បទ​វិភាគ៖ តើ​បក្ស​កាន់​អំណាច​ធ្វើ​វិសោធនកម្ម​ច្បាប់​ស្ដីពី​បក្ស​នយោបាយ​ចំណេញ​ឬ​ខាត?

ដោយ ទីន ហ្សាការីយ៉ា
2017-07-07
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
សមាជិក​សភា​គណបក្ស​ប្រជាជន​កម្ពុជា លើក​ដៃ​គាំអនុម័ត​សេចក្ដី​ស្នើ​វិសោធនកម្ម​ច្បាប់​ស្ដីពី​គណបក្ស​នយោបាយ នៅ​ក្នុង​កិច្ច​ប្រជុំ​សភា​វិសាមញ្ញ នៅ​ព្រឹក​ថ្ងៃ​ទី​២០ ខែ​កុម្ភៈ ឆ្នាំ​២០១៧។ RFA/Yang Chandara
សមាជិក​សភា​គណបក្ស​ប្រជាជន​កម្ពុជា លើក​ដៃ​គាំអនុម័ត​សេចក្ដី​ស្នើ​វិសោធនកម្ម​ច្បាប់​ស្ដីពី​គណបក្ស​នយោបាយ នៅ​ក្នុង​កិច្ច​ប្រជុំ​សភា​វិសាមញ្ញ នៅ​ព្រឹក​ថ្ងៃ​ទី​២០ ខែ​កុម្ភៈ ឆ្នាំ​២០១៧។ RFA/Yang Chandara
RFA/Yang Chandara

តំណាងរាស្ត្រ​គណបក្ស​ប្រជាជន​កម្ពុជា កំពុង​កែប្រែ​ច្បាប់​ស្ដីពី​គណបក្ស​នយោបាយ​ដ៏​ចម្រូងចម្រាស​ដើម្បី​ធ្វើ​វិសោធនកម្ម​ចែង​បន្ថែម​ខ្លឹមសារ​មិន​ឲ្យ​អ្នក​ជាប់ទោស ឬ​ទណ្ឌិត​ជាប់​ពាក់ព័ន្ធ​នឹង​គណបក្ស​នយោបាយ​នោះ ត្រូវ​បាន​អ្នក​ច្បាប់ និង​សហគមន៍​អន្តរជាតិ​រិះគន់​ថា ជា​ការ​ធ្វើ​វិសោធនកម្ម​ផ្ទុយ​ពី​រដ្ឋធម្មនុញ្ញ និង​កតិកាសញ្ញា​ស្ដីពី​សិទ្ធិ​ពលរដ្ឋ និង​នយោបាយ​ដែល​កម្ពុជា ជា​ហត្ថលេខី។

ការ​ធ្វើ​វិសោធនកម្ម​ច្បាប់​ស្ដីពី​គណបក្ស​នយោបាយ​ម្ដង​ជា​ពីរ​ដង​នេះ ត្រូវ​បាន​គេ​មើល​ឃើញ​ថា លោក ហ៊ុន សែន ចង់​សងសឹក​លោក សម រង្ស៊ី និង​ចង់​បញ្ចប់​ជីវិត​នយោបាយ​របស់​លោក សម រង្ស៊ី ទៅ​វិញ​ទេ មិន​មែន​ដើម្បី​បម្រើ​ផលប្រយោជន៍​ជាតិ​នោះ​ឡើយ។

តើ​ការ​គ្រោង​ធ្វើ​វិសោធនកម្ម​ច្បាប់​នេះ ពិត​ជា​ធ្វើ​ឲ្យ​គណបក្ស​ប្រជាជន​កម្ពុជា របស់​លោក ហ៊ុន សែន ចំណេញ ឬ​ខាត?

ជា​ការ​ពិត​ណាស់​គ្រាន់តែ​លោក ហ៊ុន សែន ស្រែក​ឲ្យ​ពិនិត្យ​មើល និង​ធ្វើ​វិសោធនកម្ម​ច្បាប់​ស្ដីពី​គណបក្ស​នយោបាយ​ភ្លាមៗ តំណាងរាស្ត្រ​របស់​គណបក្ស​ប្រជាជន​កម្ពុជា របស់​លោក​មិន​បង្អង់​យូរ ហើយ​នាំ​គ្នា​ធ្វើការ​កែប្រែ​ច្បាប់​នេះ​យ៉ាង​តក់ក្រហល់​ភ្លែត។

