អ្នកភូមិរងផលប៉ះពាល់ពីគម្រោងអាជីវកម្មរ៉ែមាសស្នើឲ្យក្រុមហ៊ុនធានាពីការដោះស្រាយ
2015.09.30
វេទិកាពិភាក្សាជាសាធារណៈរបស់សហគមន៍ភូមិពាក់ ឃុំយ៉ាទុង ស្រុកអូរយ៉ាដាវ ខេត្តរតនគិរី ដំណាក់កាលទី២ ស្ដីពីគម្រោងធ្វើអាជីវកម្មរ៉ែមាសរបស់ក្រុមហ៊ុន មេសស្កូ ហ្គូល (MESCO Gold) បង្ហាញថា អ្នកភូមិតិចតួចនៅបារម្ភពីផលប៉ះពាល់ដល់ប្រជាពលរដ្ឋ។
ការបាក់ស្រុតដី ការធ្វើអាជីវកម្មរ៉ែលើសដែនកំណត់ និងផលប៉ះពាល់ផលដំណាំប្រជាពលរដ្ឋ គឺជាក្តីបារម្ភរបស់អ្នកភូមិ ដែលសំដែងឡើងក្នុងកិច្ចពិភាក្សាជំហានទី២ ក្នុងការសិក្សាវាយតម្លៃហេតុប៉ះពាល់ផ្នែកបរិស្ថាន នៅថ្ងៃទី៣០ ខែកញ្ញា នាសាលាប្រជុំភូមិពាក់ ទាក់ទិនគម្រោងធ្វើអាជីវកម្មរ៉ែមាសរបស់ក្រុមហ៊ុន មេសស្កូ ហ្គូល។
អ្នកភូមិ ចង់ឲ្យភាគីក្រុមហ៊ុនធានាបន្ថែមទៀតថា ការបារម្ភទាំងនោះត្រូវបានដោះស្រាយប្រកបដោយតម្លាភាព មុននឹងក្រុមហ៊ុនចាប់ផ្ដើមបង្កើតឧស្សាហកម្មមាសនៅក្នុងតំបន់ពួកគាត់រស់នៅ៖ «ពីមុនគេថាទៅខួងប្រាប់ម្ចាស់ចម្ការ ប៉ុន្តែឥឡូវទៅខួងអត់ប្រាប់ម្ចាស់ចម្ការទេ ប៉ះពាល់ដើមចន្ទីពួកគាត់។ ម្ចាស់ចម្ការដើមចន្ទីជាប្អូនរបស់គាត់»។
ក្រសួងរ៉ែ និងថាមពល គ្រោងនឹងផ្តល់អាជ្ញាប័ណ្ណទៅឲ្យក្រុមហ៊ុនឈ្មោះ មេស ហ្គោល (Meas Goal) របស់ប្រទេសឥណ្ឌា មានគម្រោងធ្វើអាជីវកម្មរ៉ែមាសនៅភូមិពាក់ ស្រុកអូរយ៉ាដាវ លើផ្ទៃដីខាងលើ ៥០ហិកតារ ជម្រៅចុះទៅក្រោមដី ៣០ម៉ែត្រ និងទំហំវិនិយោគក្រោមដី ១២គីឡូម៉ែត្រការ៉េ បន្ទាប់ពីក្រុមហ៊ុន អង្គរ ហ្គោល (Angkor Goal) របស់ប្រទេសអូស្ត្រាលី បានសិក្សាស្រាវជ្រាវរយៈពេល ១០ឆ្នាំរកឃើញថា តំបន់នោះមានសក្ដានុពលរ៉ែមាស ក៏ប៉ុន្តែក្រសួងសាមីនេះ ទុកលទ្ធភាពឲ្យក្រុមហ៊ុននេះសិក្សាហេតុប៉ះពាល់ផ្នែកបរិស្ថានពេញលេញ និងការផ្តល់យោបល់សម្រេចពីក្រសួងបរិស្ថាន។
ទាក់ទិនបញ្ហានេះ ប្រធានសមាគមខ្មែរលើ លោកស្រី ដាំ ចន្ធី ដែលបានចូលរួមសង្កេតការណ៍កិច្ចប្រជុំពិភាក្សារបស់សហគមន៍លើកទីពីរ កត់សម្គាល់ថា ក្រុមហ៊ុនបានធ្វើឲ្យសហគមន៍កាន់តែមានជំនឿចិត្តច្រើនឡើង ទាក់ទិនគម្រោងវិនិយោគមួយនេះ ក៏ប៉ុន្តែលោកស្រីសំណូមពរឲ្យក្រុមហ៊ុនអនុវត្តការសន្យារបស់ក្រុមហ៊ុន