សាលាក្ដីខ្មែរក្រហមបញ្ចប់ស្ដាប់ការវាយតម្លៃលើសុខភាព អៀង ធីរិទ្ធ

សវនាការសាលាក្ដីខ្មែរក្រហម ស្ដាប់របាយការណ៍របស់អ្នកជំនាញ វាយតម្លៃលើសុខភាពកាយសម្បទា និងស្មារតីជនជាប់ចោទ អៀង ធីរិទ្ធ បានបញ្ចប់ហើយ នៅថ្ងៃទី៣១ សីហា។ ក៏ប៉ុន្តែ អង្គជំនុំជម្រះមិនទាន់សម្រេចយ៉ាងម៉េចនៅឡើយទេ ចំពោះជនជាប់ចោទ អៀង ធីរិទ្ធ។

ដោយ ឡេង ម៉ាលី
2012-08-31

ក្នុងសវនាការរយៈពេល២ថ្ងៃ គឺពីថ្ងៃទី៣០ ដល់៣១ សីហា អ្នកជំនាញផ្នែកវិកលចរិត ចិត្តសាស្ត្រ និងជំងឺមនុស្សចាស់ បានបង្ហាញរបាយការណ៍ផ្ទុយគ្នា។ អ្នកជំនាញអន្តរជាតិ បានវាយតម្លៃថា ស្ថានភាពជំងឺភ្លេចភ្លាំង និងវង្វេងវង្វាន់របស់ជនជាប់ចោទ អៀង ធីរិទ្ធ មិនបានប្រសើរទេ ទោះជាមានការព្យាបាលរយៈពេល៦ខែមកហើយក្ដី។ រីឯអ្នកជំនាញខ្មែរវាយតម្លៃថា ជនជាប់ចោទ អៀង ធីរិទ្ធ មិនមានសញ្ញាវិកលចរិតទេ។

ក្នុងសេចក្ដីសន្និដ្ឋានមុននឹងបិទសវនាការ ភាគីនានាបានបង្ហាញជំហរជំទាស់រៀងៗខ្លួន។ ភាគីសហព្រះរាជអាជ្ញាលើកឡើងថា ជនជាប់ចោទ អៀង ធីរិទ្ធ អាចដោះលែងឱ្យនៅក្រៅឃុំជាបណ្ដោះអាសន្នបាន ប៉ុន្តែស្ថិតនៅក្រោមលក្ខខណ្ឌតុលាការ។ ក៏ប៉ុន្តែ មេធាវីដើមបណ្ដឹងរដ្ឋប្បវេណីជំទាស់នឹងការដោះលែងនេះ ដោយលើកសម្អាងថា ការវាយតម្លៃរបស់អ្នកជំនាញខ្មែរសមស្របជាង ព្រោះយល់ពីវប្បធម៌ខ្មែរដូចគ្នានឹងជនជាប់ចោទ មិនដូចអ្នកជំនាញអន្តរជាតិមកពិនិត្យម្ដងម្កាល តាមរយៈអ្នកបកប្រែ។ ដូច្នេះ ភាគីដើមបណ្ដឹងរដ្ឋប្បវេណីស្នើសុំមិនឱ្យដោះលែងឡើយ។

ជំទាស់ទៅនឹងភាគីទាំងពីរ មេធាវីការពារក្ដីជនជាប់ចោទ អៀង ធីរិទ្ធ ថ្លែងថា ការលើកឡើងអំពីការដោះលែងដោយមានលក្ខខណ្ឌក្ដី ឬការឃុំខ្លួនបន្តក្ដី ជាការមិនសមស្រប ហើយមិនអាចទទួលយកបានទេ។ មេធាវីថា គ្មានមូលដ្ឋានច្បាប់ណាអាចអនុញ្ញាតឱ្យឃុំខ្លួនជនជាប់ចោទនេះបន្តទៀតបានឡើយ ហើយអ្នកជំនាញអន្តរជាតិឱ្យដឹងថា កោសិកាខួរក្បាលផ្នែកសតិបញ្ញាស្មារតីរបស់ជនជាប់ចោទ បានខូចទៅហើយ។ មេធាវីការពារក្ដីសុំឱ្យតុលាការដោះលែងជនជាប់ចោទ អៀង ធីរិទ្ធ ឱ្យមានសេរីភាពរស់ជួបជុំគ្រួសារវិញ ដោយគ្មានលក្ខខណ្ឌ។

អង្គជំនុំជម្រះមិនទាន់សម្រេចអ្វីទេ ដោយប្រកាសថា នឹងចេញសេចក្ដីសម្រេចរបស់ខ្លួន នៅពេលសមស្របណាមួយខាងមុខនេះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។