​អ្នក​ច្បាប់​លើក​ឡើង​ថា ការ​ធ្វើ​វិសោធនកម្ម​ច្បាប់​តាម​មេដឹកនាំ​រដ្ឋ​យ៉ាង​ឆាប់រហ័ស​បែប​នេះ លុះ​ត្រា​តែ​ក្នុង​ករណី​ប្រទេស​កើត​កលិយុគ និង​ដើម្បី​រក្សា​សន្តិសុខ​របស់​ប្រទេស​ជាតិ ដូច​មាន​ចែង​នៅ​ក្នុង​រដ្ឋធម្មនុញ្ញ​តែប៉ុណ្ណោះ។ សម្រាប់​នៅ​ពេល​នេះ​វិញ ត្រូវ​បាន​គេ​មើល​ឃើញ​ថា ក្រុម​តំណាងរាស្ត្រ​គណបក្ស​កាន់​អំណាច​ខំប្រឹង​ធ្វើ​ដើម្បី​បំពេញ​បំណង​របស់​លោក​នាយករដ្ឋមន្ត្រី​ក្នុង​ការ​កម្ចាត់​ជីវិត​នយោបាយ លោក សម រង្ស៊ី បក្ស​ប្រឆាំង​ជា​ជាង​ដើម្បី​គិត​ពី​ផលប្រយោជន៍​ប្រទេស​ជាតិ។

​ពិត​ជា​មិន​បង្អង់​យូរ​មែន នៅ​ព្រឹក​ថ្ងៃ​ទី​៦ ខែ​កក្កដា សេចក្ដី​ស្នើ​សេចក្ដី​ព្រាង​ច្បាប់​នេះ ត្រូវ​បាន​យក​ទៅ​ឲ្យ​គណៈកម្មាធិការ​អចិន្ត្រៃយ៍​សភា​បើក​កិច្ច​ប្រជុំ និង​អនុម័ត​ភ្លាមៗ។ តំណាងរាស្ត្រ​គណបក្ស​ប្រជាជន​កម្ពុជា បាន​បញ្ជាក់​កាន់​តែ​ច្បាស់​ថា ការ​ធ្វើ​ច្បាប់​នេះ ដើម្បី​រារាំង​លោក សម រង្ស៊ី មិន​ឲ្យ​ធ្វើ​សកម្មភាព​នៅ​ក្រៅ​ប្រទេស និង​ដើម្បី​ឲ្យ​អ្នក​គាំទ្រ​បក្ស​ប្រឆាំង​ឈប់​ហៅ​លោក សម រង្ស៊ី ជា​ប្រធាន ឬ​លោក​ប្រធាន​ជាដើម។

តំណាងរាស្ត្រ​គណបក្ស​ប្រឆាំង​វិញ​បាន​ជំទាស់​ដាច់​ខាត​ដោយ​ចាត់​ទុក​សេចក្ដី​ព្រាង​សេចក្ដី​ច្បាប់​នេះ​ថា ជា​ច្បាប់​ដ៏​អាក្រក់​ហួសហេតុ​នឹង​ធ្វើ​ឲ្យ​មេដឹកនាំ​ខ្មែរ​បែកបាក់​គ្នា​ទៅ​វិញ។ គណបក្ស​ប្រឆាំង​អះអាង​ថា ការ​រឹតត្បិត ឬ​ការ​កាត់ផ្ដាច់​លោក សម រង្ស៊ី ពី​គណបក្ស​សង្គ្រោះ​ជាតិ​នេះ ធ្វើ​ឲ្យ​គណបក្ស​សង្គ្រោះ​ជាតិ កាន់​តែ​ធ្វើ​ឲ្យ​គណបក្ស​នេះ មាន​ប្រជាប្រិយភាព​កាន់​តែ​ខ្លាំង។

ក្រុម​តំណាងរាស្ត្រ​គណបក្ស​ប្រជាជន​កម្ពុជា បាន​ប្រញាប់ប្រញាល់​ធ្វើ​វិសោធនកម្ម​ស្ដីពី​គណបក្ស​នយោបាយ​នេះ​តាម​ការ​ចង់​បាន​របស់​លោក ហ៊ុន សែន ម្ដង​រួច​ទៅ​ហើយ កាល​ពី​ដើម​ឆ្នាំ​២០១៧ ដែល​ចែង​មិន​ឲ្យ​ទណ្ឌិត​ធ្វើ​ជា​ប្រធាន​គណបក្ស​នយោបាយ។ នៅ​ពេល​ឃើញ​ដូច្នេះ លោក សម រង្ស៊ី បាន​បោះបង់​តួនាទី​ជា​ប្រធាន​គណបក្ស​សង្គ្រោះ​ជាតិ មុន​ពេល​ច្បាប់​នេះ ត្រូវ​បាន​សភា​បក្ស​ប្រជាជន​កម្ពុជា អនុម័ត​ចូល​ជា​ធរមាន​ទៅ​ទៀត។

