សេចក្តីជូនដំណឹងរបស់ក្រសួងធនធានទឹក និងឧតុនិយម ចេញផ្សាយនៅថ្ងៃទី២៦ ខែកញ្ញា ឲ្យដឹងថា កម្ពុជា នឹងទទួលប្រព័ន្ធសម្ពាធទាបថ្មីមួយ ដែលបង្កឲ្យមានភ្លៀងធ្លាក់ច្រើនចាប់ពីថ្ងៃទី២៨ ខែកញ្ញា រហូតដល់ថ្ងៃទី១ ខែតុលា នៅតាមបណ្ដាខេត្តមួយចំនួន រួមមានខេត្តកំពង់ចាម ក្រចេះ ស្ទឹងត្រែង រតនគិរី មណ្ឌលគិរី ព្រះវិហារ ឧត្តរមានជ័យ បន្ទាយមានជ័យ សៀមរាប កំពង់ធំ ព្រះសីហនុ និងខេត្តកោះកុង។
គិតត្រឹមថ្ងៃទី២៦ ខែកញ្ញា កម្ពស់ទឹកនៅស្ថានីយជលសាស្ត្រអ្នកលឿង (ទន្លេមេគង្គក្រោម) និងស្ថានីយជលសាស្ត្រកោះខែល (ទន្លេបាសាក់) បានហក់ឡើងដល់កម្រិតប្រកាសឲ្យមានការប្រុងប្រយ័ត្ន។
រដ្ឋមន្ត្រីក្រសួងធនធានទឹក និងឧតុនិយម លោក លឹម គានហោ អំពាវនាវពលរដ្ឋឲ្យមានការប្រុងប្រយ័ត្នខ្ពស់ ដើម្បីចៀសវាងឲ្យបាននូវគ្រោះថ្នាក់ផ្សេងៗដែលអាចកើតមានឡើងជាយថាហេតុ ពិសេសបានស្នើសុំឲ្យប្រជានេសាទទាំងអស់ ត្រូវផ្អាកសកម្មភាពនេសាទតាមសមុទ្រ ចាប់ពីថ្ងៃទី២៩ ខែកញ្ញា ដល់ថ្ងៃទី២ ខែតុលា ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។