Global Witness បង្ហាញ​ថា​លោក​ទ្រី ភាព​ជា​មេ​ក្លោង​នាំ​ឈើ​ប្រណីត​កម្ពុជា​​ខុស​ច្បាប់​ទៅ​លក់​នៅ​ចិន

ដោយ តាំង សារ៉ាដា
2015-02-06
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
លោក​ឧកញ៉ា ទ្រី ភាព។
លោក​ឧកញ៉ា ទ្រី ភាព។
Photo/Global Witness

អង្គការ​ឃ្លាំមើល​ពិភពលោក (Global Witness) រក​ឃើញ​ថា ឈ្មួញ​រក​ស៊ី​ឈើ​ខុសច្បាប់​ខ្នាត​ធំ​មា្នក់​ដែល​កាង​ពីក្រោយ​ដោយ ក្រុម​អង្គរក្ស​លោក​នាយករដ្ឋមន្ត្រី ហ៊ុន សែន កំពុង​មមាញឹក​លក់​ឈើ​ប្រណីត របស់​កម្ពុជា​លក់​ទៅ​ឲ្យ​ក្រុមហ៊ុន​ចិន​ដឹក​ចេញ តាម​ច្រក​កំពង់​ផែ​ក្រុងព្រះសីហនុ។ ចំណែក​ក្រុម​មន្ត្រី​រដ្ឋាភិបាល​អះអាង​ថា មិនបាន​ដឹង​អំពី​បញ្ហា​នេះ​ឡើយ។

របាយការណ៍​ស៊ើបអង្កេត​របស់​អង្គការ​ឃ្លាំមើល​ពិភពលោក ឬ​ជា​ភាសា​អង់គ្លេស គ្លបល វីនេស មាន​ឈ្មោះថា «​តម្លៃ​ឈើ​ប្រណីត» ដែល​បាន​តាមដាន ការ​ចរាចរណ៍​ឈើ​របស់​លោក​ឧកញ៉ា ទ្រី ភាព អស់ រយៈពេល​៨​ខែ​នោះ បាន​ចេញ​ផ្សាយ​នៅ​ថ្ងៃ​សុក្រ​នេះ​ថា ចិន​បាន ចំណាយ​លុយ​រាប់​លាន​ដុល្លារ​សហរដ្ឋអាមេរិក ទៅ​ក្នុង​ទីផ្សារ​ងងឹត ដើម្បី​ធ្វើ​ពាណិជ្ជកម្ម​ឈើ​ក្រញូង​ពី​កម្ពុជា។

របាយការណ៍​នេះ​បង្ហាញ​ថា លោក​ឧកញ៉ា ទ្រី ភាព គឺជា​អ្នកដឹកនាំ​នៃ​បណ្ដាញ​កាប់​ព្រៃឈើ​ខុសច្បាប់ ដែល​កាង​ដោយ​ក្រុម​មន្ត្រី​យោធា ប៉ូលិស និង​មន្ត្រី​គយ​ក្នុង​ការ​បោសសំអាត ឈើ​ក្រញូង​របស់​ខ្មែរ ពី​តាម​ខេត្ត​នានា​ហើយ​ដឹកជញ្ជូន​តាម​កប៉ាល់ ទៅកាន់​កំពង់ផែ​ក្រុង​ហុងកុង។

