២នាក់ស្លាប់និង៨នាក់ធ្លាក់ខ្លួនឈឺសង្ស័យពុលកាហ្វេ
h091912ob.mp3
ប៉ូលិសខេត្តតាកែវ ចុះស៊ើបអង្កេត និងយកសំបកកាហ្វេទុកជាភស្តុតាង ដែលសង្ស័យថា ជាមូលហេតុបណ្ដាលឲ្យមនុស្ស២នាក់ស្លាប់ និងធ្លាក់ខ្លួនឈឺ៨នាក់ ក្នុងនោះមានក្មេងអាយុ២ឆ្នាំផង ក្រោយពីពួកគេទទួលទានកាហ្វេ ក្នុងពិធីបុណ្យបញ្ចុះអដ្ឋិធាតុក្រុមគ្រួសារអ្នកមកពីសហរដ្ឋអាមេរិក នៅវត្តអង្គមន្ត្រី ឃុំគូស ស្រុកត្រាំកក់ កាលពីថ្ងៃទី១៨ ខែកញ្ញា។
ស្នងការរងខេត្តតាកែវ ទទួលបន្ទុកខាងព្រហ្មទណ្ឌ លោក សួន ផុន ថ្លែងនៅព្រឹកថ្ងៃពុធ ទី១៩ ខែកញ្ញា ថា មានមនុស្ស២នាក់ស្លាប់ និងមនុស្ស៨នាក់ផ្សេងទៀតបានពុល ក្រោយពីទទួលទានកាហ្វេរួច។ លោកបន្តថា កាលពីថ្ងៃអង្គារ ទី១៨ ខែកញ្ញា សមត្ថកិច្ចចម្រុះបានយកសំណាកកញ្ចប់កាហ្វេដែលស្ត្រីម្នាក់ឈ្មោះ យាយ ផន បានយកមកពីសហរដ្ឋអាមេរិក ឆុងជូនអ្នកចូលរួម និងចាស់ព្រឹទ្ធាចារ្យ ពិសាក្នុងពិធីបុណ្យបញ្ចុះឆ្អឹងក្រុមគ្រួសារ នៅវត្តអង្គមន្ត្រី ឃុំគូស ស្រុកត្រាំកក់ ខេត្តតាកែវ យកទៅវិភាគ។
លោក សួន ផុន៖ «ដល់ពិនិត្យជាក់ស្ដែងអ៊ីចឹងទៅ យើងឃើញថា ក្រោយពេលហូបរបស់ដូចជាកាហ្វេស្អី តែ ឬស្អីច្រើនមុខណាស់ យើងមិនកំណត់ថា នេះជាជាតិពុល ឬយើងមិនទាន់និយាយបានទេ គឺវានៅខាងឡាបូ ដើម្បីពិនិត្យធ្វើកោសល្យវិច័យ»។
នាយផ្នែកព្រហ្មទណ្ឌស្រុកត្រាំកក់ លោក យូ អាន បានថ្លែងថា អ្នកស្លាប់ចំនួន២នាក់ ម្នាក់ជាប្រធានអាចារ្យវត្ត និងម្នាក់ទៀតជាអ្នកដាំទឹកតែ ហើយ៨នាក់ផ្សេងទៀត ដែលមានអាការៈមិនស្រួល។ ក្នុង៨នាក់នោះ មានស្ត្រីម្នាក់អាយុជាង៣០ឆ្នាំ និងកុមារាអាយុ២ឆ្នាំម្នាក់។ ក្រៅពីនោះ ជាមនុស្សចាស់ ត្រូវបានដឹកយកទៅសង្គ្រោះនៅមន្ទីរពេទ្យ។ លោកថា ប៉ូលិសស៊ើបអង្កេតក្រែងមានអំពើឃាតកម្ម ដោយបន្លំដាក់ថ្នាំបំពុល។ លោកថា អ្នកស្លាប់នោះ គឺម្នាក់ស្លាប់លើសាលាឆាន់ និងម្នាក់ទៀតស្លាប់នៅពេលទៅដល់ផ្ទះ។
