម សីហនុ មានមេដឹកនាំបរទេស និងប្រទេសអាស៊ានជាច្រើន ធ្វើដំណើរជាបន្តបន្ទាប់មកកាន់ប្រទេសកម្ពុជា ដើម្បីចូលរួមក្នុងការគោរពព្រះវិញ្ញាណក្ខន្ធរបស់អង្គនៅព្រះបរមរាជវាំង។

នាយករដ្ឋមន្ត្រីនៃសាធារណរដ្ឋសង្គមនិយមវៀតណាម លោក ង្វៀន តាន់យុង (Nguyen Tan Dung) បានក្លាយជាមេដឹកនាំដំបូងបង្អស់ដែលបានធ្វើដំណើរដឹកនាំគណៈប្រតិភូជាន់ខ្ពស់មកគោរពព្រះបរមសពរបស់ព្រះអង្គមុនគេ កាលពីថ្ងៃទី១៩ ខែតុលា។ ក្នុងថ្ងៃជាមួយគ្នានោះ ឯកឧត្តម ថងស៊ីង ថាំម៉ាវង់ (Thongsing Thammavong) នាយករដ្ឋមន្ត្រីនៃសាធារណរដ្ឋប្រជាធិបតេយ្យប្រជាមានិតឡាវ ក៏បានមកគោរពវិញ្ញាណក្ខន្ធព្រះអង្គក្នុងព្រះបរមរាជវាំងដែរ។ វេនជាបន្តក្នុងថ្ងៃដដែល អ្នកស្រី យីងឡាក់ ស៊ីណាវ៉ាត់ (Yingluck Shinawatra) នាយករដ្ឋមន្ត្រីថៃ បានចូលរួមគោរពព្រះវិញ្ញាណក្ខន្ធដោយមានអមនឹងគណៈប្រតិភូចូលរួមជាមួយ។

ក្នុងដំណើរដដែល ការគោរពព្រះវិញ្ញាណក្ខន្ធនៅថ្ងៃទី២១ ខែតុលា លោក លី សៀនឡុង (Lee Hsien Loong) នាយករដ្ឋមន្ត្រីនៃសាធារណរដ្ឋសិង្ហបុរី លោក ហ្វេលីស៊ីអាណូ ប៊ែលម៉ុនតេ (Feliciano R. Belmonte JR) ប្រធានរដ្ឋសភានៃសាធារណរដ្ឋហ្វីលីពីន និងជាបេសកជនពិសេសរបស់លោក ប៊ែនីកណូ អាគីណូ ទី៣ (Benigno S. Aquino III) ប្រធានាធិបតីនៃសាធារណរដ្ឋហ្វីលីពីន និងលោក យ៉ាង ហៀងស៊ើប (Yang Hyong-Sop) អនុប្រធានសភាប្រជាជនជាន់ខ្ពស់នៃសាធារណរដ្ឋប្រជាមានិតប្រជាធិបតេយ្យកូរ៉េ ក៏បានចូលរួមគារវកិច្ចគោរពព្រះបរមសពរបស់អង្គ មុននឹងប្រមុខដឹកនាំទាំងនោះចូលជួបសំដែងការគួរសមជាមួយនឹងលោកនាយករដ្ឋមន្រ្តី ហ៊ុន សែន។

នៅថ្ងៃទី២២ ជាថ្ងៃទី៦ នៃពិធីកាន់មរណទុក្ខជាផ្លូវការ លោក សៃ ម៉ូកខាំ (Sai Mauk Kham) អនុប្រធានាធិបតីនៃសាធារណរដ្ឋសហភាពមីយ៉ាន់ម៉ា និងលោក ម៉ាទី ណាតាឡេហ្គាវ៉ា (Dr. R. M. Marty M.Natalegawa) រដ្ឋមន្ត្រីការបរទេសនៃសាធារណរដ្ឋឥណ្ឌូនេស៊ី ក៏បានអញ្ជើញចូលរួមគោរពព្រះវិញ្ញាណក្ខន្ធព្រះអង្គដែរ។

តាមកាលវិភាគរបស់ក្រសួងការបរទេស លោក ចាម៉ាល់ រ៉ាចាផាក់សា (Hon. Chamal Rajapaksa) ប្រធានសភានៃសាធារណៈប្រជាធិបតេយ្យសង្គមនិយមស្រីលង្កា នឹងមកគោរពព្រះវិញ្ញាណក្ខន្ធព្រះអង្គនៅថ្ងៃទី២៤ ខែតុលា។

