អាដហុកថា តុលាការខេត្តបាត់ដំបង អនុវត្តផ្ទុយពីនីតិវិធីច្បាប់
h072312mn.mp3
សមត្ថកិច្ចចម្រុះ កាលពីថ្ងៃទី១៨ ខែកក្កដា បានចាប់ប្រជាពលរដ្ឋ៦នាក់ ក្នុងនោះមានបីនាក់ត្រូវចាប់ខ្លួនតាមដីកា និងបីនាក់ទៀត ត្រូវចាប់ខ្លួនពីបទប្រើអំពើហិង្សាដោយចេតនា។
សមាគម អាដហុក (Adhoc) បានស្នើសុំតំណាងអយ្យកាសាលាដំបូងខេត្តបាត់ដំបង បើកការស៊ើបអង្កេតជាថ្មី លើករណីជនជាប់សង្ស័យ៥នាក់ ដែលកំពុងឃុំខ្លួននៅពន្ធនាគារខេត្តបាត់ដំបង។ សំណើនេះធ្វើឡើងបន្ទាប់ពីសមាគមរកឃើញថា ប្រតិបត្តិការដែលកងកម្លាំងសមត្ថកិច្ចចុះទៅចាប់ជនសង្ស័យ និងបទចោទប្រកាន់របស់តុលាការបានអនុវត្តផ្ទុយពីនីតិវិធីច្បាប់។
លោក យិន ម៉េងលី ប្រធានសម្របសម្រួលអង្គការ អាដហុក ប្រចាំខេត្តបាត់ដំបង ថ្លែងថា នៅក្នុងប្រតិបត្តិការចាប់ជនសង្ស័យ សមត្ថកិច្ចបានចាប់មនុស្សពីរក្រុមដាច់ដោយឡែកពីគ្នា។ ក្រុមទី១ មានជនសង្ស័យ៤នាក់ ប៉ុន្តែជនសង្ស័យបីនាក់ត្រូវបានសមត្ថកិច្ចវ៉ៃទាំងដៃជាប់ខ្នោះ។ ចំណែកក្រុមទី២ មានជនសង្ស័យ២នាក់ ត្រូវបានសមត្ថកិច្ចចាប់នៅកន្លែងផ្សេងពីគ្នា។
លោក យិន ម៉េងលី៖ «អញ្ចឹង ស្ថានភាពការវ៉ៃនេះ មិនមែនជាការវ៉ៃតដៃទេ ព្រោះជនសង្ស័យទាំងអស់ត្រូវបានដាក់ខ្នោះដៃ ដូចជាឈ្មោះ ឃឿន សារ៉េត ដាក់ខ្នោះដៃ ហើយបានវ៉ៃ ចំណែកឈ្មោះ ឈួយ ស៊ើន គឺដាក់ខ្នោះដៃ ហើយបានវ៉ៃ។ អញ្ចឹងឈ្មោះ ឈួយ ស៊ើន មានស្លាកស្នាមជាំនៅភ្នែកខាងឆ្វេង និងមានការឈឺនៅលើដើមទ្រូង។ អញ្ចឹងយើងឃើញថា អ្នកដែលពាក់ព័ន្ធទៅនឹងលោក សៀក ភា ដែលជាអធិការនគរបាលស្រុកគាស់ក្រឡ ពាក់ព័ន្ធទៅនឹងលោក ថន ជានគរបាលប៉ុស្តិ៍ឃុំដូនបា ក្នុងការវាយទៅលើជនជាប់សង្ស័យនេះ»។
លោក យិន ម៉េងលី ថ្លែងថា ការចាប់ខ្លួនជនសង្ស័យ សមត្ថកិច្ចបានធ្វើឡើងខុសគោលការណ៍ច្បាប់។ ជនសង្ស័យមិនត្រូវបានសមត្ថកិច្ចបង្ហាញដីកាចាប់ខ្លួនទេ។ ការចុះទៅព័ន្ធចាប់ជនសង្ស័យនៅទីស្ងាត់ សមត្ថកិច្ចមានឯកសណ្ឋានស៊ីវិល ធ្វើឲ្យជនសង្ស័យពុំដឹងពីមូលហេតុនៃការចាប់ខ្លួន។ ជាក់ស្ដែង ជនសង្ស័យម្នាក់បានរត់គេចខ្លួន តែសមត្ថកិច្ចដកកាំភ្លើងខ្លីគំរាមបាញ់។ ជនសង្ស័យបានស្រែកប្រាប់ថា កុំវ៉ៃខ្ញុំ ខ្ញុំសុខចិត្តឲ្យចាប់ខ្លួន។
កាលពីថ្ងៃទី១៩ កក្កដា លោក នួន សាន ព្រះរាជអាជ្ញាអមសាលាដំបូងខេត្តបាត់ដំបង បានបញ្ជាក់ថា លោកបានចេញដីកាបញ្ជាឲ្យមនុស្សតែបីនាក់ ចូលខ្លួនមកតុលាការ ប៉ុន្តែនៅពេលសមត្ថកិច្ចចុះអនុវត្ត ស្រាប់តែមានមនុស្សជាច្រើននាក់ទៀតចូលទៅជួយ ទើបមានការឃាត់ខ្លួនច្រើននាក់ដូច្នេះ។
