តុលាការខេត្តបាត់ដំបង ឃុំខ្លួនមនុស្ស៦នាក់ពីបទឆបោក

គ្រួសារជនជាប់សង្ស័យម្នាក់ក្នុងចំណោមជនជាប់សង្ស័យ៦នាក់ ដែលកំពុងជាប់ឃុំនៅក្នុងពន្ធនាគារ បានសុំកិច្ចអន្តរាគមន៍ពីអង្គការសិទ្ធិមនុស្សលីកាដូ (Licadho) ហើយអំពាវនាវសុំឲ្យតុលាការខេត្តបាត់ដំបង ដោះលែងប្ដីរបស់គាត់ឲ្យមានសេរីភាពនៅក្រៅឃុំ។

ដោយ សួន សុផលមុន្នី
2012-09-08

h090712mn.mp3

សមាជិកគ្រួសាររបស់លោក ដៀង សារុំ សុំកិច្ចអន្តរាគមន៍ផ្លូវច្បាប់នៅស្នាក់ការអង្គការលីកាដូ (Licadho) ប្រចាំខេត្តបាត់ដំបង កាលពីថ្ងៃទី៧ ខែកញ្ញា ឆ្នាំ២០១២។

RFA/Soun Sophalmony

លោកស្រី រី មន្តថា អាយុ៤៨ឆ្នាំ រស់នៅឃុំដូនបា ស្រុកគាស់ក្រឡ ខេត្តបាត់ដំបង បានថ្លែងនៅថ្ងៃទី៧ ខែកញ្ញា ថា តុលាការបានចាប់ឃុំខ្លួនប្ដីលោកស្រី កាលពីថ្ងៃទី៣ ខែកញ្ញា ឆ្នាំ២០១២ ក្រោមការចោទពីបទឆបោក៖ «គេចោទគាត់ហ្នឹង ផ្ដិតមេដៃពីរឿងឆបោក ហើយគាត់មានចេះអក្សរអីបានមួយអង្គ។ គាត់ថា ផ្ដិតមេដៃហ្នឹង ទទួលស្គាល់កុំឲ្យប្រជាពលរដ្ឋហ្នឹងធ្វើបាបគាត់។ អ៊ីចឹង គេដាក់ថាឈ្មោះគាត់ឆបោក យកលុយគេ។ ការពិត គាត់មិនចេះអីទេ ផ្ដិតមែន ចាញ់បោកគេ។ អ៊ីចឹង ឲ្យអង្គការជួយ រកយុត្តិធម៌ ចាប់ឃុំទុកអ៊ីចឹង»។

នៅក្នុងដីកាបង្គាប់ឲ្យចូលខ្លួនចុះថ្ងៃទី១៥ ខែសីហា ឆ្នាំ២០១២ ចៅក្រមស៊ើបសួរតុលាការខេត្តបាត់ដំបង លោក យាប់ មេត្តា បានចោទប្រកាន់លើឈ្មោះ ដៀង សារុំ ភេទប្រុស អាយុ៤៩ឆ្នាំ ពីបទឆបោក ប្រព្រឹត្តិនៅភូមិអណ្ដូងកន្ទួត ឃុំដូនបា ស្រុកគាស់ក្រឡ ខេត្តបាត់ដំបង។ ករណីនេះ កើតមានតាំងពីអំឡុងឆ្នាំ២០១២ ដល់ខែកក្កដា ឆ្នាំ២០១២ បទល្មើសព្រហ្មទណ្ឌមានចែងឲ្យផ្ដន្ទាទោសតាមបញ្ញត្តិមាត្រា៣៧៧ និងមាត្រា៣៧៨ នៃក្រមព្រហ្មទណ្ឌនៃព្រះរាជាណាចក្រកម្ពុជា។

លោកស្រី រុំ ចាន់រ៉ា អាយុ២៨ឆ្នាំ ត្រូវជាកូនលោក ដៀង សារុំ បានថ្លែងថា ឪពុករបស់គាត់មានកំហុសដោយសារតែគាត់ពុំចេះអក្សរ ហើយគាត់បានផ្ដិតមេដៃឲ្យគេ៖ «គេយកលុយយកកាក់ពីប្រជាជន ហើយឲ្យគាត់ផ្ដិតមេដៃទទួលដឹងឮ កុំឲ្យមានកាំបិតពូថៅមកធ្វើបាបគាត់។ គាត់ធ្វើស្រែគាត់ហ្នឹងយូរហើយ តែប្រជាជនធ្វើនៅលើដីខ្ញុំមាន១០គ្រួសារ តែច្រើនណាស់ទៅក្រោយទៀត គ្មានធ្វើអីបានទេខ្ញុំនោះ»។

លោក ហេង សាយហុង មន្ត្រីស៊ើបអង្កេតអង្គការលីកាដូ ប្រចាំខេត្តបាត់ដំបង បានប្រាប់ក្រុមគ្រួសារជនជាប់សង្ស័យធ្វើពាក្យដាក់ទៅតុលាការ ស្នើសុំនៅក្រៅឃុំដោយឈរលើហេតុផល ពុំមានចេតនាទុច្ចរិតរបស់ជនសង្ស័យ៖ «ដោយយើងសំអាងលើហេតុផល អ្វីដែលជាកំហុសអចេតនា មិនបានប្រព្រឹត្តិ មិនបានទទួលផលនៅក្នុងសាច់រឿងហ្នឹង ដោយសារយើងមិនសូវចេះអក្សរអីអ៊ីចឹង យើងមិនបានគេចខ្លួននៅគ្រប់ដំណាក់កាលតុលាការកោះហៅហ្នឹង»។

កាលពីថ្ងៃទី១៩ ខែកក្កដា ចៅក្រមស៊ើបសួរតុលាការខេត្តបាត់ដំបង បានសម្រេចឃុំខ្លួនជនសង្ស័យ៥នាក់។ ជនសង្ស័យខ្លះ ជាប់បទល្មើសផ្ទួនគ្នា គឺបទឆបោក និងបទប្រើអំពើហិង្សាដោយចេតនា។ អ្នកភូមិទាំងនោះមានឈ្មោះ ១-សើរ សាមេន ២-ឃឿន សារ៉េត ៣-យឹម វិរៈ ៤-ឌី សាវុធ ៥-ឈួយ ស៊ើន និង៦-ដៀង សារុំ ដែលទើបចាប់ឃុំខ្លួនកាលពីពេលថ្មីៗនេះ។

នៅខែកក្កដា ក្រុមអ្នកភូមិជាច្រើន បានលើកគ្នាមកតវ៉ានៅខាងមុខអគារតុលាការខេត្តបាត់ដំបង ទាមទារឲ្យដោះលែងជនសង្ស័យទាំងនោះឲ្យរួចផុតពីបទចោទប្រកាន់ ប៉ុន្តែតុលាការបានបដិសេធ ហើយប្រាប់ឲ្យប្រជាពលរដ្ឋរកមេធាវីទៅធានាអ្នកជាប់ពន្ធនាគារទាំងនោះ ឲ្យនៅក្រៅឃុំតាមនីតិវិធីច្បាប់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។