"អង្ករកម្ពុជាធ្លាក់លេខមិនប៉ះពាល់ដល់ឧស្សាហកម្មស្រូវអង្ករ"
2016.11.19
ស្រូវ និងអង្ករផ្ការំដួល ត្រូវបានគេដាក់តាំងបង្ហាញក្នុងវេទិកាស្រូវអង្ករកម្ពុជា លើកទី៥ នារាជធានីភ្នំពេញ កាលពីថ្ងៃទី២៥ ខែមករា ឆ្នាំ២០១៦។
RFA/Tha Kitya
អង្ករកម្ពុជា ជាប់លេខ២ ក្នុងការប្រកួតប្រជែងអង្ករល្អបំផុតរបស់ពិភពលោក ឆ្នាំ២០១៦ ខណៈម្ចាស់ជយលាភីលេខ១ បានទៅម្ចាស់ផ្ទះ គឺប្រទេសថៃ។ អ្នកជំនាញផ្នែកស្រូវអង្ករកម្ពុជា អះអាងថា ចំណាត់ថ្នាក់នេះមិនប៉ះពាល់ដល់វិស័យស្រូវអង្ករកម្ពុជា នោះឡើយ។
សហព័ន្ធស្រូវអង្ករកម្ពុជា អះអាងថា អង្ករកម្ពុជា ជាប់លេខ២ នេះនឹងមិនប៉ះពាល់ដល់ឧស្សាហកម្មស្រូវអង្ករកម្ពុជាទេ ព្រោះអង្ករកម្ពុជា នៅតែត្រូវបានគេទទួលស្គាល់គុណភាពពីសំណាកទីផ្សារអន្តរជាតិ។
ការលើកឡើងរបស់សហព័ន្ធស្រូវអង្ករកម្ពុជា នៅពេលនេះ ធ្វើឡើងក្រោយកម្ពុជា បានចូលរួមប្រជែងអង្ករល្អបំផុតរបស់ពិភពលោកឆ្នាំ២០១៦ ក្នុងចំណោមប្រទេសសរុបចំនួន១៤ ដែលបានដាក់ប្រកួតប្រជែងនាសន្និសីទស្រូវអង្ករអន្តរជាតិ (The World Rice Conference) ដែលប្រារព្ធឡើងនៅប្រទេសថៃ កាលពីថ្ងៃទី១៨ ខែវិច្ឆិកា។
អគ្គលេខាធិការសហព័ន្ធស្រូវអង្ករកម្ពុជា លោក មូល សារិទ្ធី បានប្រាប់អាស៊ីសេរី នៅថ្ងៃទី១៩ ខែវិច្ឆិកា ថា អង្ករកម្ពុជា ស្ថិតក្នុងចំណោមការជ្រើសរើសចម្រាញ់យ៉ាងលំបាកហើយ បានទម្លាក់សំណាកអង្ករចំនួន ២០ ប្រភេទផ្សេងទៀត មកពីប្រទេសសរុប១៤ ដែលបានដាក់ប្រកួតប្រជែង។លោកឲ្យដឹងថា សម្រាប់កម្ពុជា យកសំណាកអង្ករក្រអូបរំដួល មកពីបណ្ដាខេត្តផ្សេងៗគ្នាតាមរយៈក្រុមហ៊ុនចំនួន១១ មកប្រកួត ហើយជាលទ្ធផលចុងក្រោយអង្ករកម្ពុជា ជាប់លេខ២ បន្ទាប់ពីថៃ បានលេខ១។
លោកថា ទោះជាកម្ពុជា មិនបានជាប់លេខ១ ខណៈអង្ករកម្ពុជា ធ្លាប់ឈ្នះពានអង្ករល្អបំផុត ៣ឆ្នាំជាប់គ្នា ក៏មិនមានន័យអង្ករកម្ពុជា គុណភាពចាញ់ថៃ នោះទេ។ ហេតុនេះលទ្ធផលនេះ មិនជះឥទ្ធិពលដល់វិស័យស្រូវអង្ករកម្ពុជា នោះឡើយ៖ «យ៉ាងហោចណាស់ក៏យើងជាប់ក្នុងលំដាប់ចុងក្រោយដែរ ចង់និយាយថា ជាគូប្រកួតមួយដ៏ស្វិតស្វាញ»។
