ប្រជាពលរដ្ឋប្រមាណ ១០នាក់បានរងរបួសក្នុងការប៉ះទង្គិចជាមួយកងកម្លាំងប្រដាប់អាវុធប្រមាណ៤០នាក់ ដែលអនុវត្តសាលដីការបស់តុលាការកំពូល ក្នុងការរឹបអូសដកហូតដីនៅភូមិស្តុកស្លា ឃុំភ្នំតូច ស្រុកឧតុង្គ ខេត្តកំពង់ស្ពឺ។
ប្រជាពលរដ្ឋប្រមាណ ២០០នាក់ដែលភាគច្រើនកាន់ដំបង អ្នកខ្លះកាន់ដុំថ្ម ហើយអ្នកខ្លះប្រើចម្ពាមកៅស៊ូ បានវាយ គប់គ្រវែង និងបាញ់សម្រុកទៅលើកងកម្លាំងនគរបាលព្រមទាំងកងរាជអាវុធហត្ថ ហើយមានអ្នកខ្លះបានកាន់ដបសាំងចាក់ស្រោចទៅលើថ្នល់ដោយពួកគាត់អះអាងថា កងកម្លាំងសមត្ថកិច្ចបានបាញ់គំរាម និងប្រើដំបងឆក់វាយមកលើពួកគាត់មុន។
ទស្សនាវីដេអូនៅវឹបសាយថ៍ YouTube
តំណាងប្រជាពលរដ្ឋដែលធ្វើការតវ៉ា លោក សុន ប៊ុនឈួន បានថ្លែងថា ភាគីប្រជាពលរដ្ឋមានបំណងសុំចរចារកដំណោះស្រាយដោយសន្តិវិធី តែកងកម្លាំងប្រដាប់អាវុធបានចាប់ផ្ដើមអំពើហិង្សាមកលើប្រជាពលរដ្ឋមុន។
លោក ស៊ុន ប៊ុនឈួន បានឲ្យដឹងដូច្នេះ ៖ «ខ្ញុំគេបាញ់ ស្លឹកត្រចៀកខ្ញុំក្ដៅ ២គ្រាប់ កាំភ្លើងខ្លី ហ្នឹងលោកមេប៉ូលិសពាក់អាវស៊ីវិលមួយនោះ។ ខ្ញុំហែកអាវឲ្យបាញ់ បាញ់ទៅៗ ខ្ញុំអស់ស្រែខានធ្វើហើយ បាញ់ខ្ញុំឲ្យងាប់ទៅៗ ខ្ញុំអត់ស្ដាយជីវិតខ្ញុំទេ ខ្ញុំអស់ស្រែ ខ្ញុំអស់ផ្ទះ ខ្ញុំនៅឯណាៗ អយុត្តិធម៌ម្ល៉េះៗៗ»។
មន្ត្រីនគរបាលមួយរូបដែលរបួសជើងខាងឆ្វេងចំនួនពីរកន្លែង លោក ឡុច ស៊ីវណ្ណ បានអះអាងផ្ទុយពីនេះ ៖ «ប្រជាពលរដ្ឋគាត់បានចាប់ផ្ដើមមុនសមត្ថកិច្ច សមត្ថកិច្ចយើងក៏ទ្រាំអត់បានក៏បានតបតដើម្បីដោះខ្លួន»។
មន្ត្រីសម្របសម្រួលនៃសមាគមការពារសិទ្ធិមនុស្សអាដហុក ប្រចាំខេត្តកំពង់ស្ពឺ លោកស្រី អ៊ូច បូ បានប្រសាសន៍ថា មានភាពមិនប្រក្រតីមួយចំនួននៅក្នុងឯកសារដីធ្លីដែលកំពុងតែមានទំនាស់នោះ។
លោកស្រី អ៊ូច បូ មានប្រសាសន៍ដូច្នេះ ៖ «សូមឲ្យតុលាការគាត់គិតពីភាពយុត្តិធម៌សង្គម និងភាពស្របច្បាប់របស់ប្រជាពលរដ្ឋដែលលោកបានកាន់កាប់ជាយូរមកហើយ ស្របតាមលក្ខខណ្ឌនៃច្បាប់ភូមិបាលហើយ។ ទី២ សូមឲ្យគាត់គិតពីភាពស្របច្បាប់នៃប័ណ្ណផង កុំឲ្យតែឃើញត្រាគាត់ចាត់ថាប័ណ្ណហ្នឹងត្រឹមត្រូវ»។
តំណាងក្រុមហ៊ុនម៉េង កេត ដែលប្រជាពលរដ្ឋអះអាងថា ជាក្រុមហ៊ុនរបស់ជនជាតិតៃវ៉ាន់ឈ្មោះ ចាង កូសិន លោក គី ដារា បានអះអាងថា ដីដែលកំពុងតែមានទំនាស់នោះគឺជារបស់ក្រុមហ៊ុនម៉េង កេតដោយស្របច្បាប់ ហើយថា ប្រជាពលរដ្ឋដែលតវ៉ាពុំមានដីនៅទីនោះទេ។
លោក គី ដារា អះអាងដូច្នេះ ៖ «គាត់ចោទអត់មានចុងសន្លឹក។ នៅខេត្តកំពង់ស្ពឺ កាលហ្នឹងថ្នាក់ដែលដោះស្រាយហ្នឹងដោះស្រាយមិនយុត្តិធម៌ឲ្យខ្ញុំ»។
ក្នុងការប៉ះទង្គិច ខាងប្រជាពលរដ្ឋបានអះអាងថា បានរងរបួសជាង១០នាក់ ហើយនៅកន្លែងកើតហេតុប្រជាពលរដ្ឋ៤-៥នាក់បានបង្ហាញរបួសរបស់ខ្លួន អ្នកខ្លះរបួសក្បាល ភ្នែកនិងខ្លួនប្រាណ។ ដូចគ្នានេះដែរ ខាងមន្ត្រីសមត្ថកិច្ច៤-៥នាក់បានបង្ហាញមុខរបួសនៅកន្លែងកើតហេតុ។
ការអនុវត្តសាលដីកានៅថ្ងៃទី១៨ មីនា មិនបានសម្រេចទេ ដោយក្រុមមន្ត្រីបានដកថយ។ ទោះយ៉ាងណា រហូតដល់រសៀលថ្ងៃដដែល ក្រុមអ្នកតវ៉ាបន្តនៅជួបជុំគ្នា ដោយពួកគាត់បានដោតបដាតាមវាលស្រែ អំពាវនាវសុំជំនួយពីប្រមុខរដ្ឋាភិបាល រិះគន់ប្រព័ន្ធតុលាការ វាយនិងចងអូសទីងមោងចំនួនពីរ ដោយអ្នកស្រុកចាត់ទុកជាតំណាងមន្ត្រីតុលាការនិងមន្ត្រីអាជ្ញាធរដែលពុករលួយ យកទៅចងភ្ជាប់នឹងដើមឈើ ហើយពួកគាត់អះអាងថា នឹងដុតកម្ទេចទីងមោងនៅម៉ោង១២យប់៕