ទោះ​បី​ជា​យ៉ាង​នេះ​ក្ដី លោក​នាយករដ្ឋមន្ត្រី​មិនទាន់​អស់​ចិត្ត​នោះ​ទេ គឺ​ក្រោយ​ការ​បោះឆ្នោត​ជ្រើសរើស​ក្រុមប្រឹក្សា​ឃុំ-​សង្កាត់​អាណត្តិ​ទី​៤ ឆ្នាំ​២០១៧ នេះ នៅ​ពេល​ឃើញ​លោក សម រង្ស៊ី នៅ​តែ​ជាប់​ពាក់ព័ន្ធ​នឹង​គណបក្ស​សង្គ្រោះ​ជាតិ បាន​អំពាវនាវ​ឲ្យ​អ្នក​គាំទ្រ​លោក​បោះឆ្នោត​ជូន​បក្ស​ប្រឆាំង​នោះ លោក ហ៊ុន សែន ក៏​ស្នើ​ឲ្យ​សមាជិកសភា​របស់​លោក កាល​ពី​ព្រឹក​ថ្ងៃ​ទី​២៨ មិថុនា ក្នុង​ពិធី​ខួប​លើក​ទី ៦៦​ឆ្នាំ ថ្ងៃ​បង្កើត​គណបក្ស​ប្រជាជន​កម្ពុជា ធ្វើ​វិសោធនកម្ម​ច្បាប់​ស្ដីពី​គណបក្ស​នយោបាយ​នេះ។ ក្រៅ​ពី​នេះ លោក ហ៊ុន សែន ក៏​បាន​ឌឺដង​ឲ្យ​លោក សម រង្ស៊ី ថា បើ​ចិត្ត​សឿង​ចូល​ស្រុក​មក​ទ្វារ​បើក​ចំហ​សម្រាប់​លោក​ហើយ៖ «កុំ​ឲ្យ​អ្នក​ទោស​ធ្វើ​សកម្មភាព​របៀប​នេះ ព្រោះ​រឿង​នេះ​ជា​រឿង​ផ្លូវ​ច្បាប់​មិន​អាច​លេងសើច​បាន​ទេ នៅ​ក្នុង​ដំណើរការ​ប្រជាធិបតេយ្យ យើង​មិន​ខ្លាច​អ្នក​ទេ ក៏​ប៉ុន្តែ​យើង​មិន​ចង់​ឲ្យ​អ្នក​មក​ច្របូកច្របល់​នូវ​អ្វី​ដែល​ជា​សមិទ្ធផល​របស់​ប្រទេស​ជាតិ ប៉ុន្តែ​បើ​អ្នក​ចិត្ត​សឿង​អញ្ជើញ​ចូល​ប្រទេស​មក»។

ក៏​ប៉ុន្តែ​អ្វី​ដែល​លោក ហ៊ុន សែន ចង់​ស្នើ​ឲ្យ​ធ្វើ​វិសោធនកម្ម​ច្បាប់​បោះឆ្នោត​នៅ​ពេល​នេះ ហាក់​ដូច​ផ្ទុយ​ពី​អ្វី​ដែល​លោក​តែងតែ​ប្រកាស​ឲ្យ​បញ្ឈប់​វប្បធម៌​ទឹក​ឡើង​ត្រី​ស៊ី​ស្រមោច​ទឹក​ហោច​ស្រមោច​ស៊ី​ត្រី ពោល​គឺ​វប្បធម៌​សងសឹក​គ្នា ព្រោះ​ថា ការ​ធ្វើ​វិសោធនកម្ម​ច្បាប់​ស្ដីពី​គណបក្ស​នយោបាយ​នេះ មន្ត្រី​ជាន់​ខ្ពស់​បក្ស​ប្រឆាំង​អះអាង​ថា មិនមែន​ដើម្បី​បម្រើ​ផលប្រយោជន៍​ប្រទេស​ជាតិ​ចាំបាច់​អ្វី​ទេ តាម​មើល​ទៅ​ច្បាប់​នេះ គ្រាន់តែ​ដាក់​គំនាប​លោក សម រង្ស៊ី និង​គណបក្ស​សង្គ្រោះ​ជាតិ នឹង​ធ្វើ​ឲ្យ​បក្ស​នេះ​មាន​ការ​ឈឺចាប់​ទៅ​វិញ​ទេ ហើយ​អនុប្រធាន​គណបក្ស​ប្រឆាំង​អះអាង​ថា គេ​នឹង​លុបចោល​វិញ​នៅ​ពេល​ខ្លួន​ឈ្នះ​ឆ្នោត។

សេចក្ដី​ស្នើ​ច្បាប់​ស្ដីពី​វិសោធនកម្ម​ច្បាប់​ស្ដីពី​គណបក្ស​នយោបាយ​នៅ​ក្នុង​មាត្រា​មួយ​ចំនួន​ដែល​ក្រុម​អ្នក​ច្បាប់​បក្ស​ប្រជាជន​កម្ពុជា បាន​បន្ថែម​ថ្មី​នោះ បាន​ចែង​យ៉ាង​ច្បាស់​អំពី​ការ​កំណត់​មិន​អនុញ្ញាត​ឲ្យ​គណបក្ស​នយោបាយ​ជាប់​ពាក់ព័ន្ធ​នឹង​ទណ្ឌិត ទោះ​ជា​ក្នុង​បទឧក្រិដ្ឋ ឬ​មជ្ឈិម​ក្ដី។ បើសិនជា​គណបក្ស​ណា​មួយ​ជាប់​ពាក់ព័ន្ធ​នឹង​ទណ្ឌិត​នោះ មាត្រា​៤៤ និង ៤៥​ថ្មី​ចែង​ពី​ការ​ផ្អាក​សកម្មភាព និង​រំលាយ​គណបក្ស​នោះ​ចោល​ទៀត​ផង។