មន្ត្រី​របស់​អង្គការ​ឃ្លាំមើល​ពិភពលោក គ្លបល វីនេស អ្នកស្រី មេហ្គែន ម៉ាក់ស៊ីនែស (Megan MacInnes) មាន​ប្រសាសន៍​ថា អង្គការ​មាន​ភស្តុតាង​គ្រប់គ្រាន់​ដែល​រក​ឃើញ​ថា លោក​ឧកញ៉ា ទ្រី ភាព ដ៏​មាន​ទ្រព្យសម្បត្តិ​ស្ដុកស្ដម្ភ​ម្នាក់​នេះ កំពុង​លក់​ឈើ​ទៅ​ទី​ក្រុង​ហុងកុង ហើយ​បញ្ជូន​បន្ត​ទៅ​ប្រទេស​ចិន៖ «ភស្តុតាង​ដែល​យើង​មាន ហើយ​អ្វី​ដែល​យើង​លាតត្រដាង ក្នុង​របាយការណ៍​នេះ​គឺ​ផ្អែកលើ​ការស្រាវជ្រាវ ​រយៈពេល​៨​ខែ ពី​អំឡុង​ឆ្នាំ​២០១៣ និង ២០១៤ ដែល​បាន​សម្ភាសន៍​មនុស្ស​របស់​លោក ទ្រី ភាព ចំនួន​៦៧ រួមមាន​កម្មករ អ្នក​បើកបរ ហើយ​យើង​ក៏បាន​សម្ភាសន៍ ជាមួយ​មន្ត្រី​រដ្ឋាភិបាល រួមមាន​មន្ត្រី​រដ្ឋបាល​ព្រៃឈើ និង​មន្ត្រី​ក្រសួង​បរិស្ថាន និង​មន្ត្រី​គយ​តាម​ច្រក​ព្រំដែន ដែល​ពួកគេ​បាន​បញ្ជាក់​ដូចៗ​គ្នា​ថា លោក ទ្រី ភាព ជា​មេ​ក្លោង​នៃ​បណ្ដាញ​ជួញដូរ ឈើ​ខុសច្បាប់ ពេញ​ប្រទេស​តែម្ដង»

អ្នកស្រី​បន្ត​ថា គ្លបល វីនេស រក​ឃើញ​ឯកសារ​លក់​ឈើ​របស់​លោក ទ្រី ភាព ចំនួន​ពីរ កាលពី​ខែ​មីនា ឆ្នាំ​២០១៤ ដែល​ដឹក​ឈើ​ប្រណិត​ទៅកាន់​ទីក្រុង​ហុងកុង ចំនួន​ ៥​ពាន់​ម៉ែត្រគូប ក្នុង​តម្លៃជិត ​៦​លាន​ដុល្លារ​សហរដ្ឋអាមេរិក ចេញ​តាម​ច្រក​កំពង់ផែ​ក្រុង​ព្រះសីហនុ។

អ្នកស្រី មេហ្គែន បញ្ជាក់​ថា ក្នុង​១​ខែ ​លោក ទ្រី ភាព លក់​ឈើ​ចំណេញ​ដល់​ទៅ​ជិត ​៦​លាន​ដុល្លារ​សហរដ្ឋអាមេរិក​ទៅ​ហើយ ដូច្នេះ​លោក ទ្រី ភាព ប្រាកដជា​ចំណេញ​កប់​ក្ដោង​រក​កន្លែង​តម្កល់​លុយ​លែង​អស់​ទៅ​ហើយ​ក្នុង​រយៈពេល​ប៉ុន្មាន​ឆ្នាំ​មកនេះ។

គ្លបល វីនេស រក​ឃើញ​ថា លោក​ឧកញ៉ា មហាសេដ្ឋី ទ្រី ភាព ដែល​ធ្លាប់​ជា​ទីប្រឹក្សា​របស់​លោក​នាយករដ្ឋមន្ត្រី ហ៊ុន សែន នោះ កំពុង​កាន់​កាប់​ដី​សម្បទាន​សេដ្ឋកិច្ច ដែល​មាន​ទំហំ​ជិត ​៣​ម៉ឺន​ហិកតារ (២៩.៥៨៩) ស្មើនឹង​មួយ​​ភាគ​បួន​នៃ​ផ្ទៃដី​ដែន​កោះ​ហុងកុង​ ទាំងមូល។

ឃ្លាំង​ឈើ​ទ្រី​ភាព ៦១០
៤-វិច្ឆិកា-២០១៣៖ ឃ្លាំង​ស្តុក​ឈើ​របស់​ក្រុមហ៊ុន ទ្រី ភាព នៅ​ត្មាតពង ឧត្តុង្គ ខេត្ត​កំពង់ស្ពឺ។ CHRTF Report CHRTF Report

លើស​ពី​នេះ​ទៅ​ទៀត លោក ទ្រី ភាព ដែល​ជា​បងធំ​ម៉ាហ្វីយ៉ា​រកស៊ី​ឈើ រូបនេះ​បាន​ទទួល​សិទ្ធិ​ពិសេស​ក្នុង​ការ​កាប់​ឈើ និង​ទទួល​ទិញ​ឈើ​ពី​សមត្ថកិច្ច ដែល​រឹបអូស​បាន​ពី​ក្រុម​ឈ្មួញ​រកស៊ី​ផ្សេងៗ​ទៀត ហើយ​លក់​ចេញទៅ​ក្រៅ​ប្រទេស ដើម្បី​ផលប្រយោជន៍​ផ្ទាល់ខ្លួន។

បើ​ទោះ​បី​ជា​លោកនាយក​រដ្ឋមន្ត្រី ហ៊ុន សែន កាលពី​ឆ្នាំ​២០០២ បាន​ហាម​កាប់​ឈើ​ជា​ទ្រង់ទ្រាយ​ធំ​ក៏ដោយ ក៏​ក្រុមហ៊ុន​របស់​លោក ទ្រី ភាព នៅ​តែ​ដឹក​ជញ្ជូន​ឈើ​ប្រណិត​ចំនួន ៩​រយ ម៉ែត្រ​គុប ចេញ​ទៅ ក្រៅ​ប្រទេស​តាម​ច្រក​កំពង់ផែ​ក្រុងព្រះសីហនុ​ជា​រៀងរាល់ថ្ងៃ។

តាម​ការ​រក​ឃើញ​របស់​ក្លូបលវីនេស ឲ្យ​ដឹង​ថា យ៉ាង​ហោច​ណាស់​ឈើ​ប្រណីត​របស់​ខ្មែរ​ចំនួន​៨៥​ភាគរយ ត្រូវ​បាន​ឈ្មួញ​លក់​ទៅ​ប្រទេស​ចិន ហើយ​ដែល​ធ្វើ​ឲ្យ​ការនាំចេញ​សិប្បកម្ម​តុ​ទូ​តាំង របស់​ចិន​ធ្វើ​ដោយ​ឈើ​ប្រណិត​របស់​ខ្មែរ កើតឡើង​ដល់​ទៅ​១៥០​ភាគរយ ក្នុង​ចន្លោះ​ឆ្នាំ​២០១៣​និង​២០១៤ ។

អង្គការ​ឃ្លាំមើល​ពិភពលោក​មួយ​នេះ រក​ឃើញ​ថា​ឈ្មួញ​កណ្ដាល របស់​លោក ទ្រី ភាព គឺ​លោក​ឧត្ដមសេនីយ៍​ផ្កាយ​ពីរ​ឈ្មោះ ហុំ ហុយ ដែល​ស្ថិត​នៅ​ក្នុង​កងពល ង​៧០ ជា​កង​អង្គរក្ស​របស់​លោក​នាយករដ្ឋមន្ត្រី ហ៊ុន សែន។ លោក ទ្រី ភាព ក៏​មាន​ទំនាក់ ទំនង​ស្អិតល្មួត​ផង​ដែរ ជាមួយ​ក្រុម​មន្ត្រី​នៃ​ក្រសួងបរិស្ថាន និង​មន្ត្រី​រដ្ឋបាល​ព្រៃឈើ។

