រដ្ឋសភាគ្រោងបើកសម័យប្រជុំពិភាក្សាអំពីការលើកអភ័យឯកសិទ្ធិ លោក សម រង្ស៊ី ប្រធានគណបក្សសមរង្ស៊ី នៅថ្ងៃច័ន្ទ ទី១៦ ខែវិច្ឆិកានេះ ក្រោយដែលតុលាការខេត្តស្វាយរៀងបានចោទប្រកាន់លោកពីបទបំផ្លាញទ្រព្យសម្បត្តិសាធារណៈ ដោយសារតែលោក សម រង្ស៊ី បានដកបង្គោលសម្រាប់សម្គាល់ព្រំដែនរវាងប្រទេសកម្ពុជានិងប្រទេសវៀតណាមនៅឯស្រុកចន្ទ្រា ខេត្តស្វាយរៀង កាលពីថ្ងៃទី២៥ ខែតុលាកន្លងមកនេះ។
កាលពីពេលថ្មីៗនេះ អ្នកតំណាងរាស្ត្រនៃគណបក្សសមរង្ស៊ីបានស្នើសុំទៅប្រធានរដ្ឋសភាឲ្យលើកពេលនៃការជជែកគ្នាដកអភ័យឯកសិទ្ធិនេះ។
សូមអញ្ជើញអាននិងស្តាប់បទសម្ភាសន៍រវាងលោក ជុន ច័ន្ទបុត្រ និងលោក សម រង្ស៊ី ដែលកំពុងស្ថិតនៅក្រុងប៉ារីស ប្រទេសបារាំង ជុំវិញបញ្ហានេះ ដែលមានសេចក្តីដូចតទៅ៖
ជុន ច័ន្ទបុត្រ៖ ឯកឧត្តមបានជ្រាបហើយថា តុលាការខេត្តស្វាយរៀងបានចោទប្រកាន់ឯកឧត្តមពីបទបំផ្លាញទ្រព្យសម្បត្តិសាធារណៈ គឺការដែលឯកឧត្តមបានដកបង្គោលព្រំដែនខ្មែរ-វៀតណាមនៅស្រុកចន្រ្ទា កាលពីថ្ងៃទី២៥ ខែតុលាកន្លងទៅនេះ ខ្ញុំមានសំណួរពីរទាក់ទងទៅនឹងរឿងនេះ។សំណួរទី១ គឺថា តើហេតុអ្វីបានជាឯកឧត្តមដកបង្គោលព្រំដែននោះ?
សម រង្ស៊ី៖ ដោយសារខ្ញុំមិនទទួលស្គាល់អំពើអយុត្តិធម៌អំពើឈ្លានពានរបស់បរទេសដែលរំលោភបូរណភាពទឹកដីប្រទេសកម្ពុជា។ ដូច្នេះក្នុងឋានៈខ្ញុំជាអ្នកតំណាងរាស្រ្ត តំណាងឲ្យជាតិខ្មែរទាំងមូល ខ្ញុំមិនអាចទទួលយកបានទេ ទង្វើដែលប៉ះពាល់ដល់បូរណភាពទឹកដីនៃប្រទេសកម្ពុជា ទង្វើដែលធ្វើបាបប្រជារាស្រ្តខ្មែរ ដែលមកយកដីស្រែរបស់ប្រជារាស្ត្រខ្មែរ ដែលខ្ញុំធ្វើជាតំណាងនេះ។
ជុន ច័ន្ទបុត្រ៖ ហើយចុះដល់ឥឡូវនេះមានការចោទប្រកាន់ពីតុលាការ អ៊ីចឹងហើយតើឯកឧត្តមមានប្រតិកម្មយ៉ាងណាដែរចំពោះការចោទប្រកាន់នេះ?
សម រង្ស៊ី៖ ឲ្យគេចោទអីចោទទៅ ពីព្រោះរឿងនេះមិនមែនរឿង សម រង្ស៊ី តែម្នាក់ឯងទេ ហើយ សម រង្ស៊ី អត់សំខាន់ទេក្នុងការចោទប្រកាន់ក្នុងរឿងរ៉ាវទាំងអស់នេះ អ្នកដែលរងគ្រោះគឺជនជាតិខ្មែរ គឺប្រជារាស្រ្តខ្មែរ គឺកសិករខ្មែរ គឺប្រទេសកម្ពុជាយើងដែលបាត់បង់ទឹកដី ប្រជារាស្រ្តខ្មែររាប់រយរាប់ពាន់នាក់ដែលបាត់បង់ដីស្រែ ដីចម្ការ។ ដូច្នេះសូមកុំផ្តោតអារម្មណ៍លើ សម រង្ស៊ី សូមផ្តោតអារម្មណ៍លើប្រទេសជាតិយើង លើប្រជារាស្រ្តខ្មែរយើងទាំងអស់គ្នា ខ្ញុំគ្រាន់តែជាតំណាង ខ្ញុំគ្រាន់តែជាអ្នកចេញមុខការពារផលប្រយោជន៍ជាតិ និងផលប្រយោជន៍ប្រជារាស្រ្តខ្មែរតែប៉ុណ្ណោះ។
ជុន ច័ន្ទបុត្រ៖ ទាក់ទងក្នុងរឿងនេះដែរ រដ្ឋសភាកម្ពុជាគ្រោងនឹងបើកកិច្ចប្រជុំមួយនៅថ្ងៃច័ន្ទ ទី១៦ ខែវិច្ឆិកានេះ ដើម្បីពិភាក្សាដកអភ័យឯកសិទ្ធិតំណាងរាស្រ្តរបស់ឯកឧត្តម តើឯកឧត្តមមានពាក្យអីជម្រាបទៅសមាជិកសភាមុននឹងការបើកសវនាការនោះទេ?