មាត្រា​៦​ថ្មី​វិញ មិន​អនុញ្ញាត​ឲ្យ​គណបក្ស​នយោបាយ​ប្រើប្រាស់​សារ​ជា​សំឡេង រូបភាព ឯកសារ ជា​លាយលក្ខណ៍អក្សរ ឬ​សកម្មភាព​របស់​ទណ្ឌិត​ជាប់​ទោស​ពី​បទឧក្រិដ្ឋ ឬ​មជ្ឈិម​ដើម្បី​ជា​ផល​ប្រយោជន៍​នយោបាយ​សម្រាប់​បក្ស​ខ្លួន​នោះ​ទេ។ មាត្រា​នេះ ចង់​មិន​ចង់​គឺ​សំដៅ​ទៅ​លើ​គណបក្ស​សង្គ្រោះ​ជាតិ ដែល​មាន​រូប​លោក សម រង្ស៊ី និង​លោក កឹម សុខា នៅ​លើ​ស្លាក​គណបក្ស​ដែល​បាន​ដាក់​តាំង​នៅ​ទូទាំង​ប្រទេស​នោះ។ ប្រការ​នេះ​អាច​និយាយ​បាន​ថា ជា​ការ​ដាក់​គំនាប​ទាំង​ការ​ចំណាយ​លើ​ការ​ធ្វើ​ស្លាក​គណបក្ស​ថ្មី នឹង​ចាំ​ចាប់​កំហុស​បក្ស​ប្រឆាំង​នៅ​ពេល​ច្បាប់​នេះ​ចូល​ជា​ធរមាន បើសិនជា​គណបក្ស​នេះ​ធ្វេសប្រហែស​ក៏​ថា​បាន។

នៅ​​ត្រង់​ចំណុច​នេះ តាម​មើល​ទៅ​លោក​នាយករដ្ឋមន្ត្រី ហ៊ុន សែន ទំនង​ចង់​បន្សាប​ឥទ្ធិពល​លោក សម រង្ស៊ី និង​រុញ​ឲ្យ​លោក សម រង្ស៊ី ទាល់ច្រក​ដែល​គ្មាន​ឱកាស​វិល​មក​ឆាក​នយោបាយ​ដោយសារ​តែ​លោក សម រង្ស៊ី នៅ​ជាប់​បណ្ដឹង​នៅ​តុលាការ​កម្ពុជា រាប់​មិន​អស់​នោះ។ មួយ​វិញ​ទៀត បើ​ច្បាប់​នេះ​ចូល​ជា​ធរមាន​ហើយ​នោះ បើ​គណបក្ស​សង្គ្រោះ​ជាតិ ខ្វះ​ការ​ប្រុង​ប្រយ័ត្ន​ក្នុង​ការ​ទាក់ទង​លោក សម រង្ស៊ី ដោយ​ប្រការ​ណា​មួយ​នោះ តុលាការ និង​ក្រសួង​មហាផ្ទៃ មាន​ឱកាស​ប្រើប្រាស់​ច្បាប់​នេះ រំលាយ​គណបក្ស​សង្គ្រោះ​ជាតិ ចោល​បាន​ដោយ​ងាយ។ ការ​ធ្វើ​បែប​នេះ​លោក ហ៊ុន សែន នឹង​ប្រកាស​ថា ជា​ការ​អនុវត្ត​ច្បាប់​ប្រទេស​មាន​នីតិរដ្ឋ​ត្រូវ​តែ​អនុវត្ត​ច្បាប់​ដូច្នេះ​ហើយ ។ល។

ម្យ៉ាង​ទៀត ប្រសិនបើ​លោក​នាយករដ្ឋមន្ត្រី ហ៊ុន សែន នៅ​តែ​បន្ត​វប្បធម៌​បង្កើត​ច្បាប់​មួយ​សំដៅ​កម្ចាត់​មនុស្ស​ម្នាក់​បែប​នេះ ចុះ​បើ​មាន​ពលរដ្ឋ​រាប់​លាន​នាក់ ប្រឆាំង​នឹង​លោក តើ​លោក​នឹង​បង្កើត​ច្បាប់​រាប់​លាន​ដើម្បី​កម្ចាត់​ពលរដ្ឋ​រាប់​លាន​នាក់​នោះ ឬ​យ៉ាង​ណា?

