ក្រុមហ៊ុន​ខ្មែរ-ចិន​និង​វៀតណាម​ចុះ​កិច្ច​ព្រមព្រៀង​សង់​ទំនប់​វារីអគ្គិសនី​សេសាន​ក្រោម

ក្រុមហ៊ុន​ខេមបូឌា រ៉ូយ៉ាល់ (Cambodian Royal Group) និង​ក្រុមហ៊ុន​ចិន ឈ្មោះ ថាមពល​អន្តរជាតិ​ហាយឌ្រូឡេនកាង (Hydrolancang International Energy) កាល​ពី​ថ្ងៃ​២៦ វិច្ឆិកា បាន​ចុះ​ហត្ថលេខា​លើ​គម្រោង​សាងសង់​ទំនប់​វារីអគ្គិសនី​នៅ​ដង​ទន្លេ​មេគង្គ ក្នុង​ខេត្ត​ស្ទឹងត្រែង ដែល​មាន​ទឹក​ប្រាក់​សរុប​ជិត ៨០០​លាន​ដុល្លារ​អាមេរិក។
ដោយ ម៉ៅ សុធានី
2012-11-27
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

ប្រធាន​ក្រុមហ៊ុន​ខេមបូឌា រ៉ូយ៉ាល់ លោក គិត ម៉េង មាន​ប្រសាសន៍​ថា គម្រោង​សាងសង់​ទំនប់​វារីអគ្គិសនី​នេះ គឺ​ជា​វិនិយោគ​ទុក​ឯកជន​ជា​លើក​ដំបូង​នៅ​កម្ពុជា ដែល​មាន​អ្នក​វិនិយោគ​ពី​ប្រទេស​ចិន កម្ពុជា និង​វៀតណាម។ ក្នុង​ពិធី​ចុះ​ហត្ថលេខា​នោះ ពុំ​មាន​វត្តមាន​តំណាង​ក្រុមហ៊ុន​វៀតណាម ចូល​រួម​ទេ។

ក្រោយ​ពី​ចុះ​ហត្ថលេខា​លើ​គម្រោង​សាងសង់​ទំនប់​វារីអគ្គិសនី​នេះ​មក ក្រុមហ៊ុន​នេះ​ក៏​បាន​ចុះ​ហត្ថលេខា​ដាច់​ដោយ​ឡែក​មួយ​ទៀត ជាមួយ​អគ្គនាយក​អគ្គិសនី​កម្ពុជា ក្នុង​កិច្ច​សន្យា​លក់​ថាមពល​អគ្គិសនី​ដែល​ផលិត​បាន​ពី​ទំនប់​វារីអគ្គិសនី​នេះ​ទៅ​ឲ្យ​នាយកដ្ឋាន​អគ្គិសនី​កម្ពុជា ដើម្បី​លក់​ចែកចាយ​បន្ត។

រដ្ឋាភិបាល​កម្ពុជា បាន​យល់​ព្រម​លើ​គម្រោង​សាងសង់​ទំនប់​វារីអគ្គិសនី​នេះ កាល​ពី​ដើម​ខែ​វិច្ឆិកា។ គម្រោង​នេះ មាន​រយៈពេល ៤៥​ឆ្នាំ ក្នុង​នោះ ៥​ឆ្នាំ សម្រាប់​ការ​សាងសង់ និង ៤០​ឆ្នាំ​ទៀត សម្រាប់​ប្រតិបត្តិការ​ចែកចាយ​លក់​ភ្លើង​អគ្គិសនី។ គេ​នៅ​ពុំ​ទាន់​ដឹង​ថា​ពេល​ណា​នឹង​ចាប់​ផ្ដើម​សាងសង់​ទំនប់​នេះ​នៅ​ឡើយ​ទេ។ ប៉ុន្តែ​រដ្ឋាភិបាល​កម្ពុជា អះអាង​ថា ក្រោយ​ពេល​ដែល​ទំនប់​វារីអគ្គិសនី​បើក​ដំណើរការ រដ្ឋាភិបាល​នឹង​អាច​ទទួល​បាន​ប្រាក់​ចំណូល​ពន្ធដារ​ប្រមាណ​ជា ៣០​លាន​ដុល្លារ​អាមេរិក​ក្នុង​មួយ​ឆ្នាំៗ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (1)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

តើវារីអក្គីសនីនេះផលិតបានប៉ុន្មានម៉េហ្គាវ៉ាត់ដែរ?

Nov 27, 2012 11:45 PM