សម រង្ស៊ី៖ ជាការសោកស្តាយនិងជាការអៀនខ្មាស លើកលែងតែចំពោះតំណាងរាស្រ្ត២៦នាក់មកពីគណបក្សសមរង្ស៊ី និងបីនាក់មកពីគណបក្សសិទ្ធិមនុស្ស អ្នកតំណាងរាស្រ្តដទៃទៀតដែលទៅជួបជុំគ្នាបោះឆ្នោតលើកអភ័យឯកសិទ្ធិខ្ញុំ ព្យួរឬដកនេះ គឺមិនមែនប៉ះតែរូបខ្ញុំ សម រង្ស៊ី ទេ សម រង្ស៊ី អត់សំខាន់ទេ គឺអ្វីដែលគេធ្វើនេះគឺប៉ះពាល់ធ្ងន់ធ្ងរណាស់ដល់ផលប្រយោជន៍ជាតិយើង ដល់បូរណភាពទឹកដីប្រទេសកម្ពុជា ពីព្រោះអ្វីដែលខ្ញុំ សម រង្ស៊ី ធ្វើ គឺដើម្បីការពារទឹកដីខ្មែរ ជាការសោកស្តាយ ជាការអៀនខ្មាស ដែលរដ្ឋសភាយើងមិនការពារផលប្រយោជន៍ជាតិ ទៅការពារផលប្រយោជន៍បរទេសឈ្លានពានឯណោះទៅវិញ។
ជុន ច័ន្ទបុត្រ៖ ប្រសិនបើសភាជាតិសម្រេច ព្យួរឬដកអភ័យឯកសិទ្ធិសភារបស់ឯកឧត្តមចោលដើម្បីបើកផ្លូវឲ្យតុលាការអាចស៊ើបអង្កេតរឿងក្តីរបស់ឯកឧត្តម តើឯកឧត្តមនឹងវិលត្រឡប់មកប្រទេសកម្ពុជាវិញដើម្បីតតាំងក្នុងរឿងក្តីនោះដែរឬទេ? ហើយតើឯកឧត្តមមានអីជាសំអាងដើម្បីថាអាចនឹងឈ្នះក្តីនោះបាន?
សម រង្ស៊ី៖ ខ្ញុំនឹងបន្តការតស៊ូរបស់ខ្ញុំ ការតស៊ូរបស់ប្រជារាស្រ្តខ្មែរ តាមគ្រប់នីតិវិធីទាំងអស់ដែលស្របច្បាប់ ដែលឆ្លុះបញ្ចាំងស្មារតីយើងជាអ្នកទទួលខុសត្រូវ ជាអ្នកប្រជាធិបតេយ្យធ្វើអ្វីៗដោយអហិង្សានិងសន្តិវិធី។ ក្នុងក្របខ័ណ្ឌហ្នឹងអ្វីដែលខ្ញុំកំពុងតែធ្វើ ដែលបានធ្វើមកទល់នឹងសព្វថ្ងៃ មិនមែនចប់តែត្រឹមហ្នឹងទេ ត្រូវតែបន្តៗរហូតដល់ទទួលបានជោគជ័យ មិនមែនជោគជ័យសម្រាប់ សម រង្ស៊ី ទេ ជោគជ័យសម្រាប់ជាតិ ជាតិខ្មែរ ជោគជ័យសម្រាប់ប្រជារាស្រ្តខ្មែរដែលឥឡូវនេះ កំពុងតែរងគ្រោះហ្នឹង។
យើងទាំងអស់គ្នាត្រូវតែរួបរួមគ្នាដើម្បីការពារទឹកដីមាតុភូមិកម្ពុជាយើង ដើម្បីការពារកសិករខ្មែរ អ្នកស្រែ អ្នកចម្ការ ដែលពួកគាត់បាត់បង់ដីធ្លី ដោយសារបរទេសឈ្លានពាន ដូចខ្ញុំនិយាយអម្បាញ់មិញជាការសោកស្តាយណាស់ ដែលអ្នកតំណាងរាស្រ្តយើងមិនឃើញ មិននឹកឃើញ មិនឈឺឆ្អាល ចំពោះការបាត់បង់ទឹកដី ហើយការដែលប្រជារាស្រ្តខ្មែរបាត់បង់ដីស្រែ ដីចម្ការ ដីធ្លី ផ្ទះសម្បែងនៅផ្ទៃក្នុងប្រទេសកម្ពុជាតាមគ្រប់ខែត្រក្រុងទាំងអស់ គឺរដ្ឋអំណាចយើងសព្វថ្ងៃ គេប្រើពាក្យ គេយករដ្ឋជាខែល យកដីប្រជារាស្រ្ត គេថាដីហ្នឹងដីរដ្ឋ តែទីបញ្ចប់រដ្ឋអំណាចសព្វថ្ងៃហ្នឹងគ្រាន់តែយកឈ្មោះរដ្ឋជាខែលទេ យកដីប្រជារាស្រ្តថាជាដីរដ្ឋ តែទីបញ្ចប់យកទៅលក់ឲ្យក្រុមហ៊ុនឯកជន លក់ឲ្យថៅកែ លក់ឲ្យឧកញ៉ាឯណោះទៅវិញ ធ្វើឲ្យប្រជាកសិករខ្មែរបាត់បង់ដីស្រែ ដីចម្ការរបស់ជនជាតិខ្មែរយើង។
បើនៅតាមជាយដែនវិញដូចគ្នាអ៊ីចឹង រដ្ឋអំណាចប្រើភាសាដដែលហ្នឹង យកពាក្យរដ្ឋធ្វើជាខែលទៅរឹបអូសយកដីធ្លីបងប្អូនជនរួមជាតិយើងដែលរស់នៅតាមដងព្រំប្រទល់ដែនជាមួយប្រទេសវៀតណាម គេថាដីហ្នឹងដីរដ្ឋចង់យកពេលណាក៏បានដែរ ហើយគេយកមែន។ តែទីបញ្ចប់មានយកទៅឲ្យរដ្ឋខ្មែរឯណា យកទៅឲ្យរដ្ឋយួន យកទៅឲ្យបរទេសឈ្លានពាន ដូច្នេះរឿងអីយើងសុខចិត្ត រឿងអីយើងឱបដៃឈរមើល រឿងអីយើងឱនក្បាលឲ្យគេជិះជាន់ ឲ្យគេមើលងាយរាស្រ្តខ្មែរ ជនជាតិខ្មែរ មាតុភូមិជាតិយើងដូចសព្វថ្ងៃនេះ។
ខ្ញុំសូមអំពាវនាវឲ្យខ្មែរយើងទាំងអស់ភ្ញាក់រឭក ឲ្យខ្មែរយើងទាំងអស់រួបរួមគ្នាដើម្បីការពារជនជាតិខ្មែរយើងដែលជាអ្នករងគ្រោះ កសិករខ្មែរ អ្នកស្រែ អ្នកចម្ការ អ្នកក្រ អ្នកទន់ខ្សោយ ដែលបាត់បង់ដីធ្លី ដីធ្លីនៅកណ្តាលប្រទេសក៏បាត់បង់ ដីធ្លីនៅជាយដែនក៏បាត់បង់។ ដូច្នេះមានអំពើអយុត្តិធម៌ធ្ងន់ធ្ងរណាស់ រឿងអីមានតែគណបក្សសមរង្ស៊ីមួយចេញមុខការពារប្រជារាស្រ្តខ្មែរ ក្រែងយើងខ្មែរទាំងអស់គ្នាដែរ? រឿងអីទៅការពារតែអ្នកដែលប្រព្រឹត្តអំពើអាក្រក់ អំពើឃោរឃៅមកលើអ្នកទន់ខ្សោយមកលើអ្នកក្រីក្រ។
ខ្ញុំជឿថា ខ្មែរយើងមានអ្នកស្រឡាញ់យុត្តិធម៌ច្រើនណាស់ យុត្តិធម៌សម្រាប់ប្រជារាស្រ្តខ្មែរក្រីក្រទន់ខ្សោយដែលបាត់បង់ដីធ្លីផង យុត្តិធម៌សម្រាប់ជាតិមាតុភូមិកម្ពុជាយើងដែលបាត់បង់ទឹកដី ដែលត្រូវគេរំលោភបូរណភាពទឹកដីរៀងរាល់ថ្ងៃនេះ ដូច្នេះខ្ញុំអត់មានអ្វីតក់ស្លុត ខ្ញុំអត់មានរារែក ខ្ញុំអត់មានចុះចាញ់ ចុះថយអីបន្តិចទាល់តែសោះ ផ្ទុយទៅវិញទង្វើៗដ៏អាក្រក់របស់អ្នកកាន់អំណាចសព្វថ្ងៃធ្វើឲ្យខ្ញុំមានការប្តេជ្ញាចិត្តកាន់តែខ្ពស់ កាន់តែខ្លាំងក្លាឡើងថែមទៀត ដើម្បីការពារអ្នករងគ្រោះ ការពារជនជាតិខ្មែរ ការពារផលប្រយោជន៍មាតុភូមិកម្ពុជារបស់យើង៕