​យ៉ាង​ណា​ក៏ដោយ​ចុះ យុទ្ធសាស្ត្រ​កាច់​កុង​គ្នា ឬ​យក​ឈ្នះ​ចាញ់​គ្នា​របស់​គណបក្ស​ប្រជាជន​កម្ពុជា នៅ​ដំណាក់កាល​ចុង​ក្រោយ​នេះ ហាក់​ដូចជា​គ្មាន​ចំណេញ​ប្រជាប្រិយភាព​អ្វី​នោះ​ទេ ព្រោះ​ថា នៅ​គ្រា​ដែល​ពលរដ្ឋ​ស្ទើរ​ពេញ​នគរ​កំពុង​ប្រឈម​នឹង​បញ្ហា​លំបាក យុវជន​ធ្វើ​ចំណាកស្រុក​ជា​បន្តបន្ទាប់ ដំណាំ​កសិផល​របស់​កសិករ​គ្មាន​ទីផ្សារ ប៉ុន្តែ​តុលាការ ឬ​រដ្ឋាភិបាល​រវល់​ទៅ​នឹង​រឿង​ចាប់ចង​អ្នក​ការពារ​សិទ្ធិមនុស្ស អ្នក​វិភាគ សកម្មជន​ដីធ្លី សកម្មជន​បក្ស​ប្រឆាំង និង​សមាជិក​រដ្ឋសភា ព្រឹទ្ធ​សភា​ទៅ​វិញ។

សម្រាប់​បច្ចុប្បន្ន​​នេះ​វិញ នៅ​គ្រា​ដែល​ពលករ​ខ្មែរ​ខុស​ច្បាប់​នៅ​ក្នុង​ប្រទេស​ថៃ អ្នក​ខ្លះ​ត្រូវ​បាន​អាជ្ញាធរ​ថៃ ចាប់​បញ្ជូន និង​អ្នក​ខ្លះ​រត់​សម្រុក​ចូល​ស្រុក​វិញ ដូច​ទឹកបាក់​ទំនប់ តែ​បែរ​ជា​តំណាងរាស្ត្រ​បក្ស​កាន់​អំណាច មមាញឹក​នឹង​ការ​ធ្វើ​ច្បាប់​កំណត់​មិន​ឲ្យ​អ្នក​ទោស​ជាប់​ទាក់ទង​បក្ស​នយោបាយ ហាក់​ដូចជា​ភ្លេច​ពី​អ្វី​ដែល​ជា​តម្រូវការ​របស់​ពលរដ្ឋ​បច្ចុប្បន្ន។ បញ្ហា​រវល់​ធ្វើ​ច្បាប់​រាប់​មិន​អស់​នៅ​សភា និង​ការ​ចាប់ចង​នេះ​ហើយ ដែល​ជំរុញ​ឲ្យ​បក្ស​កាន់​អំណាច​បាត់បង់​មេ​ឃុំ ចៅសង្កាត់​ជិត ៥០០ នៅ​ក្នុង​ការ​បោះឆ្នោត​ជ្រើសរើស​ក្រុមប្រឹក្សា​ឃុំ-​សង្កាត់ អាណត្តិ​ទី​៤ នេះ ក៏​ថា​បាន។

​ជា​សរុប​សេចក្ដី​ទៅ ការ​កែប្រែ​ច្បាប់​នយោបាយ​នៅ​ពេល​នេះ ក៏​ដូចគ្នា​ដែរ គ្មាន​ចំណេញ​អ្វី​ដល់​បក្ស​កាន់​អំណាច​នោះ​ទេ តាម​មើល​ទៅ ព្រោះ​នៅ​ក្នុង​សម័យកាល​ដែល​មាន​ប្រព័ន្ធ​បច្ចេកវិទ្យា​ប្រើប្រាស់​ទំនើប​រួមមាន​ហ្វេសប៊ុក (Facebook) ធ្វីតធឺ (Twitter) និង​ផ្សេងៗ​ទៀត​នេះ អ្នក​នយោបាយ​ពិបាក​នឹង​បិទ​បាំង​ពី​អ្វី​ដែល​ខ្លួន​បាន​ធ្វើ និង​សកម្មភាព​របស់​គណបក្ស​នយោបាយ​កំពុង​តែ​ដើរ​ណាស់ ដូចជា​ការ​កែប្រែ​ច្បាប់​ស្ដីពី​គណបក្ស​នយោបាយ​នេះ​ជាដើម ព្រោះ​ថា អ្នក​ណា​ក៏​ដឹង​ដែរ​ថា ការ​ធ្វើ​វិសោធនកម្ម​ច្បាប់​នេះ គ្រាន់​តែ​ជា​រឿង​នយោបាយ​ចង់​កម្ចាត់​បក្ស​ប្រឆាំង និង​លោក សម រង្ស៊ី នោះ។

