អង្គការ​ស៊ីប៉ា​សម្ពោធ​បណ្ណាល័យ​សម្រាប់​កុមារ​ជំងឺ​បេះដូង​នៅ​មន្ទីរពេទ្យ​កាល់ម៉ែត្រ

បច្ចុប្បន្ន​កុមារ​កម្ពុជា ដែល​កើត​ជំងឺ​បេះដូង ត្រូវ​បាន​គ្រូពេទ្យ​វាយ​តម្លៃ​ថា កំពុង​មាន​ការ​កើន​ឡើង។ កុមារ​ដែល​មាន​ជំងឺ​បេះដូង បាន​ចូល​មក​កាន់​មន្ទីរពេទ្យ ដើម្បី​ស្វែង​រក​ការ​ព្យាបាល​ជា​រៀង​រាល់​ថ្ងៃ។
ដោយ ខែ សុណង
2012-12-07
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

ផ្នែក​ធំ​នៃ​ជំងឺ​បេះដូង​នេះ គឺ​គ្មាន​ការ​ព្យាបាល​ដោយ​ប្រើ​ថ្នាំ ដោយ​មិន​វះកាត់​នោះ​ទេ។ ជាង​នេះ​ទៅ​ទៀត ពួក​គេ​ត្រូវ​ចំណាយ​ពេល​យូរ​ក្នុង​ការ​ព្យាបាល។ បញ្ហា​នេះ​បាន​ជំរុញ​ឲ្យ​អង្គការ​បារាំង មួយ ដែល​មាន​ឈ្មោះ​ថា ឡាហ្ស៊ិន ដឺឡេះស្ព័រ (La Chaîne de l'Espoir) និង​អង្គការ​ស៊ីប៉ា (Sipar) បាន​សហការ​គ្នា​បង្កើត​កម្មវិធី​អប់រំ​សម្រាប់​កុមារ​ក្នុង​មន្ទីរពេទ្យ​បេះដូង។

ក្រុម​កុមារ​ដែល​ទៅ​ព្យាបាល​ជំងឺ​បេះដូង​នៅ​មន្ទីរពេទ្យ​កាល់ម៉ែត្រ ត្រូវ​បាន​អង្គការ​មនុស្សធម៌​ផ្ដល់​សម្ភារៈ​សិក្សា និង​បង្ហាត់​បង្រៀន​អក្សរ​ក្នុង​កំឡុង​ពេល​ពួក​គេ​សម្រាក​ព្យាបាល​ជំងឺ ក្រោម​គម្រោង​មួយ​ដែល​មាន​ឈ្មោះ​ថា រៀន​ក្នុង​មន្ទីរពេទ្យ។

នាយក​អង្គការ​ស៊ីប៉ា លោក ហុក សុទ្ធិ មាន​ប្រសាសន៍​នៅ​ថ្ងៃ​ទី៦ ធ្នូ ថា នេះ​គឺ​ជា​គម្រោង​ថ្មី​មួយ​ផ្ដួច​ផ្ដើម​គំនិត​ដោយ​អង្គការ​បារាំង ដែល​មាន​ឈ្មោះ​ថា ឡាហ្ស៊ិន ដឺឡេះស្ព័រ បាន​សហការ​គ្នា​នឹង​អង្គការ​ស៊ីប៉ា ក្រោម​ការ​ឧបត្ថម្ភ​ពី​មូលនិធិ​កូម៉ូ (Cuomo) ដែល​ជា​អ្នក​ផ្ដល់​អំណោយ​ដ៏​ធំ​នៃ​មន្ទីរពេទ្យ​បេះដូង​កុមារ។

លោក​ថា គម្រោង​នេះ​មាន​បំណង​ជួយ​ដល់​កុមារ​ដែល​បាន​ជា​សះ​ស្បើយ​ពី​ជំងឺ ឲ្យ​បាន​ចូល​រៀន​នៅ​តាម​សាលា​រៀន​របស់​ពួក​គេ​វិញ ព្រម​ទាំង​មាន​ការ​ជួយ​ជា​សម្ភារៈ​សិស្ស ការ​រៀន​មុខវិជ្ជា​អក្សរ​ខ្មែរ និង​មុខវិជ្ជា​គណិតវិទ្យា និង​ការ​លេង​ល្បែង​កម្សាន្ត​នៅ​ក្នុង​ពេល​ដែល​ពួក​គេ​កំពុង​តែ​ទទួល​ការ​សម្រាក​ព្យាបាល​នៅ​ក្នុង​មន្ទីរពេទ្យ។

