មន្ត្រីរដ្ឋបាលព្រៃឈើខេត្តកំពង់ធំបង្ក្រាបអាជីវកម្មឡធ្យូងជិត១០០កន្លែង
2016.05.05
មន្ត្រីជំនាញព្រៃឈើខេត្តកំពង់ធំ បានដឹកនាំកម្លាំងបង្ក្រាបទីតាំងឡធ្យូងខុសច្បាប់របស់ប្រជាពលរដ្ឋនៅស្រុកសន្ទុក ស្រុកបារាយណ៍ និងស្រុកសណ្ដាន់។ អាជ្ញាធរអះអាងថា ការបង្ក្រាបនេះ ដើម្បីធានា និងការពារព្រៃឈើនៅតំបន់ព្រៃអភិរក្សក្នុងតំបន់នោះ។ ចំណែកមន្ត្រីសម្របសម្រួលសហគមន៍តំបន់ព្រៃឡង់ យល់ថា វិធានការប៉ុណ្ណឹង មិនអាចទប់ស្កាត់បទល្មើសកាប់បំផ្លាញព្រៃឈើបានឡើយ។
មន្ត្រីរដ្ឋបាលព្រៃឈើ លើកឡើងថា សកម្មភាពបង្ក្រាបទីតាំងឡធ្យូងខុសច្បាប់ ពុំមែនជាវិធានការដើម្បីធ្វើបាបប្រជាពលរដ្ឋឡើយ ប៉ុន្តែជាការថែរក្សាតំបន់គម្របព្រៃឈើឲ្យនៅគង់វង្ស។ បន្ថែមពីនេះទៀត ដើម្បីរួមចំណែកទប់ស្កាត់បម្រែបម្រួលអាកាសធាតុដែលកំពុងជួបប្រទះនាពេលបច្ចុប្បន្ន។
នាយផ្នែករដ្ឋបាលព្រៃឈើសណ្ដាន់ លោក សៅ វណ្ណី មានប្រសាសន៍នៅថ្ងៃទី៥ ឧសភា ថា ឡធ្យូងខុសច្បាប់ទាំងនោះជារបស់ពលរដ្ឋនៅស្រុកសន្ទុក ស្រុកបារាយណ៍ និងនៅស្រុកសណ្ដាន់។ លោកបញ្ជាក់ថា មូលហេតុនាំឲ្យមន្ត្រីជំនាញបង្ក្រាបសិប្បកម្មប្រមាណ ១០០កន្លែង ពីព្រោះពួកគាត់ទាំងនោះនាំគ្នាចូលទៅកាប់ឈើនៅតំបន់អភិរក្ស ឬហៅថាតំបន់រ៉េតបូក (REDD+) ដែលជាតំបន់កាត់បន្ថយពីការបញ្ចេញឧស្ម័នពុលដោយសារការកាប់បំផ្លាញព្រៃឈើ៖ «ព្រោះដែនហ្នឹងជាដែនរបស់ព្រៃ មិនមែនដែនរបស់ប្រជាពលរដ្ឋទេ។ ការរស់នៅទាល់តែមានការសម្រេចពីរាជរដ្ឋាភិបាល បានរស់នៅបាន។ ការកាប់ហ្នឹង កាប់ឈើតូចៗមកដុតធ្វើឡ ហើយសល់ដីវាស់លក់ចែកគ្នា»។
ការបង្ក្រាបទីតាំងសិប្បកម្មឡធ្យូងរបស់ពលរដ្ឋទាំងបីស្រុកនេះ ដឹកនាំកម្លាំងដោយនាយខណ្ឌរដ្ឋបាលព្រៃឈើខេត្តកំពង់ធំ លោក តឹប ញាតា កាលពីថ្ងៃទី៤ ឧសភា។
