កឹម សុស ៖ សូមថ្វាយបង្គំ ករុណាបានឮថា ព្រះតេជគុណមកពីប្រទេសបារាំង ព្រះតេជគុណបានទៅប្រទេសបារាំងហ្នឹង នៅឆ្នាំ១៩៧៨ ហើយត្រឡប់មកចូលស្រុកខ្មែរវិញ តាំងពីទស្សវត្សរ៍ ៨០ មក ហើយពេលថ្មីៗនេះព្រះអង្គនិមន្តទៅព្រះវិហារ តើនេះជាលើកទីមួយឬ ដែលព្រះអង្គនិមន្តទៅព្រះវិហារនោះ ?
ភិក្ខុ ទូច សារិទ្ធ ៖ អាត្មាអត់ដែលស្គាល់សោះ ប្រាសាទព្រះវិហារនេះពីដើមមក ជាលើកដំបូងរបស់អាត្មាហើយ ។ ជាពិតអាត្មាដែលមានសារសំខាន់បំផុតនិមន្តទៅឃើញប្រាសាទព្រះវិហារជាលើកដំបូងនេះ ។
កឹម សុស ៖ តើព្រះអង្គមានទស្សនៈយល់ឃើញយ៉ាងដូចម្ដេចទៅចំពោះព្រះវិហារ ? ករុណាមិនដែលទៅទេ ប៉ុន្តែដែលឮ ស្ដាប់គេនិយាយ ហើយដែលឃើញរូបថត ប៉ុន្តែព្រះអង្គផ្ទាល់តើព្រះអង្គយល់ឃើញយ៉ាងម៉េចខ្លះ ព្រះវិហារ ?
ភិក្ខុ ទូច សារិទ្ធ ៖ អាត្មាគិតថា ប្រាសាទព្រះវិហារជាព្រលឹងខ្មែរមួយដែលប្រជាជាតិខ្មែរមិនគួរធ្វេសប្រហែសឲ្យព្រលឹងជាតិយើងបាត់បង់សាបសូន្យ ។ ប្រាសាទព្រះវិហារមានវិសាលភាពធំណាស់នៅលើកំពូលភ្នំ មានពពក មានអ័ព្ស មើលទៅហាក់ដូចជាវិមានមួយដែលផុសឡើងនៅក្នុងអាកាសនភាលៃ ។
ប្រាសាទនេះមានបណ្ដោយវែងពីខាងជើងទៅខាងត្បូង ហើយមានទទឹងប្រមាណជា យើងរាប់តួប្រាសាទផង ហើយតំបន់មានដូចជាស្រះទឹក មានផ្ទាំងថ្ម អីៗទាំងអស់ហ្នឹង គឺប្រមាណជាជិត៤០០ម៉ែត្រ ធំណាស់ ហើយមានធម្មជាតិស្អាត រុក្ខជាតិគ្រប់ប្រភេទ ជាឈើដែលជាឱសថ ឈើដែលយកមកប្រើប្រាស់មានតម្លៃ ជាសង្ហារិម ឈើដែលឲ្យជាអុស ជាពិសេសធម្មជាតិល្អណាស់ ។ ហើយផ្ទាំងប្រាសាទហ្នឹងគឺយើងមើលទៅចាប់ចិត្ត គួរឲ្យស្រឡាញ់ ។ អាត្មាបានប្រើពាក្យថា ជីវិតនេះដើម្បីព្រះវិហារ យើងគួរនាំគ្នាធ្វើអ្វីដើម្បីព្រះវិហាររបស់យើង ។
កឹម សុស ៖ ចុះផ្លូវពីជើងភ្នំទៅព្រះវិហារ ផ្លូវឡើងហ្នឹងតើយ៉ាងម៉េចខ្លះទៅ ?
ភិក្ខុ ទូច សារិទ្ធ ៖ ផ្លូវដែលឡើងទៅគឺមានជួបការលំបាកច្រើនដែរ បើយើងធ្វើដំណើរតាមជើងមិនសូវជាបញ្ហាទេ ប៉ុន្តែបើយើងឡើងដោយរថយន្ត ដោយម៉ូតូ គឺមានការលំបាកច្រើន ។ វាមានចោទខ្លាំងប្រហែលជា៣កន្លែង ។ ហើយក្រៅពីនោះវាមានសភាពមិនល្អ គឺថាមានទឹកហូរកាត់ បែកជាភក់អីអ៊ីចឹងទៅ ប៉ុន្តែទោះបីយ៉ាងណា គឺថាយើងអាចប្រើមធ្យោបាយយានយន្តបានរហូតទៅដល់ព្រះវិហារ ។ អាត្មាបាននាំក្បួនដើរផ្សាយមេត្តា ចេញពីសាលារៀនខាងក្រោមឡើងដើរផ្សាយរហូតដល់លើព្រះវិហារ មានប្រមាណជា៥គីឡូម៉ែត្រ ។
កឹម សុស ៖ ប៉ុន្តែបើធ្វើដំណើរតាមថ្មើរជើង តើអស់ពេលវេលាប៉ុន្មានទៅ ដើម្បីនឹងទៅដល់នោះ ហើយត្រូវការអ្វីខ្លះផ្លូវហ្នឹង ?
