មនុស្ស៥នាក់ស្លាប់ក្នុងគ្រោះទឹកជំនន់ទន្លេមេគង្គប៉ុន្មានថ្ងៃនេះ
2014.08.04
កម្ពស់ទឹកទន្លេមេគង្គកំពុងស្ថិតនៅក្នុងកម្រិតប្រកាសអាសន្ននៅឡើយ ជាពិសេសខេត្តតាមដងទន្លេ ដូចជា ខេត្តកំពង់ចាម និងខេត្តក្រចេះ។ ចំណែកទឹកជំនន់តំបន់ភ្នំ កំពុងគំរាមកំហែងខេត្តព្រះវិហារ ធ្ងន់ធ្ងរជាងគេ។ ប៉ុន្តែមានការព្យាករថា ស្ថានភាពទឹកនឹងស្រកចុះជាបន្តបន្ទាប់ក្នុងរង្វង់២ ទៅ ៣ថ្ងៃខាងមុខនេះទៀត។
តាមការប៉ាន់ប្រមាណបឋមពីក្រសួងធនធានទឹក និងគណៈកម្មាធិការគ្រប់គ្រងគ្រោះមហន្តរាយបង្ហាញថា ក្នុងរយៈពេល ៣ថ្ងៃកន្លងមកនេះ ជំនន់ទឹកភ្លៀង និងទឹកទន្លេបានលិចដីស្រែចម្ការប្រមាណមួយម៉ឺនហិកតារ និងបណ្ដាលឲ្យមនុស្សសត្វមួយចំនួនបាត់បង់ជីវិត។
មន្ត្រីជាន់ខ្ពស់នៃគណៈកម្មាធិការជាតិគ្រប់គ្រងគ្រោះមហន្តរាយបានឲ្យដឹងថា គិតមកត្រឹមថ្ងៃច័ន្ទ ដើមសប្ដាហ៍នេះ គេរកឃើញថា មានមនុស្សប្រមាណ ៥នាក់បានស្លាប់ដោយសារគ្រោះទឹកជំនន់។ អ្នកទាំង ៥នោះ មាននៅខេត្តស្ទឹងត្រែង ម្នាក់ ក្រចេះ ពីរនាក់ ខេត្តកណ្ដាល ម្នាក់ និងខេត្តត្បូងឃ្មុំ ម្នាក់។
ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ លោក ញឹម វណ្ណដា មានប្រសាសន៍នៅថ្ងៃច័ន្ទ ទី៤ សីហាថា អ្នកស្លាប់ទាំងនោះភាគច្រើនជាកសិករ ពេលធ្វើដំណើរឆ្លងកាត់តំបន់មុខទឹក ខ្លះចេញនេសាទជួបព្យុះភ្លៀង។
លោកថានៅឆ្នាំ២០១៤នេះ ដំណាក់កាលទីមួយកម្លាំងទឹកខ្សោយជាងឆ្នាំ២០១៣ កន្លងទៅ និងមានការប្រែប្រួលខុសពីឆ្នាំមុន ទំហំនៃការខូចខាតក៏អាចតិចជាងឆ្នាំទៅដែរ ប្រសិនបើពុំមានអ្វីប្រែប្រួលទៅថ្ងៃមុខទៀតនោះទេ៖ «កាលពីឆ្នាំ២០១៣ ទឹកខែ៩ បានឡើង ហើយឆ្នាំនេះខែនេះបានឡើងជិតស្មើនឹងខែ៩ហើយ អ៊ីចឹងទឹកនេះអាចនឹងកយូរ។ ឆ្នាំទៅកំពង់ចាម ទឹក ១៥.៩៧ម៉ែត្រ ហើយខែ១០ អីចាប់ចុះទៅវិញ ចំណែកឆ្នាំនេះខែ៨ ឡើងពេញព្រែកពេញបឹងបួរហើយ អាចថាខែ៩ ពេលភ្ជុំទឹកនឹងឡើង»។
លោកបន្តថា ពលរដ្ឋរងគ្រោះដែលត្រូវជម្លៀសចេញពីទីទួលសុវត្ថិភាពមានប្រមាណ ៤ពាន់គ្រួសារ ភាគច្រើននៅខេត្តកំពង់ចាម ត្បូងឃ្មុំ ក្រចេះ ស្ទឹងត្រែង។
