បញ្ហាយុវជននិងនយោបាយ
zr.mp3
ក្រុមយុវជនកម្ពុជា សព្វថ្ងៃ បែរជាត្រូវបានគណបក្សនយោបាយប្រើប្រាស់ជាឈ្នាន់នយោបាយរបស់គណបក្សនយោបាយទៅវិញ ពិសេសនៅពេលយុទ្ធនាការឃោសនារកសំឡេងឆ្នោតរបស់គណបក្សនយោបាយ។
យុវជនកម្ពុជា មានតួនាទីសំខាន់ក្នុងការរួមចំណែកអភិវឌ្ឍប្រទេសជាតិ តាមរយៈយុវជនមានសិទ្ធិក្នុងធ្វើការសម្រេចចិត្តនានានៅក្នុងជួររដ្ឋាភិបាល។ ផ្ទុយទៅវិញ នៅកម្ពុជា ក្រុមយុវជនភាគច្រើនត្រូវបានគណបក្សនយោបាយប្រើប្រាស់ ដោយពុំបានផ្ដល់ឱកាសឲ្យយុវជនមានឋានៈ ឬតួនាទី ដើម្បីធ្វើការសម្រេចចិត្តនោះឡើយ។
គណបក្សនយោបាយនីមួយៗ ត្រូវបានក្រុមអ្នកវិភាគរកឃើញថា គេផ្ដល់តួនាទីឲ្យភាគច្រើនទៅលើមនុស្សចាស់ជាអ្នកតស៊ូ និងអ្នកមានលុយ ប៉ុន្តែក្រុមយុវជនមានតែសមត្ថភាព គ្មានលុយ មិនត្រូវបានគណបក្សនយោបាយផ្ដល់តួនាទីឲ្យពួកគាត់ច្រើននោះទេ ទោះបីជាសំឡេងបោះឆ្នោតភាគច្រើនជាយុវជនក្ដី។
អ្នកជំនាញផ្នែកវិទ្យាសាស្ត្រនយោបាយ និងជាអ្នកវិភាគឯករាជ្យ លោកបណ្ឌិត សុខ ទូច មានប្រសាសន៍ថា យុវជនបច្ចុប្បន្នបានចូលរួមសកម្មភាពនៅក្នុងរឿងនយោបាយ ប៉ុន្តែគ្រប់គណបក្សនយោបាយបានធ្វើរនាំងមិនឲ្យយុវជនកាន់អំណាច ដើម្បីធ្វើការសម្រេចចិត្ត និងធ្វើគោលនយោបាយជាដើម។
លោក សុខ ទូច៖ «ការកាន់អំណាច និងការអនុម័តច្បាប់ហ្នឹង យុវជនមិនបានចូលរួមទេ ពីព្រោះគណបក្សនីមួយៗ ត្រូវការលុយដើម្បីធ្វើការបោះឆ្នោតនៅឆ្នាំ២០១៣ ឯយុវជនអត់មានលុយទេ យុវជនមានតែកម្លាំង និងគំនិត ដូច្នេះអ្នកនៅជួរមុខនោះ មានតែចាស់ៗទេ ដោយសារគាត់មានលុយ ប៉ុន្តែយុវជនឥឡូវនេះមានការចេះដឹងណាស់ ដោយសារបច្ចេកវិទ្យាទំនើប»។
របាយការណ៍របស់គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅថា ខុមហ្រ្វែល បានសរសេរថា នៅក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ កាលពីខែមិថុនា ឆ្នាំ២០១២ បានសរសេរថា គណបក្សនយោបាយទាំងអស់បានដាក់បេក្ខភាពយុវជនមានប្រមាណ ៩ភាគរយ ក្នុងនោះយុវជនជាប់ឆ្នោតជាសមាជិកក្រុមប្រឹក្សាឃុំ សង្កាត់ ប្រមាណ ៥ភាគរយ រួមមានគណបក្សប្រជាជនកម្ពុជា មានជាង ៣ភាគរយ គណបក្ស សម រង្ស៊ី មានជាង ១ភាគរយ និងគណបក្សសិទ្ធិមនុស្សមាន ០,៣៤ភាគរយ។
នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅថា ខុមហ្វ្រែល លោក គល់ បញ្ញា បានពន្យល់ថា ច្បាប់បោះឆ្នោតជាកត្តារួមចំណែកក្នុងការរារាំងមិនឲ្យយុវជនមានតួនាទីនៅក្នុងស្ថាប័នរដ្ឋាភិបាល និងស្ថាប័នសភាជាដើម។
លោក គល់ បញ្ញា បញ្ជាក់ថា ច្បាប់បោះឆ្នោតបានកំណត់ឲ្យពលរដ្ឋខ្មែរដែលអាចឈរឈ្មោះជាបេក្ខភាពក្រុមប្រឹក្សាឃុំ សង្កាត់ និងឈរឈ្មោះជាបេក្ខភាពតំណាងរាស្ត្របាន ត្រូវមានអាយុពី ២៥ឆ្នាំឡើងទៅ រីឯសមាជិកព្រឹទ្ធសភា ត្រូវមានអាយុពី ៤៥ឆ្នាំឡើងទៅ។