អគ្គលេខាធិការសហព័ន្ធស្រូវអង្ករកម្ពុជា រូបនេះ បញ្ជាក់ថា ទោះចំណាក់ថា្នក់នៃលទ្ធផលប្រកួតនេះ មិនជះឥទ្ធិពលដល់វិស័យស្រូវអង្ករ ពិសេសដល់ការនាំចេញអង្ករកម្ពុជា ក៏ដោយ ក៏សហព័ន្ធនឹងពង្រឹងដល់ការដាក់ស្លាកសញ្ញាបញ្ជាក់ពីគុណភាពអង្ករ ដើម្បីផ្ដល់ទំនុកចិត្តដល់អ្នកបញ្ជាទិញ។ ទន្ទឹមគ្នានេះ សហព័ន្ធបន្តសហការ ព្រមទាំងជំរុញស្ថាប័នពាក់ព័ន្ធ ធ្វើយ៉ាងណាជួយដល់ការផលិតអង្ករ ដែលមានគុណភាពបច្ចេកទេសឲ្យមានកំណើនខ្ពស់៖ «យើងនៅតែជំរុញក្រសួងពាក់ព័ន្ធ ធ្វើយ៉ាងណាឲ្យការផលិតអង្កររបស់យើងឲ្យកាន់តែមានគុណភាពរក្សាគុណភាពអង្ករល្អហ្នឹងបានយូរ ហើយយើងព្យាយាមស្រាវជ្រាវបច្ចេកទេសថ្មី»។
ចំណែកឯម្ចាស់រោងម៉ាស៊ីនកិនស្រូវ និងជាអគ្គនាយកក្រុមហ៊ុននាំចេញអង្ករ អេមរុ រ៉ាយ (AMRU RICE) ដែលជាក្រុមហ៊ុនបានចូលរួមការប្រកួតនេះ លោក សុង សារ៉ន លើកឡើងថា បើពិនិត្យមើលលើសណ្ឋានដី ទីតាំងភូមិសាស្ត្រ នៃប្រទេសកម្ពុជា និងថៃ គឺប្រហាក់ប្រហែលគ្នា ដូចនេះគុណភាពអង្ករនៃប្រទេសទាំងពីរមិនខុសគ្នានោះទេ។ ប៉ុន្តែអ្វីដែលកម្ពុជា អាចរៀនសូត្របានពីប្រទេសថៃ ហេតុអ្វីគេជាប់លេខ១ ដោយសារកម្ពុជា ខ្វះការផ្សព្វផ្សាយ ខ្វះការអនុវត្តកសិកម្មបែបទំនើប និងបង្កើតថ្មីឲ្យមាននិរន្តរភាព។
លោកបន្តថា ទោះជាលទ្ធផលប្រកួតនេះ មិនប៉ះពាល់ខ្លាំង តែលោកស្នើឲ្យរដ្ឋាភិបាលគួរគិតទៅដល់ការកែលំអពូជ និងគិតទៅលើការគាំទ្រសហគមន៍សម្រាប់ត្រៀមការប្រកួតនៅឆ្នាំ២០១៧ ដើម្បីរក្សាកេរ្តិ៍ឈ្មោះអង្ករកម្ពុជា ដែលធ្លាប់តែទទួលបានចំណាត់ថ្នាក់ល្អ៖ «កម្ពុជាយើងបើយើងចង់ឈ្នះ សូមឲ្យមានការកែលំអរឿងពូជ អភិវឌ្ឍន៍វាឲ្យបានល្អ តំបន់ណាដែលធ្វើប្រភេទអង្ករម្លិះបានល្អ ហើយយើងអភិរក្ស ខិតខំជួយសហគមន៍កសិកម្មដើម្បីពង្រឹងគុណភាពដាំដុះរបស់កសិករឲ្យធានាបានគុណភាពស្តង់ដារដូចៗគ្នា»។
យ៉ាងណា អាស៊ីសេរី មិនអាចទាក់ទងប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានកសិកម្ម លោក ហ៊ាន វណ្ណហន ដើម្បីដឹងពីវិធានការបន្តរបស់ក្រសួងកសិកម្មក្រោយចាញ់ការប្រកួតនេះបាននៅឡើយ នៅថ្ងៃទី១៩ ខែវិច្ឆិកា។
កម្ពុជាធ្លាប់ឈ្នះពានអង្ករល្អបំផុត លើកដំបូងនៅឆ្នាំ២០១២ ដែលគេរៀបចំឡើងនៅកោះបាលី ប្រទេសឥណ្ឌូនេស៊ី ហើយពីរឆ្នាំបន្តបន្ទាប់ គឺឆ្នាំ២០១៣ នៅទីក្រុងហុងកុង និងឆ្នាំ២០១៤ ជាពេលដែលកម្ពុជា ធ្វើជាម្ចាស់ផ្ទះនៃសន្និសីទស្រូវអង្ករអន្តរជាតិ។
នៅឆ្នាំ២០១៧ ខាងមុខនេះ កម្ពុជានឹងធ្វើម្ចាស់ផ្ទះក្នុងការរៀបចំសន្និសីទស្រូវអង្ករអន្តរជាតិនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