ចំណែកផលប៉ះពាល់ខូចខាត លោកថា ពុំអាចវាយតម្លៃបានភ្លាមៗទេ ដោយរង់ចាំពេលទឹកស្រកទៅវិញ ប៉ុន្តែចំពោះមុខ លោកសង្កេតឃើញថា ដីស្រែចម្ការនៅខេត្តក្រចេះ មួយកន្លែងប្រមាណមួយពាន់ហិកតារត្រូវខូចខាតទាំងស្រុង និងស្ពានមួយប្រវែង ២ពាន់ម៉ែត្រនៅស្រុកព្រែកប្រសព្វ ត្រូវទឹកហូរកាត់ផ្ដាច់ខូចខាតទាំងស្រុង។ តម្លៃនៃការកសាងស្ពាននេះ មានទឹកប្រាក់ប្រមាណជាងមួយលានដុល្លារ។
ទាក់ទងគ្រោះទឹកជំនន់នេះដែរ នាយកខុទ្ទកាល័យក្រសួងធនធានទឹក និងឧតុនិយម និងជាអ្នកនាំពាក្យលោក ចាន់ យុត្ថា បានឲ្យដឹងថា ថ្វីត្បិតតែកម្ពស់ទឹកជំនន់ទន្លេនៅខេត្តតាមដងទន្លេមានកម្រិតខ្ពស់លើសពីចំណុចត្រូវប្រកាសអាសន្នក៏ពិតមែន ប៉ុន្តែនៅថ្ងៃច័ន្ទ ទី៤ សីហា កម្លាំងទឹកពុំមានសន្ទុះហក់ឡើងខ្លាំងគួរឲ្យព្រួយបារម្ភនោះទេ ដូចជានៅខេត្តស្ទឹងត្រែង ទឹកចាប់ផ្ដើមស្រកជាបណ្ដើរៗហើយ ហើយថ្ងៃទី៧ សីហា ខាងមុខនេះខេត្តនៅខាងក្រោមអាចនឹងស្រកចុះដូចគ្នាដែរ៖ «ដូចខ្ញុំជម្រាបជូនអ៊ីចឹង សុទ្ធតែឡើងផុតពីចំណុចឲ្យមានការប្រុងប្រយ័ត្ន រួចទៅហើយ ដូចស្ទឹងត្រែងអ៊ីចឹងគឺ ១០.៧០ម៉ែត្រ ឥឡូវឡើងដល់ ១១.៤៦ម៉ែត្រ ក្រចេះ ២២ម៉ែត្រ ឥឡូវ ២២.៥០ម៉ែត្រ កំពង់ចាម ១៥.២០ម៉ែត្រ ឥឡូវឡើងដល់ ១៥.៣០ម៉ែត្រជាងទៅហើយ អ៊ីចឹងសុទ្ធតែលើស ប៉ុន្តែផលប៉ះពាល់មិនទាន់មានអីធ្ងន់ធ្ងរទេ»។
ចំណែកទឹកនៅចំណុចទន្លេបាសាក់ ចតុមុខ រាជធានីភ្នំពេញ កម្ពស់ទឹកស្ថិតនៅក្រោមចំណុចត្រូវប្រកាសអាសន្ននៅឡើយ។
លោកបានពន្យល់ឲ្យដឹងអំពីការព្យាករ និងហេតុផលមួយចំនួនដែលនាំឲ្យទឹកអាចស្រកចុះពីចំណុចត្រូវប្រកាសអាសន្ននៅពេលឆាប់ខាងមុខនេះ៖ «មកដល់ពេលនេះគឺឥទ្ធិពលសម្ពាធទាបដែលនៅលើទីក្រុងវៀងចន្ទន៍ នោះ គឺបានថយឥទ្ធិពលហើយ ហើយបើនិយាយពីឥទ្ធិពលក្នុងទន្លេមេគង្គមេ គឺចាប់ផ្តើមស្រក ៣ថ្ងៃហើយ គឺក្នុងប្រទេសថៃ និងប្រទេសឡាវ ហើយគ្រប់ស្ថានីយតម្កល់ទឹកភ្លៀងនៅម្សិលមិញ ផ្ទៀង ២៤ម៉ោង គឺយើងឃើញតែស្ថានីយមួយទេដែលស្ថិតក្នុងកម្រិតជិត ១០០មិល្លីម៉ែត្រ ក្រៅពីនោះគឺអត់មានបញ្ហាអីធ្ងន់ធ្ងរទេ អ៊ីចឹងយើងចាប់ផ្តើមសន្និដ្ឋានបានថា ចាប់ផ្តើមធូរស្រាលមែនទែនហើយ»។