ផ្ទុយ​ទៅ​វិញ ការ​កែប្រែ​ច្បាប់​នេះ អាច​ថា លោក ហ៊ុន សែន ខ្លាច​លោក សម រង្ស៊ី នៅ​ក្នុង​ការ​ប្រកួតប្រជែង​លើ​ឆាក​នយោបាយ​ដូច​ដែល​លោក សម រង្ស៊ី អះអាង ឬ​យ៉ាង​ណា?  ព្រោះ​ថា នៅ​ក្នុង​ជីវិត​នយោបាយ​របស់​លោក សម រង្ស៊ី តាំង​ពី​អាណត្តិ​ទី​២​មក លោក សម រង្ស៊ី មិន​ដែល​បាន​ចូលរួម​ប្រកួតប្រជែង​បាន​ដោយ​ពេញ​ដៃ​ពេញ​ជើង​នោះ​ទេ។ លោក សម រង្ស៊ី ពេល​ខ្លះ​រង​នូវ​គ្រាប់បែកដៃ​នៅ​ក្នុង​ព្រឹត្តិការណ៍​ថ្ងៃ​ទី​៣០ ខែ​មីនា ឆ្នាំ​១៩៩៧ និង​រត់​គេច​ពី​ដីកា​ចាប់​ខ្លួន​ពី​តុលាការ​ជា​ញឹកញាប់។

សម្រាប់​ឆ្នាំ​២០១៧ នេះ​វិញ បើសិនជា​គ្មាន​ចេតនា​ណា​មួយ​សម្រាប់​កម្ចាត់​លោក សម រង្ស៊ី និង​បក្ស​សង្គ្រោះ​ជាតិ​ទេ​នោះ តើ​ចាំបាច់​អ្វី​ត្រូវ​កែប្រែ​ច្បាប់​នេះ​ឡើង ដោយ​រង​ការ​រិះគន់​ពី​សហគមន៍​ជាតិ និង​អន្តរជាតិ? ព្រោះ​ថា លោក សម រង្ស៊ី លែង​មាន​តួនាទី​ជា​ប្រធាន​បក្ស ឬ​តួនាទី​អ្វី​ផ្សេង​នៅ​ក្នុង​គណបក្ស​ប្រឆាំង​ទៀត​ហើយ​នោះ។ សព្វថ្ងៃ​នេះ លោក សម រង្ស៊ី មិន​ខុស​ពី​ពលរដ្ឋ​ទូទៅ​នោះ​ឡើយ ប៉ុន្តែ​ការ​កែប្រែ​ច្បាប់​នេះ ត្រូវ​បាន​អ្នក​ច្បាប់​ចាត់​ទុក​ថា ជា​ការ​ធ្វើ​ផ្ទុយ​ពី​រដ្ឋធម្មនុញ្ញ និង​កតិកាសញ្ញា​អន្តរជាតិ​ស្ដីពី​សិទ្ធិ​ពលរដ្ឋ និង​នយោបាយ ដែល​កម្ពុជា ជា​ភាគី​ហត្ថលេខី​នោះ។

រដ្ឋធម្មនុញ្ញ​មាត្រា​៣១ ចែង​ថា ព្រះរាជាណាចក្រ​កម្ពុជា ទទួល​ស្គាល់ និង​គោរព​សិទ្ធិមនុស្ស​ដូច​មាន​ចែង​ក្នុង​ធម្មនុញ្ញ​អង្គការ​សហប្រជាជាតិ សេចក្ដី​ប្រកាស​ជា​សកល​ស្ដីពី​សិទ្ធិមនុស្ស និង​កតិកាសញ្ញា ព្រមទាំង​អនុសញ្ញា​ទាំង​ឡាយ​ទាក់ទង​ទៅ​នឹង​សិទ្ធិមនុស្ស សិទ្ធិ​នារី និង​សិទ្ធិ​កុមារ។ ឯ​មាត្រា​៣៥ ចែង​ថា ប្រជាពលរដ្ឋ​ខ្មែរ​ទាំង​ពីរ​ភេទ​មាន​សិទ្ធិ ចូលរួម​យ៉ាង​សកម្ម​ក្នុង​ជីវភាព​នយោបាយ សេដ្ឋកិច្ច សង្គមកិច្ច និង​វប្បធម៌​របស់​ប្រទេស​ជាតិ។

ជា​សរុប​សេចក្ដី​ទៅ​ការ​កែប្រែ​ច្បាប់​ស្ដីពី​គណបក្ស​នយោបាយ​នេះ តាម​មើល​ទៅ​គណបក្ស​ប្រជាជន​កម្ពុជា គ្មាន​ចំណេញ​អ្វី ឬ​ទាក់ទាញ​ការ​គាំទ្រ​ពី​ប្រជាពលរដ្ឋ​បាន​នោះ​ទេ ដោយសារ​ពលរដ្ឋ​ប្រហែលជា​ដឹង​ច្បាស់​ថា ច្បាប់​នេះ​គ្មាន​ចំណេញ​អ្វី​ដល់​ប្រទេស​ជាតិ​ឡើយ មាន​តែ​ការ​ធ្វើ​ឲ្យ​ភាគី​ម្ខាង​ទៀត​មាន​ការ​ឈឺ​ចាប់​ទៅ​វិញ​ទេ។ នៅ​ត្រង់​ចំណុច​នេះ ប្រហែលជា​គណបក្ស​ប្រជាជន​កម្ពុជា ចង់​ផ្ដួល​គូ​ប្រកួត​មុន​ពេល​ការប្រកួត​នៅ​ឆ្នាំ​២០១៨ មក​ដល់​ក៏​ថា​បាន ព្រោះ​ថា គណបក្ស​ប្រជាជន​កម្ពុជា មិន​ខ្វះ​ដៃគូ​ប្រកួត​ក្រៅ​ពី​គណបក្ស​សង្គ្រោះ​ជាតិ នោះ​ឡើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (9)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

HUN SEN AND NEPOTISM ARE TRAITORS AND DICTATOR THEY VERY HAPPY TO SADISTIC TO CAMBODIAN 'S WHO ARE PATRIOT OWN COUNTRY . WE WANT TO HAVE PEACEFUL AND FREEDOM IN CAMBODIA ! ! !
FOR 2018 ECTION ALL OF CAMBODIAN PEOPLE DO NOT VOTE FOR CPP , IF YOU VOTE FOR CPP THAT IS MEAN YOU SUPPORT YOUN AND YOUN CONTROL KHMER LIKE KAMPUCHEAN KROUM . HUN SEN GOVERNMENT GET PAY BY KHMER BUT WORKING FOR YOUN ONLY !

Oct 16, 2017 10:26 AM

អ្នក​អាន​អនាមិក

TRANSPARENTCY : NO ONE CAN NOT TAKE AWAY FROM HUN SEN POWER , ONLY CHINES AND YUN CAN .
2 MORE YEARS YOU WILL SEE AFTER 2 COUNTRY DESTROY EVERYTHING COMPLETELY , MR. HUN'S LIFE
WILL BE THE SAME MR. PEN SAVAN OR MR. CHANSY .

KEEP AN EYE TOGETHER FOR POLITIC IN CAMBODIA .

Aug 26, 2017 10:58 AM

អ្នក​អាន​អនាមិក

it is very good to record every one's face who raise their hand to vote for Hun Sen's none sense law.

Jul 14, 2017 01:51 AM

អ្នក​អាន​អនាមិក

HUN SEN YOU CAN NOT TAKE THE LAW IN TO YOUR OWN HAND , ICC WILL WORKING FOR YOU ! ! !

Jul 25, 2017 07:34 PM

ភវវ្ម័ន

ពី បាវិត ស្វាយ​រៀង​

តំណាងរាស្រ្ដបក្សប្រជាជនបានទទួលបញ្ជាលោកហ៊ុនសែនជាថ្មី ឲ្យធ្វើច្បាប់បន្ថែមនេះ គឺធ្វើដើម្បីដកសិទ្ធិសេរីភាពប្រជាជាតិខ្មែរទាំងអស់ គឺដកយកទាំងសិទ្ធិរស់នៅ ដែលប្រព្រឹត្តតាមល័ក្ខខ័ណ្ឌកំណត់ក្នុងច្បាប់ ដកទាំងសិទ្ធិជាជនរួមជាតិខ្មែរថែមទៀត គឺមិនឲ្យមានទំនាក់ទំនង រវាងប្រជាជាតិខ្លួនឯងនិងសង្គមជាតិទាំងស្រុងតែម្ដង ។ ដូច្នេះអ្នកទោសរបស់របបលោកហ៊ុនសែន គឺ ត្រូវ លោកហ៊ុនសែនកាត់ផ្ដាច់ពីសង្គមជាតិមាតុភូមិ ទាំងស្រុង វាជាអំពើឃោឃៅជួជាតិ លើសពីការដកហូតសញ្ជាតិ ឬធ្វើទិរទេសអ្នកទោសដែលគេបានធ្វើកាលពីសម័យបុរាណទៅទៀត ។

