ម៉ាយ៉ារិទ្ធិ ៖ ជាបឋម ខ្ញុំបាទសូមជម្រាបសួរឯកឧត្ដម ញឹក ប៊ុនឆៃ។ ឯកឧត្ដម តើស្ថានភាពរបស់គណបក្សហ៊្វុនស៊ិនប៉ិច មកទល់ឥឡូវហ្នឹង យ៉ាងម៉េចទៅហើយ?
ញឹក ប៊ុនឆៃ ៖ គណបក្សហ៊្វុនស៊ិនប៉ិច មកទល់ពេលឥឡូវនេះ នៅជាធម្មតា គឺដំណើរការដោយមិនមានអ្វីជាការប្រែប្រួលអ្វីទេ។
ម៉ាយ៉ារិទ្ធិ ៖ ប៉ុន្តែ ប៉ុន្មានថ្ងៃកន្លងមកនេះ គេឃើញមានឯកឧត្ដម លឺ ឡាយស្រេង អ្នកអង្គម្ចាស់ ស៊ីសុវត្ថិ សិរីរ័ត្ន បានបង្ហាញចំពោះមុខអ្នកកាសែតទាក់ទងនឹងរឿងលទ្ធផលនៃការបោះឆ្នោត។ តើរឿងរ៉ាវនេះមានពាក់ព័ន្ធទៅដល់គណបក្សហ៊្វុនស៊ិនប៉ិចដែរឬទេ?
ញឹក ប៊ុនឆៃ ៖ សូមជម្រាបផងដែរថា បញ្ហាដែលពាក់ព័ន្ធដល់ការបោះឆ្នោតនេះ គឺយើងឃើញហើយថា ការបោះឆ្នោតនេះយើងខ្ញុំអាចលើកគឺថា ជាការបោះឆ្នោតមួយដោយសេរី ប៉ុន្តែមិនមានភាពយុត្តិធម៌ ដោយសារតែមានភាពមិនប្រក្រតីខ្លះៗ ដែលមានតាមបណ្ដាខេត្តក្រុងមួយចំនួន ដែលយើងខ្ញុំបានធ្វើការបូកសរុបរបាយការណ៍កន្លងមក។
ម៉ាយ៉ារិទ្ធិ ៖ ដូច្នេះ ជំហររបស់គណបក្សហ៊្វុនស៊ិនប៉ិចពិតប្រាកដ(យ៉ាងដូចម្ដេចដែរ)?
ញឹក ប៊ុនឆៃ ៖ សូមជម្រាបថា ជំហររបស់យើងខ្ញុំ គឺការបោះឆ្នោតនេះ គឺសេរី ប៉ុន្តែមិនយុត្តិធម៌ ដោយសារតែមានភាពមិនប្រក្រតីខ្លះ។ ជាធម្មតាទេ យើងជាអ្នកប្រជាធិបតេយ្យ តែងតែមានមតិផ្ទុយគ្នាខ្លះ ហើយថ្ងៃនេះ (៣១ កក្កដា) មានការជួបជុំគ្នា សំខាន់ផ្ដោតទៅលើថ្នាក់ដឹកនាំមូលដ្ឋាន គឺថ្នាក់ដឹកនាំខេត្ត ហើយនិងស្រុកដែលបានអញ្ជើញមកយ៉ាងច្រើន គឺយើងបានជម្រាបអំពីលទ្ធផលនៃការបោះឆ្នោត ហើយយើងបានឯកភាពគ្នាទុកថា យើងនឹងធ្វើសិក្ខាសាលាមួយដើម្បីឲ្យបងប្អូននៅមូលដ្ឋានគឺពីឃុំ ស្រុក ខេត្តហ្នឹង ជជែកគ្នាអំពីអ្វីខ្លះ ដែលជាភាពមិនប្រក្រតី ឬអំពីចំណុចខ្វះខាតរបស់គណបក្សហ៊្វុនស៊ិនប៉ិចមានអ្វីខ្លះ ដើម្បីយើងបូកសរុបលទ្ធផលទាំងអស់នេះ សម្រាប់ក្នុងការគិតគូរ ក៏ដូចជាយុទ្ធសាស្ត្រដែលយើងត្រូវធ្វើដំណើរទៅមុខទៀត។
ម៉ាយ៉ារិទ្ធិ ៖ លទ្ធផលដែលគណបក្សហ៊្វុនស៊ិនប៉ិចបានមើលឃើញតាមរយៈការបោះឆ្នោត តើបានប៉ុន្មានអាសនៈដែរ នៅក្នុងរដ្ឋសភា?