ទាក់ទិនករណីនេះ លោក យិន ម៉េងលី បានសុំឲ្យតំណាងអយ្យកាបើកការស៊ើបអង្កេតឡើងវិញ តាមគោលការណ៍ច្បាប់។ ព្រះរាជអាជ្ញាជាដើមបណ្ដឹង ជាតំណាងរបស់រដ្ឋាភិបាល និងជាអ្នកការពាររក្សាសន្តិសុខ សណ្ដាប់ធ្នាប់៖ «អញ្ចឹង យើងឆ្ងល់ថា ហេតុអី បានជាជនសង្ស័យនៅចំពោះមុខព្រះរាជអាជ្ញា ដែលមានស្លាកស្នាមជាប់បែកអញ្ចឹង ហេតុអីបានលោកព្រះរាជអាជ្ញាមិនសាកសួរថា ហេតុអីបានអញ្ចឹង លោកមានសិទ្ធិមួយដែលច្បាប់ប្រគល់ឲ្យ»។
ករណីជនជាប់សង្ស័យទាំង៥នាក់ សមាគម អាដហុក បានចេញមុខទទួលការពារក្ដី លើការចោទប្រកាន់ពីបទឆបោក និងបទប្រើអំពើហិង្សាដោយចេតនាលើសមត្ថកិច្ច។
មេធាវីសមាគម អាដហុក លោក ជា តារា បានថ្លែងថា មានជនសង្ស័យ៥នាក់ជាប់ឃុំនៅក្នុងពន្ធនាគារខេត្តបាត់ដំបង។ ពួកគេបានសុំឲ្យលោកជួយការពារក្ដី។ លោកនឹងដាក់ពាក្យទទួលការពារលើករណីនេះ ទៅតុលាការនៅល្ងាចថ្ងៃទី២៣ ខែកក្កដា៖ «ចំពោះកូនក្តីខ្ញុំទាំង៥រូប បន្ទាប់ពីការពិនិត្យឃើញ និងសាកសួរ គឺខ្ញុំយល់ឃើញថា កូនក្ដីខ្ញុំមិនបានទទួលរងនូវការប្រព្រឹត្តិដូចអ្វីដែលតំណាងអយ្យកាធ្វើការចោទប្រកាន់។ ហើយការសម្រេចឃុំខ្លួនរបស់ចៅក្រមស៊ើបសួរ ហាក់ដូចជាមិនទាន់មានមូលដ្ឋានណាមួយ បញ្ជាក់អំពីមូលហេតុត្រឹមត្រូវសម្រាប់ធ្វើការឃុំខ្លួនកូនក្ដីខ្ញុំទេ»។
ក្រុមអ្នកភូមិជាច្រើន នៅតែបន្តលើកគ្នាមកតវ៉ានៅខាងមុខអគារតុលាការខេត្តបាត់ដំបង ដើម្បីទាមទារឲ្យតុលាការដោះលែងអ្នកភូមិ៥នាក់នោះ រួចផុតពីបទចោទប្រកាន់។ ពួកគាត់អះអាងថា រឿងលក់ទិញដី នៅតំបន់ទំនាស់នោះ បង្កឡើងដោយក្រុមអាជ្ញាធរមូលដ្ឋាន។
កាលពីថ្ងៃទី១៩ ខែកក្កដា តំណាងអយ្យកាសាលាដំបូងខេត្តបាត់ដំបង បានចោទជនជាប់សង្ស័យ៥នាក់ ពីបទឆបោក និងបទប្រើអំពើហិង្សាដោយចេតនាទៅលើសមត្ថកិច្ច។ ក្រោយមក ចៅក្រមស៊ើបសួរបានបញ្ជូនទៅឃុំខ្លួន។ អ្នកភូមិទាំងនោះ មានឈ្មោះ សើរ សាមេន ឃឿន សារ៉េត យឹម វិរៈ ឌី សាវុធ និងឈួយ ស៊ើន ត្រូវបានសមត្ថកិច្ចចាប់ខ្លួន កាលល្ងាចថ្ងៃទី១៨ ខែកក្កដា នៅជិតទីតាំងដីមានទំនាស់នៅក្នុងស្រុកគាស់ក្រឡ ខេត្តបាត់ដំបង។ ជនជាប់សង្ស័យទាំង៥នាក់ បច្ចុប្បន្នកំពុងជាប់ឃុំនៅក្នុងពន្ធនាគារខេត្តបាត់ដំបង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