ដែលបានលើកឡើងក្នុងកិច្ចពិភាក្សាជាមួយសហគមន៍ឲ្យបានពិតប្រាកដ ជាពិសេសគម្រោងការអភិវឌ្ឍន៍នៅមូលដ្ឋានសហគមន៍នៅពេលបច្ចុប្បន្ន និងថ្ងៃអនាគត៖ «ក្រុមហ៊ុនគាត់ធ្វើបានល្អដែរ ព្រោះគាត់បានសួរយោបល់អ្នកភូមិពិតប្រាកដ។ អ្នកភូមិមានបញ្ហាអ្វី គាត់លើកមកពិភាក្សាជាមួយក្រុមហ៊ុន។ ខ្ញុំសង្ឃឹមថា ក្រុមហ៊ុននឹងធ្វើតាមការសន្យាជាមួយសហគមន៍»។
ចំណែកមន្ត្រីមូលដ្ឋានឃុំយ៉ាទុង លោក រចំ ជើង ចាត់ទុកការប្រជុំពិភាក្សាលើកទីពីរនេះ បង្ហាញថា អ្នកភូមិមានការយល់ដឹងច្រើនទាក់ទងគម្រោងអភិវឌ្ឍន៍ និងដំណោះស្រាយផលប៉ះពាល់ប្រជាពលរដ្ឋ។ ហេតុនេះ អ្នកភូមិ ៨០ភាគរយអស់កង្វល់ពីផលប៉ះពាល់ទៀតហើយ៖ «ការយល់ដឹងរបស់អ្នកភូមិប្រហែល ៨០ភាគរយ។ ដើមឡើយ ទុក្ខកង្វល់របស់អ្នកភូមិភ័យព្រួយការរុករករ៉ែ ខ្លាចប៉ះពាល់បាក់ស្រុតដី ខ្លាចមានចោរ។ ទាំងពីរយ៉ាងនេះ ក្រុមហ៊ុនបានបកស្រាយឲ្យអ្នកភូមិយល់»។
យ៉ាងណាក៏ដោយ តំណាងក្រុមហ៊ុន អង្គរ ហ្គោល ប្រចាំកម្ពុជា លោក ម៉ាយ ហ៊ីបប៊ី (Mike Hegbee) អះអាងថា លោកបានប្រាប់ទៅតំណាងក្រុមហ៊ុន មេសស្កូ ហ្គូល ហើយ ត្រូវតែផ្តល់សំណងផលប៉ះពាល់នៅសេសសល់ចំពោះប្រជាពលរដ្ឋដែលមិនទាន់ទទួលបានការដោះស្រាយ៖ «នេះជាឱកាសរបស់ប្រជាពលរដ្ឋខ្មែរ ហើយគាត់មានជីវភាពកាន់តែប្រសើរឡើង។ បញ្ហាផលប៉ះពាល់ស្វាយចន្ទីរបស់ពលរដ្ឋតិចតួច។ គាត់នឹងដោះស្រាយ ហើយគាត់សង្ឃឹមថា មិនមានបញ្ហាទៀតទេ»។
ក្រុមហ៊ុន មេសស្កូ ហ្គូល បានជួលក្រុមហ៊ុនប្រឹក្សាយោបល់ ស៊ី.អ៊ី.អេស (CES) សហការជាមួយក្រសួងបរិស្ថាន សម្រាប់វាយតម្លៃពីហេតុប៉ះពាល់ផ្នែកបរិស្ថាន ទាក់ទិនគម្រោងធ្វើអាជីវកម្មរ៉ែមាសនៅឃុំយ៉ាទុង។
ប្រធានបច្ចេកទេសផ្នែកបរិស្ថាន លោក សុខ សុធា មានប្រសាសន៍បញ្ជាក់ថា បន្ទាប់ពីកិច្ចពិគ្រោះយោបល់ធ្វើរួចរាល់ ក្រុមហ៊ុននឹងរៀបចំមតិយោបល់ទាំងអស់ដាក់ក្នុងរបាយការណ៍វាយតម្លៃហេតុប៉ះពាល់បរិស្ថានពេញលេញ និងប្រឹក្សាយោបល់សុំការសម្រេចពីក្រសួងបរិស្ថាន ដើម្បីក្រសួងរ៉ែ និងថាមពល សម្រេចផ្តល់អាជ្ញាប័ណ្ណធ្វើអាជីវកម្មដល់ក្រុមហ៊ុន មេសស្កូ ហ្គូល។ តាមការគ្រោងទុក ក្រុមហ៊ុននឹងចាប់ផ្ដើមបង្កើតឧស្សាហកម្មមាសចាប់ពីឆ្នាំ២០១៦ រហូតដល់ឆ្នាំ២០៤៥៕