លោក យូ អាន៖ «មួយឈ្មោះ តុប ណុប ជាអាចារ្យធម៌ក្នុងវត្តអង្គមន្ត្រី និងអាយុ៧៥ឆ្នាំ។ គាត់ស្លាប់ ពេលដែលដឹងថា ខ្លួនគាត់អត់ស្រួល។ គាត់ក៏ជិះម៉ូតូទៅផ្ទះគាត់។ ពេលទៅដល់នោះ គាត់ដេកទៅនិងស្លាប់តែម្ដង។ ហើយមួយទៀតឈ្មោះ ជួប តឹក អាយុ៨០ឆ្នាំ ជាអ្នកដាំទឹកយកមកឆុងកាហ្វេ ស្លាប់នៅនឹងវត្តតែម្ដង។ អ៊ីចឹង ខាងសមត្ថកិច្ចយើងមិនទាន់កំណត់ច្បាស់ថា ធាតុហ្នឹងវាពុលដោយសារកាហ្វេ ឬក៏ពុលដោយសារទឹក ឬក៏ពុលដោយសារស្អី យើងមិនទាន់កំណត់ទេ ពីព្រោះថាយើង កំពុងតែធ្វើការស្រាវជ្រាវ ពិនិត្យទៅលើកាហ្វេ លើអីហ្នឹង»។
ប្រធានមន្ទីរសុខាភិបាលខេត្តតាកែវ លោកវេជ្ជបណ្ឌិត ហែម សារ៉េត មានប្រសាសន៍ថា តាមការសាកសួរពលរដ្ឋដែលទទួលទានកាហ្វេហើយមានស្លាប់ និងសង្ស័យពុលនោះ បានទទួលទានអាហារច្រើនមុខ ដែលមិនទាន់អាចថាពុលមកពីកាហ្វេទេ។ លោកថា អ្នកទាំង១០នាក់នោះ បានទទួលទានកាហ្វេទឹកដោះគោ ម៉ាក អិនសួរិន (insurance) មង្ឃុត ស្ករស ស្ករត្នោត។ លោកថា មន្ទីរសុខាភិបាលមិនទាន់ទទួលបានសំណាកកាហ្វេពីសមត្ថកិច្ចប៉ូលិស ដែលប្រមូលយកមកនោះ ដើម្បីធ្វើពិសោធន៍នៅឡើយទេ។
ប្រធានមន្ទីរពេទ្យបង្អែកខេត្តតាកែវ លោក ខៀវ សម្រស់ មានប្រសាសន៍ថា មានមនុស្ស៣នាក់ ចាស់ម្នាក់ និងក្មេង២នាក់ សង្ស័យពុលកាហ្វេ កំពុងព្យាបាលនៅក្នុងមន្ទីរពេទ្យបង្អែកខេត្ត។ លោកថា អ្នកទាំង៣នាក់នោះមិនមានប៉ះពាល់សុខភាពធ្ងន់ធ្ងរទេ៖ «អ្នកជំងឺដែលមកសម្រាន្តពេទ្យខ្ញុំហ្នឹង អត់អីទេ គាត់ស្រួលហើយ គាត់ត្រឡប់ទៅវិញហើយ»។
អ្នកភូមិបានឲ្យដឹងថា ក្រុមអ្នកសង្ស័យពុលកាហ្វេ និងអ្នកស្លាប់នោះ សុទ្ធតែជាអ្នកចំណុះជើងវត្តអង្គមន្ត្រី។ ពួកគាត់ទទួលទានកាហ្វេក្នុងពិធីបុណ្យបញ្ចុះធាតុក្រុមគ្រួសារអ្នកមកពីសហរដ្ឋអាមេរិក ហើយបានស្លាប់ និងក្អួតចង្អោរ វិលមុខ ក្រោយពិសាអាហារថ្ងៃត្រង់ក្នុងថ្ងៃទី១៨ ខែកញ្ញា ឆ្នាំ២០១២៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
