អ្នកបឹងកក់បន្តតវ៉ាទាមទារដោះលែងតំណាង១៥នាក់

អ្នកបឹងកក់បន្តសុំអន្តរាគមន៍ពីស្ថានទូតសហរដ្ឋអាមេរិក និងសហភាពអឺរ៉ុប ដើម្បីអោយមានការដោះលែងតំណាងអ្នកភូមិ ១៥នាក់ អោយមានសេរីភាព ខណៈដែលស្រ្តី ៦នាក់ ក្នុងចំណោមនោះបានបន្តការតវ៉ាដោយអត់អាហារក្នុងពន្ធនាគារ។

ដោយ សុ ជីវី
2012-06-13

ក្រុមអ្នកបឹងកក់ដែលភាគច្រើនជាស្ត្រី នឹងកុមារសរុបជិត ១០០នាក់ នៅព្រឹកថ្ងៃពុធ ទី១៣ ខែមិថុនា បាននាំគ្នាទៅតវ៉ានៅខាងមុខស្ថានទូតសហរដ្ឋអាមេរិក ក្បែរវត្តភ្នំ និងបានដាក់ញត្តិទៅរដ្ឋមន្ត្រីការបរទេសអាមេរិក តាមរយៈ លោក វីលលៀម ថត (William Todd) ឯកអគ្គរដ្ឋទូតសហរដ្ឋអាមេរិកប្រចាំកម្ពុជា ដោយស្នើសុំរដ្ឋមន្ត្រីការបរទេសនៃសហរដ្ឋអាមេរិក លោកស្រី ហ៊ីលឡារី គ្លិនតុន (Hillary Clinton) អោយពិចារណាមុនការជួបសន្ទនាណាមួយជាមួយរដ្ឋាភិបាលកម្ពុជា។

ពួកគេក៏បានដង្ហោយហៅអោយស្ថានទូតសហរដ្ឋអាមេរិក អន្តរាគមន៍ដោះលែងអ្នកតំណាងទាំង ១៥នាក់ ដ្បិតពួកគេមិនចង់ឲ្យអ្នកតំណាង និងជាម្តាយរបស់ពួកគេធ្វើអត្តឃាតក្នុងពន្ធនាគារ។

ជាមួយគ្នានោះដែរពលរដ្ឋតំបន់បឹងកក់ក៏បានដាក់ញត្តិអំពាវនាវឲ្យលោក ហ្វ្រង់ស្វ័រ កូរ៉ែន (Francois Caurain) ឯកអគ្គរដ្ឋទូតសហគមន៍អឺរ៉ុបប្រចាំកម្ពុជា ដើម្បីជំរុញឲ្យមានការដោះលែងប្រជាពលរដ្ឋទាំង ១៥នាក់ នៅតំបន់បឹងកក់ ដែលបច្ចុប្បន្នកំពុងជាប់ពន្ធនាគារព្រៃស។

មន្ត្រីនៅស្ថានទូតសហរដ្ឋអាមេរិក និងសភាពអឺរ៉ុប បានយល់ព្រមទទួលយកញត្តិអ្នកបឹងកក់ និងសន្យាថា នឹងជួយដល់ពួកគេ។ ដោយឡែកក្រុមអ្នកភូមិបានអោយដឹងថា មានស្ត្រីអ្នកភូមិបឹងកក់ចំនួន ៦ ហើយ ដែលបានធ្វើការតវ៉ាដោយអត់អាហារក្នុងពន្ធនាគារ ក្នុងនោះរួមមាន អ្នកស្រី ទេព វន្នី គង់ ចន្ថា ឆេង លាភ តុល ស្រីពៅ លី ណារី និងអ្នកស្រី សុង ស្រីលាភ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។