បណ្ដាប្រទេសមហាអំណាចសេដ្ឋកិច្ចធំៗនៅលើពិភពលោក មានបារាំង អាមេរិក និងសហគមន៍អឺរ៉ុប មិនបានគោរពព្រះវិញ្ញាណក្ខន្ធដោយផ្ទាល់ទេ តែបានផ្ញើសាររំលែកមរណទុក្ខ ដោយបញ្ជាក់ស្រដៀងគ្នាពីភាពក្លៀវក្លានៃព្រះរាជដឹកនាំរបស់ព្រះអង្គ ដើម្បីសេរីភាព និងការប្រឆាំងដោយសន្តិភាព ទទួលបានឯករាជ្យនៅប្រទេសកម្ពុជា។

ក្រៅពីមេដឹកនាំបរទេស កាលវិភាគនៃការគោរពព្រះវិញ្ញាណក្ខន្ធសម្ដេចឪ ក៏មានសភាពមមាញឹក ខ្លាំងណាស់ដែរសម្រាប់ស្ថាប័នរដ្ឋនៅក្នុងស្រុក។ មានមន្ត្រីរដ្ឋាភិបាលមកពី ២៦ស្ថាប័ន បានដាក់វេនគ្នាចូលគោរពព្រះវិញ្ញាណក្ខន្ធព្រះបរមសពសម្តេចឳជាបន្តបន្ទាប់។ ដោយឡែកប្រជាពលរដ្ឋដែលមិនទាន់ត្រូវបានគេអនុញ្ញាតឲ្យចូលក្នុងព្រះបរមរាជវាំងនោះ ក៏នៅតែបន្តគោរពព្រះវិញ្ញាណក្ខន្ធព្រះមហាវីរក្សត្រនៅមុខព្រះបរមរាជវាំង និងនៅគ្រប់ទិសទីពេញផ្ទៃប្រទេស។

នៅខាងមុខព្រះបរមរាជវាំង នាល្ងាចថ្ងៃទី២០ តុលា កន្លងទៅ ព្រះសង្ឃពីគ្រប់ឋានានុក្រម ៥.០០០អង្គ និងពុទ្ធបរិស័ទរាប់ម៉ឺននាក់ បានសូត្រធម៌តាមបែបព្រះពុទ្ធសាសនា បួងសួងសុំឲ្យទេវតានាំយកមហាកុសលថ្វាយព្រះបរមសពព្រះមហាវីរក្សត្រ។ នៅក្នុងពិធីនោះ ព្រះសង្ឃគង់ជាជួរៗ តាំងសមាធិរយៈពេល ៣០នាទី បន្ទាប់មកសូត្រធម៌បង្សុកូលថ្វាយទៅព្រះបរមសព។ គេចាត់ទុកការជួបជុំព្រះសង្ឃ និងពុទ្ធបរិស័ទនេះ ជាការជួបជុំធំជាងគេក្នុងរយៈពេលមួយទសវត្សរ៍ចុងក្រោយនេះ។

ព្រះញាណវង្ស ឃឹម សន ព្រះមេគណរាជធានីភ្នំពេញ មានថេរដីកាថា មូលហេតុដែលព្រះសង្ឃ និងប្រជាពលរដ្ឋរៀបចំពិធីជួបជុំធំនេះ ធ្វើឡើងដើម្បីសមាធិចិត្ត និងប្រមូលព្រះរាជកុសលថ្វាយដល់ព្រះបរមសពព្រះករុណាព្រះបាទសម្ដេចព្រះ នរោត្តម សីហនុ៖ «គោលបំណងសំខាន់នោះ គឺប្រមូលនូវព្រះរាជកុសលថ្វាយព្រះវិញ្ញាណក្ខន្ធរបស់សម្ដេចព្រះ នរោត្តម សីហនុ ព្រះមហាវីរក្សត្រ ប៉ុន្តែសម្រាប់ព្រះសង្ឃ និងពុទ្ធបរិស័ទសម្រាប់គោរពព្រះពុទ្ធសាសនា មានតែបុណ្យកុសលដ៏ពិសេសរួមគ្នាធ្វើសមាធិចិត្តឲ្យស្ងប់»។

ក្នុងព្រះរាជពិធីកាន់មរណទុក្ខជាផ្លូវការរយៈពេល ៧ថ្ងៃ ប្រជាពលរដ្ឋខ្មែរ ជាពិសេសចាស់ៗមកពីតាមបណ្ដាលខេត្តមួយចំនួន បានមកអុជធូបថ្វាយព្រះអង្គ និងមានខ្លះតាំងទីសម្រាកនៅមុខព្រះបរមរាជវាំងតែម្ដង។