លោក​ថ្លែង​បែប​នេះ នៅ​ក្នុង​ពិធី​សម្ពោធ​គម្រោង​ឈ្មោះ​ថា រៀន​ក្នុង​មន្ទីរពេទ្យ នៅ​អាគារ​កុមារ​ផ្នែក​ជំងឺ​បេះដូង នៃ​មន្ទីរពេទ្យ​កាល់ម៉ែត្រ រាជធានី​ភ្នំពេញ នៅ​ថ្ងៃ​ទី៦ ខែ​ធ្នូ ឆ្នាំ​២០១២។

គ្រូពេទ្យ​ឯកទេស​ជំងឺ​បេះដូង និង​សង្គ្រោះ​បន្ទាន់ នៅ​អាគារ​កុមារ​នៃ​មន្ទីរពេទ្យ​កាល់ម៉ែត្រ វេជ្ជ​បណ្ឌិត សុខ ផាង បាន​សាទរ​ចំពោះ​គម្រោង​កម្មវិធី​នេះ។ លោក​បាន​ឲ្យ​តម្លៃ​ចំពោះ​កម្មវិធី​នេះ​ថា ជា​គំនិត​ផ្ដួច​ផ្ដើម​ដ៏​ល្អ​មួយ និង​ជា​ឱកាស​បន្លំ​ទុក្ខ​កង្វល់​របស់​កុមារ​ដែល​កំពុង​ភ័យ​តក់ស្លុត​នឹង​ការ​ព្យាបាល​វះកាត់​បេះដូង​នៅ​ក្នុង​មន្ទីរពេទ្យ។

លោក​វេជ្ជ​បណ្ឌិត សុខ ផាង បាន​ឲ្យ​ដឹង​ថា មាន​កុមារ​ចំនួន​ពី ១៥​នាក់ ទៅ ២០​នាក់ ដែល​បាន​ទទួល​ការ​វះកាត់​ជា​រាល់​ខែ។

អាណាព្យាបាល​កុមារ​ដែល​នាំ​យក​កូន​មក​ព្យាបាល​ជំងឺ​បេះដូង ក៏​បាន​ត្រេកអរ​ដែល​បង្កើត​ឲ្យ​មាន​កម្មវិធី​នេះ​ដែរ។

ពលរដ្ឋ​មក​ពី​ខេត្ត​ព្រៃវែង គឺ​អ្នកស្រី ឯម សៀកនី ដែល​មាន​កូន​ប្រុស​អាយុ ៦​ឆ្នាំ កើត​ជំងឺ​បេះដូង​ចំហ បាន​ថ្លែង​ថា អ្នកស្រី​មាន​សេចក្ដី​ត្រេកអរ​ជា​ពន់ពេក​ចំពោះ​អង្គការ​មនុស្សធម៌​នេះ​ដែល​បាន​ជួយ​សង្គ្រោះ​ជីវិត​កូន​គាត់ ហើយ​គាត់​ត្រូវ​សម្រាក​ចំនួន​មួយ​សប្ដាហ៍​សម្រាប់​រង់ចាំ​ការ​វះកាត់​របស់​កូន។

ចំណែក​ពលរដ្ឋ​ម្នាក់​ទៀត​មក​ពី​ខេត្ត​តាកែវ គឺ​អ្នកស្រី ងៀប គឹមហេង បាន​ថ្លែង​ថា កូន​ស្រី​របស់​គាត់​មាន​អាយុ ៤​ឆ្នាំ​មាន​ជំងឺ​ប្រហោង​សន្ទះ​បេះដូង។

ចាប់​តាំង​ពី​ឆ្នាំ​២០០០ រហូត​មក​ដល់​បច្ចុប្បន្ន មន្ទីរពេទ្យ​កាល់ម៉ែត្រ ក្រោម​ជំនួយ​របស់​អង្គការ​ឡាហ្ស៊ិន ដឺឡេះស្ព័រ បាន​វះកាត់​កុមារ​ដែល​មាន​ជំងឺ​បេះដូង​បាន​ជោគជ័យ​ចំនួន ២.២០០​នាក់ ហើយ​នឹង​មាន​អ្នក​ជំងឺ​ដែល​កំពុង​រង់ចាំ​វះកាត់​ជាង ២.០០០​នាក់​ទៀត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល