អ្នកភូមិកោះគរស្រុកស្អាងបារម្ភពីសុវត្ថិភាពពេលមានដីកាតុលាការកោះហៅ
2017.08.13
អ្នកភូមិកោះគរ (ពីឆ្វេង) លោកស្រី មុត ប៉ុម លោក ហែម ហឿន និងលោកស្រី លី លាប ដែលត្រូវតុលាការខេត្តកណ្ដាល កោះហៅឲ្យចូលខ្លួនដើម្បីសាកសួររឿងញុះញង់ឲ្យមានហិង្សា ផ្ដល់បទសម្ភាសន៍នៅថ្ងៃទី១៣ ខែសីហា ឆ្នាំ២០១៧។
RFA/Leng Maly
អ្នកភូមិកោះគរ ៣នាក់ បារម្ភពីសុវត្ថិភាពពេលតុលាការកោះហៅទាក់ទងនឹងការតវ៉ាអំពីការបូមខ្សាច់នៅទីនោះ។ ពួកគាត់ខកចិត្តពេលដែលមិនបានជួបមន្ត្រីក្រសួងរ៉ែ និងថាមពល ក្រោយពេលរង់ចាំជាងកន្លះថ្ងៃនៅថ្ងៃទី១៣ សីហា។
អ្នកភូមិថ្លែងថា ពួកគាត់ប្រមូលផ្ដុំគ្នានៅថ្ងៃទី១៣ សីហា ព្រោះចង់ជួបមន្ត្រីក្រសួងរ៉ែ និងថាមពល ដើម្បីចង់ដឹងអំពីក្រុមហ៊ុនដែលកំពុងបូមខ្សាច់នៅទីតាំងភូមិកោះគរ ស្រុកស្អាង ខេត្តកណ្ដាល នោះ ប្ដឹងពួកគាត់ ៣នាក់។
អ្នកភូមិកោះគរ ឃុំរកាខ្ពស់ ម្នាក់ក្នុងចំណោម ៣នាក់ គឺលោក ហែម ហឿន ថ្លែងថា ការចង់ជួបមន្ត្រីក្រសួងរ៉ែ និងថាមពល ព្រោះកន្លងទៅ ពួកលោកធ្លាប់មកដោះស្រាយបញ្ហាតវ៉ារឿងបូមខ្សាច់ជាមួយក្រុមហ៊ុន ឡេង ជីន (Leng Chin Group Co., Ltd.) នៅទីនោះ។ លោកព្រួយបារម្ភពីដីកាកោះហៅរបស់តុលាការដែលមានអ្នកផ្សេងប្ដឹងលោកពីរឿងញុះញង់ឲ្យមានហិង្សា និងធ្វើឲ្យខូចខាតដោយចេតនាដល់ការវិនិយោគ។ លោកហៅការប្ដឹងនេះជាការគំរាមកំហែង៖ «យើងខ្ញុំអត់ដែលស្គាល់ឈ្មោះ វណ្ណ គឹមផា ផង។ កន្លងមកដែលខ្ញុំធ្វើនេះ គឺធ្វើរវាងក្រសួងរ៉ែ និងថាមពល ហើយនិងក្រុមហ៊ុន ឡេង ជីន អត់ដែលពាក់ព័ន្ធជាមួយគាត់ទេ ហើយគាត់ដាក់បណ្ដឹងនេះ ធ្វើឲ្យក្រុមគ្រួសារខ្ញុំភិតភ័យខ្លាច ដូចជារូបខ្ញុំ ខ្ញុំសង្ស័យថា គឺជាការគំរាមកំហែងមកលើរូបខ្ញុំដែលជាប្រជាពលរដ្ឋដែលប៉ះពាល់ដោយសារការបាក់ច្រាំង។ កន្លងមក ដំណោះស្រាយរបស់ខ្ញុំ គឺមានឯកឧត្ដម ឌិត ទីណា ឯកឧត្ដម ហេង ចាន់ធួន គាត់មកដោះស្រាយជាមួយខ្ញុំ ដូចអត់មានហិង្សាអីកើតឡើងទៅលើក្រុមហ៊ុនបូមខ្សាច់ទាំងនេះទេ»។
អ្នកភូមិម្នាក់ទៀត លោកស្រី លី លាប ដែលមានឈ្មោះក្នុងដីកាដែរ បដិសេធចំពោះការចោទពួកលោកស្រីជាអ្នកប្រមូលផ្ដុំអ្នកភូមិ ញុះញង់ឲ្យមានហិង្សាពេលតវ៉ាការបូមខ្សាច់។ លោកស្រីថា អ្នកភូមិមកដោយខ្លួនឯង ព្រោះជាអ្នករស់នៅមាត់ទន្លេដូចគ្នា៖ «ចូលរួមជាមួយគ្នា នេះដោយសារការស្ម័គ្រចិត្ត ទឹកចិត្តអ្នកមាត់ទន្លេដូចគ្នា ភ័យបារម្ភពីការបាក់ដីទាំងអស់គ្នា មិនមែនជាការញុះញង់ទេ។ ពួកគាត់មើលមកថាមានការញុះញង់អី តែតាមការពិតគ្មានទេ»។
ចំពោះអ្នកភូមិឈ្មោះ មុត ប៉ុម សន្និដ្ឋានថា លោកស្រីអាចត្រូវគេប្ដឹង ព្រោះរឿងតវ៉ាទឹកចេញពីខ្សាច់ស្តុកទុកលិចអំពៅ និងដំឡូងរបស់លោកស្រី៖ «បូមទឹកនៅតែលិច រួចខ្ញុំថាដោះស្រាយរឿងដំណាំខ្ញុំសិនចាំបូម។ កាលណានៅតែបូម គឺទឹកហ្នឹងនៅតែលិច។ ប្រហែលជាគាត់ដាក់ពាក្យបណ្ដឹងប្រហែលបញ្ហារឿងហ្នឹងហើយ ព្រោះអីផលប៉ះពាល់ដំណាំរបស់ខ្ញុំអាស្រ័យតែមួយឆ្នាំម្ដងទេ។ ដល់ពេលលិចទៅ ឲ្យចុះមកដោះស្រាយ មិនដឹងថា វណ្ណ គឹមផា ហ្នឹងមុខរបៀបម៉េចទេ ស្រាប់ចេញដីកាពីតុលាការមកវិញ ដាក់បទព្រហ្មទណ្ឌទៀតថា ខ្ញុំនេះញុះញង់ហិង្សា ទៅឃាត់មុខរបរវិនិយោគរបស់គាត់អត់បានបូមខាតថវិកា»។
ទាក់ទងនឹងការខកខានមិនបានជួបគ្នារវាងមន្ត្រីក្រសួងរ៉ែ និងថាមពល និងអ្នកភូមិ នៅថ្ងៃទី១៣ សីហា នេះ ត្រូវបានតំណាងក្រសួងដែលប្រចាំការនៅភូមិកោះគរ ឈ្មោះ សុធារិន ប្រាប់ពលរដ្ឋថា លោកទាក់ទងទៅថ្នាក់ដឹកនាំក្រសួងដែរ ប៉ុន្តែលោកមិនទទួលបានការឆ្លើយតប៖ «រាយការណ៍ប្រាប់មេហើយ តែមេអត់ទាន់ឆ្លើយតបមកវិញ ឯកឧត្ដមខាងក្រសួងរ៉ែ»។
អ្នកភូមិកោះគរ ឃុំរកាខ្ពស់ ស្រុកស្អាង ខេត្តកណ្ដាល បានតវ៉ាជំទាស់ការបូមខ្សាច់របស់ក្រុមហ៊ុន ឡេង ជីន នៅទីនោះជាច្រើនខែមកហើយ ព្រោះបារម្ភអំពីការបាក់ច្រាំង និងផ្ទះចូលទន្លេ។ កាលពីពាក់កណ្ដាលខែមិថុនា រដ្ឋលេខាធិការក្រសួងរ៉ែ និងថាមពល លោក ឌិត ទីណា និងលោក ហេង ចាន់ធួន អនុរដ្ឋលេខាធិការក្រសួងរ៉ែ និងថាមពល ចុះដោះស្រាយបញ្ហាដោយធ្វើកិច្ចសន្យាជាមួយអ្នកភូមិថា មិនអនុញ្ញាតឲ្យក្រុមហ៊ុនបូមជិតច្រាំងពេក និងបូមមានទីតាំង និងពេលកំណត់។ ប៉ុន្តែរហូតមកដល់ថ្ងៃទី១៣ សីហា អ្នកភូមិថា ក្រុមហ៊ុន ឡេង ជីន មិនបានអនុវត្តតាមការសន្យាទេ។
តំណាងក្រសួង លោក សុធារិន ថ្លែងថា លោកបានប្រាប់ឲ្យក្រុមហ៊ុនបូមឲ្យបានឆ្ងាយពីច្រាំងដែរ ប៉ុន្តែលោកមិនដឹងធ្វើយ៉ាងម៉េចទេ ពេលដែលក្រុមហ៊ុនមិនធ្វើតាម ហើយថ្នាក់ដឹកនាំក្រសួងមិនទាន់ឆ្លើយតប។
ក្នុងដីការបស់សាលាដំបូងខេត្តកណ្ដាល បង្ហាញថា អ្នកភូមិឈ្មោះ ហែម ហឿន មុត ប៉ុម និង លី លាប តម្រូវឲ្យចូលខ្លួននៅព្រឹកថ្ងៃទី២៤ សីហា ដើម្បីតុលាការសាកសួរអំពីដំណើររឿងញុះញង់ឲ្យមានហិង្សា និងធ្វើឲ្យខូចខាតដោយចេតនាដល់ការវិនិយោគ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