ប៉ុន្តែ​អ្នកនាំពាក្យ​នៃ​ក្រសួងបរិស្ថាន លោក សៅ សុភាព មាន​ប្រសាសន៍​ថា លោក​មិន​បាន​ឃើញ​ឯកសារ​អំពី​ករណី​រកស៊ី​ឈើ​របស់ លោក ទ្រី ភាព នោះ​ឡើយ៖ «ព័ត៌មាន​ដែល​ខាង​អង្គការ​នោះ​បាន​លើកឡើង​ហ្នឹង គឺ​ខ្ញុំ​មិនបាន​ដឹង​ទេ។ ព័ត៌មាន​ពី​ខាង​ណា ហើយ​ទិន្នន័យ​ទទួល​បាន​ពី​ខាង​ណា គឺ​ខ្ញុំ​មិន​ទទួល​បាន​នោះ​ទេ។ ការងារ​អស់ហ្នឹង​គឺ​យើង​អត់​អាច​ក្ដាប់​បានទេ គឺ​យើង​ក្ដាប់​បានតែ​ការងារ​ខាង​ផ្នែក​បរិស្ថាន​របស់​យើង​តែ​ប៉ុណ្ណឹង។ សំនួរ៖ តើ​ក្រសួងបរិស្ថាន​មាន​ដែល​ដឹង​ដែរ​ទេ​អំពី​ការ​រក​ស៊ី​ឈើ​របស់​លោក​ទ្រី​ភាព​កន្លងមក​នោះ​បាទ? លោក សៅ សុភាព៖ យើង​អត់​បាន​ផ្ដោត​តែ​ទៅលើ​បុគ្គល​ណាមួយ​ទេ គឺ​ក្រសួងបរិស្ថាន​ក៏ដូចជា​ស្ថាប័ន មាន​សមត្ថកិច្ច​ពាក់ព័ន្ធ​នៅ​ក្នុង​ការងារ​គ្រប់គ្រង​ធនធានធម្មជាតិ ក៏ដូចជា​ព្រៃឈើ​ហ្នឹង គឺ​យើង​ធ្វើ​ជា​រួម​ទៅលើ​ការងារ​ដើម្បី​ទប់ស្កាត់ និង​អភិរក្ស​ធនធាន​ធម្មជាតិ​របស់​យើង»

ទោះជា​យ៉ាងណាក៏ដោយ កាលពី​ថ្ងៃ​ច័ន្ទ ទី​២ ខែ​កុម្ភៈ​នេះ អង្គភាព​ប្រឆាំង​អំពើពុករលួយ បាន​ប្រកាស​បើក​ការ​បើក​ស៊ើបអង្កេត ទៅលើ​មន្ត្រី​រដ្ឋបាល​ព្រៃឈើ និង​មន្ត្រី​បរិស្ថាន​ជិត ៥០​នាក់ ដែល​ព័ត៌មាន​នេះ ត្រូវ​បាន​គេ​ទម្លាយ​ឲ្យ​ដឹង​កាល​ពី​ខែ​ចុង​មករា។

មន្ត្រី​ទាំង​ ៥០​នាក់​នោះ សង្ស័យ​ថា​ មាន​ជាប់​ពាក់ព័ន្ធ​នឹង​អំពើ​ពុករលួយ ក្នុង​ករណី​បទល្មើស​ព្រៃឈើ​នេះ។ អង្គភាព​ប្រឆាំង​អំពើ​ពុករលួយ បាន​បញ្ចូល​ឈ្មោះ​សមត្ថកិច្ច​ទាំងនោះ​ក្នុង​បញ្ជី​ខ្មៅ ដើម្បី​ត្រៀម​បើក​ការស៊ើបអង្កេត។

កាប់​ឈើ ទ្រី ភាព ៦១០
៩-វិច្ឆិកា-២០១៣៖ ឃ្លាំ​ស្តុក​ឈើ​របស់​ក្រុមហ៊ុន ទ្រី ភាព នៅ​តាវែង ខេត្ត​រតនគិរី។ CHRTF Report CHRTF Report

ផ្ទុយទៅវិញ​ប្រធាន​អង្គការ​កិច្ចការ​ពិសេស​សិទ្ធិមនុស្ស​កម្ពុជា លោក អ៊ូច ឡេង កាលពី​ថ្ងៃ​ច័ន្ទ អះអាង​ថា បើ​ទោះ​ជា​អ្នក​ទាំងនោះ រក​ឃើញ​ថា បាន​ប្រព្រឹត្ត​បទល្មើស​ក៏ដោយ ក៏​ពួកគេ​អាច​រស់​នៅ​ក្រៅ​សំណាញ់​ច្បាប់​យ៉ាង​សប្បាយ​ដែរ ដោយសារ​ពួកគេ​មិន​ត្រឹមតែ​រក​ចំណូល​សម្រាប់​ខ្លួន​ប៉ុណ្ណោះ​ទេ ប៉ុន្តែ​ជា​អ្នករក​ចំណូល​ដ៏​ពូកែ សម្រាប់​ចិញ្ចឹម​បក្ស​កាន់អំណាច​ថែមទៀត។