លោក គល់ បញ្ញា៖ «របៀបធ្វើការនៅក្នុងគណបក្សហ្នឹងក៏អ៊ីចឹង គេត្រូវមានគោលនយោបាយក្នុងបក្សហ្នឹង ថាតើដើម្បីឲ្យយុវជនរៀនធ្វើនយោបាយហ្នឹង គេត្រូវធ្វើដូចម្ដេច? មិនមែនចាំតែអ្នកចាស់ៗហ្នឹងគាត់ស្លាប់ ចាំដាក់យុវជនចូលនោះទេ ពីព្រោះយុវជនហ្នឹងក៏អាចចូលរួមក្នុងកិច្ចការនយោបាយធំៗដែរ»។
លោក គល់ បញ្ញា បានលើកឡើងថា បក្សពួកនិយមរបស់អ្នកនយោបាយនៅតែជាបញ្ហាសម្រាប់អ្នកនយោបាយនៅសង្គមកម្ពុជា ដែលគេមិនបានបើកឲ្យបានទូលាយឲ្យយុវជនធ្វើការប្រកួតប្រជែងនៅក្នុងរឿងនយោបាយ ឬប្រកួតប្រជែងដើម្បីទទួលបានតួនាទី ឋានៈឲ្យស្មើភាពគ្នា៖ «កាលណាយើងយកតែកូនយើង យកតែក្មួយយើងយកមកធ្វើការរបស់ខ្លួនហ្នឹង វាមិនមែនលើកស្ទួយយុវជនឲ្យកាន់កិច្ចការងាររដ្ឋាភិបាល និងកិច្ចនយោបាយទេ ផ្ទុយទៅវិញវាកាន់តែបង្កើតទំនាស់ កាន់តែធ្វើឲ្យយុវជនហ្នឹងមានការខកចិត្ត»។
យុវជននៅកម្ពុជា បានកើនឡើងពីមួយឆ្នាំទៅមួយឆ្នាំ គិតពីអាយុ ១៥ឆ្នាំ ដល់អាយុ ៣០ឆ្នាំ មានប្រមាណ ៤លាននាក់បច្ចុប្បន្ន។
ប្រធានអង្គការអភិវឌ្ឍន៍ធនធានយុវជន (YRDP) លោក ជាង សុខា មានប្រសាសន៍ថា កំណើនយុវជននៅកម្ពុជា បានកើនឡើងខ្ពស់ជាប្រវត្តិសាស្ត្រ ដូច្នេះជាឱកាសល្អសំរាប់គ្រប់គណបក្សនយោបាយសំរាប់វិនិយោគយុវជនឲ្យមានលក្ខណៈប្រាកដប្រជាក្នុងការផ្ដល់តួនាទីឲ្យយុវជន ពិសេសរដ្ឋាភិបាលគួរតែយកចិត្តលើយុវជន ពីព្រោះថា យុវជន មានឥទ្ធិពលខ្លាំងទៅលើរឿងនយោបាយ និងសេដ្ឋកិច្ច។
លោក ជាង សុខា៖ «ក្នុងខណៈនេះ បើសិនជាមានឆកល្វែងណាមួយក្នុងការវិនិយោគទៅលើយុវជន ឬក៏មិនបានគិតដល់យុវជនឲ្យបានច្បាស់លាស់ទេ នោះក្រុមនេះនឹងមានឥទ្ធិពលមិនល្អនៅពេលអនាគត អ៊ីចឹងបើសិនជារដ្ឋាភិបាលលោកមានឆន្ទៈឲ្យយុវជនបានចូលរួមក្នុងការសម្រេចចិត្តនោះ ការបន្ថយអាយុក្នុងក្របខ័ណ្ឌច្បាប់វាកាន់តែឲ្យយុវជនមានឱកាសឈរជាតំណាងរាស្ត្រ ក្រុមប្រឹក្សាឃុំ រាជធានីខែត្រ ហើយអាចបន្ថយអាយុមកនៅត្រឹម ២៣ឆ្នាំ វាជាការល្អ»។
លោក ជាង សុខា បានអះអាងថា គណបក្សទាំងអស់ពុំទាន់មានគោលនយោបាយពិតប្រាកដសម្រាប់យុវជននៅឡើយទេ ទោះបីជាការចុះឈ្មោះបោះឆ្នោតឃុំ សង្កាត់ មានជាង ៩,២លាននាក់ ក្នុងនោះមានជាង ៥០ភាគរយ ជាយុវជនក៏ដោយ។ លោក ជាង សុខា បានឲ្យដឹងថា គណបក្សនយោបាយទាំងនោះឲ្យដឹងថា យុវជនមិនទាន់មានបទពិសោធន៍ការងារនយោបាយ មានតែចំណេះដឹង និងយុវជនមិនមានថវិកាសំរាប់ប្រើប្រាស់នៅពេលឃោសនារកសំឡេងឆ្នោតជាដើម។
ទោះបីជាយ៉ាងណាក៏ដោយ មន្ត្រីជាន់ខ្ពស់រដ្ឋាភិបាលបច្ចុប្បន្ន គេសង្កេតឃើញពួកគេបានផ្ដល់តួនាទីដល់កូនៗរបស់ខ្លួនឲ្យធ្វើការនៅក្នុងស្ថាប័នរដ្ឋាភិបាល និងធ្វើការសម្រេចចិត្តផ្សេងៗទាក់ទងនឹងរឿងនយោបាយ ពិសេសប្រមុខរដ្ឋាភិបាល លោកបានតែងតាំងកូនប្រុសរបស់លោកឲ្យកាន់តួនាទីធំជាដើម។