លោកបញ្ជាក់ថារយៈពេលប៉ុន្មានថ្ងៃចុងក្រោយនេះ ទឹកជំនន់ទឹកភ្លៀង និងទន្លេបានគំរាមកំហែងខេត្តប្រមាណ ១៣ខេត្តទូទាំងប្រទេស៖ «ប៉ុន្តែមួយចំនួនចាប់ផ្ដើមស្រកអស់ហើយដូចជានៅខាងកែបអីគ្រាន់តែលិចក្នុងមួយរយៈខ្លី ក្រុងព្រះសីហនុអី ចំណែកខាងត្បូងឃ្មុំ ទឹកភ្លៀងក៏បានធូរស្រាលហើយ ប៉ុន្តែទឹកភ្លៀងនៅខេត្តព្រះវិហារ ទេចាប់ផ្ដើមលិចខ្លាំង ប៉ុន្តែស្ថានភាពដូចខ្ញុំបញ្ជាក់ជូនអ៊ីចឹង គឺចាប់ពីរសៀលនេះទៅចាប់ផ្ដើមធូរស្រាលបណ្ដើរៗហើយបាទ»។
ទោះយ៉ាងណា លោកមិនលម្អិតអំពីផលប៉ះពាល់ការខូចទ្រព្យសម្បត្តិទេ ប៉ុន្តែលោកបញ្ជាក់ថា ផ្ទៃដីដែលត្រូវលិចលង់មានប្រមាណមួយម៉ឺនហិកតារ។
លោក ញឹម វណ្ណដា បានឲ្យដឹងថា នៅថ្ងៃច័ន្ទនេះ លោកបានចុះពិនិត្យស្ថានភាពទឹកជំនន់ផ្ទាល់ និងពិនិត្យស្ថានភាពជម្លៀសពលរដ្ឋទៅកាន់ទីទួលសុវត្ថិភាព ព្រមទាំងបើកកិច្ចប្រជុំមួយជាមួយគណៈកម្មការត្រួតពិនិត្យ ជួយសង្គ្រោះ និងវាយតម្លៃផលប៉ះពាល់គ្រោះទឹកជំនន់ខេត្តតាមដងទន្លេមេគង្គ ដោយបានលើកនូវវិធានការទប់ទឹកជំនន់ដូចជាធ្វើរបាំង និងត្រៀមច្រកបាវ ខ្សាច់ការពារកុំឲ្យទឹកហូរ ចូលទីប្រជុំជន ត្រៀមរៀបចំម៉ាស៊ីនបូមទឹកចេញបណ្តោះអាសន្ន និងឆ្លើយតបពេលមានគ្រោះអាសន្នជាដើម។
គណៈកម្មាធិការជាតិគ្រប់គ្រងគ្រោះមហន្តរាយ បានឲ្យដឹងថា ជំនន់ទឹកភ្លៀង និងទន្លេមេគង្គកាលពីឆ្នាំ២០១៣ បណ្ដាលឲ្យមានមនុស្សស្លាប់ ១៦៨នាក់ និងប៉ះពាល់ដល់ការរស់នៅរបស់ពលរដ្ឋប្រមាណ ១.៨លាននាក់។ ក្នុងនោះមានប្រជាពលរដ្ឋ ៣១.៣១៤គ្រួសារ បានជម្លៀសទៅទីទួលមានសុវត្ថិភាព។
លោក ញឹម វណ្ណដា ឲ្យដឹងថា នៅឆ្នាំ២០១៤នេះ រដ្ឋាភិបាលបានត្រៀមអង្កប្រមាណជាងមួយម៉ឺនតោន ស្រូវពូជ ២ពាន់តោន និងពូជបន្លែមួយចំនួនទៀត ព្រមទាំងត្រៀមមធ្យោបាយផ្សេងៗដើម្បីជួយសង្គ្រោះពលរដ្ឋ ពេលមានគ្រោះទឹកជំនន់ ប៉ុន្តែលោកមិនបញ្ជាក់ឲ្យដឹងពីចំនួនទឹកប្រាក់នោះទេ៕