ភិក្ខុ ទូច សារិទ្ធ ៖ តាមមនុស្ស តាមសុខភាព តាមវ័យទៀត ។ បើក្មេងហាក់ដូចជាមិនយូរណាស់ប៉ុន្មានទេ ប៉ុន្តែបើមនុស្សចាស់អាចជាង១ម៉ោងបានឡើងដល់ ។ មួយម៉ោងទៅពីរម៉ោង ព្រោះមនុស្សចាស់ត្រូវការសម្រាកតាមផ្លូវខ្លះ ហើយយើងត្រូវការទឹក ពេលណាយើងឡើងទៅអាចហត់ អាចទទួលទានទឹកទៅ យើងឡើងទៅទៀតបាន ។ ប៉ុន្តែសម្រាប់អាត្មាផ្ទាល់ អាត្មាគ្មានសេចក្ដីនឿយហត់អីទាំងអស់ គឺឡើងដោយសេចក្ដីក្លាហាន ឡើងដោយកម្លាំងពលំ គឺថាទីមួយចិត្តចង់ឃើញប្រាសាទព្រះវិហារ ហើយមួយទៀតគឺបានជួបទាហានយើងយាមកាមតាមផ្លូវទាំងអស់ ដូចជាកម្លាំងអ្វីមួយបង្កើតឡើងសម្រាប់អាត្មា គ្មានការនឿយហត់អីទាំងអស់ ។
កឹម សុស ៖ ព្រះអង្គមានថេរដីកាត្រួសៗអម្បាញ់មិញនេះ គឺថាធ្វើឲ្យករុណានឹកឃើញថា វាមានការខ្វះខាតច្រើននៅព្រះវិហារហ្នឹង តើព្រះអង្គឃើញអ្វីខ្លះដែលអាចនឹងកែលម្អឲ្យបានល្អឡើង ?
ភិក្ខុ ទូច សារិទ្ធ ៖ ការខ្វះខាតមានច្រើន ទីមួយគឺផ្លូវ ប្រហែលជារាជរដ្ឋាភិបាលយើងកំពុងតែឈូស កំពុងតែសម្អាតផ្លូវហ្នឹង ឲ្យងាយស្រួលក្នុងការឡើង ហើយតាមផ្លូវគឺថាយើងត្រូវការសម្អាត កុំឲ្យមានជាតិពុលនៅតាមផ្លូវ បោះសំរាមតាមផ្លូវ ជាពិសេសគឺថាត្រូវធ្វើបង្គន់ ។ ហើយអាត្មាបានទាក់ទងខាងអាជ្ញាធរយើងនៅកន្លែងនោះហើយ គឺអាត្មាសុខចិត្តជួយកសាងបង្គន់ ពីក្រោមរហូតដល់លើ សូមឲ្យគេរកជាង អស់ប៉ុន្មានអាត្មានឹងអំពាវនាវញាតិញោមនៅប្រទេសបារាំងមេត្តាជួយ ។ ហើយនៅខាងលើត្រូវរៀបបង្គន់អនាម័យនៅកន្លែងវត្ត ហើយនៅតាមក្បែរៗប្រាសាទខ្លះដើម្បីបរិស្ថានល្អ ដើម្បីសុខភាពអនាម័យ ហើយជាពិសេសគឺថានៅតាមខាងលើនោះ មានទឹកធ្លាក់មក ទឹកធ្លាក់ហ្នឹង គឺចូលទៅក្នុងស្រះមួយយ៉ាងស្អាតណាស់ ដូច្នេះនាំគ្នាកុំធ្វើយ៉ាងណាដើម្បីបំពុល ទឹកដែលហូរហ្នឹង ចូលទៅក្នុងស្រះសម្រាប់យើងប្រើប្រាស់នៅក្នុងរដូវក្ដៅ មានសារសំខាន់ណាស់ ។
កឹម សុស ៖ ចុះតួប្រាសាទវិញ តើមានខ្វះអីសម្រាប់ការពារ សម្រាប់ថែរក្សាជាវប្បធម៌ទៅដល់អនាគតទៅ តើព្រះអង្គមានគំនិតយ៉ាងម៉េច គម្រោងយ៉ាងម៉េច ?
ភិក្ខុ ទូច សារិទ្ធ ៖ សំខាន់ជាងគេប្រហែលខាងអង្គការយូណេស្កូ គេនឹងរៀបចំជួលជុល ថែទាំ រក្សាប្រាសាទនេះ គឺថាសម្រាប់អាត្មា អាត្មាមើលឃើញថា ទីមួយគឺយើងត្រូវរៀបចំវាស់វែងព្រំដែនឲ្យបានត្រឹមត្រូវនៅតំបន់នោះ ហើយកុំឲ្យមានសេចក្ដីប្រមាថជាមួយបច្ចាមិត្ត គឺថាយើងត្រូវថែរក្សាប្រាសាទហ្នឹងឲ្យបានគង់វង្ស ឲ្យយើងទៅជាម្ចាស់ពិតប្រាកដសម្រាប់ប្រាសាទ ហើយនិងតួភ្នំទាំងមូល ។
កាលណាយើងឡើងទៅ សព្វថ្ងៃគឺឡើងទៅច្រកជាមួយគ្នា ដល់ខាងលើ ចំណោទចុងក្រោយហ្នឹង យើងជួបឃើញទាហានសៀម ទាហានឈុតខ្មៅហ្នឹង គេនៅយាមកាមកន្លែងហ្នឹង ហាក់ដូចជាទាហានហ្នឹងគេកំពុងតែគ្រប់គ្រងទឹកដីរបស់យើងកន្លែងហ្នឹង ។ ដូច្នេះយើងមិនទាន់ជាម្ចាស់ដ៏ពិតប្រាកដសម្រាប់តំបន់ព្រះវិហារយើងទេ ដូច្នេះយើងត្រូវគ្រប់គ្រងភ្នំទាំងមូល ភ្នំផង ហើយនិងវត្តផង ហើយនិងផ្លូវផង ហ្នឹងទើបយើងម្ចាស់ការ ៕