ទាក់ទងទៅនឹងបញ្ហានេះ អ្នកវិភាគបានលើកឡើងថា អ្នកនយោបាយបានចាប់ផ្ដើមតែងតាំងកូនរបស់ខ្លួនឲ្យចូលបំរើកិច្ចការនយោបាយ និងផ្ដល់តួនាទីជាក់លាក់ឲ្យកូនរបស់ខ្លួន ប៉ុន្តែដើម្បីឆ្លុះបញ្ចាំងពីតម្លាភាពនៅក្នុងសង្គម រដ្ឋាភិបាលគួរតែបើកឱកាសស្មើភាពគ្នាដល់យុវជនក្នុងការទទួលបានមុខតំណែងនៅក្នុងជួររដ្ឋាភិបាលនោះ។
អ្នកជំនាញផ្នែកវិទ្យាសាស្ត្រនយោបាយ និងជាអ្នកវិភាគឯករាជ្យ លោកបណ្ឌិត សុខ ទូច បានឲ្យដឹងថា យុវជនជាអ្នកដឹងរឿងច្រើននៅក្នុងសង្គម រួមមានទាំងបញ្ហាព្រំដែន សេដ្ឋកិច្ចសង្គមកិច្ច និងនយោបាយ។
លោកបញ្ជាក់ថា អ្នកនយោបាយខ្លះមិនយល់ដឹងស៊ីជម្រៅទៅលើបញ្ហាទាំងនេះដូចយុវជនទេ៖ «ខ្ញុំជឿជាក់ថា ចាប់ពីឆ្នាំ២០១៣ នេះទៅ ដល់វេនយុវជនហើយ ព្រោះវាមានករណីពីរ។ ទី១ ចាស់ៗហ្នឹងអស់កម្លាំងហើយ ទី២ អ្នកនយោបាយហ្នឹងចង់ជំរុញកូនខ្លួនឯងចូល កាលណាចង់ឲ្យកូនចូលក្នុងរឿងនយោបាយ ត្រូវតែមានយុវជនចូលដែរ ដើម្បីឲ្យស្មើភាពគ្នា បើមិនដូច្នោះទេវានឹងមានបញ្ហា»។
បន្ថែមពីលើនេះទៀត អ្នកវិភាគបានពន្យល់ថា នៅអាណត្តិបោះឆ្នោតឆ្នាំ២០១៣ ខាងមុខ បើសិនជាគណបក្សនយោបាយមិនយកយុវជនឲ្យធ្វើនយោបាយ និងផ្ដល់តួនាទីឲ្យយុវជនដើម្បីចូលរួមក្នុងការសម្រេចចិត្តទេ កម្ពុជានឹងមិនអាចអភិវឌ្ឍន៍ប្រទេសទាន់ប្រទេសរីកចំរើនក្នុងតំបន់បានទេ ពីព្រោះថា យុវជនមានចំណេះដឹងផ្នែកបច្ចេកវិទ្យាទំនើបក្នុងការស្រាវជ្រាវរកអ្វីដែលថ្មី និងចេះនិយាយភាសាបរទេស ដើម្បីធ្វើការទំនាក់ទំនងជាដើម។
អ្នកវិភាគ និងក្រុមអ្នកឃ្លាំមើលការបោះឆ្នោតបានលើកឡើងថា នៅកម្ពុជាកន្លងមក អ្នកដែលមានតួនាទីជាមន្ត្រីធំ និងមានតួនាទីនៅក្នុងជួររដ្ឋាភិបាល មានអ្នកមួយចំនួនបានមកពីបក្សពួក មួយចំនួន បានមកពីការតស៊ូ និងមន្ត្រីមួយចំនួនបានតួនាទីអំពីការសូកប៉ាន់។ បញ្ហាទាំងនេះជាកត្តាធ្វើឲ្យមានអំពើពុករលួយ។
ភ្ជាប់ទៅនឹងបញ្ហានេះ អ្នកវិភាគបន្តថា បើរដ្ឋាភិបាល ឬគណបក្សនយោបាយបើកឱកាសទូលាយផ្ដល់តួនាទី ឋានៈដល់យុវជន ដើម្បីធ្វើគោលនយោបាយ និងធ្វើការសម្រេចចិត្តផ្សេងៗនៅក្នុងជួររដ្ឋាភិបាលនោះ ប្រទេសកម្ពុជា និងការមានសន្ទុះលឿនផ្នែកសេដ្ឋកិច្ច និងផ្នែកផ្សេងៗទៀត ជាជាងគណបក្សនយោបាយប្រើប្រាស់យុវជនធ្វើជាឈ្នាន់ដើម្បីបំរើផលប្រយោជន៍គណបក្សរបស់ខ្លួន។
ក្រុមអ្នកជំនាញធ្វើការទាក់ទងនឹងយុវជនបានបញ្ជាក់ថា យុវជនជាកម្លាំងស្នូលមួយ មានឥទ្ធិពលទាំងផ្នែកនយោបាយ ផ្នែកសេដ្ឋកិច្ច។ ដោយសារយុវជនកម្ពុជា មានសមត្ថភាពគ្រប់គ្រាន់ក្នុងការប្រលូកក្នុងកិច្ចការនយោបាយ បើសិនជារដ្ឋាភិបាលបានរៀបចំឲ្យបានត្រឹមត្រូវចំពោះមន្ត្រីដែលចូលនិវត្តន៍នោះ វាក៏ជាឱកាសមួយបើកឱកាសឲ្យយុវជនស្នងតំណែងពីចាស់ៗដែរ នៅគ្រាដែលយុវជនកម្ពុជា មានចំនួនកើនឡើង ហើយទីផ្សារការងារនៅចង្អៀតនៅឡើយនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