សំណួរ សួរថាតើលោក សមរង្ស៊ី មានទោសឧក្រិដ្ឋ អ្វី ដូចជាទោសសម្លាប់មនុស្ស ឬទោសក្បត់ជាតិ ដែលបណ្ដោយឲ្យនិគមជន ប្រជាជនបរទេសចូលមកក្នុងប្រទេសរស់នៅដោយខុសច្បាប់ ដណ្ដើមទឹកដីធ្វើជាតិតូបជាតូបនីយកម្មរម្លាយជាតិខ្មែរ ឬក៏ជាទោសធ្វើឲ្យបាត់បង់ទឹកដី ដោយគាត់បានធ្វើសម្បទានទឹកដី កាប់ព្រៃឈើ ឬកាត់ទឹកដីព្រំដែននៃមាតុភូមិឲ្យទៅបរទេសរាប់សិបឆ្នាំ ឬក៏គាត់បានធ្វើនយោបាយអ្វីដែលជាដើមចមធ្វើឲ្យប្រទេសជាតិ ប្រឈមនឹងនយោបាយបរទេសឈ្លានពានរំលាយទឹកដីខ្មែរឲ្យក្លាយជារបស់បរទេសក្នុង ២០ ឬ៣០ឆ្នាំទៀត ។ល ។ កុំថាឡើយដល់ ៩៩ឆ្នាំ សម្រាប់ប្រជាជនវៀតណាម តែ៥ ទៅ១០ ឆ្នាំ ក៏គេអាចសម្រេចបានជោគជ័យគ្រប់គ្រាន់ក្នុងការកសាងគ្រឹះឈ្លានពានទុកឲ្យកូនចៅយួនជំនាន់ក្រោយហើយដែរ ។ ទោសដែលរៀបរាប់ខាងលើ លោកសមរង្ស៊ី មិនដែលមានទាល់តែសោះ ផ្ទុយទៅវិញ ប្រជាជនខ្មែរ ដឹងយ៉ាងច្បាស់ថាអ្នកណាកំពុងតែធ្វើ អំពើទាំងនេះ!!!

Jul 10, 2017 03:11 AM

អ្នក​អាន​អនាមិក

100% RIGTH

Aug 26, 2017 11:01 AM

ភវវ្ម័ន

ពី បាវិត ស្វាយ​រៀង​

តំណាងរាស្រ្ដបក្សប្រជាជនបានទទួលបញ្ជាលោកហ៊ុនសែនជាថ្មី ឲ្យធ្វើច្បាប់បន្ថែមនេះ គឺធ្វើដើម្បីដកសិទ្ធិសេរីភាពប្រជាជាតិខ្មែរទាំងអស់ គឺដកយកទាំងសិទ្ធិរស់នៅ ដែលប្រព្រឹត្តតាមល័ក្ខខ័ណ្ឌកំណត់ក្នុងច្បាប់ ដកទាំងសិទ្ធិជាជនរួមជាតិខ្មែរថែមទៀត គឺមិនឲ្យមានទំនាក់ទំនង រវាងប្រជាជាតិខ្លួនឯងនិងសង្គមជាតិទាំងស្រុងតែម្ដង ។ ដូច្នេះអ្នកទោសរបស់របបលោកហ៊ុនសែន គឺ ត្រូវ លោកហ៊ុនសែនកាត់ផ្ដាច់ពីសង្គមជាតិមាតុភូមិ ទាំងស្រុង វាជាអំពើឃោឃៅជួជាតិ លើសពីការដកហូតសញ្ជាតិ ឬធ្វើទិរទេសអ្នកទោសដែលគេបានធ្វើកាលពីសម័យបុរាណទៅទៀត ។

សំណួរ សួរថាតើលោក សមរង្ស៊ី មានទោសឧក្រិដ្ឋ អ្វី ដូចជាទោសសម្លាប់មនុស្ស ឬទោសក្បត់ជាតិ ដែលបណ្ដោយឲ្យនិគមជន ប្រជាជនបរទេសចូលមកក្នុងប្រទេសរស់នៅដោយខុសច្បាប់ ដណ្ដើមទឹកដីធ្វើជាតិតូបជាតូបនីយកម្មរម្លាយជាតិខ្មែរ ឬក៏ជាទោសធ្វើឲ្យបាត់បង់ទឹកដី ដោយគាត់បានធ្វើសម្បទានទឹកដី កាប់ព្រៃឈើ ឬកាត់ទឹកដីព្រំដែននៃមាតុភូមិឲ្យទៅបរទេសរាប់សិបឆ្នាំ ឬក៏គាត់បានធ្វើនយោបាយអ្វីដែលជាដើមចមធ្វើឲ្យប្រទេសជាតិ ប្រឈមនឹងនយោបាយបរទេសឈ្លានពានរំលាយទឹកដីខ្មែរឲ្យក្លាយជារបស់បរទេសក្នុង ២០ ឬ៣០ឆ្នាំទៀត ។ល ។ កុំថាឡើយដល់ ៩៩ឆ្នាំ សម្រាប់ប្រជាជនវៀតណាម តែ៥ ទៅ១០ ឆ្នាំ ក៏គេអាចសម្រេចបានជោគជ័យគ្រប់គ្រាន់ក្នុងការកសាងគ្រឹះឈ្លានពានទុកឲ្យកូនចៅយួនជំនាន់ក្រោយហើយដែរ ។ ទោសដែលរៀបរាប់ខាងលើ លោកសមរង្ស៊ី មិនដែលមានទាល់តែសោះ ផ្ទុយទៅវិញ ប្រជាជនខ្មែរ ដឹងយ៉ាងច្បាស់ថាអ្នកណាកំពុងតែធ្វើ អំពើទាំងនេះ!!!

Jul 09, 2017 02:50 AM

មើល​មតិ​ទាំង​អស់.

គេហទំព័រ​ទាំងមូល