ញឹក ប៊ុនឆៃ ៖ មកដល់ពេលនេះ គឺយើងទទួលបានអាសនៈតែ ២ទេ ដែលមួយនៅខេត្តបន្ទាយមានជ័យ ដែលមានរូបខ្ញុំផ្ទាល់ ហើយទីពីរនៅខេត្តកំពង់ធំ មួយអាសនៈដែរ។
ម៉ាយ៉ារិទ្ធិ ៖ គណបក្សប្រជាជនកម្ពុជា បានប្រកាសថា នឹងទទួលគណបក្សហ៊្វុនស៊ិនប៉ិច ធ្វើជាដៃគូរដ្ឋាភិបាលក្រោមការដឹកនាំរបស់ឯកឧត្ដម។ តើហេតុអ្វីមិនមាននិយាយចំឈ្មោះប្រធានគណបក្សហ៊្វុនស៊ិនប៉ិចនោះ?
ញឹក ប៊ុនឆៃ ៖ សូមជម្រាបផងដែរថា មកដល់ពេលនេះ យើងខ្ញុំមានសំឡេងពីរកៅអី ហើយយើងខ្ញុំក៏មិនមានអ្វីទៅទាមទារទេ គឺសម្រេចទៅលើគណបក្សប្រជាជនដែលលោកបានឈ្នះឆ្នោតយ៉ាងច្រើន គឺជាសន្ដានចិត្តរបស់លោកដែលអាចនឹងឲ្យគណបក្សហ៊្វុនស៊ិនប៉ិចចូលរួមក្នុងរដ្ឋាភិបាលចម្រុះ គឺថា លោកអាចមានសិទ្ធិហើយក្នុងរដ្ឋាភិបាលចម្រុះ ហើយអ្នកដែលអាចចូលរួម ក៏លោកមានសិទ្ធិអាចជ្រើសរើសអ្នកនេះអ្នកនោះដែរ ក្នុងការត្រូវទៅចូលរួមក្នុងរដ្ឋាភិបាលថ្មីខាងមុខនេះ។
ម៉ាយ៉ារិទ្ធិ ៖ តើហេតុអ្វីបានជាជ្រើសរើសថា ទាល់តែក្រោមការដឹកនាំរបស់ឯកឧត្ដមនោះ?
ញឹក ប៊ុនឆៃ ៖ ខ្ញុំយល់ថា ប្រហែលជាពាក់ព័ន្ធដល់ការងារកិច្ចសហប្រតិបត្តិការមួយចំនួនផងដែរ ហើយនៅក្នុងបញ្ហានេះគឺថា ផ្ទៃក្នុងរបស់គណបក្សហ៊្វុនស៊ិនប៉ិចយើងក៏មានការជជែក អំពីបញ្ហានេះផងដែរ ប្រហែលជាបន្តិចទៀតនេះនឹងមានការជជែកគ្នាពីបញ្ហានេះ។
ម៉ាយ៉ារិទ្ធិ ៖ តើនេះមិនមែនចង់បង្ហាញថា មានការបែកបាក់ក្នុងរង្វង់ផ្ទៃក្នុងហ៊្វុនស៊ិនប៉ិច ហើយទាល់តែអ្នកណាក្រោមការដឹកនាំរបស់ឯកឧត្ដម ទើបអាចចូលរដ្ឋាភិបាលបានឬយ៉ាងណា?
ញឹក ប៊ុនឆៃ ៖ មិនឆ្លុះបញ្ចាំងអំពីបញ្ហាបែកបាក់ទេ។ មកដល់ពេលនេះ ដូចជាមិនមានអ្វីដែលជាការបែកបាក់ទេ។
ម៉ាយ៉ារិទ្ធិ ៖ ឯកឧត្ដម តើគណបក្សប្រជាជនកម្ពុជា នឹងសន្យាថាឲ្យប៉ុន្មានកៅអីដែលប្រសិនបើមានការចូលរួមនៅក្នុងរដ្ឋាភិបាលនោះ?
