ប្រធានកម្មវិធីនៃអង្គការខារ៉ាមកម្ពុជា លោក មាស សាណែត មានប្រសាសន៍ថា បុរសខ្មែរទាំង ៥នាក់នោះ មានអាយុចន្លោះជាង ២០ឆ្នាំទៅ ៣០ឆ្នាំ ដែលបានចាញ់បោកមេខ្យល់ទៅធ្វើការលើកទូកនេសាទថៃ ហើយក្រោយមកទូកនេសាទនោះ អណ្ដែតទៅដល់ដែនទឹកប្រទេសឥណ្ឌូនេស៊ី។ ពួកគេទាំងនោះ ត្រូវថៅកែបង្ខំឲ្យធ្វើការហួសកម្លាំង។
លោកបានបន្តថា អ្នកទាំងនោះ ត្រូវបានរដ្ឋាភិបាលកម្ពុជា តាមរយៈក្រសួងការបរទេស និងសហប្រតិបត្តិការអន្តរជាតិ និងស្ថានទូតកម្ពុជាប្រចាំបរទេស អង្គការទេសន្តរប្រវេសក៍ និងអង្គការខារ៉ាមកម្ពុជា ជួយសង្គ្រោះ៖ «ប្រាក់ខែប៉ុន្មានខែដែលគាត់ធ្វើទៀតជាមួយនឹងថៅកែនោះ មេខ្យល់បើកយករបស់គាត់អស់ បន្ទាប់មកទូកគាត់នោះចេញទៅដល់ឥណ្ឌូនេស៊ី»។
កាលពីថ្ងៃទី៧ ខែកក្កដា បុរសខ្មែរបីនាក់ដែលធ្វើការលើទូកនេសាទថៃ បាននាំគ្នាព្យាយាមលួចរត់ចុះពីលើទូក ក្នុងគ្រាដែលទូកនេសាទនោះ សំចតនៅក្នុងដែនសមុទ្ទក្នុងខេត្តបាតាំ ប្រទេសឥណ្ឌូនេស៊ី។
នៅក្នុងសេចក្ដីប្រកាសព័ត៌មានរបស់ក្រសួងការបរទេស បានឲ្យដឹងថា ពលករខ្មែររងគ្រោះចំនួន ១៣នាក់ត្រូវបានជួយសង្គ្រោះ។ ពលរដ្ឋខ្មែរចំនួន ១៣នាក់នោះ បានទៅធ្វើការជាកម្មករលើទូកនេសាទនៅអាហ្វ្រិកខាងត្បូង ដែលរងការធ្វើបាបគ្រប់បែបយ៉ាងពីសំណាក់ម្ចាស់ទូកនេសាទ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។