ទាហានថៃបន្តបាញ់សម្លាប់ពលរដ្ឋខ្មែរនៅតាមព្រំដែន

សាច់ញាតិជនរងគ្រោះឲ្យដឹងថា ទាហានថៃនៅតែបន្តបាញ់សម្លាប់ពលរដ្ឋខ្មែរដែលឆ្លងចូលទៅក្នុងទឹកដីថៃ បើទោះជារដ្ឋាភិបាលនៃប្រទេសទាំងពីរបានឯកភាពគ្នាដោះស្រាយលើប្រព័ន្ធច្បាប់យ៉ាងក៏ដោយ។

ដោយ ម៉ម មុនីរតន៍
2012-09-04

លោក យ៉ង់ សុផល ជាពលរដ្ឋរស់នៅឃុំដូង ស្រុកបារាយ ខេត្តកំពង់ធំដែល ត្រូវជាឪពុកមារបស់ជនរងគ្រោះឈ្មោះ កែវ សុភាព អាយុ ៣៤ឆ្នាំ ដែលត្រូវទាហានថៃបាញ់សម្លាប់នៅដើមសប្ដាហ៍កន្លងទៅនេះថ្លែងថា ពលរដ្ឋកម្ពុជា តែងក្លាយជាជនរងគ្រោះក្នុងអំពើហិង្សាបាញ់ប្រហារពីសំណាក់ទាហានថៃជាបន្តបន្ទាប់ ដោយពុំមានសំណងយុត្តិធម៌ម្ដងណានោះទេសម្រាប់ពួកគេ។

លោក យ៉ង់ សុផល បន្តថា៖ «ថៃបាញ់ខ្មែរយើងងាប់ដូចឆ្កែ មិនដែលផ្ដន្ទាទោសថៃណាដាក់គុកទេ។ ខ្មែរយើងវាថោកណាស់ វាអត់ដែលផ្ដន្ទាទោសតាមផ្លូវច្បាប់ទេបាញ់វាចោលតែម្ដងទៅ ចោលអត់មានឲ្យខ្មោចយើងទេ។ ឥឡូវខ្ញុំកំពុងតែតស៊ូធ្វើម៉េចដើម្បីឲ្យបានខ្មោចក្មួយខ្ញុំមក។ មិនដែលដាក់កំហុសទៅលើវា ចាប់វាដាក់គុកបានទេ។ យើងមិនដែលបាញ់សម្លាប់វាចោលទេបង។ ខ្ញុំអន់ចិត្តណាស់ រដ្ឋាភិបាលយើងមិនដែលដាក់កំហុសលើវាទេ។ វាបាញ់យើងងាប់ ១០០នាក់ ក៏មិនដែលមានដែរ!»។

បើតាមលោក យ៉ង់ សុផល ឈ្មោះ កែវ សុភាព ដែលត្រូវជាក្មួយបានទៅរស់នៅស្រុកត្រពាំងប្រសាទ ខេត្តព្រះវិហារ ដោយមានប្រពន្ធ និងកូន ៣នាក់ក្នុងបន្ទុក។ លោកបន្តថា តែទើបតែថ្ងៃទី៣ ខែកញ្ញា ឆ្នាំ២០១២ ក្រុមគ្រួសារទទួលព័ត៌មានថា ត្រូវទាហានថៃបាញ់ស្លាប់កាលពីថ្ងៃទី១ ខែកញ្ញា នៅតំបន់អូរខៀវ ចម្ងាយ ២០គីឡូម៉ែត្រ ក្នុងទឹកដីថៃ និងខេត្តព្រះវិហាររបស់កម្ពុជា ខណៈឈ្មោះ កែវ សុភាព និងពលរដ្ឋកម្ពុជា មួយចំនួនទៀតត្រូវគេជួលឲ្យទៅកាបឈើគ្រញូងក្នុងទឹកដីថៃ។

គ្រួសារជនរងគ្រោះឲ្យដឹងថា នៅពេលគេកំពុងស្នើសុំកិច្ចអន្តរាគមន៍តាមផ្លូវច្បាប់ដើម្បីទៅទទួលសាកសពដែលកំពុងស្ថិតនៅក្នុងទឹកដីថៃនៅឡើយ ចាប់តាំងពីត្រូវទាហានថៃ បាញ់សម្លាប់កាលពីថ្ងៃទី១ ខែកញ្ញា មកនោះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។