Rick Vong
ពី Phnom Penhសូមអ្នកជួយវិភាគ អំពីយន្តការ ៨ចំណុច របស់ គណបក្ស ជួង សម្ព័ន្ធប្រជាធិប តេយ្យ តាមវេបសាយ www.camldp.org ឬស្តាប់ វិទ្យុ FM105 ពី 2PM-3PM ថាតើវា ជាប្រយោជន៏របស់នណាមុនគេ?
Aug 16, 2012 10:35 AM
និស្សិតកម្ពុជា
ពី ភ្នំពេញក្នុងនាមជាយុវជនកម្ពុជាគាំទ្រគំនិតនេះពីព្រោះកម្ពុជាសព្វថ្ងៃមានបពា្ហពុករលួយច្រើនចាប់ពីថ្នាក់តូចរហូតដល់ធំ
Aug 15, 2012 10:17 PM
និស្សិតកម្ពុជា
ពី ភំ្នពេញក្នុងនាមជាយុវជនកម្ពុជាគាំទ្រគំនិតនេះពីព្រោះកម្ពុជាសព្វថ្ងៃមានបពា្ហពុករលួយច្រើនចាប់ពីថ្នាក់តូចរហូតដល់ធំ
Aug 15, 2012 10:14 PM
Eagle Master
ពី PA(USA)Nothing wrong with that,this is realy good farsigth after mission acomplished Mr:Hun Sen's goverment should be investigate families biography, booklist with pictures also making refinery who's khmernationalism ,I agreed this is master minds dig out corrupt crops and sowing pure crops on our soils,remember we are lanlords who had bloodshet whenever country facing war,let them respected us.
Aug 15, 2012 08:09 PM
CAMBODIAN-AMERICAN
ពី WASHINGTON DC,USAIn general, most Khmers never think far, just "Muony Chhang Am". My question, do Khmers ever worry " if all our neighbors countries try to invade cambodia, what we must do to save territory? Do not forget, we have nothing!!!no money, no forces ect... Who are going to help us? UN? Or other countries around the world? No way, in that situation, our country will be no longer for all Khmers, may be within one month!!! If so, we must stop fighting or pointing finger to each other by changing mind working together for our homeland. Khmers are so weak, loosing territory history may repeat again & again. Khmers attitude and style always doing thing witout righ judgment, just follow each other. Do not act like KHMERS ROUGE," HEI OEUR!!!" or uneducated " YOUNG YO THEA" under POl POT'S REGIME. Carefully watch THAI!!! Thanks God that VN agrees to draw map for Cambodia.
Aug 15, 2012 11:16 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
