សាលាឧទ្ធរណ៍ផ្ដន្ទាទោសសកម្មជនដីធ្លី
2015.01.26
ចៅក្រមសាលាឧទ្ធរណ៍ផ្តន្ទាទោសស្ត្រីសកម្មជនដីធ្លី ១០នាក់ និងអតីតព្រះសង្ឃ ១អង្គ នៅព្រឹកថ្ងៃទី២៦ មករា ក្នុងបទចោទ ២ដាច់ដោយឡែកពីគ្នា។ សំណុំរឿងទី១ ចៅក្រមសម្រេចផ្ដន្ទាទោសស្ត្រីសកម្មជនដីធ្លីបឹងកក់ ៧នាក់ ដាក់ពន្ធនាគារចន្លោះពី ៦ខែ ទៅ ១ឆ្នាំ និងពិន័យជាប្រាក់ពី ១លានរៀល ទៅ ១,៥លានរៀល ពាក់ព័ន្ធនឹងបទចោទ បង្កឲ្យស្ទះចរាចរណ៍សាធារណៈ។ ចំណែកឯសំណុំរឿងទី២ ដែលមានស្ត្រីសកម្មជនដីធ្លី ៣នាក់ផ្សេងទៀត ត្រូវបានចាប់ខ្លួននៅមុខសាលាដំបូងរាជធានីភ្នំពេញ ចៅក្រមសម្រេចផ្ដន្ទាទោសដាក់ពន្ធនាគារ ១០ខែ និងពិន័យជាប្រាក់ ១,៥លានរៀល។ រីឯអតីតព្រះសង្ឃខ្មែរកម្ពុជា សឺន ហាយ ត្រូវបានតុលាការផ្ដន្ទាទោសដាក់ពន្ធនាគារ ១ឆ្នាំ និងពិន័យជាប្រាក់ ២លានរៀល។ អ្នកទាំង ៤ ត្រូវបានចោទពីបទរំខានមន្ត្រីរាជការសាធារណៈ៕