ចំណែក​អង្គភាព​ប្រឆាំង​អំពើពុករលួយ​នៅ​មិន​បាន​ផ្ដួចផ្ដើម បើក​ការ​ស៊ើបអង្កេត ករណី​លោក ទ្រី ភាព នោះ​នៅឡើយ​ទេ បើ​ទោះ​បី បណ្ដាញ​សារព័ត៌មាន​ជាតិ និង​អន្តរជាតិ ព្រមទាំង​អង្គការ​ឃ្លាំមើល បទល្មើស ព្រៃឈើ​នានា​បាន​រក​ឃើញ​ថា ឧកញ៉ា​បងធំ​រកស៊ី​ប្រណិត រូប​នេះ​ដែល​កំពុង​កាង​ដោយ​មន្ត្រី​មានអំណាច​កំពូលៗ កំពុង​បោស​សំអាត​ឈើ​ដ៏​មានតម្លៃ​របស់​ប្រទេសជាតិ។

រហូត​មក​ទល់​ពេលនេះ វិទ្យុ​អាស៊ីសេរី​នៅ​មិនទាន់​អាច​សុំ​ការ​បំភ្លឺ​ពី​លោក ទ្រី ភាព បាន​នៅ​ឡើយ​ទេ។

ទោះជា​យ៉ាងណាក៏ដោយ អង្គការ​ឃ្លាំមើល​ពិភពលោក​បាន​ជំរុញ​ឲ្យ​រដ្ឋាភិបាល​កម្ពុជា​ ត្រូវ​ចាត់​វិធានការ​ជា​បន្ទាន់ ដើម្បី​បំបាត់​បទល្មើស​ព្រៃឈើ ហើយ​ការពារ​ព្រៃឈើ​ដែល​នៅ​សេសសល់​បន្តិច​បន្តួច​ដែល​សហគមន៍​រស់នៅ​អាស្រ័យ​ផល​នោះ។

ទន្ទឹម​គ្នា​នេះ រដ្ឋាភិបាល​ត្រូវ​បើក​ការស៊ើបអង្កេត​ជាបន្ទាន់​ទៅ​លើ​លោក​ឧកញ៉ា ទ្រី ភាព និង​អ្នក​ពាក់ព័ន្ធ​ដើម្បី​នាំ​ខ្លួន​ជន​ដៃដល់​ទាំងនេះ​មក​ផ្ដន្ទាទោស​តាមច្បាប់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (30)
  • បោះពុម្ព
  • ចែករំលែក
  • អ៊ីម៉ែល

ជាតិខ្ញុំអើយ!

ពី តាកែវ

ខ្ញុំស្រលាញ់ខ្មែរដែលជាជាតិខ្ញុំត្រង់ចិត្តធ្ងន់។ដឹងហើយ លឺហើយថាវាកំពុងមានអី កើតអី សព្វថ្ងៃនឹងថ្ងៃមុខ តែសុខចិត្តខាំមាំស៊ូទ្រាំ ធ្វើមិនដឹងមិនលឺ ទ្រាំលុះដល់ថ្ងៃចុងក្រោយនៃជីវិត។

Dec 17, 2015 05:54 AM

អ្នក​អាន​អនាមិក

Try Pheap group just chop the trees but he is not a officer or leader of the Cambodian government, why he has a authorized to chop and destroy all the Cambodian trees, who is behind him you should reveal it.

Oct 01, 2015 12:34 AM

អ្នក​អាន​អនាមិក

You can't forget your jail after Hun sen dead even though you won't be in Cambodia in the future because of the the democratic law。

Sep 13, 2015 09:52 AM

អ្នក​អាន​អនាមិក

Thank you very very much Global witness !hopping HUN SEn Government will bring this Try Pheap to court and let get big money or job of young khmer generation.

Jul 06, 2015 01:43 AM

អ្នក​អាន​អនាមិក

I almost die when I joined a trip to Ratanaki in Voeunsai district last year to see all the empty lands villagers there told us that Try Pheap company cut down all the tree and transport to VN.

Jun 29, 2015 10:49 PM

មើល​មតិ​ទាំង​អស់.

គេហទំព័រ​ទាំងមូល