ទាក់ទងបញ្ហានេះ នាយខណ្ឌរដ្ឋបាលព្រៃឈើខេត្តកំពង់ធំ លោក តឹប ញាតា មានប្រសាសន៍ថា មន្ត្រីជំនាញកំពុងស្រាវជ្រាវរកអ្នកពាក់ព័ន្ធដែលជាម្ចាស់សិប្បកម្មឡធ្យូងទាំងនោះ ពីព្រោះជាសិប្បកម្មខុសច្បាប់។ លោកបន្តថា ទីតាំងសិប្បកម្មឡធ្យូងទាំងនោះ មានជាច្រើនកន្លែងផ្សេងគ្នា ប៉ុន្តែស្ថិតនៅក្នុងឃុំទំរីង ស្រុកសណ្ដាន់។ ចំណែកកូនឈើ គឺពលរដ្ឋកាប់យកចេញពីដែនអភិរក្សស្ថិតនៅក្នុងឃុំទំរីង និងផ្នែកខ្លះនៅក្នុងឃុំក្រយា ស្រុកសន្ទុក ហើយកូនឈើដែលពួកគាត់កាប់យកមកដុតធ្វើធ្យូង គឺជាប្រភេទឈើមិនទាន់គ្រប់អាយុឡើយ៖ «អាហ្នឹងយើងចាត់ការស្រាវជ្រាវ ប៉ុន្តែអ្វីដែលយើងមើលឃើញផ្ទះធំពីរហ្នឹង ជាអ្នកធំក្នុងរឿងហ្នឹង»។
លោកបញ្ជាក់ថា ក្រុមមន្ត្រីជំនាញនឹងធ្វើស្នាក់ការនៅកន្លែងសិប្បកម្មតែម្តង ដើម្បីការពារមិនឲ្យមានសកម្មភាពកាប់ឈើបន្តទៀត។ លើសពីនេះ មន្ត្រីជំនាញនឹងបង្កើតថ្នាលបណ្ដុះកូនឈើសម្រាប់ដាំឡើងវិញ ក្នុងតំបន់ដែលរងការកាប់បំផ្លាញកន្លងមក។
មន្ត្រីសម្របសម្រួលសហគមន៍ព្រៃឡង់បួនខេត្ត លោក សេង សុខហេង អបអរសាទរចំពោះចំណាត់ការរបស់អាជ្ញាធរនៅពេលនេះ ប៉ុន្តែលោកស្នើឲ្យមន្ត្រីរដ្ឋបាលព្រៃឈើ ព្រមទាំងរាជរដ្ឋាភិបាល ចាត់វិធានការឲ្យបានទូលំទូលាយ និងស្មើភាពគ្នា ទើបធានាថាបទល្មើសព្រៃឈើនឹងត្រូវថយចុះ៖ «បង្ក្រាបទាំងអស់ទៅ ពិសេសអ្នករកស៊ីធំៗដឹករាប់រយកុងតឺន័រអី។ អាហ្នឹងឯងដែលជាហេតុផលនៃវិនាសកម្មព្រៃឈើខ្លាំង»។
លោកបន្តថា ដើម្បីឲ្យបទល្មើសព្រៃឈើថយចុះ ក្នុងពេលបច្ចុប្បន្ន រាជរដ្ឋាភិបាលត្រូវបិទអាជីវកម្មឈើគ្រប់ប្រភេទ ហើយបញ្ឈប់ការផ្តល់ដីសម្បទាន ព្រមទាំងលុបចោលតំបន់ដីសម្បទានព្រៃឈើកាលពីមុនទាំងអស់។ ទន្ទឹមគ្នានេះ ដើម្បីជាគំរូល្អ និងជាការព្រមានដល់ពលរដ្ឋតូចតាច អាជ្ញាធរត្រូវចាប់ក្រុមមន្ត្រី ឧកញ៉ា សែស្រឡាយរាជរដ្ឋាភិបាល ដែលបានរកស៊ីឈើ និងពាក់ព័ន្ធករណីរកស៊ីឈើខុសច្បាប់ ដាក់ទោសទណ្ឌ ជាដើម៕