យុវជន និងស្ត្រីវ័យកណ្ដាលមួយចំនួន បានកោរសក់បំបួសមុខព្រះឆាយាល័ក្ខណ៍ព្រះអង្គ ដើម្បីជាការដឹងគុណដែលព្រះករុណាបានទាមទារទឹកដី និងឯករាជ្យជូនប្រទេសកម្ពុជា។

មានរឿងគួរឲ្យកត់សំគាល់ផ្សេងទៀតក្នុងពិធីកាន់ទុក្ខ ដោយមានប្រជាពលរដ្ឋ និងក្រុមយុវសិស្សបានចែកទឹកសុទ្ធ និងអាហារដោយឥតគិតថ្លៃដល់អ្នកចូលរួមដែលព្រឹត្តិការណ៍មនុស្សធម៌បែបនេះ គេកម្រនឹងឃើញកើតឡើង។

ក្រុមយុវជនដែលចែកទឹកសុទ្ធឥតគិតថ្លៃឲ្យដឹងស្រដៀងគ្នាថា កាលពីថ្ងៃដំបូងពួកគេបានរៃអង្គាសប្រាក់គ្នា ដើម្បីទិញបាយមកចែកជូនប្រជាពលរដ្ឋនៅមុខវាំង តែក្រោយមកដោយបញ្ហាកង្វះថវិកា ពួកគេបានប្ដូរមកចែកទឹកសុទ្ធជំនួស។

យុវជនទាំងនោះបន្តថា ក្នុងរយៈពេល ៣ថ្ងៃ ពួកគេបានចំណាយប្រាក់ជិត ១.៥០០ដុល្លារ ជាបច្ច័យមនុស្សធម៌របស់ក្រុមនិស្សិត ទុកទិញទឹកចែកជូនចាស់ៗដែលមកពីចម្ងាយ និងដើម្បីរួមចំណែកបញ្ជូនកុសលថ្វាយអតីតព្រះមហាក្សត្រ៖ «ពួកខ្ញុំក៏នាំគ្នារៃអង្គាសប្រាក់គ្នា មានជំនួយពីក្រៅខ្លះពីពួកខ្ញុំខ្លះ ដើម្បីចូលរួមទិញជារបស់ដើម្បីចែកជូនពួកគាត់ដោយឥតគិតថ្លៃ។ មូលហេតុដែលសំខាន់គឺយើងចង់ធ្វើបុណ្យឧទ្ទិសកុសលឲ្យព្រះករុណាព្រះបាទ នរោត្តម សីហនុ»។

ប្រជាពលរដ្ឋម្នាក់ទៀត ឈ្មោះ សំ រតនា អាយុ ៤០ឆ្នាំ មានទីលំនៅនៅច្បារអំពៅ បានយកបាយកញ្ចប់ មានម្ហូប និងទឹកជាង ១០០កញ្ចប់ មកចែកជូនចាស់ៗ នៅថ្ងៃទី២១ ខែតុលា ឲ្យដឹងថា គាត់ធ្វើបុណ្យជាមួយចាស់ៗ ក្នុងគោលបំណងបញ្ជូនកុសលដែលបានទាំងនោះថ្វាយដល់ព្រះមហាក្សត្រទាំងអស់៖ «ជាកុសលផលបុណ្យទាំងអស់គ្នា រួមគ្នា»។

នៅមានការចែកជូនបូខ្មៅសម្រាប់កាន់ទុក្ខដោយឥតគិតថ្លៃ ចែកអាវយឺតដែលមានរូបព្រះឆាយាល័ក្ខណ៍។ ប៉ុន្តែនៅមានជនឱកាសនិយមមួយចំនួន ឆ្លៀតធ្វើអាជីវកម្មក្នុងពិធីកាន់ព្រះមរណទុក្ខដោយមានការដំឡើងថ្លៃធូប ទៀន និងផ្កាឈូក ជាគ្រឿងសក្ការបូជាចាំបាច់ ពី ២ពាន់ ដល់ ៥ពាន់រៀលក្នុងមួយបាច់។ ការដំឡើងថ្លៃផ្ញើម៉ូតូពី ១ពាន់រៀល ដល់ ៤ពាន់រៀល និងការធ្វើអាជីវកម្មលក់រូបសម្ដេចឪជាហូរហែតាមចិញ្ចើមផ្លូវទៅកាន់ព្រះបរមរាជវាំង។

