លោក ហ៊ុន សែន៖ កម្ពុជានឹងប្រឹងប្រែងជំរុញកិច្ចចរចាជួយប្រទេសអភិវឌ្ឍន៍តិចតួចចូល WTO
2017.03.20
លោកនាយករដ្ឋមន្ត្រី ហ៊ុន សែន (ឆ្វេង) ចាប់ដៃជាមួយអគ្គនាយករងអង្គការពាណិជ្ជកម្មពិភពលោក លោក ដាវីឌ សាកគ៍ (David Shark) (កណ្ដាល) និងអនុរដ្ឋមន្ត្រីក្រសួងពាណិជ្ជកម្មចិន លោក វ៉ាង ស៊ូវិន (Wang Shouwen) (ស្ដាំ) នាខេត្តសៀមរាប ថ្ងៃទី២០ ខែមីនា ឆ្នាំ២០១៧។
RFA/Hang Savyouth
ក្រសួងពាណិជ្ជកម្មនៃប្រទេសកម្ពុជា កំពុងធ្វើជាម្ចាស់ផ្ទះនៃកិច្ចប្រជុំតុមូលចិន លើកទី៥ នៅឯខេត្តសៀមរាប រយៈពេល ៣ថ្ងៃ ចាប់ពីថ្ងៃទី២០ រហូតទៅដល់ថ្ងៃទី២៣ ខែមីនា។ កិច្ចប្រជុំក្រោមប្រធានបទស្ដីពី ការអនុវត្តល្អបំផុតនេះ គឺជាការចែករំលែកបទពិសោធន៍សម្រាប់ឲ្យប្រទេសអភិវឌ្ឍន៍តិចតួច យកទៅរៀបចំខ្លួនឲ្យប្រសើរ សម្រាប់ចូលជាសមាជិកអង្គការពាណិជ្ជកម្មពិភពលោក (WTO) បាននៅពេលអនាគត។
ប្រមុខរដ្ឋាភិបាលបានថ្លែងថា កម្ពុជា ស្ម័គ្រចិត្តទទួលយកតួនាទីជាប្រធានសម្របសម្រួលប្រទេសដែលអភិវឌ្ឍន៍តិចតួច ហើយប្រឹងប្រែងជំរុញកិច្ចចរចានានា ដើម្បីធ្វើយ៉ាងណាឲ្យប្រទេសអភិវឌ្ឍន៍តិចតួចជាច្រើនបានចូលជាសមាជិកនៃអង្គការពាណិជ្ជកម្មពិភពលោកនៅពេលអនាគត។
នាយករដ្ឋមន្ត្រីនៃរាជរដ្ឋាភិបាលកម្ពុជា លោក ហ៊ុន សែន បានថ្លែងក្នុងការបើកកិច្ចប្រជុំតុមូលចិន លើកទី៥ នៅឯខេត្តសៀមរាប នៅព្រឹកថ្ងៃច័ន្ទ ទី២០ ខែមីនា ថា ការចូលជាសមាជិកនៃអង្គការពាណិជ្ជកម្មពិភពលោក គឺនឹងធ្វើឲ្យប្រទេសអភិវឌ្ឍន៍តិចតួចមានឱកាសច្រើនក្នុងការអភិវឌ្ឍខ្ពស់ តាមរយៈការនាំផលិតផលចេញទៅលក់នៅក្រៅប្រទេស ដោយមានការអនុគ្រោះពន្ធគយ និងមិនជាប់កូតា ជាដើម។
លោកនាយករដ្ឋមន្ត្រី ហ៊ុន សែន ថ្លែងទៀតថា បើទោះបីជាបច្ចុប្បន្ន កម្ពុជា កំពុងមមាញឹកលើការអនុវត្តកម្មវិធី និងការកែទម្រង់អភិវឌ្ឍជាតិ ព្រមទាំងការចរចាថ្នាក់តំបន់ជាច្រើនក៏ដោយ ក៏កម្ពុជា ស្ម័គ្រចិត្តទទួលយកតួនាទីជាប្រធានសម្របសម្រួលក្រុមប្រទេសអភិវឌ្ឍន៍តិចតួច។ ក្នុងឋានៈនេះ កម្ពុជា នឹងប្រឹងប្រែងសម្រួលជាមួយប្រទេសអភិវឌ្ឍន៍តិចតួច និងអង្គការពាណិជ្ជកម្មពិភពលោក ដើម្បីបម្រើផលប្រយោជន៍ប្រទេសក្រីក្រ។
លោកនាយករដ្ឋមន្ត្រី ហ៊ុន សែន អំពាវនាវឲ្យអង្គការពាណិជ្ជកម្មពិភពលោក និងប្រទេសដែលជាសមាជិកអង្គការនេះរួចហើយ គប្បីយោគយល់ និងអធ្យាស្រ័យចំពោះប្រទេសអភិវឌ្ឍន៍តិចតួចដែលកំពុងសុំចូលជាសមាជិកដែរនោះ៖ «ទាំងអស់គ្នា ពិភពលោកត្រូវតែដើរទៅជាមួយគ្នា មិនអាចមានពិភពលោកបែងចែកដោយទុកឲ្យអ្នកក្រនៅតែក្រ ហើយទទួលផលវិបាកនោះទេ»។
អង្គការពាណិជ្ជកម្មពិភពលោក (WTO) បញ្ជាក់ថា ការជ្រើសរើសប្រទេសណាមួយឲ្យក្លាយទៅជាសមាជិកនៃអង្គការពាណិជ្ជកម្មពិភពលោក គឺត្រូវបញ្ជាក់ និងមានការឆ្លើយតបជាក់លាក់លើចំណុចជាច្រើន ដែលប្រទេសនោះត្រូវបំពេញ។
អគ្គនាយករងរបស់អង្គការពាណិជ្ជកម្មពិភពលោក លោក ដាវីឌ សាកគ៍ (David Shark) ថ្លែងថា តាមរយៈកិច្ចប្រជុំតុមូលចិន លើកទី៥ នេះ លោករំពឹងថា គឺជាការចែករំលែកបទពិសោធន៍ ព្រមទាំងជាការត្រួសត្រាយផ្លូវឲ្យប្រទេសអភិវឌ្ឍន៍តិចតួចជាច្រើន អាចរៀបចំខ្លួនចូលជាសមាជិកនៃអង្គការពាណិជ្ជកម្មពិភពលោកបាន៖ «ខ្ញុំចង់ឃើញការជួបសន្ទនាគ្នារវាងប្រទេសអភិវឌ្ឍន៍តិចតួចជាច្រើនមកពីតំបន់ផ្សេងៗពេលនេះ បានក្លាយទៅជាវិថីសម្រាប់ឲ្យអ្នកទាំងនោះអាចដើរទៅរកភាពជាសមាជិកនៃអង្គការពាណិជ្ជកម្មពិភពលោកបាននៅពេលខាងមុខ»។
អនុរដ្ឋមន្ត្រីក្រសួងពាណិជ្ជកម្មនៃសាធារណរដ្ឋប្រជាមានិតចិន លោក វ៉ាង ស៊ូវិន (Wang Shouwen) ដែលកំពុងសកម្មក្នុងការរៀបចំកិច្ចប្រជុំតុមូលចិន លើកទី៥ នោះ ថ្លែងថា អង្គការពាណិជ្ជកម្មពិភពលោក (WTO) មានតួនាទីយ៉ាងសំខាន់ក្នុងការជួយកាត់បន្ថយភាពក្រីក្រ ជំរុញកំណើនពាណិជ្ជកម្ម ព្រមទាំងការអភិវឌ្ឍសេដ្ឋកិច្ចនៃប្រទេសអភិវឌ្ឍន៍តិចតួចបាន។
កាលពីព្រឹកថ្ងៃច័ន្ទ បន្ទាប់ពីថ្លែងបើកកិច្ចប្រជុំតុមូលចិន លើកទី៥ មក តំណាងអង្គការពាណិជ្ជកម្មពិភពលោក និងក្រសួងពាណិជ្ជកម្មចិន បានចុះហត្ថលេខាលើអនុស្សរណៈនៃការយោគយល់គ្នាសម្រាប់គាំទ្ររបស់ចិន ចំពោះប្រទេសអភិវឌ្ឍន៍តិចតួច ដែលសុំចូលជាសមាជិកនៃអង្គការពាណិជ្ជកម្មពិភពលោកផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