ញឹក ប៊ុនឆៃ ៖ ខ្ញុំរហូតមកទល់ពេលនេះ មិនទាន់ដឹងថា ឲ្យតំណែងអ្វីខ្លះនោះទេ គ្រាន់តែមានជាគោលការណ៍ថា គណបក្សប្រជាជនលោកនឹងទទួលគណបក្សហ៊្វុនស៊ិនប៉ិចចូលរួមក្នុងរដ្ឋាភិបាល ប៉ុន្តែការដែលថា បែងចែកជាកូតា ឬយ៉ាងណានោះគឺយើងខ្ញុំមិនទាន់បានទទួលនៅឡើយទេ។
ម៉ាយ៉ារិទ្ធិ ៖ មានការនិយាយនៅខាងក្រៅថា ទទួលមែន ប៉ុន្តែផ្នែកខាងរាជវង្សមិនចូលរួមក្នុងឆាកនយោបាយទេ គឺមិនឲ្យកិច្ចការធ្វើអ្វីទេ។ តើរឿងនេះពិតដែរឬទេ?
ញឹក ប៊ុនឆៃ ៖ មកដល់ពេលនេះ ខ្ញុំដូចជាមិនបានដឹងទេ នៅក្នុងហ៊្វុនស៊ិនប៉ិចដូចជាមិនមានលើកអំពីករណីហ្នឹងទេ។
ម៉ាយ៉ារិទ្ធិ ៖ ចំពោះទស្សនៈផ្ទាល់ចុងក្រោយរបស់ឯកឧត្ដម តើឯកឧត្ដមយល់យ៉ាងណាដែរ ចំពោះការដែលគណបក្សប្រជាជនកម្ពុជាបានប្រកាសថា នឹងឲ្យគណបក្សហ៊្វុនស៊ិនប៉ិចចូលរួមក្នុងរដ្ឋាភិបាលនេះ?
ញឹក ប៊ុនឆៃ ៖ សូមជម្រាបថា នេះក៏ដោយសារតែមនោសញ្ចេតនា។ គណបក្សហ៊្វុនស៊ិនប៉ិច តាំងពីអាណត្តិទីមួយ អាណត្តិទីពីរ អាណត្តិទីបី ដែលយើងមានបញ្ហាមករហូតក៏យើងមានមនោសញ្ចេតនាជាមួយគ្នាក្នុងការចង់ឲ្យប្រទេសជាតិរបស់យើងមានស្ថិរភាព មានសន្តិសុខ ដើម្បីការអភិវឌ្ឍប្រទេសជាតិ អ៊ីចឹងហើយ លើកនេះក៏ជាចេតនាល្អរបស់គណបក្សប្រជាជនដែរ ព្រោះពីមុនចេតនាល្អរបស់ហ៊្វុនស៊ិនប៉ិចក៏ធ្លាប់មាននៅពេលដែលបោះឆ្នោតរួចទាំងពីរបីលើក ក៏យើងក្នុងគោលបំណងតែមួយគឺការបង្រួបបង្រួមនិងផ្សះផ្សាជាតិដើម្បីឲ្យមានសុខសន្តិភាព មានស្ថិរភាព មានការអភិវឌ្ឍប្រទេសជាតិផងដែរ។
ម៉ាយ៉ារិទ្ធិ ៖ មានការលេចឮថា នឹងមានការបណ្ដេញប្រធានគណបក្ស ឯកឧត្ដម កែវ ពុទ្ធរស្មី និងមានការគ្រោងបណ្ដេញចេញពីក្របខ័ណ្ឌរាជរដ្ឋាភិបាលផង តើរឿងនេះក្រោយពីដោះស្រាយទៅ ឯកឧត្ដមអាចមានប្រសាសន៍យ៉ាងដូចម្ដេចដែរ?
ញឹក ប៊ុនឆៃ ៖ សូមជម្រាបថា ការដែលថានឹងមានការបណ្ដេញប្រធានគណបក្ស មកដល់ពេលនេះ មិនមានទេបញ្ហានេះ។ រីឯនៅក្នុងរដ្ឋាភិបាលគឺបានឃើញស្រាប់ហើយថា ពេលនេះគឺគណបក្សហ៊្វុនស៊ិនប៉ិច បានទទួលអាសនៈតែពីរទេ អ៊ីចឹងយើងអាចនិយាយបានថា អ្វីដែលយើងមាន២៦អាសនៈកាលពីមុន ហើយឥឡូវមានតែពីរហ្នឹង គឺថាវាអាចនឹងបាត់បង់ច្រើនហើយ អ៊ីចឹងមិនដឹងថា ការបាត់បង់ហ្នឹងទៅលើអ្នកណាខ្លះទេ គឺយើងត្រូវមានការបាត់បង់ហើយ៕