លោក វណ្ណ ជាអ្នកលក់រូបព្រះអង្គនៅមុខវាំង ឲ្យដឹងថា ក្នុងមួយថ្ងៃយ៉ាងហោចណាស់គាត់អាចលក់រូបអតីតព្រះមហាក្សត្របានជាង ១ពាន់សន្លឹក ដែលរូបខ្លះតម្លៃពី ១ពាន់ ដល់ ១ពាន់៥រយរៀល និងរូបមានដាក់ស៊ុមរូបថតស្រាប់ តម្លៃ ១ម៉ឺនរៀល។

លោកបន្តថា ក្នុងរយៈពេលកាន់ទុក្ខ ៧ថ្ងៃនេះ គាត់អាចលក់រូបបានជាង ៦ពាន់សន្លឹកហើយ៖ «មូលហេតុមកពីឃើញរូបវាស្តែងៗ ហើយរូបពីដើមៗអ៊ីចឹង យើងមិនដែលបានឃើញ។ ណាមួយយើងលក់ទៅបានចែកចាយដល់បងប្អូនដែលទិញមក ហើយកូនចៅជំនាន់ក្រោយក្រែងលោអត់បានស្គាល់រូបគាត់។ ជួនកាលអ្នកទិញ ជាម្ដាយ ជាយាយទៅ គាត់ប្រាប់ចៅប្រាប់កូនតៗគ្នាទៀត»។

សម្រាប់អ្នកស្រី អៀម ម៉ាលី មកពីខេត្តកណ្ដាល ដែលចូលរួមគោរពព្រះវិញ្ញាណក្ខន្ធព្រះបរមសពព្រះអង្គនៅមុខវាំង បានទិញរូបព្រះអង្គ ដោយមានជំនឿថា ការតាំងរូបព្រះអង្គក្នុងផ្ទះនឹងធ្វើឲ្យក្រុមគ្រួសារជួបសុខសប្បាយ ថ្កុំថ្កើន និងមានសេរីសួស្ដីដល់សង្គមជាតិ៖ «មានដាក់ផ្ទះដែរ ប៉ុន្តែដល់ពេលសុគតអ៊ីចឹងរឹតតែចង់បានថែមទៀត យកទៅដាក់ឲ្យបានច្រើន ឲ្យត្រជាក់ត្រជំនៅក្នុងផ្ទះយើង»។

ឯកសារពីព្រះបរមរាជវាំង បានបង្ហាញថា ព្រះរាជសមិទ្ធិផលសង្គមជាច្រើនដែលត្រូវបានកសាង ក្រោមការដឹកនាំរបស់ព្រះបាទសម្ដេចព្រះ នរោត្ដម សីហនុ ដូចជាវិមានឯករាជ្យ ផ្លូវជាតិ ផ្លូវដែក កំពង់ផែ អាកាសយានដ្ឋាន រោងចក្រ ពហុកីឡាដ្ឋាន សាលសន្និសីទ និងមហាវិទ្យាល័យជាដើម សរុបមានចំនួនជាង ៤០សមិទ្ធផលសំខាន់ ដែលបានបន្សល់ទុក។ ព្រះអង្គបានសោយទិវង្គតកាលពីថ្ងៃទី១៥ ខែតុលា នៅទីក្រុងប៉េកាំង ប្រទេសចិន ដោយរោគគាំងបេះដូង ក្នុងព្រះជន្ម ៩០ព្រះវស្សា។

រដ្ឋាភិបាលបានចេញសារាចរណែនាំ ដោយកំណត់ឲ្យប្រជាពលរដ្ឋខ្មែរគ្រប់រូបកាន់ទុក្ខផ្លូវការក្នុងរយៈពេល ៧ថ្ងៃ ចាប់ពីថ្ងៃទី១៧ ដល់ថ្ងៃទី២៣ ខែតុលា។ ព្រះបរមសពព្រះបាទ នរោត្តម សីហនុ នឹងត្រូវតម្កល់ទុកក្នុងព្រះបរមរាជវាំងរយៈពេលមិនតិចជាង ៣ខែ។ ក្នុងអំឡុងពេលនោះ ភ្ញៀវជាតិ អន្តរជាតិ ប្រជាពលរដ្ឋ និងមន្ត្រីរាជការ មានសិទ្ធិចូលរួមគោរពព្រះវិញ្ញាណក្ខន្ធរបស់ព្រះអង្គបាន។ រីឯកាលបរិច្ឆេទនៃការបូជាព្រះបរមសព ខាងគណៈកម្មាធិការជាតិរៀបចំព្រះរាជពិធីបុណ្យព្រះបរមសពព្រះអង្គ នឹងសម្រេចតាមក្រោយ៕